‏ Daniel 11

1ဒီးလၢပှၤမၤဒဲဖိစီၤဒၤရယါဝ့ၣ်အနံၣ်ခီၣ်ထံးတနံၣ်န့ၣ်ယဆၢထၢၣ်ဒ်သိးယကဒုးဆူၣ်ထီၣ်အီၤ,ဒီးမၤဂၢၢ်မၤကျၢၤအီၤလီၤ.

2ဒီးခဲကနံၣ်အံၤယကဒုးနဲၣ်နၤလၢတၢ်မ့ၢ်တၢ်တီလီၤ.ကွၢ်ကွၢ်,ပၤရၣ်အစီၤပၤသၢဂၤကဆၢထၢၣ်ဒံး,ဒီးပှၤလွံၢ်ဂၤတဂၤန့ၣ်ကထူးထီၣ်တီၤထီၣ်ဒိၣ်န့ၢ်အဝဲသ့ၣ်ခဲလၢာ်တက့ၢ်လီၤ.ဒီးတုၤအဂံၢ်အဘါဆူၣ်ထီၣ်လၢအတၢ်ထူးတၢ်တီၤအဃိဒီး,ကထိၣ်ဂဲၤတၢ်ခဲလၢာ်ထီဒါယၤဝၣ်အဘီအမုၢ်လီၤ.

3ဒီးစီၤပၤဖးဒိၣ်တဂၤကဆၢထၢၣ်လၢအကကဲစီၤပၤလၢတၢ်ပၢအလီၢ်ဖးလဲၢ်အဖီခိၣ်,ဒီးကမၤဖဲဒၣ်အသးလီၤ.

4ဒီးတုၤအဆၢထၢၣ်ဒီး,အဘီအမုၢ်ကကၢ်ဝဲ,ဒီးကလီၤမုၢ်လီၤဖးဆူမူခိၣ်အကလံၤလွံၢ်ခီ,ဒီးတမ့ၢ်ဘၣ်လၢအစၢၤအသွဲၣ်အဂီၢ်ဘၣ်.ဒီးတမ့ၢ်ဘၣ်ဒ်တၢ်ပၢအလီၢ်လၢအပၢဝဲအသိးန့ၣ်ဘၣ်.အဂ့ၢ်ဒ်အံၤ,တၢ်ကထဲးထီၣ်ကွံာ်အဘီအမုၢ်,ဒီးလၢအဝဲသ့ၣ်အမဲာ်ညါန့ၣ်ကကဲထီၣ်ပှၤဂၤအတၢ်လီၤ.

5ဒီးစီၤပၤလၢကလံၤထံးတခီကဆူၣ်ထီၣ်ဘၣ်ဆၣ်ဒီးပှၤလၢအပဒိၣ်ဖးဒိၣ်အကျါတဂၤကဆူၣ်ထီၣ်ဒိၣ်န့ၢ်အီၤ,ဒီးကကဲထီၣ်စီၤပၤလီၤ.အဘီအမုၢ်န့ၣ်ကကဲထီၣ်တၢ်ပၢအကီၢ်ဖးလဲၢ်လီၤ.

6ဒီးလၢနံၣ်တဖၣ်အကတၢၢ်န့ၣ်ကအၢၣ်လီၤအီလီၤတၢ်လီၤ.အဂ့ၢ်ဒ်အံၤ,တၢ်လၢကလံၤထံးအစီၤပၤဖိမုၣ်တဂၤကဟဲဆူကလံၤစိးအစီၤပၤအအိၣ်ဒ်သိးအကမၤဃူမၤဖိးတၢ်လီၤ.ဘၣ်ဆၣ်ဒီးပိာ်မုၣ်တဟံးဃာ်အစုဒုၣ်အစိအကမီၤဘၣ်,ဒီးပိာ်ခွါန့ၣ်မ့ၢ်ဂ့ၤ,အစုဒုၣ်မ့ၢ်ဂ့ၤ,တဆၢထၢၣ်ဘၣ်,ဒီးတၢ်ကဟ့ၣ်လီၤကွံာ်ပိာ်မုၣ်,ဒီးပှၤတဖၣ်လၢအဟဲစိာ်အီၤ,ဒီးပှၤတဂၤလၢအထီၣ်ဖိအီၤ,ဒီးပှၤတဂၤလၢအမၤဆူၣ်ထီၣ်အီၤလၢအဆၢအကတီၢ်န့ၣ်လီၤ.

