‏ Deuteronomy 2

1ဒီးပဃၣ်ပသး,ဒီးပဟးထီၣ်ဆူပှၢ်မုၢ်ကနၢလၢပီၣ်လဲၣ်ဂီၤအကျဲ,ဒ်ယွၤကတိၤတၢ်ဒီးယၤအသိးန့ၣ်,ဒီးပလဲၤဝးတရံးကစၢၢ်စ့ဧၢ်အါနံၤအါသီလီၤ.

2ဒီးယွၤကတိၤတၢ်ဒီးယၤ,ဒီးစံးဝဲဒၣ်, 3သုလဲၤတရံးကစၢၢ်အံၤအါလံ.ဃၣ်သုသးဆူကလံၤစိးတခီတက့ၢ်,

4ဒီးမၤလိာ်ပှၤဂီၢ်မုၢ်,ဒီးစံးဘၣ်အီၤသုကခီဂာ်သုဒီပုၢ်ဝဲၢ်,စီၤဧ့ၡီၤအဖိအကီၢ်ဃၢၤလၢအအိၣ်လၢစ့ဧၢ်,ဒီးကပျံၤသုလီၤ.ပလီၢ်သုသးသပှၢ်တၢၢ်တက့ၢ်. 5မၤကိၢ်မၤဂီၤအီၤတဂ့ၤ.အဂ့ၢ်ဒ်အံၤ,ယတဟ့ၣ်လီၤသုလၢအကီၢ်ဘၣ်,ထဲသိးဒီးခီၣ်ညါသးအလီၢ်ယတဟ့ၣ်ဘၣ်.အဂ့ၢ်ဒ်အံၤ,ယဟ့ၣ်လံကစၢၢ်စ့ဧၢ်လၢစီၤဧ့ၡီၤလၢတၢ်န့ၢ်သါအဂီၢ်လံ.

6သုဘၣ်ပှ့ၤတၢ်အီၣ်လၢစ့လၢအီၤ,ဒ်သိးသုကအီၣ်တၢ်,ဒီးသုဘၣ်ပှ့ၤစ့ၢ်ကီးထံလၢစ့လၢအီၤ,ဒ်သိးသုကအီတၢ်လီၤ.

7အဂ့ၢ်ဒ်အံၤ,လၢကယဲၢ်နမၤတၢ်လၢနစုန့ၣ်ယွၤနကစၢ်ဆိၣ်ဂ့ၤလံနၤလံ.နလဲၤတၢ်လၢပှၢ်မုၢ်ကနၢဖးဒိၣ်အံၤ,သ့ၣ်ညါဝဲလီၤ.အနံၣ်လွံၢ်ဆံအံၤယွၤအိၣ်လံဒီးနၤလံ.နတဆံးလီၤစှၤလီၤဘၣ်တၢ်ဘၣ်.

8ဒီးတုၤပလဲၤပူၤကွံာ်ပဒီပုၢ်ဝဲၢ်စီၤဧ့ၡီၤအဖိလၢအအိၣ်ဝဲလၢစ့ဧၢ်လၢကျဲလၢပျီပူၤလၢအ့လၤသး,ဒီးလၢဧ့းစယိၣ်က့ဘ့ၢ်ဒီး,ပဃၣ်ပသး,ဒီးပလဲၤပိာ်ကျဲလၢပှၢ်မုၢ်ကနၢမိၤအးလီၤ.

9(ဒီးယွၤစံးဘၣ်ယၤ,မၤကိၢ်မၤဂီၤပှၤမိၤအးဖိတဂ့ၤ,ဒီးဒုးသုးဒီးအီၤတဂ့ၤ.အဂ့ၢ်ဒ်အံၤ,ယတဟ့ၣ်လီၤဘၣ်နၤလၢအကီၢ်လၢတၢ်န့ၢ်သါအဂီၢ်ဘၣ်.အဂ့ၢ်ဒ်အံၤ,ယဟ့ၣ်လီၤလံဧၢ်လၢစီၤလိာ်အဖိလၢအတၢ်န့ၢ်သါအဂီၢ်လံ,

