Daniel 3
1စီၤပၤနဘူၤကးန့စၢ်တ့တၢ်ဂီၤထူလၢအထီအပျၢ်ဃုဆံ,ဒီးအဒီၣ်တူာ်ဃုပျၢ်လီၤ.ပာ်ဝဲလၢတၢ်ပျီပူၤဒူရၤလၢကီၢ်ဘၤဘူၤလိၣ်အပူၤလီၤ. 2ဒီးစီၤပၤနဘူၤကးန့စၢ်မၢပှၤလဲၤဒုးအိၣ်ဖှိၣ်ရိဖှိၣ်ပဒိၣ်ဖးဒိၣ်,ပဒိၣ်ပပှၢ်,ပှၤပၢတၢ်ဖိ,ပှၤစံၣ်ညီၣ်ကွီၢ်,ပှၤကွၢ်စ့ပာ်ဖှိၣ်အလီၢ်,ပှၤသ့တၢ်သိၣ်တၢ်သီ,ပှၤသ့တၢ်မၤလိာ်,ဒီးပှၤပၢတၢ်လၢကီၢ်ဖိအပူၤခဲလၢာ်,ဒ်သိးအကဟဲဘါသီတၢ်ဂီၤလၢစီၤပၤနဘူၤကးန့စၢ်ပာ်ထီၣ်ဝဲန့ၣ်လီၤ. 3တုၤနုၤတစုပဒိၣ်ဖးဒိၣ်,ပဒိၣ်ပပှၢ်,ပှၤပၢတၢ်ဖိ,ပှၤစံၣ်ညီၣ်ကွီၢ်,ပှၤကွၢ်စ့ပာ်ဖှိၣ်အလီၢ်,ပှၤသ့တၢ်သိၣ်တၢ်သီ,ပှၤသ့တၢ်မၤလိာ်,ဒီးပှၤပၢတၢ်လၢကီၢ်ဖိအပူၤခဲလၢာ်န့ၣ်အိၣ်ဖှိၣ်ရိဖှိၣ်ဒ်သိးအကဘါသီတၢ်ဂီၤလၢစီၤပၤနဘူၤကးန့စၢ်ပာ်ထီၣ်ဝဲ,ဒီးဆၢထၢၣ်ဝဲလၢတၢ်ဂီၤလၢစီၤပၤနဘူၤကးန့စၢ်ပာ်ထီၣ်ဝဲအမဲာ်ညါလီၤ. 4ဒီးပှၤကိးတၢ်ဖိကိးပသူထီၣ်,ပှၤဂီၢ်မုၢ်တဖၣ်,ပှၤကလုာ်တဖၣ်,ဒီးပှၤကတိၤတၢ်အကျိာ်အကလုာ်ကလုာ်သ့ၣ်တဖၣ်ဧၢ,တၢ်မၤလိာ်သု, 5ဖဲအကတီၢ်လၢသုနၢ်ဟူကွဲၤ,ပံ,တနၢ်,သီတူၢ်,တြီၢ်,တူခံဘိတမံၤ,ဒီးကယဲၢ်တၢ်သံကျံအသီၣ်ဒီး,သုဘၣ်ထိၣ်တွံၤလီၤသုသး,ဒီးဘါထီၣ်တၢ်ဂီၤထူလၢစီၤပၤနဘူၤကးန့စၢ်ပာ်ထီၣ်ဝဲန့ၣ်လီၤ. 6ဒီးဖဲဒၣ်ပှၤလၢအတထိၣ်တွံၤလီၤအသး,ဒီးတဘါဘၣ်ဝဲတဂၤလၢ်လၢ်န့ၣ်တၢ်ကတ့ၢ်လီၤကွံာ်အီၤလၢမ့ၣ်အူကဲၤထီၣ်အဖၣ်ကပူၤန့ၣ်တကီၢ်ခါလီၤ. 7မၤသးဒ်န့ၣ်ဒီးဖဲအကတီၢ်လၢပှၤကိးကလုာ်ဒဲးန့ၣ်နၢ်ဟူကွဲၤ,ပံ,တနၢ်,သီတူၢ်,တြီၢ်ဒီးကယဲၢ်တၢ်သံကျံအသီၣ်ဒီး,ပှၤဂီၢ်မုၢ်တဖၣ်,ပှၤကလုာ်တဖၣ်,ဒီးပှၤကတိၤတၢ်အကျိာ်အကလုာ်ကလုာ်ခဲလၢာ်န့ၣ်ထိၣ်တွံၤလီၤအသး,ဒီးဘါထီၣ်တၢ်ဂီၤထူလၢစီၤပၤနဘူၤကးန့စၢ်ပာ်ထီၣ်ဝဲလီၤ. 