Dan 10 | KswSKMB | STEP | ပၤရၣ်အစီၤပၤကိရ့ၣ်အနံၣ်သၢနံၣ်တနံၣ်န့ၣ်တၢ်လီၣ်ဖျါတၢ်ကတိၤလၢစီၤဒၤနံးယ့လးလၢအမံၤမ့ၢ်ဘ့ၤလးတၡါစၢ်,ဒီးတၢ်ကတိၤန့ၣ်မ့ၢ်အမ့ၢ်အတီ,ဒီးတၢ်ဒုးတၢ်ယၤန့ၣ်မ့ၢ်အဒိၣ်,ဒီးအနၢ်ပၢၢ်တၢ်ကတိၤန့ၣ်လီၤ.ဒီးအနၢ်ပၢၢ်တၢ်ထံၣ်တၢ်လၢညါခီလီၤ.

‏ Daniel 10

1 ပၤရၣ်အစီၤပၤကိရ့ၣ်အနံၣ်သၢနံၣ်တနံၣ်န့ၣ်တၢ်လီၣ်ဖျါတၢ်ကတိၤလၢစီၤဒၤနံးယ့လးလၢအမံၤမ့ၢ်ဘ့ၤလးတၡါစၢ်,ဒီးတၢ်ကတိၤန့ၣ်မ့ၢ်အမ့ၢ်အတီ,ဒီးတၢ်ဒုးတၢ်ယၤန့ၣ်မ့ၢ်အဒိၣ်,ဒီးအနၢ်ပၢၢ်တၢ်ကတိၤန့ၣ်လီၤ.ဒီးအနၢ်ပၢၢ်တၢ်ထံၣ်တၢ်လၢညါခီလီၤ.

2 တၢ်လၢမုၢ်နံၤတဖၣ်န့ၣ်ယၤစီၤဒၤနံးယ့လးအံၤ,ယသူၣ်အုးယသးအုးသၢနွံညါလီၤ.

3 ယတအီၣ်ဘၣ်ကိၣ်လၢအဝံၣ်ဘၣ်,ဒီးတၢ်ညၣ်ဒီးစပံးထံတဟဲနုာ်လၢယထးခိၣ်ဘၣ်,ဒီးယတဖှူဘၣ်ယသးတုၤသၢနွံညါပှဲၤထီၣ်လီၤ.

4 ဒီးလၢလါခီၣ်ထံး,လါထီၣ်ခံဆံလွံၢ်နံၤတနံၤန့ၣ်ယအိၣ်လၢထံမိၢ်ပှၢ်အနံၤလၢအမ့ၢ်ဃံးဒက့လးလီၤ.

5 ဒီးယကျ့ထီၣ်ယမဲာ်ဒီးယကွၢ်တၢ်ဒီးကွၢ်ကွၢ်,ပှၤကညီတဂၤကူသိးလၢဖှီဝါကဆှၣ်,ဒီးအယီၢ်ဒ့ကံၢ်တူာ်အသးဒီးထူအူဖစး, 6 ဒီးအကစၢ်မၤသးဒ်တၢ်မျၢ်ဘီဟ့အသိး,ဒီးအမဲာ်ဖျါဝဲဒ်လီဝၢ်အဒံးအသိး,ဒီးအမဲာ်သၣ်မၤသးဒ်မ့ၣ်အူဒၢကဲၤကပီၤတဖၣ်အသိး,ဒီးအစုဒီးအခီၣ်ဖျါဝဲမၤသးဒ်တိၢ်ဘီတြူာ်အသးဒီးအတၢ်ကတိၤအကလုၢ်မၤသးဒ်ပှၤဂီၢ်မုၢ်အကိးပသူတၢ်အသိးန့ၣ်လီၤ.