7ဒီးလၢအဂံၢ်အပဒၢပှၤတဂၤကဆၢထၢၣ်လၢအလီၢ်ဒီးကဟဲဝဲဆူတၢ်သုးမုၢ်,ဒီးကလဲၤနုာ်လၢကလံၤစိးအစီၤပၤအတိာ်ပူၤ,ဒီးကမၤထီဒါအီၤ,ဒီးကမၤနၢၤတၢ်လီၤ.

8ဒီးကစိာ်မၢကဲကုၢ်အကစၢ်တဖၣ်ဆူအဲၤကူပတူးအိၣ်ဝဲဒီးအတၢ်ဂီၤသိအသးတဖၣ်,ဒီးအလီခီစ့ဒီးအလီခီထူလၢအလုၢ်ဒိၣ်ပှ့ၤဒိၣ်,ဒီးတမၤဘူးဘၣ်ဒီးကလံၤစိးအစီၤပၤလၢနံၣ်ဧိၤလါဧိၤတနီၤလီၤ.

9ဒီးကဟဲဆူကလံၤထံးအစီၤပၤအဘီအမုၢ်,ဘၣ်ဆၣ်ဒီးကက့ၤက့ၤဆူအကီၢ်ဒၣ်ဝဲလီၤ.

10ဒီးအဖိခွါတဖၣ်ကဒုးသုး,ဒီးကဒုးအိၣ်ဖှိၣ်ပှၤသုးမုၢ်ဂီၢ်မုၢ်,ဒီးကလဲၤတၢ်,ဒီးလုၣ်ဘၢတၢ်,ဒီးခီဂာ်တၢ်,ဒီးကက့ၤကဒါက့ၤ,ဒီးကဒုးတၢ်ပၢၢ်လၢအတိာ်ပူၤဒၣ်လဲာ်လီၤ.

11ဒီးတၢ်လၢကလံၤထံးအစီၤပၤကသးထီၣ်,ဒီးကလဲၤဒုးအီၤ,ကလံၤစိးအစီၤပၤဒၣ်လဲာ်,ဒီးကဒုးအိၣ်ထီၣ်ပှၤဂီၢ်မုၢ်လီၤ.ဒီးတၢ်ကဟ့ၣ်လီၤကွံာ်ပှၤဂီၢ်မုၢ်န့ၣ်လၢအစုပူၤလီၤ.

12ဒီးပှၤဂီၢ်မုၢ်န့ၣ်ကပာ်ထီၣ်ထီအသး,ဒီးအဝဲဒၣ်အသူၣ်ကပိၢ်အသးကဝး,ဒီးကဒုးလီၤဃံၤပှၤကလးသ့ၣ်တဖၣ်န့ၣ်လီၤ.ဘၣ်ဆၣ်ဒီးတဆူၣ်ထီၣ်ဘၣ်ဝဲဘၣ်.

13ဒီးတၢ်လၢကလံၤစိးအစီၤပၤကဟဲကဒါက့ၤ,ဒီးကဒုးအိၣ်ထီၣ်ပှၤဂီၢ်မုၢ်အါန့ၢ်လၢအခီၣ်ထံးတက့ၢ်,ဒီးလၢအဆၢအကတီၢ်နံၣ်တဖၣ်အကတၢၢ်န့ၣ်ကဟဲဝဲဒီးတၢ်သုးမုၢ်ဖးဒိၣ်,ဒီးအစုလီၢ်အခီၣ်ခိၣ်အါအါကလဲာ်လီၤ.

14တၢ်လၢအကတီၢ်တဖၣ်န့ၣ်ပှၤအါဂၤကဆၢထၢၣ်ထီဒါတၢ်လၢကလံၤထံးအစီၤပၤ,နပှၤဂီၢ်မုၢ်အပှၤမၤဆူၣ်မၤစိးတၢ်တဖၣ်ကပာ်ထီၣ်ထီအသးဒ်သိးအကဒုးအိၣ်ကျၢၤတၢ်ထံၣ်တၢ်လၢညါခီလီၤ.ဘၣ်ဆၣ်ဒီးကလီၤဃံၤဝဲလီၤ.