8မၤသးဒ်န့ၣ်ဒီးပှၤကညီ,ပှၤက့ၤစ့းဖိတနီၤသုးဘူးအသး,ဒီးပာ်တၢ်ကမၣ်လၢပှၤယူဒၤဖိအလိၤလီၤ. 9ကတိၤတၢ်ဒီးစီၤပၤနဘူၤကးန့စၢ်,ဒီးစံးဝဲဒၣ်,မ်စီၤပၤမူဝဲလီၤထူလီၤယိာ်တက့ၢ်. 10နဲဒၣ်စီၤပၤဧၢ,နကလုၢ်လီၤလၢကယဲၢ်ပှၤကညီလၢအနၢ်ဟူကွဲၤ,ပံ,တနၢ်,သီတူၢ်,တြီၢ်,တူခံဘိတမံၤ,ဒီးကယဲၢ်တၢ်သံကျံအသီၣ်တဂၤလၢ်လၢ်န့ၣ်ဘၣ်ထိၣ်တွံၤလီၤအသး,ဒီးဘါထီၣ်တၢ်ဂီၤထူ, 11ဒီးဖဲဒၣ်ပှၤလၢအတထိၣ်တွံၤလီၤအသးဘၣ်,ဒီးတဘါထီၣ်ဘၣ်တဂၤဂၤန့ၣ်ကဘၣ်တၢ်တ့ၢ်လီၤကွံာ်အီၤလၢမ့ၣ်အူကဲၤအဖၣ်ကပူၤလီၤ. 12ပှၤကညီ,ပှၤယူဒၤဖိတနီၤလၢနပာ်လီၤလၢတၢ်လၢကီၢ်ဘၤဘူၤလိၣ်အပူၤအဖီခိၣ်,စီၤၡၤဒရး,စီၤမ့ၤၡး,ဒီးစီၤဧဘ့ၤဒနကိၤတဖၣ်န့ၣ်အိၣ်ဝဲလီၤ.စီၤပၤဧၢ,အဝဲသ့ၣ်တဖၣ်န့ၣ်တပးကဲဘၣ်နၤဘၣ်,တမၤဘၣ်နကစၢ်တဖၣ်အတၢ်,ဒီးတဘါတၢ်ဂီၤထူလၢနပာ်ထီၣ်အီၤဘၣ်လီၤ. 13ဒီးစီၤနဘူၤကးန့စၢ်မၤလိာ်ဝဲလၢအသးထီၣ်ဒီးအသးကဲၤထီၣ်ဒ်သိးပှၤကဟဲစိာ်စီၤၡၤဒရး,စီၤမ့ၤၡး,ဒီးစီၤဧဘ့ၤဒနကိၤလီၤ.ဒီးတၢ်ဟဲစိာ်ပှၤတဖၣ်န့ၣ်ဆူစီၤပၤအမဲာ်ညါလီၤ. 14စီၤနဘူၤကးန့စၢ်ကတိၤတၢ်ဒီးအီၤ,ဒီးစံးဝဲဒၣ်,စီၤၡၤဒရး,စီၤမ့ၤၡး,ဒီးစီၤဧဘ့ၤဒနကိၤသ့ၣ်ဧၢ,သုတမၤဘၣ်ယကစၢ်တဖၣ်အတၢ်,သုတဘါတၢ်ဂီၤထူလၢယပာ်ထီၣ်အီၤဘၣ်န့ၣ်သုပာ်သုသးစ့ၢ်ကီးဧါ. 15ဖဲအကတီၢ်လၢသုနၢ်ဟူကွဲၤ,ပံ,တနၢ်,သီတူၢ်,တြီၢ်တူခံဘိတမံၤ,ဒီးကယဲၢ်တၢ်သံကျံအသီၣ်န့ၣ်သုမ့ၢ်ကတဲာ်ကတီၤသုသးဒီး,သုမ့ၢ်ထိၣ်တွံၤလီၤသုသး,ဒီးဘါတၢ်ဂီၤလၢယတ့အီၤဒီး,ဂ့ၤလံ.မ့မ့ၢ်သုမ့ၢ်တဘါဘၣ်ဒီး,သုကဘၣ်တၢ်တ့ၢ်လီၤကွံာ်သုဆူမ့ၣ်အူကဲၤအဖၣ်ကပူၤတကီၢ်ခါလီၤ.ဒီးကစၢ်လၢအကမၤပူၤဖျဲးသုလၢယစုပူၤန့ၣ်မ့ၢ်မတၤတဂၤလဲၣ်. 