Deuteronomy 16
1တိၢ်န့ၢ်လါအါဘံာ်,ဒီးမၤဘူၣ်လဲၤကပာ်လၢယွၤနကစၢ်အဂီၢ်တက့ၢ်.အဂ့ၢ်ဒ်အံၤ,လၢလါအါဘံာ်အတီၢ်ပူၤန့ၣ်ယွၤဒုးဟးထီၣ်ကွံာ်နၤလၢအဲၤကူပတူးလၢမုၢ်နၤန့ၣ်လီၤ. 2ဒီးလၢသိလၢမဲာ်တဲးလဲးမ့ၢ်ဂ့ၤ,လၢဂီၤဘုၣ်ဂီၤဖံးမ့ၢ်ဂ့ၤ,နဘၣ်လုၢ်တၢ်လဲၤကပာ်လၢယွၤနကစၢ်အဂီၢ်ဖဲအလီၢ်လၢယွၤနကစၢ်ကဃုထၢပာ်အမံၤန့ၣ်လီၤ. 3နတဘၣ်အီၣ်ကိၣ်အိၣ်ဒီးကိၣ်မံၣ်ဒီးအီၤဘၣ်,နဘၣ်အီၣ်ကိၣ်တအိၣ်ဒီးကိၣ်မံၣ်နွံနံၤ,ကိၣ်ဘၣ်ဃးဒီးတၢ်နးတၢ်ဖှီၣ်,(အဂ့ၢ်ဒ်အံၤ,နဟးထီၣ်ကွံာ်လၢကီၢ်အဲၤကူပတူးချ့ချ့),ဒ်သိးနကသ့ၣ်နီၣ်ထီၣ်က့ၤမုၢ်တနံၤလၢနဟးထီၣ်ကွံာ်လၢကီၢ်အဲၤကူပတူးအပူၤတစိၤဒၣ်နၤကိးမုၢ်နံၤမုၢ်နၤဒဲးလီၤ. 4ဒီးကိၣ်အိၣ်ဒီးကိၣ်မံၣ်န့ၣ်တဘၣ်အိၣ်လၢနဃၢၤနီတပူၤနွံနံၤညါ,ဒီးတၢ်ညၣ်လၢနလုၢ်အီၤ,လၢအခီၣ်ထံးတနံၤန့ၣ်တဘၣ်အိၣ်လီၤတဲာ်သီတနၤကျၢၤတုၤမုၢ်ဂီၤဘၣ်. 5နတဘၣ်လုၢ်တၢ်လဲၤကပာ်လၢနပဲတရီအပူၤလၢယွၤနကစၢ်ဟ့ၣ်လီၤနၤနီတပူၤဘၣ်, 6မ့ၢ်လၢအလီၢ်ဖဲယွၤနကစၢ်ကဃုထၢပာ်အမံၤ,ဖဲန့ၣ်နဘၣ်လုၢ်တၢ်လဲၤကပာ်လၢမုၢ်ဟါ,လၢမုၢ်လီၤနုာ်,အဆၢအကတီၢ်လၢနဟးထီၣ်ကွံာ်လၢအဲၤကူပတူးအပူၤလီၤ. 7ဒီးနဘၣ်ကၣ်အီၤ,ဒီးအီၣ်အီၤဖဲအလီၢ်လၢယွၤနကစၢ်ကဃုထၢ,ဒီးနဘၣ်ဃၣ်နသးလၢမုၢ်ဆ့ၣ်ထီၣ်,ဒီးက့ၤက့ၤဆူနဒဲတဖၣ်အပူၤလီၤ. 8ဃုနံၤနဘၣ်အီၣ်ကိၣ်တအိၣ်ဘၣ်ဒီးကိၣ်မံၣ်ဘၣ်,ဒီးနွံနံၤတနံၤတၢ်အိၣ်ဖှိၣ်လၢယွၤနကစၢ်အဂီၢ်န့ၣ်ကအိၣ်လီၤ.နတဘၣ်မၤတၢ်မၤဘၣ်. 9နဘၣ်ဂံၢ်နွံနံၤလၢနဂီၢ်လီၤ.လၢနဒၢနုာ်သီထါဂဲာ်လၢဘုကျါန့ၣ်နဘၣ်ဂံၢ်သီနွံနွံန့ၣ်လီၤ. 10ဒီးနဘၣ်မၤတၢ်မၤဘူၣ်နွံတဖၣ်လၢတၢ်မၤဘူၣ်ဒၣ်တၢ်လၢနစုပူၤလၢနဘၣ်ဟ့ၣ်လၢယွၤနကစၢ်,ဒ်ယွၤနကစၢ်ဆိၣ်ဂ့ၤနၤအသိးန့ၣ်လီၤ. 11ဒီးနသးကခုလၢယွၤနကစၢ်အမဲာ်ညါ,နဲဒၣ်,ဒီးနဖိခွါ,ဒီးနဖိမုၣ်,ဒီးနကုၢ်ပိာ်ခွါ,ဒီးနကုၢ်ပိာ်မုၣ်,ဒီးပှၤလ့ၤဝံဖိလၢအအိၣ်လၢနပဲတရီအပူၤ,ဒီးပှၤတခီဘီမုၢ်ဖိ,ဒီးပှၤဖိၣ်ဃဲ,ဒီးပှၤမုၣ်ကမဲ,လၢအအိၣ်လၢသုကျါဖဲအလီၢ်အိၣ်လၢယွၤနကစၢ်ကဃုထၢပာ်အမံၤလီၤ. 