10ပှၤအ့ၣ်ဖိအိၣ်ဝဲဖဲန့ၣ်လၢပျၢၤလီၤ.ပှၤတကလုာ်လၢအနီၢ်ဒိၣ်,ဒီးအါဝဲ,ဒီးအနီၢ်ထီဝဲ,ဒ်ပှၤဧနးဖိအသိးန့ၣ်လီၤ. 11ပှၤပာ်အီၤလၢပှၤနီၢ်ဒိၣ်ဖိဒ်ပှၤဧနးဖိအသိးန့ၣ်လီၤ.မ့မ့ၢ်ပှၤမိၤအးဖိကိးအီၤလၢပှၤအ့ၣ်ဖိလီၤ.

12ဒီးပှၤဃိရံၤဖိအိၣ်ဝဲလၢစ့ဧၢ်လၢပျၢၤလီၤ.မ့မ့ၢ်စီၤဧ့ၡီၤအဖိမၤဟးဂီၤအီၤလၢအမဲာ်ညါ,ဒီးအိၣ်ဝဲလၢအလီၢ်န့ၣ်,ဒီးန့ၢ်ဘၣ်သါအတၢ်ဒ်အံၣ်စရ့လးမၤကီၢ်လၢအန့ၢ်ဘၣ်သါတၢ်လၢယွၤဟ့ၣ်လီၤအီၤအသိးလီၤ.)

13ခဲကနံၣ်အံၤဂဲၤဆၢထၢၣ်,ဒီးခီဂာ်ထံစ့ရ့းအကျိတက့ၢ်.ဒီးပခီဂာ်ထံစ့ရ့းအကျိလီၤ.

14ဒီးမုၢ်နံၤမုၢ်နၤတဖၣ်လၢပဟဲလၢကၤဒ့ၣ်ဘၢ်န့တုၤပခီဂာ်ထံစရ့းအကျိန့ၣ်,မ့ၢ်သၢဆံဃိးနံၣ်,တုၤကယဲၢ်ပှၤသုးဖိတစိၤလၢာ်ဝဲလၢပှၤသုးမုၢ်အကျါတဂၤလၢ်လၢ်န့ၣ်,ဒ်ယွၤဆိၣ်တၢ်ဒီးအီၤအသိးန့ၣ်လီၤ.

15မ့ၢ်မးယွၤအစုအိၣ်လၢအလိၤ,ဒ်သိးအကမၤဟးဂီၤကွံာ်အီၤလၢပှၤသုးမုၢ်အကျါတုၤအလၢာ်လီၤ.

16ဒီးတုၤပှၤသုးမုၢ်ခဲလၢာ်န့ၣ်လၢာ်ဝဲ,ဒီးသံဝဲလၢပှၤဂီၢ်မုၢ်အကျါဒီး, 17တၢ်မၤအသးလၢယွၤကတိၤတၢ်ဒီးယၤ,ဒီးစံးဝဲဒၣ်, 18မုၢ်မဆါတနံၤအံၤနဘၣ်ခီဂာ်ဧၢ်လၢမိၤအးအဃၢၤ, 19ဒီးတုၤနလဲၤတုၤလၢပှၤဧၣ်မိၣ်ဖိအမဲာ်ညါဒီး,မၤကိၢ်မၤဂီၤအီၤတဂ့ၤ,ဒီးမၤအီၤနီတမံၤတဂ့ၤ,အဂ့ၢ်ဒ်အံၤ,ယတဟ့ၣ်လီၤဘၣ်နၤလၢတၢ်န့ၢ်သါလၢပှၤဧၣ်မိၣ်ဖိအကီၢ်ဘၣ်.အဂ့ၢ်ဒ်အံၤ,ယဟ့ၣ်လီၤလံအီၤလၢစီၤလိာ်အဖိလၢတၢ်န့ၢ်ဘၣ်သါအဂီၢ်လံ.