15ဒီးတၢ်လၢကလံၤစိးအစီၤပၤကဟဲဝဲ,ဒီးမၤထီၣ်တၢ်ခိၣ်ဒူ,ဒီးမၤန့ၢ်ဝ့ၢ်အိၣ်ဒီးအခိၣ်ဒူခၢၣ်သနၢၢ်,ဒီးတၢ်လၢကလံၤထံးအသုးမုၢ်,အပှၤသုးဖိလၢအဃုထၢအီၤဒၣ်လဲာ်,တဆၢထၢၣ်ဘၣ်ဝဲဘၣ်.အဂံၢ်အဘါလၢအကဆၢထၢၣ်ဝဲန့ၣ်တအိၣ်ဘၣ်.

16ဒီးပှၤလၢအဟဲဝဲန့ၣ်ကမၤအီၤဖဲဒၣ်အသးဒၣ်ဝဲ,ဒီးတၢ်တဆၢထၢၣ်ဘၣ်လၢအမဲာ်ညါဘၣ်.ဒီးကဆၢထၢၣ်လၢကီၢ်အိၣ်ဝဲဒီးအဃံအလၤ,ဒီးကမၤလၢာ်ကွံာ်ဝဲလၢအစုလီၤ.

17ဒီးကပာ်အမဲာ်လၢအကဟဲဒီးအဘီအမုၢ်ဒီဘ့ၣ်ညါအစိအကမီၤ,ဒီးပှၤတီပှၤလိၤအိၣ်ဒီးအီၤလီၤ.ဒ်န့ၣ်အသိးကမၤဝဲလီၤ.ဒီးကဟ့ၣ်လီၤအီၤလၢပိာ်မုၣ်အဖိမုၣ်တဂၤ,ဒ်သိးအကမၤဟးဂီၤဝဲလီၤ.ဘၣ်ဆၣ်ဒီးတၢ်န့ၣ်တမံၤတကျၢၤဘၣ်ဝဲဘၣ်.ဒီးတကဲထီၣ်ဘၣ်လၢအဂီၢ်ဘၣ်.

18ဒီးကဃၣ်ဃီၤအမဲာ်ဆူကီးတဖၣ်အအိၣ်,ဒီးကမၤန့ၢ်အါဖျၢၣ်လီၤ.ဘၣ်ဆၣ်ဒီးတၢ်အခိၣ်တဂၤကဒုးဆိတ့ၢ်အတၢ်ဒုၣ်ဒွဲၣ်လီၤ.လၢန့ၣ်အမဲာ်ညါကဒုးဘၣ်ကဒါက့ၤအတၢ်ဒုၣ်ဒွဲၣ်လၢအကစၢ်ဒၣ်ဝဲအလိၤလီၤ.

19ဒီးကဃၣ်က့ၤအမဲာ်ဆူတိာ်ဧိၤတာ်ဧိၤလၢအကီၢ်ဒၣ်ဝဲအပူၤလီၤ.ဒီးအခီၣ်ကဘၣ်တိၢ်ဒီးကလီၤဃံၤဝဲ,ဒီးတၢ်တထံၣ်န့ၢ်လၢၤဘၣ်အီၤဘၣ်.

20ဒီးပှၤကဆၢထၢၣ်လၢအလီၢ်တဂၤ,လၢအကဒုးခီဂာ်ပှၤဃ့သွဲလၢဘီမုၢ်အဃံအလၤအပူၤလီၤ.ဒီးလၢစှၤနံၤအတီၢ်ပူၤကတုၤလၢတၢ်ဟးဂီၤလီၤ.ဘၣ်ဆၣ်ဒီးတမ့ၢ်ဘၣ်လၢတၢ်သးထီၣ်အဃိ,တမ့ၢ်ဘၣ်လၢဒုးသုးအပူၤဘၣ်.

21ဒီးပှၤလၢတၢ်တပးကဲဘၣ်အီၤတဂၤကဆၢထၢၣ်လၢအလီၢ်လၢပှၤတဟ့ၣ်ဘၣ်အီၤလၢဘီမုၢ်အလၤကပီၤဘၣ်.ဒီးကဟဲနုာ်ဃူဃူဖိးဖိး,ဒီးကန့ၢ်ဘၣ်ဘီမုၢ်လၢလီတၢ်လီၤ.

22ဒီးသုးမုၢ်လၢအလုၣ်ဘၢတၢ်န့ၣ်ကလီၤဘျၢဝဲလၢအမဲာ်ညါ,ဒီးကကၢ်လီၤကလဲ,တၢ်အခိၣ်ဘၣ်ဃးဒီးတၢ်အၢၣ်လီၤအီလီၤလီၤ.