7 ဒီးယၤစီၤဒၤနံးယ့လးအံၤယထံၣ်တၢ်လၢညါခီတဂၤဃီလီၤ.ဒီးပှၤအိၣ်ဝဲဒီးယၤတဖၣ်န့ၣ်တထံၣ်ဘၣ်တၢ်ထံၣ်လၢညါခီဘၣ်.မ့ၢ်အဘၣ်ပျံၤဘၣ်ဖုးကနိးကစုာ်ဒိၣ်မး,ဒီးဃ့ၢ်ဝဲဒ်သိးအကပာ်ခူသူၣ်အသးလီၤ.

8 ဒီးယဲဒၣ်ယအိၣ်လီၤတဲာ်တဂၤဃီ,ဒီးယထံၣ်တၢ်ထံၣ်လၢညါခီဖးဒိၣ်,ဒီးယဂံၢ်ယဘါတအိၣ်လီၤတဲာ်ဘၣ်လၢယပူၤဘၣ်.အဂ့ၢ်ဒ်အံၤ,ယဃံယလၤကဲထီၣ်ဒ်တၢ်အုၣ်သံအသိး,ဒီးယဂံၢ်ယဘါတအိၣ်လၢၤဘၣ်.

9 ဒီးယနၢ်ဟူအတၢ်ကတိၤတဖၣ်အသီၣ်,ဒီးဖဲယနၢ်ဟူအတၢ်ကတိၤတဖၣ်အသီၣ်ဒီး,ယမံသပ့ၤအီထီလာ်,ဒီးယမဲာ်ကျးလီၤအသးလၢဟီၣ်ခိၣ်အဖီခိၣ်လီၤ.

10 ဒီးကွၢ်ကွၢ်,တၢ်အစုထိးယၤလၢအဒုးဆၢထၢၣ်ယၤလၢယခီၣ်လ့ၢ်ခိၣ်,ဒီးယစုညါသးလီၤ.

11 ဒီးစံးဘၣ်ယၤ,ပှၤလၢအဘၣ်တၢ်အဲၣ်အီၤတဂၤ,စီၤဒၤနံးယ့လးဧၢ,နၢ်ပၢၢ်တၢ်ကတိၤလၢယကတိၤတၢ်ဒီးနၤ,ဒီးဆၢထၢၣ်ထူၣ်ကလာ်တက့ၢ်.အဂ့ၢ်ဒ်အံၤ,ခဲကနံၣ်အံၤတၢ်မၢလီၤယၤဆူနအိၣ်လီၤ.ဒီးတုၤအကတိၤတၢ်ကတိၤန့ၣ်ဒီးယၤဒီး,ယဆၢထၢၣ်,ဒီးယကနိးကစုာ်လီၤ.

12 ဒီးစံးဘၣ်ယၤ,စီၤဒၤနံးယ့လးဧၢ,ပျံၤတၢ်တဂ့ၤ.အဂ့ၢ်ဒ်အံၤ,လၢမုၢ်အခီၣ်ထံးလံၤလံၤလၢနပာ်နသးလၢနကနၢ်ပၢၢ်တၢ်ဒီးဆီၣ်လီၤနသးလၢနကစၢ်အမဲာ်ညါဒီး,တၢ်ကနၣ်နတၢ်ကတိၤ,ဒီးယဟဲလၢနတၢ်ကတိၤအဃိလီၤ. 13 ဒီးပၤရၣ်အဘီအမုၢ်အခိၣ်တြီယၤခံဆံတနံၤ,ဒီးယအိၣ်လီၤတဲာ်ဖဲန့ၣ်ဒီးပၤရၣ်အစီၤပၤတဖၣ်န့ၣ်လီၤ.

14 ဒီးယဟဲဘိးဘၣ်သ့ၣ်ညါနၤလၢတၢ်လၢအကဘၣ်နပှၤဂီၢ်မုၢ်လၢမုၢ်နံၤကတၢၢ်တဖၣ်န့ၣ်လီၤ.အဂ့ၢ်ဒ်အံၤ,တၢ်ထံၣ်တၢ်လၢညါခီအိၣ်ဒံးလၢမုၢ်နံၤတဖၣ်အဂီၢ်လီၤ.