20(ပှၤပာ်စ့ၢ်ကီးအဝဲန့ၣ်လၢပှၤနီၢ်ဒိၣ်ဖိအကီၢ်လီၤ.ပှၤနီၢ်ဒိၣ်ဖိအိၣ်ဝဲဖဲန့ၣ်လၢပျၢၤ,ဒီးပှၤဧၣ်မိၣ်ဖိကိးအီၤလၢပှၤစၤမစူၣ်ဖိလီၤ. 21ပှၤတကလုာ်အနီၢ်ဒိၣ်,ဒီးအါဝဲ,ဒီးအနီၢ်ထီဒ်ပှၤဧနးဖိအသိးန့ၣ်လီၤ.ဒီးယွၤမၤဟးဂီၤအီၤလၢအမဲာ်ညါ,ဒီးအဝဲသ့ၣ်န့ၢ်သါအတၢ်,ဒီးအိၣ်ဝဲဆိးဝဲအလီၢ်, 22ဒ်အမၤစီၤဧ့ၡီၤအဖိလၢအအိၣ်ဝဲလၢစ့ဧၢ်အပူၤ,လၢအမၤဟးဂီၤတ့ၢ်ပှၤဃိရံၤဖိလၢအမဲာ်ညါ,ဒီးအဝဲသ့ၣ်န့ၢ်သါဝဲလၢအတၢ်,ဒီးအိၣ်ဝဲလၢအလီၢ်တုၤမုၢ်မဆါတနံၤအံၤအသိးန့ၣ်လီၤ. 23ဒီးဒ်ပှၤဧ့ၤဝံဖိအိၣ်လၢဃစ့ရံၣ်တုၤလၢဧးစၤ,ပှၤကၤဖတိၢ်ဖိလၢအဟဲထီၣ်လၢကၤဖတိၢ်န့ၣ်မၤဟးဂီၤအီၤဒီးအိၣ်ဝဲလၢအလီၢ်အသိးန့ၣ်လီၤ.)

24ဂဲၤဆၢထၢၣ်,ဟးထီၣ်,ဒီးခီဂာ်ထံအၢ်နိၣ်တက့ၢ်.ကွၢ်တက့ၢ်,ယဟ့ၣ်လီၤလံလၢနစုပူၤပှၤအမိၢ်ဖိ,ဃ့ၡဘိၣ်အစီၤပၤစံဃိၣ်,ဒီးအကီၢ်လီၤ.မၤန့ၢ်သီ,ဒီးဒုးသုးဒီးအီၤတက့ၢ်.

25လၢမုၢ်မဆါတနံၤအံၤယကပာ်သီတၢ်ဘၣ်ယိာ်နၤ,ဒီးတၢ်ပျံၤနၤလၢပှၤကလုာ်တဖၣ်အလိၤလၢမူခိၣ်ဒီဘ့ၣ်ညါအဖီလာ်,လၢအကနၢ်ဟူနကစီၣ်,ဒီးကကနိးဝဲ,ဒီးအသးကဘၣ်တၢ်ကိၢ်တၢ်ဂီၤလၢနဃိလီၤ.

26ဒီးယမၢလီၤကလူးတဖၣ်လၢပှၢ်မုၢ်ကနၢကဒ့မိးဆူဃ့ၡဘိၣ်အစီၤပၤစံဃိၣ်အအိၣ်,အိၣ်ဒီးတၢ်ဃူတၢ်ဖိးအတၢ်ကတိၤတဖၣ်,ဒီးစံးဝဲဒၣ်, 27ဒုးခီဂာ်ယၤလၢနကီၢ်ပူၤတက့ၢ်.ယကလဲၤတၢ်လၢကျဲဧိၤကပူၤဧိၤလီၤ.လၢစုထွဲမ့ၢ်ဂ့ၤ,လၢစုစ့ၣ်မ့ၢ်ဂ့ၤ,ယတဃၣ်ယသးဘၣ်, 28နကဆါန့ၢ်ယၤလၢတၢ်အီၣ်လၢစ့,ဒ်သိးယကအီၣ်တၢ်,ဒီးနကဟ့ၣ်လီၤယၤလၢထံလၢစ့အဃိ,ဒ်သိးယကအီတၢ်လီၤ.ထဲယကခီဂာ်တၢ်လၢယခီၣ်, 29(ဒ်စီၤဧ့ၡီၤအဖိလၢအအိၣ်ဝဲလၢစ့ဧၢ်,ဒီးပှၤမိၤအးဖိလၢအအိၣ်လၢဧၢ်မၤယၤအသိးန့ၣ်.)တုၤယခီဂာ်ယၢ်ဒ့ၣ်ဆူကီၢ်လၢယွၤပကစၢ်ဟ့ၣ်လီၤပှၤလီၤ.