23ဒီးလၢအအၢၣ်လီၤအီလီၤတၢ်ဒီးအီၤလံၤလံၤန့ၣ်ကမၤဝဲဒီးလီတၢ်,ဒီးကလဲၤထီၣ်,ဒီးမၤဃၣ်တၢ်လၢအပှၤဂီၢ်မုၢ်စှၤတဖုလီၤ.

24ကဟဲနုာ်ဃူဃူဖိးဖိးလၢကီၢ်အဂ့ၤကတၢၢ်အပူၤ,ဒီးကမၤတၢ်လၢအပၢ်တဖၣ်ဒီးအပၢ်အပၢ်တဖၣ်တမၤဘၣ်ဝဲဘၣ်.ဒီးကဟ့ၣ်နီၤဖးဝဲလၢတၢ်မၤန့ၢ်ဆူၣ်,ဒီးတၢ်ဂုာ်ဆူၣ်ပျီဆူၣ်,ဒီးတၢ်ထူးတၢ်တီၤလီၤ,ဒီးကကူၣ်တၢ်ထီဒါတိာ်ဧိၤတာ်ဧိၤတုၤအမုၢ်အလါဘၣ်လီၤ.

25ဒီးကထိၣ်ဂဲၤအသုးမုၢ်,ဒီးပာ်အသးခူတလ့ၢ်အိၣ်ဒီးတၢ်သုးမုၢ်ဂီၢ်မုၢ်ထီဒါတၢ်လၢကလံၤထံးအစီၤပၤလီၤ.ဒီးတၢ်လၢကလံၤထံးအစီၤပၤကထိၣ်ဂဲၤအသးအိၣ်ဝဲဒီးတၢ်သုးမုၢ်ဖးဒိၣ်ဒီးဆူၣ်ဝဲလီၤ.ဘၣ်ဆၣ်ဒီးတဆၢထၢၣ်ဘၣ်ဝဲဘၣ်.အဂ့ၢ်ဒ်အံၤ,အဝဲသ့ၣ်တဖၣ်န့ၣ်ကကူၣ်တၢ်ထီဒါအီၤလီၤ.

26ဒီးပှၤလၢအအီၣ်ဝဲလၢတၢ်အီၣ်ဝံၣ်ဒၣ်ဝဲတဖၣ်န့ၣ်ကမၤဟးဂီၤအီၤ,ဒီးအသုးမုၢ်လုၣ်ဘၢကွံာ်တၢ်,ဒီးပှၤကလီၤဃံၤဘၣ်တၢ်မၤသံအီၤအါဂၤလီၤ.

27ဒီးတၢ်လၢစီၤပၤခံဂၤန့ၣ်တိာ်ဝဲလၢအကမၤအၢတၢ်လီၤ.ကကတိၤတၢ်ကဘျံးကဘျၣ်လၢစီၢ်နီၤခိၣ်တဖျၢၣ်ဃီအဃၢၤလီၤ.ဘၣ်ဆၣ်ဒီးတကဲထီၣ်ဘၣ်တၢ်ဘၣ်.တုၤတၢ်သ့ၣ်ဆၢဖးကတီၢ်န့ၣ်ဘၣ်ဝဲဒီး,တၢ်အကတၢၢ်ကအိၣ်လီၤ.

28ဒီးကက့ၤကဒါက့ၤဆူအကီၢ်ဒၣ်ဝဲအပူၤအိၣ်ဝဲဒီးတၢ်ထူးတၢ်တီၤဖးဒိၣ်,ဒီးအသးကထီဒါတၢ်အၢၣ်လီၤအီလီၤစီဆှံ,ဒီးကမၤတၢ်,ဒီးက့ၤကဒါက့ၤဆူအကီၢ်ဒၣ်ဝဲအပူၤလီၤ.

29ဒီးတၢ်သ့ၣ်ဆၢဖးအကတီၢ်ဘၣ်ဒီး,ကဟဲက့ၤဒီးကလဲၤနုာ်လၢကလံၤထံးတခီ,ဘၣ်ဆၣ်ဒီးတၢ်တမၤဘၣ်အသးလၢခံတဘျီဒ်လၢအခီၣ်ထံးတဘျီအသိးဘၣ်.

