Daniel 12
1အကတီၢ်ဖဲန့ၣ်တၢ်အခိၣ်ဖးဒိၣ်,မံၤက့လးလၢအအိၣ်ပှိၤနပှၤဂီၢ်မုၢ်တဂၤန့ၣ်ကဆၢထၢၣ်ဝဲလီၤ.ဒီးတၢ်နးတၢ်ဖှီၣ်အကတီၢ်ကအိၣ်ထီၣ်ဝဲလၢတၢ်ဒ်န့ၣ်အသိးလၢပှၤတကလုာ်အိၣ်ထီၣ်ဝဲလံၤလံၤတုၤအကတီၢ်တကတီၢ်န့ၣ်တအိၣ်ဘၣ်ဝဲဘၣ်.ဒီးဖဲအကတီၢ်န့ၣ်နပှၤဂီၢ်မုၢ်,ဒီးပှၤလၢအမံၤကွဲးအသးလၢလံာ်ပူၤတဂၤလၢ်လၢ်န့ၣ်ကပူၤကဖျဲးဝဲလီၤ. 2ဒီးပှၤလၢအမံဝဲလၢဟီၣ်ခိၣ်အကမူၣ်အကျါအါဂၤန့ၣ်ကဖုသံနီၣ်ထီၣ်လီၤ.တနီၤနီၤလၢတၢ်မူအထူအယိာ်အဂီၢ်,ဒီးတနီၤနီၤလၢတၢ်မဲာ်ဆှးဒီးတၢ်မၤတရီတပါအီၤအထူအယိာ်အဂီၢ်လီၤ. 3ပှၤလၢအကူၣ်တၢ်သ့န့ၣ်ကကပီၤထီၣ်ဒ်မူခိၣ်အတၢ်ကပီၤအသိး,ဒီးပှၤလၢအဒုးတီဒုးလိၤပှၤအါဂၤန့ၣ်ဒ်ဆၣ်ဧိၤဖီဧိၤအသိးအစိၤစိၤအဃၣ်ဃၣ်လီၤ. 4ဒီးနဲဒၣ်အံၤ,စီၤဒၤနံးယ့လးဧၢ,ကးတံာ်ဃာ်တၢ်ကတိၤတဖၣ်န့ၣ်,ဒီးစဲဃာ်ပနီၣ်လံာ်တုၤတၢ်အကတၢၢ်န့ၣ်တက့ၢ်.ပှၤအါဂၤကကွၢ်ဆိကမိၣ်တၢ်ထံထံဆးဆး,ဒီးတၢ်သ့ၣ်ညါကအါထီၣ်လီၤ. 5ဒီးယၤစီၤဒၤနံးယ့လးအံၤ,ယကွၢ်တၢ်,ဒီးကွၢ်ကွၢ်,ပှၤအဂၤခံဂၤဆၢထၢၣ်ဝဲ,တဂၤလၢထံနံၤအအံၤတခီ,ဒီးတဂၤလၢထံနံၤဝၢ်ဘးခီလီၤ. 6ဒီးပှၤဘၣ်စံးပှၤကူသိးဝဲဒီးတၢ်ဖှီဝါကဆှၣ်လၢအအိၣ်ဝဲလၢထံဖံးခိၣ်န့ၣ်တၢ်လီၤလးတဖၣ်အကတၢၢ်န့ၣ်အိၣ်ဆံးယံာ်လဲၣ်. 7ဒီးယနၢ်ဟူပှၤလၢအကူသိးဝဲဒီးဖှီဝါကဆှၣ်လၢအအိၣ်ဝဲလၢထံဖံးခိၣ်တဂၤအကလုၢ်,ယူာ်ထီၣ်အစုထွဲဒီးအစုစ့ၣ်ဆူမူခိၣ်,ဒီးဆိၣ်တၢ်လၢတၢ်လၢပှၤအမူဝဲလီၤထူလီၤယိာ်တဂၤအမဲာ်ညါဒီးစံး,ကအိၣ်ဝဲလၢအကတီၢ်တကတီၢ်,ဒီးကတီၢ်တဖၣ်,ဒီးဖးဖီတကတီၢ်န့ၣ်လီၤ.ဒီးတုၤတၢ်မၤသဘှံးကွံာ်ပှၤဂီၢ်မုၢ်စီဆှံအစိအကမီၤလၢာ်ဝံၤဒီး,တၢ်ခဲလၢာ်န့ၣ်ကဝံၤဝဲလီၤ. 8ဒီးယနၢ်ဟူတၢ်ဘၣ်ဆၣ်ဒီး,ယနၢ်တပၢၢ်ဘၣ်,ဒီးယစံး,ယကစၢ်ဧၢ,တၢ်တဖၣ်န့ၣ်အကတၢၢ်ကမၤအသးဒ်လဲၣ်. 9ဒီးစံးဝဲဒၣ်,ဟးထီၣ်တက့ၢ်.စီၤဒၤနံးယ့လးဧၢ,အဂ့ၢ်ဒ်အံၤ,တၢ်ကတိၤန့ၣ်ကးတံာ်ဃာ်လံအသးဒီးစဲဃာ်ပနီၣ်လံအသးတုၤတၢ်အကတၢၢ်ဘၣ်လီၤ. 10ပှၤအါဂၤကမၤကဆှီထီၣ်အသး,ဒီးကမၤဝါထီၣ်အသးဒၣ်ဝဲ,ဒီးကဆှံထီၣ်ဝဲလီၤ.မ့မ့ၢ်ပှၤအအၢတဖၣ်န့ၣ်ကမၤအၢတၢ်,ဒီးပှၤအၢန့ၣ်အနၢ်တပၢၢ်ဘၣ်တၢ်နီတဂၤဘၣ်.မ့မ့ၢ်ပှၤကူၣ်တၢ်သ့တဖၣ်န့ၣ်အနၢ်ကပၢၢ်တၢ်လီၤ. 11ဒီးလၢတၢ်အကတီၢ်လၢတၢ်ကပာ်ကွံာ်တၢ်လုၢ်တနံၤဘၣ်တနံၤ,ဒီးလၢတၢ်ပာ်ထီၣ်တၢ်သးဘၣ်အၢလၢအမၤသယုၢ်တၢ်လံၤလံၤန့ၣ်အနံၤတကထိခံကယၤခွံဆံကအိၣ်ဝဲလီၤ. 12ပှၤလၢအအိၣ်ခိးဝဲ,ဒီးတုၤလၢတကထိသၢကယၤသၢဆံယဲၢ်နံၤန့ၣ်ဘၣ်ဆိၣ်ဂ့ၤဝဲလီၤ. 13မ့မ့ၢ်နဲဒၣ်အံၤလဲၤတၢ်တုၤအကတၢၢ်တက့ၢ်.ဒီးနကအိၣ်ဘှံး,ဒီးဆၢထၢၣ်လၢနကီၢ်အပူၤလၢမုၢ်နံၤတဖၣ်အကတၢၢ်လီၤ.
Copyright information for
KswSKMB