Deuteronomy 18
1ပှၤလုၢ်တၢ်အဒိၣ်ဒီးပှၤလ့ၤဝံဖိတဒူၣ်ခဲလၢာ်န့ၣ်အဂီၢ်ဂ့ၤ,အတၢ်န့ၢ်သါဂ့ၤ,တဘၣ်အိၣ်ဒီးပှၤအံၣ်စရ့လးဖိဘၣ်,ဘၣ်အီၣ်ယွၤအတၢ်လုၢ်မ့ၣ်အူ,ဒီးအတၢ်န့ၢ်သါလီၤ. 2ဒီးတဘၣ်အိၣ်ဒီးအတၢ်န့ၢ်သါလၢအဒီပုၢ်ဝဲၢ်အကျါဘၣ်,ယွၤမ့ၢ်အတၢ်န့ၢ်သါ,ဒ်အစံးဘၣ်အီၤအသိးန့ၣ်လီၤ. 3ဒီးအအံၤမ့ၢ်တၢ်စံၣ်ညီၣ်ဘၣ်ဃးဒီးပှၤလုၢ်တၢ်အဒိၣ်လၢအကန့ၢ်ဘၣ်လၢပှၤဂီၢ်မုၢ်,ဒီးလၢပှၤလၢအလုၢ်တၢ်လုၢ်ဂီၤဖံးမ့ၢ်ဂ့ၤ,သိမဲာ်တဲးလဲးမ့ၢ်ဂ့ၤ,ဘၣ်ဟ့ၣ်ပှၤလုၢ်တၢ်အဒိၣ်လၢအဖံဘၣ်ခိၣ်,ဒီးအဘိးခံခီ,ဒီးအကဖုလီၤ. 4တၢ်အဆိဘၣ်ဃးဒီးနဘုဧိၤဟုဧိၤ,နစပံးထံ,ဒီးနသိဒီးသိအဆူၣ်လၢနတံာ်ဆိန့ၣ်နဘၣ်ဟ့ၣ်လီၤအီၤလီၤ. 5အဂ့ၢ်ဒ်အံၤ,ယွၤနကစၢ်ဃုထၢလံအီၤလၢနဒူၣ်ခဲလၢာ်အကျါ,ဒ်သိးအကဆၢထၢၣ်မၤတၢ်လၢယွၤအမံၤ,အဝဲဒၣ်ဒီးအဖိခွါကိးမုၢ်နံၤမုၢ်နၤဒဲးလီၤ. 6ဒီးပှၤလ့ၤဝံဖိမ့ၢ်ဟဲလၢနပဲတရီတပူၤပူၤလၢကယဲၢ်ပှၤအံၣ်စရ့လးဖိအကျါဖဲအအိၣ်ဝဲ,ဒီးဟဲဆၢတၢ်လၢအသးဒီဖျၢၣ်ညါဆူတၢ်အလီၢ်လၢယွၤကဃုထၢအီၤဒီး, 7ကမၤတၢ်လၢယွၤအကစၢ်အမံၤ,ဒ်အဒီပုၢ်ဝဲၢ်ခဲလၢာ်ပှၤလ့ၤဝံဖိ,လၢအဆၢထၢၣ်ဖဲန့ၣ်လၢယွၤအမဲာ်ညါအသိးန့ၣ်လီၤ. 8ဒီးကအီၣ်ဘၣ်အဂီၢ်ဒ်အဝဲသ့ၣ်အဂီၢ်အသိးန့ၣ်လီၤ.လၢန့ၣ်အမဲာ်ညါကန့ၢ်ဘၣ်တၢ်လၢအဟဲလၢအဆါကွံာ်တၢ်လၢအပၢ်အတၢ်တဖၣ်လီၤ. 9တုၤနလဲၤတုၤလၢကီၢ်ပူၤလၢယွၤနကစၢ်ဟ့ၣ်လီၤနၤဒီး,နတဘၣ်မၤလိမၤတၢ်ဒ်ပှၤကလုာ်တဖၣ်အတၢ်သးဘၣ်အၢအသိးန့ၣ်ဘၣ်. 10ပှၤလၢအမၢအဖိခွါဂ့ၤ,အဖိမုၣ်ဂ့ၤ,ခီဂာ်မ့ၣ်အူမ့ၢ်ဂ့ၤ,ပှၤဖးတၢ်ဖိမ့ၢ်ဂ့ၤ,ပှၤလၢအဒုၣ်တၢ်အဆၢကတီၢ်မ့ၢ်ဂ့ၤ,ပှၤလၢအဟိၣ်တၢ်လိၢ်တၢ်မ့ၢ်ဂ့ၤ,ပှၤမၤကဒါပမဲာ်မ့ၢ်ဂ့ၤ, 11ပှၤသ့တၢ်အူတၢ်သမူမ့ၢ်ဂ့ၤ,ပှၤမၤန့ၢ်ပှၤသံကလၤမ့ၢ်ဂ့ၤ,ပှၤမဲာ်ထံၣ်ဝံမ့ၢ်ဂ့ၤ,ပှၤလၢအသံကွၢ်တၢ်လၢပှၤသံမ့ၢ်ဂ့ၤ,တဘၣ်အိၣ်လၢသုကျါဘၣ်. 