15 ဒီးကတိၤတၢ်ကတိၤတဖၣ်ဒ်န့ၣ်ဒီးယၤအဖၢမုၢ်ဒီး,ယပာ်ယမဲာ်လၢဟီၣ်ခိၣ်အဖီခိၣ်,ဒီးယအိၣ်ဘှီၣ်ကလာ်လီၤ.

16 ဒီးကွၢ်ကွၢ်,တၢ်ဖျါဝဲဒ်ပှၤကညီအဖိခွါတဂၤထိးယပျုၤဒီးယအဲးထီၣ်ယထးခိၣ်,ဒီးယကတိၤတၢ်,ဒီးယစံးဘၣ်ပှၤလၢအဆၢထၢၣ်လၢယမဲာ်ညါ,ယကစၢ်ဧၢ,ယတၢ်သးအုးဘၣ်လံယၤ,ဒီးယဂံၢ်ယဘါတအိၣ်လၢၤဘၣ်လၢတၢ်ထံၣ်လၢညါခီအဃိလီၤ.

17 ဒီးယကစၢ်အခ့အပှၤတဂၤအံၤကတိၤတၢ်ဒီးယကစၢ်တဂၤအံၤဒ်လဲၣ်.ဒီးတၢ်လၢယၤအံၤ,တၢ်ဂံၢ်တၢ်ဘါတအိၣ်လၢၤဘၣ်လၢယပူၤဘၣ်,ဒီးယသါတအိၣ်လၢၤဘၣ်လၢယပူၤဘၣ်.

18 ဒီးတၢ်အိၣ်ဒီးပှၤကညီအက့ၢ်အဂီၤတဂၤထိးကဒီးယၤ,ဒီးဒုးဆူၣ်ထီၣ်ယၤ, 19 ဒီးစံးဝဲဒၣ်,ပှၤလၢအဘၣ်တၢ်အဲၣ်အီၤတဂၤဧၢ,ပျံၤတၢ်တဂ့ၤ,မ်နဘၣ်တၢ်ဃူတၢ်ဖိးတက့ၢ်.အိၣ်ဒီးနဂံၢ်နဘါ,အိၣ်ဒီးနဂံၢ်နဘါတက့ၢ်.ဒီးကတိၤဝဲဒီးယၤအဖၢမုၢ်ဒီးယဂံၢ်ယဘါဆူၣ်ထီၣ်,ဒီးယစံး,မ်ယကစၢ်ကကတိၤတၢ်တက့ၢ်.အဂ့ၢ်ဒ်အံၤ,နဒုးဆူၣ်ထီၣ်ယၤလီၤ.

20 ဒီးစံးဝဲဒၣ်,ယဟဲမ့ၢ်အဘၣ်မနုၤလဲၣ်န့ၣ်နသ့ၣ်ညါစ့ၢ်ကီးဧါ.ဒီးခဲကနံၣ်အံၤယဘၣ်က့ၤကဒါက့ၤဒီးဒုးတၢ်ဒီးပၤရၣ်အခိၣ်,ဒီးယကဟးထီၣ်,ဒီးကွၢ်ကွၢ်,ယၤဝၣ်အခိၣ်ကဟဲလီၤ. 21 ဘၣ်ဆၣ်ဒီးယကစံးဘၣ်နၤလၢတၢ်လၢအကွဲးအသးလၢတၢ်မ့ၢ်တၢ်တီအလံာ်ပူၤလီၤ.ဒီးမ့တမ့ၢ်သုးခိၣ်မံၤက့လးတဂၤန့ၣ်မၤဃုာ်ဒီးယၤလၢတၢ်အံၤတမံၤဘၣ်ဒီးပှၤတအိၣ်ဘၣ်နီတဂၤဘၣ်.