Act 17 | KswSKMB | STEP | ဒီးလဲၤခီဂာ်အၣ်ဖံပလံၤ,ဒီးအၤပလိၤနံဝံၤဒီး,လဲၤဝဲဆူသ့းစၤလနံ,ဖဲပှၤယူဒၤဖိအဘူၣ်ဘျီၣ်အိၣ်ဝဲတဖျၢၣ်လီၤ.

‏ Acts 17

1 ဒီးလဲၤခီဂာ်အၣ်ဖံပလံၤ,ဒီးအၤပလိၤနံဝံၤဒီး,လဲၤဝဲဆူသ့းစၤလနံ,ဖဲပှၤယူဒၤဖိအဘူၣ်ဘျီၣ်အိၣ်ဝဲတဖျၢၣ်လီၤ. 2 ဒီးစီၤပီလူးဒ်အလုၢ်အလၢ်အိၣ်ဝဲအသိးန့ၣ်,လဲၤနုာ်ဆူအဝဲသ့ၣ်အအိၣ်,ဒီးလၢသၢအိၣ်ဘှံးနံၤညါန့ၣ်ကတိၤတၢ်ဒီးအီၤလၢတၢ်ကွဲးအသးအဂ့ၢ်အကျိၤ, 3 ဒီးအိးထီၣ်တၢ်,ဒီးဒုးနဲၣ်ဝဲလၢခရံာ်ဘၣ်ဒိးတၢ်နးတၢ်ဖှီၣ်,ဒီးဘၣ်ဂဲၤဆၢထၢၣ်က့ၤလၢတၢ်သံအပူၤ,ဒီးလၢယ့ၣ်ရှူးလၢယစံၣ်တဲၤတဲလီၤသုမ့ၢ်ခရံာ်န့ၣ်လီၤ. 4 ဒီးပှၤတနီၤနီၤလၢအကျါ,ဒီးဟ့းလ့ၣ်ဖိလၢအဘါယွၤဂီၢ်မုၢ်ဖးဒိၣ်,ဒီးပိာ်မုၣ်အိၣ်ဒီးအလၤအကပီၤတဘျုးဂၤ,စူၢ်က့ၤနာ်က့ၤတၢ်ဒီးဘျုးအသးဒီးစီၤပီလူးဒီးစီၤစံလၤလီၤ.

5 ဘၣ်ဆၣ်ဒီးပှၤယူဒၤဖိအသးက့ၣ်,ဒီးဟံးန့ၢ်ပှၤအအၢအသီလၢအအိၣ်ဒၣ်တၢ်လၢဖၠါပူၤ,ဒီးဒုးအိၣ်ဖှိၣ်ပှၤဂီၢ်မုၢ်,ဒီးမၤတၢထီၣ်တၢလီၤတၢ်လၢဝ့ၢ်ပူၤလီၤ.ဒီးဟဲဃီၤဆူစီၤယါစီၣ်အဟံၣ်ဒီး,ဃုမိၤထီၣ်ပှၤတဖၣ်န့ၣ်ဆူပှၤဂီၢ်မုၢ်အအိၣ်လီၤ. 6 ဒီးမ့ၢ်အတထံၣ်ဘၣ်အီၤဘၣ်ဒီး,မိၤတွံၢ်တြူာ်စီၤယါစီၣ်,ဒီးဒီပုၢ်ဝဲၢ်တနီၤနီၤဆူဝ့ၢ်ပဒိၣ်တဖၣ်အအိၣ်,ဒီးကိးပသူထီၣ်ဝဲ,ပှၤလၢအမၤကဒါဟီၣ်ခိၣ်တဖၣ်ဟဲတုၤဖဲအံၤစ့ၢ်ကီးလံ. 7 ဒီးစီၤယါစီၣ်တူၢ်လိာ်လံအီၤလံ.ဒီးပှၤခဲလၢာ်အံၤ,မၤတၢ်ထီဒါကဲစၢ်အကလုၢ်,ဒီးစံးလၢစီၤပၤအဂၤ,ယ့ၣ်ရှူးအိၣ်ဝဲတဂၤလီၤ.

8 ဒီးတုၤပှၤဂီၢ်မုၢ်ဒီးဝ့ၢ်အပဒိၣ်နၢ်ဟူတၢ်န့ၣ်ဒီး,အသူၣ်ကိၢ်အသးဂီၤထီၣ်လီၤ. 9 ဒီးတုၤအဟံးန့ၢ်ပှၤအုၣ်အသးလၢစီၤယါစီၣ်အဂီၢ်,ဒီးပှၤဂၤအဂီၢ်ဒီး,ပျၢ်အီၤလီၤ.