12အဂ့ၢ်ဒ်အံၤ,ကယဲၢ်ပှၤလၢအမၤတၢ်တဖၣ်န့ၣ်မ့ၢ်ယွၤအတၢ်သးဘၣ်အၢလီၤ.ဒီးယွၤနကစၢ်ဟီထီၣ်ကွံာ်အီၤလၢနမဲာ်ညါလၢတၢ်သးဘၣ်အၢန့ၣ်တဖၣ်အဃိလီၤ. 13နဘၣ်လၢထီၣ်ပှဲၤထီၣ်ဒီးယွၤနကစၢ်လီၤ. 14အဂ့ၢ်ဒ်အံၤ,ပှၤကလုာ်လၢနကမၤန့ၢ်အီၤတဖၣ်န့ၣ်ဒိကနၣ်ပှၤလၢအဒုၣ်တၢ်အဆၢကတီၢ်,ဒီးပှၤလၢအဖးတၢ်တဖၣ်အကလုၢ်လီၤ.မ့မ့ၢ်နဲဒၣ်အံၤတဟ့ၣ်နမၤတၢ်ဒ်န့ၣ်ဘၣ်. 15ယွၤနကစၢ်ကဒုးဂဲၤဆၢထၢၣ်ဝံတဂၤလၢနဒီပုၢ်ဝဲၢ်အကျါဒ်ယၤအသိးန့ၣ်,သုဘၣ်ဒိကနၣ်အကလုၢ်အကထါလီၤ. 16ဒ်ကယဲၢ်တၢ်လၢနဃ့လၢယွၤနကစၢ်လၢဃိၤရ့းအပူၤလၢတၢ်အိၣ်ဖှိၣ်အမုၢ်နံၤအသိးန့ၣ်,လၢနစံး,မ်ယသုတနၢ်ဟူလၢၤယွၤယကစၢ်အကလုၢ်,ဒီးမ်ယသုတထံၣ်ဘၣ်လၢၤမ့ၣ်အူဖးဒိၣ်အံၤတဂ့ၤ,ဒ်သိးယသုတသံတဂ့ၤန့ၣ်လီၤ. 17ဒီးယွၤစံးဘၣ်ယၤ,တၢ်လၢအကတိၤတၢ်န့ၣ်ဂ့ၤမးလီၤ. 18ယကဒုးဂဲၤဆၢထၢၣ်ဝံတဂၤလၢအဒီပုၢ်ဝဲၢ်အကျါ,ဒ်နၤအသိး,ဒီးယကပာ်ယတၢ်ကတိၤလၢအထးခိၣ်,ဒီးအဝဲဒၣ်ကကတိၤတၢ်ဒီးအီၤလၢကယဲၢ်တၢ်လၢယကမၤလိာ်အီၤလီၤ. 19ဒီးတၢ်ကမၤအသးလၢဖဲဒၣ်ပှၤလၢအတဒိကနၣ်ဘၣ်ယကလုၢ်ကထါလၢအဝဲဒၣ်ကကတိၤတၢ်လၢယမံၤတဂၤဂၤန့ၣ်ယကဃုတၢ်လၢအီၤလီၤ. 20မ့မ့ၢ်ဝံလၢအပာ်အသးကဖိလိ,ဒီးကတိၤတၢ်ကတိၤတထံၣ်လၢယမံၤလၢယတမၤလိာ်ဘၣ်အီၤဒ်သိးအကကတိၤတၢ်မ့ၢ်ဂ့ၤ,မ့ၢ်ကတိၤတၢ်လၢကစၢ်အဂၤတဖၣ်အမံၤမ့ၢ်ဂ့ၤ,တၢ်လၢဝံတဂၤန့ၣ်ကဘၣ်တၢ်မၤသံအီၤလီၤ. 21ဒီးတၢ်ကတိၤလၢယွၤတကတိၤဘၣ်န့ၣ်ပကသ့ၣ်ညါဒ်လဲၣ်န့ၣ်နမ့ၢ်စံးလၢနသးကံၢ်ပူၤဒီး, 22တုၤဝံတဂၤကတိၤတၢ်လၢယွၤအမံၤဒီး,တၢ်မ့ၢ်တမၤအသးဘၣ်,ဒီးတကဲထီၣ်ဘၣ်တၢ်ဘၣ်ဒီး,တၢ်န့ၣ်တမံၤမ့ၢ်တၢ်လၢယွၤတကတိၤဘၣ်,မ့ၢ်ဝံတဂၤန့ၣ်ပာ်အသးကဖိလိဒီးကတိၤတၢ်န့ၣ်လီၤ,ပျံၤအီၤတဂ့ၤ.
Copyright information for
KswSKMB