30ဒီးကံးတံၣ်အကဘီတဖၣ်ကဟဲထီဒါအီၤ,ဒီးအသးကဟးဂီၤ,ဒီးကက့ၤကဒါက့ၤ,ဒီးအသးကကဲၤထီၣ်ဘၣ်တၢ်အၢၣ်လီၤအီလီၤစီဆှံ,ဒီးကမၤဝဲ,ဒီးကက့ၤကဒါက့ၤဝဲ,ဒီးကကွၢ်မဲာ်လိာ်အသးဒီးပှၤလၢအလဲၤသဒၣ်တၢ်အၢၣ်လီၤအီလီၤစီဆှံန့ၣ်လီၤ.

31ဒီးတၢ်သုးမုၢ်ကအိၣ်ဒီးအီၤ,ဒီးအဝဲသ့ၣ်ကမၤဘၣ်အၢတၢ်အလီၢ်စီဆှံ,တၢ်အလီၢ်ခၢၣ်သနၢၣ်,ဒီးကပာ်ကွံာ်တၢ်လုၢ်တနံၤဘၣ်တနံၤ,ဒီးကပာ်ထီၣ်တၢ်သးဘၣ်အၢတမံၤလၢအမၤသယုၢ်တၢ်လီၤ.

32ဒီးပှၤလၢအလုၣ်သ့ၣ်ခါပတာ်တၢ်အၢၣ်လီၤအီလီၤတဖၣ်န့ၣ်အဝဲဒၣ်ကဘိးကမၣ်အီၤလၢတၢ်လွဲတၢ်လဲးလီၤ.မ့မ့ၢ်ပှၤလၢအသ့ၣ်ညါအကစၢ်န့ၣ်ကဆူၣ်ထီၣ်ဝဲ,ဒီးဘီၣ်ထီၣ်ညီထီၣ်ဝဲလီၤ.

33ဒီးပှၤလၢအကူၣ်တၢ်သ့လၢပှၤဂီၢ်မုၢ်အကျါတဖၣ်န့ၣ်ကသိၣ်လိပှၤအါဂၤလီၤ.ဘၣ်ဆၣ်ဒီးကလၢာ်ဝဲလၢနး,ဒီးလၢမ့ၣ်လၣ်,ဒီးလၢတၢ်မၢကဲကုၢ်အီၤ,ဒီးလၢတၢ်မၤန့ၢ်ဆူၣ်အီၤလၢအါနံၤအတီၢ်ပူၤလီၤ.

34ဒီးတုၤအလီၤဃံၤဒီး,တၢ်ကမၤစၢၤအီၤလၢတၢ်မၤစၢၤတစဲးဖိ,ဒီးပှၤကစဲဘူးအသးဒီးအီၤလၢလီတၢ်အါဂၤလီၤ.

35ဒီးပှၤလၢအကူၣ်သ့တၢ်တနီၤနီၤ,ကလီၤဃံၤဝဲဒ်သိးတၢ်ကမၤကွၢ်အီၤ,ဒီးမၤကဆှီအီၤ,ဒီးမၤဝါအီၤတုၤအကတၢၢ်တၢ်အဆၢအကတီၢ်လီၤ.အဂ့ၢ်ဒ်အံၤ,အိၣ်ဝဲလၢအတၢ်သ့ၣ်ဆၢဖးကတီၢ်လီၤ.

36ဒီးစီၤပၤတဂၤန့ၣ်ကမၤဝဲဖဲဒၣ်အသး,ဒီးကပာ်ထီၣ်ထီအသး,ဒီးကပာ်ဒိၣ်အသးလၢကယဲၢ်အကစၢ်တဂၤလၢ်လၢ်အဖီခိၣ်,ဒီးကကတိၤတၢ်လီၤလးတဖၣ်ထီဒါကစၢ်တဖၣ်အကစၢ်,ဒီးကဘီၣ်ထီၣ်ညီထီၣ်တုၤတၢ်သးထီၣ်ကလၢာ်ကွံာ်ဝဲလီၤ.အဂ့ၢ်ဒ်အံၤ,တၢ်လၢတၢ်တိာ်ပာ်န့ၣ်ကမၤအသးသပှၢ်တၢၢ်လီၤ.

37ဒီးတပးကဲဘၣ်အပၢ်အကစၢ်တဖၣ်ဘၣ်,ဒီးတပးကဲဘၣ်တၢ်လၢအဘၣ်ပိာ်မုၣ်အသး,ဒီးတပးကဲဘၣ်ကစၢ်နီတဂၤဘၣ်.အဂ့ၢ်ဒ်အံၤ,ကပာ်ဒိၣ်အသးလၢခဲလၢာ်န့ၣ်အဖီခိၣ်လီၤ.