10 ဒီးပှၤဒီပုၢ်ဝဲၢ်တဖၣ်မၢစီၤပီလူး,ဒီးစီၤစံလၤလဲၤတကီၢ်ခါလၢမုၢ်နၤဆူဘ့းရံၤလီၤ.လဲၤတုၤဝဲဒီး,လဲၤနုာ်ဝဲလၢပှၤယူဒၤဖိအဘူၣ်ဘျီၣ်ပူၤလီၤ. 11 ဒီးပှၤတဖၣ်န့ၣ်အသးဂ့ၤန့ၢ်ပှၤသ့းစၤလနံဖိတက့ၢ်,ဒီးတူၢ်လိာ်တၢ်အကလုၢ်အကထါလၢအသူၣ်ဆူၣ်အသးဆူၣ်,ဒီးတၢ်န့ၣ်တဖၣ်မ့ၢ်တၢ်ဒ်န့ၣ်တမ့ၢ်တၢ်ဒ်န့ၣ်လဲၣ်န့ၣ်,ဃုကွၢ်တၢ်ကွဲးအသး,ထံထံဆးဆးသ့သ့တနံၤလီၤ.

12 မၤသးဒ်န့ၣ်ဒီး,ပှၤစူၢ်က့ၤနာ်က့ၤလၢအကျါအါဂၤ,ဒီးပှၤဟ့းလ့ၣ်မုၣ်အိၣ်ဒီးအလၤအကပီၤ,ဒီးပိာ်ခွါ,နာ်စ့ၢ်ကီးဝဲတစှၤဂၤဘၣ်လီၤ. 13 ဒီးပှၤယူဒၤဖိလၢသ့းစၤလနံအပူၤ,တုၤအသ့ၣ်ညါလၢစီၤပီလူးစံၣ်တဲၤတဲလီၤယွၤအကလုၢ်အကထါလၢဘ့းရံၤအပူၤဒီး,လဲၤစ့ၢ်ကီးဝဲဖဲန့ၣ်ဒီးထိၣ်ဟူးထိၣ်ဂဲၤပှၤဂီၢ်မုၢ်အသးလီၤ. 14 တုၤနုၤတစုပှၤဒီပုၢ်ဝဲၢ်မၢစီၤပီလူးလဲၤတၢ်တကီၢ်ခါမၤသးဒ်အကလဲၤလၢပီၣ်လဲၣ်အသိးန့ၣ်လီၤ.မ့မ့ၢ်စီၤစံလၤဒီးစီၤတံၤမသ့းအိၣ်ဒံးဝဲဒၣ်ဖဲန့ၣ်လီၤ. 15 ဒီးပှၤလၢအဆှၢစီၤပီလူးတဖၣ်န့ၣ်,ဆှၢဝဲတုၤလၢအၤသ့ၣ်အပူၤလီၤ.ဒီးဒိးန့ၢ်တၢ်မၤလိာ်လၢစီၤစံလၤဒီးစီၤတံၤမသ့းအဂီၢ်,ဒ်သိးအကဟဲဆူအအိၣ်ချ့သဒံးဝံၤဒီး,ဟးထီၣ်ဝဲလီၤ.