30ဘၣ်ဆၣ်ဒီးဃ့ၡဘိၣ်အစီၤပၤစံဃိၣ်ဒုးခီဂာ်ပှၤအသးတအိၣ်ဘၣ်.အဂ့ၢ်ဒ်အံၤ,ယွၤနကစၢ်ဒုးဆူၣ်ထီၣ်အသး,ဒီးမၤကိၤအသး,ဒ်သိးအကဟ့ၣ်လီၤအီၤလၢနစုပူၤ,ဒ်လၢမုၢ်မဆါတနံၤအံၤအသိးန့ၣ်လီၤ.

31ဒီးယွၤစံးဘၣ်ယၤ,ကွၢ်ကွၢ်,ယဟ့ၣ်လီၤသီစီၤစံဃိၣ်ဒီးအကီၢ်လၢနမဲာ်ညါလီၤ.မၤန့ၢ်သီဒ်သိးနကန့ၢ်ဘၣ်သါကီၢ်န့ၣ်တက့ၢ်.

32ဒီးစီၤစံဃိၣ်ဟဲသဂၢၢ်ပှၤ,အဝဲဒၣ်,ဒီးအပှၤဂီၢ်မုၢ်ခဲလၢာ်,ဒ်သိးအကဒုးသုးလၢယါစၤအပူၤလီၤ.

33ဒီးယွၤပကစၢ်ဟ့ၣ်လီၤကွံာ်အီၤလၢပမဲာ်ညါ,ဒီးပကျီကွံာ်အီၤ,ဒီးအဖိခွါတဖၣ်,ဒီးအပှၤဂီၢ်မုၢ်တဖၣ်ခဲလၢာ်လီၤ. 34အဆၢကတီၢ်ဖဲန့ၣ်ပမၤန့ၢ်အခူအဝ့ၢ်ခဲလၢာ်,ဒီးပှၤပိာ်ခွါ,ဒီးပှၤပိာ်မုၣ်,ဒီးဖိဒံဖိသၣ်လၢဝ့ၢ်ကိးပူၤဒဲးအပူၤပမၤဟးဂီၤကွံာ်တုၤအလၢာ်လီၤ.ပတပာ်လီၤတဲာ်ဘၣ်နီတဂၤဘၣ်. 35ထဲပဟံးန့ၢ်ဆၣ်ဧိၤကီၢ်ဧိၤအဒၢလၢတၢ်ဂုာ်န့ၢ်လၢပဂီၢ်,ဒီးဝ့ၢ်လၢပမၤန့ၢ်အီၤအတၢ်ဖိတၢ်လံၤလီၤ.

36လၢဧရိၤဧ့ၢ်လၢအအိၣ်လၢထံအၢ်နိၣ်ဒီးလၢဝ့ၢ်အိၣ်လၢထံကျိနံၤပၢၢ်လၢကံးလဧးန့ၣ်ဝ့ၢ်လၢအဆူၣ်န့ၢ်ပှၤတအိၣ်ဘၣ်.ယွၤပကစၢ်ဟ့ၣ်လီၤကွံာ်ခဲလၢာ်လၢပှၤလီၤ. 37ထဲနတလဲၤနုာ်ဘၣ်လၢပှၤဧၣ်မိၣ်ဖိအကီၢ်ပူၤ,လၢအလီၢ်ဘၣ်ဃးဒီးထံယးဘိးနီတပူၤ,ဒီးလၢဝ့ၢ်တဖၣ်အိၣ်လၢကစၢၢ်လိၤ,ဒီးဖဲဒၣ်အလီၢ်လၢယွၤတြီပလဲၤနုာ်လၢအပူၤန့ၣ်လီၤ.