38ဒီးကမၤလၤကပီၤတၢ်သုးမုၢ်အကစၢ်လၢအလီၢ်,ဒီးကစၢ်တဂၤလၢအပၢ်တဖၣ်တသ့ၣ်ညါဘၣ်န့ၣ်ကမၤဘူၣ်အီၤလၢထူ,ဒီးစ့,ဒီးတၢ်မျၢ်,ဒီးတၢ်လုၢ်ဒိၣ်ပှ့ၤဒိၣ်လီၤ.

39ဒီးကမၤတိာ်ဧိၤတာ်ဧိၤဘၣ်ဃးဒီးပှၤတခီဘီမုၢ်ဖိအကစၢ်လီၤ.ဖဲဒၣ်ပှၤလၢအအၢၣ်လီၤအီလီၤအီၤတဂၤလၢ်လၢ်န့ၣ်ကမၤလၤကပီၤဒိၣ်ထီၣ်ဝဲလီၤ.ဒီးကဒုးပၢပှၤအါဂၤ,ဒီးကဟ့ၣ်နီၤဖးထံဧိၤကီၢ်ဧိၤအဆၢလၢတၢ်အပှ့ၤအဂီၢ်လီၤ.

40ဒီးလၢတၢ်အကတၢၢ်အဆၢအကတီၢ်န့ၣ်တၢ်လၢကလံၤထံးအစီၤပၤန့ၣ်ကဒုးသုးဒီးအီၤ,ဒီးတၢ်လၢကလံၤစိးအစီၤပၤကဟဲသဖှိထီၣ်ထီဒါအီၤ,ဒ်ကလံၤမုၢ်အသိးန့ၣ်အိၣ်ဒီးလ့ၣ်ကဟၣ်,ဒီးပှၤကသ့ၣ်သုးဖိ,ဒီးကဘီအါဘ့ၣ်,ဒီးကလဲၤနုာ်လၢကီၢ်တဖၣ်အပူၤ,ဒီးကလုၣ်ဘၢတၢ်ဒီးလဲၤတၢ်လီၤ.

41ဒီးကလဲၤနုာ်ဆူကီၢ်အိၣ်ဒီးအဃံအလၤတဘ့ၣ်အပူၤ,ဒီးတၢ်ကမၤကဒံကဒါကီၢ်အါဘ့ၣ်လီၤ.ဘၣ်ဆၣ်ဒီး,အအံၤကပူၤဖျဲးဒီးအစုပူၤ,အဒိၣ်,ဒီးမိၤအး,ဒီးပှၤဧၣ်မိၣ်ဖိလၢအအါတက့ၢ်န့ၣ်လီၤ.

42ဒီးကယူာ်ထီၣ်အစုလၢကီၢ်တနီၤနီၤအဖီခိၣ်,ဒီးကီၢ်အဲၤကူပတူးတပူၤတဖျဲးဘၣ်ဝဲဘၣ်. 43ဒီးကပၢဝဲလၢတၢ်ပာ်ဖှိၣ်ထူဒီးစ့အလီၢ်အဖီခိၣ်,ဒီးလၢတၢ်လုၢ်ဒိၣ်ပှ့ၤဒိၣ်လၢအဲၤကူပတူးအပူၤခဲလၢာ်အဖီခိၣ်,ဒီးပှၤလူအးဖိ,ဒီးပှၤကူၤၡးဖိကအိၣ်ခိးဝဲလၢအခီၣ်လီၢ်လီၤ.

44ဒီးတၢ်အကစီၣ်လၢမုၢ်ထီၣ်ဒီးလၢကလံၤစိးန့ၣ်ကမၤကိၢ်အသးလီၤ.ဒီးကလဲၤတၢ်လၢအသးကဲၤထီၣ်ဆူၣ်ဆူၣ်ကလဲာ်ဒ်သိးအကမၤဟးဂီၤကွံာ်,ဒီးမၤသယုၢ်ပှၤအါဂၤအသးလီၤ.

45ဒီးကသူၣ်အနူၢ်အဒဲလၢကစၢၢ်စီဆှံအိၣ်ဒီးအဃံအလၤတဖျၢၣ်ဒီးပီၣ်လဲၣ်အဘၢၣ်စၢၤ,ဘၣ်ဆၣ်ဒီးကတုၤလၢအကတၢၢ်,ဒီးပှၤတမၤစၢၤဘၣ်အီၤနီတဂၤဘၣ်.