12ဒီးနဘၣ်သ့ၣ်နီၣ်ထီၣ်က့ၤလၢနမ့ၢ်ပှၤကုၢ်ဖိလၢအဲၤကူပတူးအပူၤ,ဒီးနဘၣ်တိၢ်န့ၢ်,ဒီးမၤတၢ်မၤလိာ်တဖၣ်အံၤလီၤ. 13ဒီးနပာ်ဖှိၣ်နဘုဒီးနစပံးထံအလီၢ်ခံန့ၣ်နဘၣ်မၤတၢ်ဘူၣ်ဒဲနွံနံၤလီၤ. 14နသးကခုလၢနဘူၣ်ပူၤ,နဲဒၣ်,ဒီးနဖိခွါ,ဒီးနဖိမုၣ်,ဒီးနကုၢ်ပိာ်ခွါ,ဒီးနကုၢ်ပိာ်မုၣ်,ဒီးပှၤလ့ၤဝံဖိ,ဒီးပှၤတခီဘီမုၢ်ဖိဒီးပှၤဖိၣ်ဃဲ,ဒီးပှၤမုၣ်ကမဲ,လၢအအိၣ်လၢနပဲတရီအပူၤလီၤ. 15နွံနံၤန့ၣ်နဘၣ်မၤတၢ်လၢယွၤအဂီၢ်ဖဲအလီၢ်လၢယွၤနကစၢ်ကဃုထၢအီၤလီၤ.အဂ့ၢ်ဒ်အံၤယွၤနကစၢ်ကဆိၣ်ဂ့ၤနၤလၢနတၢ်အါထီၣ်ခဲလၢာ်,ဒီးလၢကယဲၢ်နမၤတၢ်လၢနစုလီၤ.မၤသးဒ်န့ၣ်ဒီးနသးကခုလီၤ. 16တနံၣ်အတီၢ်ပူၤန့ၣ်ကယဲၢ်နဖိခွါဘၣ်အိၣ်ဖျါထီၣ်သၢဘျီလၢယွၤနကစၢ်အမဲာ်ညါ,ဖဲအလီၢ်လၢအကဃုထၢအီၤ,လၢဘူၣ်ကိၣ်တအိၣ်ဒီးကိၣ်မံၣ်အပူၤ,ဒီးလၢဘူၣ်နွံတဖၣ်အပူၤ,ဒီးလၢဘူၣ်ဒဲအပူၤလီၤ.ဒီးတဘၣ်အိၣ်ဖျါလၢယွၤအမဲာ်ညါအိၣ်ကလီဘၣ်. 17တဂၤဒ်တၢ်ဟ့ၣ်လၢအစု,တဂၤဒ်တၢ်ဟ့ၣ်လၢအစုအသိးန့ၣ်,ဒ်ယွၤနကစၢ်အတၢ်ဆိၣ်ဂ့ၤလၢအဟ့ၣ်လီၤနၤအသိးန့ၣ်လီၤ. 18ဒီးနဘၣ်ပာ်ပှၤစံၣ်ညီၣ်ကွီၢ်,ဒီးပှၤကွဲးလံာ်လၢကယဲၢ်နပဲတရီအပူၤလၢယွၤနကစၢ်ဟ့ၣ်လီၤနၤလၢနဒူၣ်ခဲလၢာ်အကျါလီၤ.ဒီးအဝဲသ့ၣ်တဖၣ်န့ၣ်ကစံၣ်ညီၣ်ပှၤဂီၢ်မုၢ်ဒီးတၢ်စံၣ်ညီၣ်တီလီၤ. 19နတဘၣ်ဘိးကမၣ်တၢ်စံၣ်ညီၣ်ဘၣ်,နတဘၣ်ကွၢ်မဲာ်ပှၤကညီဘၣ်,ဒီးနတဘၣ်ဒိးန့ၢ်ခိၣ်ဖးဘၣ်.အဂ့ၢ်ဒ်အံၤ,ခိၣ်ဖးန့ၣ်မၤဘျီၣ်ပှၤကူၣ်တၢ်သ့အမဲာ်,ဒီးဒုးတလံာ်ပှၤတီပှၤလိၤအတၢ်ကတိၤန့ၣ်လီၤ. 20နဘၣ်ပိာ်တၢ်တီတၢ်လိၤအခံဒ်သိးနကမူဒီးန့ၢ်သါကီၢ်လၢယွၤနကစၢ်ဟ့ၣ်လီၤနၤလီၤ. 21သူၣ်အရှ့ရၤဘူးဒီးယွၤနကစၢ်အတၢ်လုၢ်လီၢ်လၢနကမၤလၢနဂီၢ်နီတမံၤတဂ့ၤ. 22ဒီးဘိးဆၢထၢၣ်တၢ်ဂီၤလၢယွၤနကစၢ်သးဟ့အီၤတဂ့ၤ.
Copyright information for
KswSKMB