Act 3 | KswSKMB | STEP | အန့ၣ်တစု,စီၤပ့းတရူးဒီးစီၤယိၤဟၣ်လဲၤထီၣ်ဆူတၢ်လုၢ်အဟံၣ်ပူၤ,ဖဲတၢ်ဘါထုကဖၣ်အကတီၢ်,လၢခွံနၣ်ရံၣ်လီၤ.

‏ Acts 3

1 အန့ၣ်တစု,စီၤပ့းတရူးဒီးစီၤယိၤဟၣ်လဲၤထီၣ်ဆူတၢ်လုၢ်အဟံၣ်ပူၤ,ဖဲတၢ်ဘါထုကဖၣ်အကတီၢ်,လၢခွံနၣ်ရံၣ်လီၤ. 2 ဒီးပှၤလၢအခီၣ်ဟးဂီၤလၢအမိၢ်အဟၢဖၢပူၤလံၤလံၤတဂၤန့ၣ်,ဒ်သိးအကဃ့တၢ်ဟ့ၣ်သးကညီၤလၢပှၤဟဲနုာ်ဆူတၢ်လုၢ်အဟံၣ်ပူၤဒီး,ပှၤဟဲစိာ်ပာ်လီၤအီၤလၢပဲတရီကိးဝဲလၢအဃံအလၤအခီၣ်ထံး,ကိးမုၢ်နံၤဒဲးလီၤ. 3 အဝဲဒၣ်ထံၣ်စီၤပ့းတရူးဒီးစီၤယိၤဟၣ်ဖဲအကလဲၤနုာ်တ့ၢ်ဆူတၢ်လုၢ်အဟံၣ်ပူၤ,ဒီးဃ့ဒိးန့ၢ်တၢ်ဟ့ၣ်သးကညီၤလၢအီၤလီၤ. 4 ဒီးစီၤပ့းတရူးစီၤယိၤဟၣ်ကွၢ်ထံအီၤဒီးစံးဝဲဒၣ်,ကွၢ်ထီၣ်ပှၤတက့ၢ်. 5 ဒီးအဝဲဒၣ်ဆိကမိၣ်လၢအကန့ၢ်ဘၣ်တၢ်တမံၤမံၤလၢအီၤဒီး,ဒိကနၣ်တၢ်လီၤ. 6 ဒီးစီၤပ့းတရူးစံးဘၣ်အီၤ,ကျိၣ်ဧိၤစ့ဧိၤ,ဒီးထူဧိၤလွဲဧိၤတအိၣ်ဘၣ်ဒီးယၤဘၣ်.မ့မ့ၢ်တၢ်လၢအအိၣ်ဒီးယၤန့ၣ်,ယဟ့ၣ်နၤလီၤ.လၢပှၤနစၤရ့းဖိယ့ၣ်ရှူးခရံာ်အမံၤန့ၣ်,ဂဲၤဆၢထၢၣ်ဒီးဟးတက့ၢ်. 7 ဒီးဟံးဃာ်အစုထွဲ,ဒီးဝံၣ်ဆၢထၢၣ်အီၤလီၤ.ဒီးအခီၣ်လာ်,ဒီးအခီၣ်ဒ့အဂံၢ်အဘါဆူၣ်ထီၣ်က့ၤတကီၢ်ခါလီၤ. 8 ဒီးစံၣ်ထီၣ်,ဒီးဆၢထၢၣ်,ဒီးဟးဝဲ,ဒီးလဲၤနုာ်ဒီးအီၤဆူတၢ်လုၢ်အဟံၣ်ပူၤအဖၢမုၢ်ဒီး,ဟးဝဲ,ဒီးစံၣ်ထီၣ်,ဒီးသးဝံၣ်ထီၣ်ယွၤလီၤ. 9 ဒီးပှၤဂီၢ်မုၢ်ခဲလၢာ်ထံၣ်အီၤလၢအဟးထီၣ်,ဒီးသးဝံၣ်ထီၣ်ယွၤလီၤ. 10 ဒီးသ့ၣ်ညါထံအီၤလၢအမ့ၢ်ပှၤလၢအဆ့ၣ်နီၤဃ့တၢ်ဟ့ၣ်သးကညီၤလၢတၢ်လုၢ်အဟံၣ်အပဲတရီအဃံအလၤအခီၣ်ထံးလီၤ.မ့ၢ်တၢ်မၤအသးအဃိဒီး,တၢ်လီၤလးလၢအမဲာ်ဒိၣ်မး,ဒီးပာ်အသးကမၢကမၣ်လီၤ.