16 ဒီးစီၤပီလူးအိၣ်ဆူလၢ်ဟူအီၤလၢအၤသ့ၣ်အဖၢမုၢ်ဒီး,ထံၣ်ဝ့ၢ်န့ၣ်ပှဲၤဝဲဒီးတၢ်ဂီၤဒီး,အသးကိၢ်ထီၣ်ဝဲလီၤ. 17 မၤသးဒ်န့ၣ်ဒီးလၢဘူၣ်ဘျီၣ်ပူၤန့ၣ်,တဲးလိာ်ဃိလိာ်တၢ်ဒီးပှၤယူဒၤဖိဒီးပှၤယူးယီၣ်ယွၤ,ဒီးလၢဖၠါပူၤဒီးပှၤလၢအဟဲဘၣ်သဃိာ်အီၤကိးမုၢ်နံၤမုၢ်နၤဒဲးလီၤ. 18 ဒီးပှၤအ့းပံၤကူၤရူးဖိဒီးပှၤစတီးအၤဖိ,ပှၤကူၣ်တၢ်သ့တနီၤနီၤ,ဘၣ်သဃိာ်အီၤလီၤ.ဒီးတနီၤနီၤစံးဝဲဒၣ်,ပှၤကတိၤကြီတၢ်တဂၤအံၤ,မ့ၢ်အကစံးမနုၤတမံၤလဲၣ်.ဒီးပှၤဂၤစံးဝဲဒၣ်,လီၤဂာ်လၢအမ့ၢ်ပှၤစံၣ်တဲၤတဲလီၤပှၤတခီဘီမုၢ်ဖိအကစၢ်တဖၣ်အဂ့ၢ်လီၤ.အဂ့ၢ်ဒ်အံၤ,မ့ၢ်အစံးဘၣ်တဲဘၣ်အီၤလၢယ့ၣ်ရှူးဒီးတၢ်ဂဲၤဆၢထၢၣ်က့ၤအဂ့ၢ်အကျိၤလီၤ. 19 ဒီးအဝဲသ့ၣ်တဖၣ်ဟံးန့ၢ်အီၤ,ဒီးဆှၢအီၤဆူတၢ်စိခိၣ်အၤရံဒီးစံးဝဲဒၣ်,တၢ်သိၣ်တၢ်သီအသီလၢနစံၣ်တဲၤတဲလီၤန့ၣ်ပသ့ၣ်ညါမ့ၢ်အတသ့ဘၣ်ဧါ. 20 အဂ့ၢ်ဒ်အံၤ,နဒုးဟူဘၣ်ပနၢ်ပူၤလၢတၢ်လီၤဆီတဖၣ်န့ၣ်လီၤ.မၤသးဒ်န့ၣ်ဒီးတၢ်န့ၣ်တဖၣ်မ့ၢ်ဒ်လဲၣ်ဒ်လဲၣ်န့ၣ်,တၢ်မိၣ်သ့ၣ်ညါဘၣ်ပသးလီၤ. 21 ဒီးပှၤအၤသ့ၣ်ဖိခဲလၢာ်,ဒီးပှၤတမှံၤအိၣ်ဝဲဖဲန့ၣ်,တမၤဘၣ်တၢ်အဂၤနီတမံၤဘၣ်.ထဲအဂုာ်စံးဃဲၤဒီးကနၣ်တၢ်အသီတက့ၢ်တမံၤမံၤလီၤ. 22 ဒီးစီၤပီလူးဆၢထၢၣ်လၢတၢ်စိခိၣ်အၤရံအဒီခိၣ်ဒီးစံးဝဲဒၣ်,ပှၤအၤသ့ၣ်ဖိသ့ၣ်ဧၢ,လၢတၢ်ခဲလၢာ်အပူၤယထံၣ်လၢသုယူးယီၣ်သုကစၢ်တဖၣ်ဒိၣ်မးလီၤ. 23 အဂ့ၢ်ဒ်အံၤ,ယလဲၤဟးဒီးကွၢ်သုဘူၣ်တၢ်ဘါတၢ်အလီၢ်အဖၢမုၢ်ဒီး,ယထံၣ်တၢ်လုၢ်လီၢ်တပူၤ,အိၣ်ဒီးတၢ်ကွဲးအသးလၢအလိၤ,ကစၢ်လၢပတသ့ၣ်ညါဘၣ်အီၤတဂၤအဂီၢ်လီၤ.မၤသးဒ်န့ၣ်ဒီးပှၤလၢသုတသ့ၣ်ညါဘၣ်ဒီးဘူၣ်ထီၣ်ဘါထီၣ်အီၤန့ၣ်ယစံၣ်တဲၤတဲလီၤသုလၢအဝဲတဂၤန့ၣ်အဂ့ၢ်လီၤ. 24 ယွၤလၢအတ့လီၤဟီၣ်ခိၣ်ဒီးကယဲၢ်တၢ်အိၣ်လၢအပူၤ,အဝဲဒၣ်န့ၣ်မ့ၢ်မူခိၣ်ဒီးဟီၣ်ခိၣ်အကစၢ်လီၤ.ဒီးဟံၣ်လၢပှၤကညီမၤလၢအစုန့ၣ်,တအိၣ်တဆိးဘၣ်ဝဲလၢအပူၤဘၣ်. 25 ဒီးပှၤကညီအစုတမၤဘၣ်အတၢ်,ဒ်ပှၤလၢအဒိးန့ၢ်တၢ်အလီၢ်အိၣ်တဂၤအသိးဘၣ်.အဂ့ၢ်ဒ်အံၤ,အကစၢ်ဒၣ်ဝဲဟ့ၣ်ပှၤခဲလၢာ်အသးသမူ,ဒီးအသါ,ဒီးအတၢ်ခဲလၢာ်လီၤ. 26 ဒီးတ့လီၤပှၤကညီကိးအကလုာ်ဒဲးလၢအသွံၣ်တမံၤဃီ,ဒ်သိးအကအိၣ်ကဆိးလၢဟီၣ်ခိၣ်ချၢဒီဘ့ၣ်ညါ,ဒီးပာ်လီၤအဆၢအကတီၢ်,ဒီးအအိၣ်အဆိးအလီၢ်တဖၣ်, 27 ဒ်သိးအကဃုယွၤ,ဒီးဘၣ်တဘၣ်ကလၢၢ်ဝဲဒီး,ကထံၣ်န့ၢ်အီၤသ့ၣ်သ့ၣ်လီၤ.မ့ၢ်နာ်သက့ဒ်န့ၣ်ဒီး,အိၣ်တယံၤဘၣ်ဒီးပှၤနီတဂၤဘၣ်. 28 အဂ့ၢ်ဒ်အံၤ,ပမူ,ဒီးပဂဲၤ,ဒီးပအိၣ်လၢအပူၤလီၤ.ဒ်ပှၤမၤထါလၢသုကျါတနီၤနီၤစံးဝဲအသိး,