16စီၤၡၤဒရး,စီၤမ့ၤၡး,ဒီးစီၤဧဘ့ၤဒနကိၤစံးဆၢစီၤပၤနဘူၤကးန့စၢ်ဒီးစံးဝဲဒၣ်,ပစံးဆၢတၢ်လၢတၢ်တမံၤအံၤအဂ့ၢ်န့ၣ်အလီၢ်တအိၣ်ဘၣ်. 17ကွၢ်ကွၢ်,ပကစၢ်လၢပမၤအတၢ်တဂၤန့ၣ်မၤပူၤမၤဖျဲးပှၤဒီးမ့ၣ်အူကဲၤအဖၣ်ကပူၤသ့,ဒီးကမၤပူၤမၤဖျဲးပှၤလၢနစုပူၤလီၤ,စီၤပၤဧၢ. 18မ့တမ့ၢ်ဘၣ်ဒ်န့ၣ်ဒီးသ့ၣ်ညါ,စီၤပၤဧၢ,လၢပတမၤဘၣ်နကစၢ်အတၢ်ဘၣ်,ဒီးပတဘါဘၣ်နတၢ်ဂီၤထူလၢနပာ်ထီၣ်အီၤန့ၣ်တက့ၢ်. 19တုၤနုၤတစုနဘူၤကးန့စၢ်သးထီၣ်ပှဲၤဆၢၣ်ကလာ်,အမဲာ်အက့ၢ်အဂီၤလီၤဆီထီၣ်ထီဒါစီၤၡၤဒရး,စီၤမ့ၤၡး,ဒီးစီၤဧဘ့ၤဒနကိၤလီၤ.ဒီးမၤလိာ်ဝဲလၢပှၤကမၤကိၢ်ဖၣ်ကပူၤန့ၣ်ကိၢ်န့ၢ်အလီၢ်န့ၣ်နွံစးလီၤ. 20ဒီးမၤလိာ်ပှၤအဂံၢ်ဆူၣ်အဘါဆူၣ်လၢအသုးမုၢ်အကျါတဖၣ်ဒ်သိးအကစၢဃာ်စီၤၡၤဒရး,စီၤမ့းၡး,ဒီးစီၤဧဘ့ၤဒနကိၤ,ဒီးတ့ၢ်လီၤကွံာ်အီၤလၢမ့ၣ်အူကဲၤအဖၣ်ကပူၤလီၤ. 21တုၤနုၤတစုပှၤစၢဃာ်အဝဲသ့ၣ်အိၣ်ဒီးအတၢ်ဖျီၣ်ခံ,ဒီးအဆ့,ဒီးအယၣ်,ဒီးအတၢ်ကူတၢ်သိးအဂၤ,ဒီးတ့ၢ်လီၤကွံာ်အီၤလၢမ့ၣ်အူကဲၤအဖၣ်ကပူၤအသးကံၢ်ပူၤလီၤ. 22မၤသးဒ်န့ၣ်ဒီးမ့ၢ်စီၤပၤအမၤလိာ်တၢ်ဆူၣ်ဝဲ,ဒီးဖၣ်ကပူၤန့ၣ်ကိၢ်နးနးကလဲာ်သတးဒီး,မ့ၣ်အူလၣ်ပျ့ၤအီၣ်သံပှၤကညီလၢအစိာ်ထီၣ်စီၤၡၤဒရး,စီၤမ့ၤၡး,ဒီးစီၤဧဘ့ၤဒနကိၤလီၤ. 23ဒီးစီၤၡၤဒရး,စီၤမ့ၤၡး,ဒီးစီၤဧဘ့ၤဒနကိၤသၢဂၤန့ၣ်လီၤတဲာ်စၢဃာ်အသးလၢမ့ၣ်အူကဲၤအဖၣ်ကပူၤအသးကံၢ်ပူၤလီၤ. 24ဒီးစီၤပၤနဘူၤကးန့စၢ်န့ၣ်ပာ်အသးကမၢကမၣ်,ဒီးဂဲၤဆၢထၢၣ်ချ့ချ့ဒီးကတိၤတၢ်,ဒီးစံးဘၣ်အပှၤကူၣ်လိာ်အသးတဖၣ်န့ၣ်,ပတ့ၢ်လီၤကွံာ်ပှၤသၢဂၤစၢဃာ်အသးလၢမ့ၣ်အူအကျါန့ၣ်တမ့ၢ်ဘၣ်ဧါ.အဝဲသ့ၣ်စံးဆၢတၢ်ဒီးစံးဝဲ,မ့ၢ်ယၢာ်,စီၤပၤဧၢ. 