11 ဒီးအဝဲဒၣ်ဟံးဃာ်စီၤပ့းတရူး,ဒီးစီၤယိၤဟၣ်အဖၢမုၢ်ဒီး,ပှၤဂီၢ်မုၢ်ခဲလၢာ်ဟဲဃ့ၢ်ဖှိၣ်ဆူအအိၣ်,လၢတၢ်ဒုးခိၣ်ကိးဝဲလၢၡလိၤမိၤ,ဒီးကမၢကမၣ်ဝဲတကူၢ်သ့ၣ်လီၤ. 12 ဒီးစီၤပ့းတရူးထံၣ်တၢ်ဒီး,ကတိၤဆၢတၢ်လၢပှၤဂီၢ်မုၢ်န့ၣ်,ပှၤအံၣ်စရ့လးဖိသ့ၣ်ဧၢ,လၢတၢ်အံၤအဂ့ၢ်န့ၣ်,သုကမၢကမၣ်ဘၣ်မနုၤလဲၣ်.သုကွၢ်ထံကွၢ်ဆးပှၤ,ဒ်ပဒုးဟးထီၣ်က့ၤအီၤလၢပစိပကမီၤ,ပတၢ်ယူးယီၣ်ယွၤဒၣ်ပဝဲအသိးဘၣ်မနုၤလဲၣ်. 13 စီၤအၤဘြၤဟၣ်ဒီးစီၤအံၤစဲးဒီးစီၤယၤကိာ်အကစၢ်,ပပၢ်သ့ၣ်အကစၢ်,လီၣ်ဖျါထီၣ်အခ့အပှၤယ့ၣ်ရှူးအလၤအကပီၤလီၤ.အဝဲဒၣ်န့ၣ်သုဟ့ၣ်လီၤကွံာ်,ဒီးသမၢအီၤလၢစီၤပံၤလးအမဲာ်ညါ,ဖဲအစံၣ်ညီၣ်လၢအကပျၢ်အီၤလီၤ. 14 ဒီးသုသမၢတၢ်စီတၢ်ဆှံဒီးတၢ်တီတၢ်လိၤတဂၤန့ၣ်,ဒီးသုဃ့လၢတၢ်ကဟ့ၣ်သုလၢပှၤမၤသံပှၤကညီတဂၤလီၤ. 15 ဒီးသုမၤသံကွံာ်တၢ်မူအခိၣ်,လၢယွၤဒုးဂဲၤဆၢထၢၣ်က့ၤဝဲ,ဒီးပကဲပဝဲလၢပှၤအုၣ်အသးလၢအဂ့ၢ်လီၤ. 16 ဒီးတၢ်စူၢ်က့ၤနာ်က့ၤအမံၤသတးဒီး,အမံၤမၤဆူၣ်ထီၣ်န့ၢ်ပှၤလၢသုထံၣ်,ဒီးသုသ့ၣ်ညါအီၤတဂၤအံၤ,အဂံၢ်အဘါလီၤ.မ့ၢ်မးတၢ်နာ်ဘၣ်ဃးဒီးအီၤန့ၣ်,ဒုးအိၣ်ဆူၣ်အိၣ်ချ့ပှၤတဂၤအံၤ,လၢသုမဲာ်ညါခဲလၢာ်လီၤ.