အဂ့ၢ်ဒ်အံၤ,အစၢၤအသွဲၣ်,
မ့ၢ်စ့ၢ်ကီးပှၤသ့ၣ်အံၤ,ပဝဲ.

29 မၤသးဒ်န့ၣ်ဒီး,မ့ၢ်ပမ့ၢ်ယွၤအစၢၤအသွဲၣ်ဒီး,တဂ့ၤဆိကမိၣ်လၢယွၤလီၤဂာ်ထူဧိၤလွဲဧိၤ,ကျိၣ်ဧိၤစ့ဧိၤ,ဒီးလၢၢ်ဧိၤလ့ဧိၤလၢပှၤကညီစိးပျၤဝဲလၢအစုသ့ဒီးအကူၣ်တၢ်သ့အသိးန့ၣ်ဘၣ်. 30 မၤသးဒ်န့ၣ်ဒီးပှၤတသ့ၣ်ညါဘၣ်တၢ်အကတီၢ်န့ၣ်,ယွၤဝံသးစူၤတၢ်လီၤ.မ့မ့ၢ်ခဲကနံၣ်အံၤမၤလိာ်ပှၤခဲလၢာ်အိၣ်လၢအလီၢ်တပူၤလၢ်လၢ်,လၢအကပီၢ်ယၢ်လီၤက့ၤအသးလီၤ. 31 အဂ့ၢ်ဒ်အံၤ,သ့ၣ်နံၤဖးသီလၢအကစံၣ်ညီၣ်ဟီၣ်ခိၣ်လၢတၢ်တီတၢ်လိၤလၢပှၤလၢအပာ်လီၤဝဲတဂၤအစုပူၤလီၤ.ဒီးဒ်သိးပှၤခဲလၢာ်ကစူၢ်က့ၤနာ်က့ၤတၢ်န့ၣ်ဒီး,ဒုးဂဲၤဆၢထၢၣ်အဝဲဒၣ်န့ၣ်လၢတၢ်သံန့ၣ်လီၤ. 32 ဒီးတုၤအနၢ်ဟူပှၤဂဲၤဆၢထၢၣ်က့ၤလၢတၢ်သံအဂ့ၢ်ဒီး,ပှၤတနီၤနီၤဒုၣ်ဒွဲၣ်တၢ်,ဒီးတနီၤနီၤစံးဝဲဒၣ်,တၢ်န့ၣ်တဖၣ်အဂ့ၢ်အကျိၤပကနၢ်ဟူကဒီးလၢနၤလီၤ. 33 ဒီးဒ်န့ၣ်အသိးစီၤပီလူးဟးထီၣ်လၢအကျါလီၤ.ဘၣ်ဆၣ်ဒီးပှၤတနီၤနီၤဘျုးအသးဒီးအီၤ,ဒီးစူၢ်က့ၤနာ်က့ၤဝဲလီၤ. 34 ပှၤစံၣ်ညီၣ်ကွီၢ်စီၤဒံၤနူၤစံၤအိၣ်လၢအကျါန့ၣ်တဂၤ,ဒီးပိာ်မုၣ်နီၢ်ဒမၤရံတဂၤ,ဒီးပှၤဂၤအိၣ်ဒီးအီၤတဖၣ်လီၤ.