25စံးဆၢဝဲဒၣ်ဒီးစံး,ကွၢ်ကွၢ်,ယထံၣ်ပှၤထူၣ်ဖျဲးလွံၢ်ဂၤ,လဲၤတၢ်လၢမ့ၣ်အူကျါ,ဒီးတဘၣ်ဘၣ်တၢ်အၢနီတမံၤဘၣ်,ဒီးလွံၢ်ဂၤတဂၤမၤအသးဒ်ကစၢ်အဖိခွါအသိးန့ၣ်လီၤ. 26တုၤနုၤတစုနဘူၤကးန့စၢ်သုးဘူးအသးဒီးမ့ၣ်အူအဖၣ်ကပူၤအကျဲစၢၤလီၤ.ကတိၤတၢ်ဒီးစံးဝဲဒၣ်,ကစၢ်အထီကတၢၢ်အခ့အပှၤ,စီၤၡၤဒရး,စီၤမ့ၤၡး,ဒီးစီၤဧဘ့ၤဒနကိၤသ့ၣ်ဧၢ,ဟဲက့ၤထီၣ်ဒီးဟဲတက့ၢ်.တုၤနုၤတစုစီၤၡၤဒရး,စီၤမ့ၤၡး,ဒီးစီၤဧဘ့ၤဒနကိၤဟဲက့ၤထီၣ်လၢမ့ၣ်အူကျါလီၤ. 27ဒီးပဒိၣ်ဖးဒိၣ်,ပဒိၣ်ပပှၢ်,ပှၤပၢၤတၢ်ဖိ,ဒီးစီၤပၤအပှၤကူၣ်လိာ်အသးအိၣ်ဖှိၣ်ရိဖှိၣ်ဝဲ,ဒီးကွၢ်ပှၤကညီတဖၣ်အံၤလၢမ့ၣ်အူအစိအကမီၤတအိၣ်ဘၣ်လၢအနီၢ်ခိအဖီခိၣ်,ဒီးအခိၣ်သူတကိၢ်ဃိာ်ဘၣ်နီတဘိဘၣ်.ဒီးအတၢ်ဖျီၣ်ခံအိၣ်ဒၣ်အတၢ်,ဒီးမ့ၣ်အူအနၢတဘၣ်ဘၣ်အီၤဘၣ်. 28နဘူၤကးန့စၢ်ကတိၤတၢ်ဒီးစံးဝဲဒၣ်,စီၤၡၤဒရး,စီၤမ့ၤဒီးစီၤဧဘ့ၤဒနကိၤတဖၣ်အကစၢ်လၢအမၢလီၤအကလူးတဂၤ,ဒီးမၤပူၤမၤဖျဲးအခ့အပှၤလၢအသန့ၤအသးလၢအီၤ,ဒီးလဲလိာ်စီၤပၤအတၢ်မၤလိာ်,ဒီးဟ့ၣ်လီၤကွံာ်အနီၢ်ခိဒ်သိးအသုတမၤကစၢ်အဂၤအတၢ်,လၢအတမ့ၢ်ဘၣ်အကစၢ်,ဒီးအသုတဘါအီၤတဂ့ၤန့ၣ်,မ်အဘၣ်တၢ်ဆိၣ်ဂ့ၤအီၤတက့ၢ်. 29မၤသးဒ်န့ၣ်ဒီးယကလုၢ်လီၤလၢကယဲၢ်ပှၤဂီၢ်မုၢ်,ပှၤကလုာ်တဖၣ်,ဒီးပှၤကတိၤတၢ်အကျိာ်အကလုာ်ကလုာ်လၢအကတိၤကမၣ်ဘၣ်စီၤၡၤဒရး,စီၤမ့ၤၡး,ဒီးစီၤဧဘ့ၤဒနကိၤအကစၢ်တဂၤလၢ်လၢ်န့ၣ်တၢ်ကဒီၣ်တဲာ်ကွံာ်အီၤတကူာ်တကူာ်,ဒီးအဟံၣ်ကကဲထီၣ်တၢ်အ့ၣ်အလီၢ်လီၤ.အဂ့ၢ်ဒ်အံၤ,ကစၢ်အဂၤလၢအမၤပူၤမၤဖျဲးတၢ်ဒ်အံၤသိးတအိၣ်ဘၣ်. 30တုၤနုၤတဘျီစီၤပၤဒုးဘီၣ်ထီၣ်ညီထီၣ်စီၤၡၤဒရး,စီၤမ့ၤၡး,ဒီးစီၤဧဘ့ၤဒနကိၤလၢကီၢ်ဘၤဘူၤလိၣ်အပူၤလီၤ.
Copyright information for
KswSKMB