17 ဒီးခဲကနံၣ်အံၤ,ဒီပုၢ်ဝဲၢ်သ့ၣ်ဧၢ,ယသ့ၣ်ညါလၢသုတသ့ၣ်ညါဘၣ်ဒီး,သုမၤသုဝဲ,ဒီးသုပဒိၣ်ပပှၢ်သ့ၣ်ဒ်န့ၣ်သိးစ့ၢ်ကီးလီၤ. 18 တၢ်လၢယွၤစံးပာ်လၢအဝံခဲလၢာ်အထးခိၣ်,လၢခရံာ်ဘၣ်ဒိးတၢ်န့ၣ်,မ့ၢ်အမၤလၢထီၣ်ပှဲၤထီၣ်ဝဲဒ်န့ၣ်အသိးလီၤ. 19 မၤသးဒ်န့ၣ်ဒီးဒ်သိးသုတၢ်ဒဲးဘးကဘၣ်တၢ်တြူာ်ကွံာ်,ဒီးဒ်သိးတၢ်အခုၣ်တၢ်အမုာ်လၢကစၢ်အမဲာ်ညါအကတီၢ်ကဘၣ်, 20 ဒီးဒ်သိးတၢ်ကမၢလီၤယ့ၣ်ရှူးခရံာ်လၢအဘၣ်တၢ်စံၣ်တဲၤတဲလီၤပာ်လၢသုဒီး,သ့ၣ်နီၣ်ပီၢ်ယၢ်လီၤက့ၤသုသး,ဒီးဃၣ်လိၤက့ၤသုသးတက့ၢ်. 21 အဝဲဒၣ်,တချုးတၢ်ခဲလၢာ်ဘၣ်တၢ်မၤက့ၤအသးဒီး,မူခိၣ်ဘၣ်တူၢ်လိာ်အီၤ,ဒ်ယွၤစံးပာ်ဝဲလၢအဝံစီဆှံအထးခိၣ်လၢပျၢၤလၢကစၢၤလံၤလံၤအသိးန့ၣ်လီၤ. 22 အဂ့ၢ်ဒ်အံၤ,စီၤမိၤရှ့စံးဘၣ်ပပၢ်သ့ၣ်သပှၢ်တၢၢ်,ယွၤသုကစၢ်ကဒုးဂဲၤဆၢထၢၣ်န့ၢ်သုဝံတဂၤ,လၢသုဒီပုၢ်ဝဲၢ်အကျါ,ဒ်ယၤအံၤအသိးလီၤ.အဝဲဒၣ်န့ၣ်,ဖဲဒၣ်အစံးဘၣ်သုတမံၤလၢ်လၢ်န့ၣ်,သုဘၣ်ဒိကနၣ်လီၤ. 23 ဒီးတၢ်ကမၤအသးလၢကယဲၢ်ပှၤလၢအတဒိကနၣ်ဘၣ်ဝံတဂၤန့ၣ်အကလုၢ်ဒီး,ကဘၣ်တၢ်မၤဟးဂီၤကွံာ်အီၤလၢပှၤဂီၢ်မုၢ်အကျါလီၤ. ^{▼▼3:23 ၅မိၤ.၁၈း၁၅} 24 ဒီးကယဲၢ်ဝံသ့ၣ်တဖၣ်လၢစီၤၡမူၤအ့လးလံၤလံၤ,ဒီးပှၤလၢခံလၢလာ်လၢအကတိၤတၢ်ခဲလၢာ်န့ၣ်,မ့ၢ်အစံးပာ်တၢ်လၢမုၢ်နံၤတဖၣ်အံၤအဂ့ၢ်လီၤ.

25 သုဝဲဒၣ်အံၤ,သုမ့ၢ်ဝံသ့ၣ်တဖၣ်အဖိခွါ,ဘၣ်ဃးဒီးတၢ်အၢၣ်လီၤအီလီၤလၢယွၤဟ့ၣ်လၢပပၢ်သ့ၣ်,ဖဲအစံးဘၣ်စီၤအၤဘြၤဟၣ်,ကယဲၢ်ပှၤကညီအကလုာ်ကလုာ်လၢဟီၣ်ခိၣ်ချၢန့ၣ်,ကဘၣ်တၢ်ဆိၣ်ဂ့ၤလၢနချံနသၣ်န့ၣ်လီၤ. ^{▼▼3:25 ၁မိၤ.၂၂း၁၈} 26 ယွၤဒုးဂဲၤဆၢထၢၣ်က့ၤအခ့အပှၤဒီးမၢအလဲၤဆိဆူသုအိၣ်,ဒ်သိးကဆိၣ်ဂ့ၤသုလၢတၢ်ဘိးကဒါက့ၤသုလၢသုတၢ်ဒဲးဘးအပူၤစုာ်စုာ်န့ၣ်လီၤ.