Deu 21 | KswSKMB | STEP | ပှၤမ့ၢ်ထံၣ်န့ၢ်ပှၤဘၣ်တၢ်မၤသံအီၤတဂၤမံလီၤလၢတၢ်ပျီပူၤလၢထံဧိၤကီၢ်ဧိၤအပူၤလၢယွၤနကစၢ်ဟ့ၣ်လီၤနၤဒ်သိးနကမၤန့ၢ်အီၤ,(ဒီးမ့ၢ်မတၤမတၤမၤသံအီၤန့ၣ်ပှၤတသ့ၣ်ညါဘၣ်)ဒီး,

‏ Deuteronomy 21

1 ပှၤမ့ၢ်ထံၣ်န့ၢ်ပှၤဘၣ်တၢ်မၤသံအီၤတဂၤမံလီၤလၢတၢ်ပျီပူၤလၢထံဧိၤကီၢ်ဧိၤအပူၤလၢယွၤနကစၢ်ဟ့ၣ်လီၤနၤဒ်သိးနကမၤန့ၢ်အီၤ,(ဒီးမ့ၢ်မတၤမတၤမၤသံအီၤန့ၣ်ပှၤတသ့ၣ်ညါဘၣ်)ဒီး, 2 နပှၤသူၣ်က့သးပှၢ်,ဒီးနပှၤစံၣ်ညီၣ်ကွီၢ်ဘၣ်ဟဲထီၣ်,ဒီးဘၣ်ထိၣ်တၢ်ဆူဝ့ၢ်တဖၣ်အိၣ်ဝးတရံးပှၤလၢအဘၣ်တၢ်မၤသံအီၤတဂၤ, 3 ဒီးတၢ်ကမၤအသးလၢဝ့ၢ်တဖျၢၣ်လၢအအိၣ်ဘူးကတၢၢ်ဒီးပှၤလၢအဘၣ်တၢ်မၤသံအီၤ,ဝ့ၢ်တဝ့ၢ်န့ၣ်အပှၤသူၣ်က့သးပှၢ်ဘၣ်ဟံးန့ၢ်ဂီၤဖံးမိၢ်လၢပှၤတမၤဘၣ်တၢ်ဒီးအီၤ,လၢအတထုးတၢ်လၢနီၣ်ယိးဘိအပူၤဘၣ်တဒု, 4 ဒီးပှၤသူၣ်က့သးပှၢ်ဘၣ်ဆှၢလီၤဂီၤဖံးမိၢ်ဆူထံဖိကျိယွၤဝဲအလီၢ်လီၤဆၢၣ်လၢပှၤတထဲၣ်ဘၣ်အီၤဂ့ၤ,တဖှံတၢ်လၢအပူၤဘၣ်ဂ့ၤ,ဒီးဘၣ်ဒီၣ်တဲာ်ကွံာ်ဂီၤဖံးမိၢ်အကိာ်ဖဲန့ၣ်လၢကစၢၢ်ကဆူးအပူၤန့ၣ်လီၤ.

5 ဒီးပှၤလုၢ်တၢ်အဒိၣ်,စီၤလ့ၤဝံအဖိခွါဘၣ်သုးဘူးအသးလီၤ.(အဂ့ၢ်ဒ်အံၤ,ယွၤနကစၢ်ဃုထၢအဝဲသ့ၣ်တဖၣ်န့ၣ်ဒ်သိးအကမၤအတၢ်,ဒီးဆိၣ်ဂ့ၤတၢ်လၢယွၤအမံၤလီၤ).ဒီးဖဲဒၣ်အဝဲသ့ၣ်အထးခိၣ်ကယဲၢ်တၢ်ကွီၢ်ဒီးတၢ်တီၢ်ကဘၣ်တၢ်စံၣ်ညီၣ်လီၤ. 6 ဒီးကယဲၢ်ပှၤသူၣ်က့သးပှၢ်လၢဝ့ၢ်အိၣ်ဘူးကတၢၢ်ဒီးပှၤလၢအဘၣ်တၢ်မၤသံအီၤခဲလၢာ်န့ၣ်ဘၣ်သ့ကွံာ်အစုလၢဂီၤဖံးမိၢ်အဖီခိၣ်လၢအဘၣ်တၢ်ဒီၣ်တဲာ်ကွံာ်အကိာ်လၢတၢ်ကဆူးအပူၤန့ၣ်လီၤ.

7 ဒီးဘၣ်စံးဆၢတၢ်ဒီးစံး,ပစုတဂၢ်လီၤဘၣ်တၢ်သွံၣ်အံၤဘၣ်ဒီးပမဲာ်တထံၣ်ဘၣ်ဝဲဘၣ်. 8 ယွၤဧၢ,မၤပူၤဖျဲးတၢ်ဒီးအံၣ်စရ့လးနပှၤဂီၢ်မုၢ်လၢနပှ့ၤက့ၤအီၤန့ၣ်တက့ၢ်,ဒီးပာ်တၢ်သွံၣ်လၢအတၢ်ဒဲးဘးတအိၣ်ဘၣ်လၢနပှၤဂီၢ်မုၢ်အံၣ်စရ့လးအလိၤတဂ့ၤ.ဒီးတၢ်သွံၣ်န့ၣ်ကပူၤဖျဲးဒီးအီၤလီၤ.

9 တုၤနမၤတၢ်အလိၤလၢယွၤအမဲာ်ညါဒီး,နကမၤဟါမၢ်တၢ်သွံၣ်လၢတၢ်ဒဲးဘးတအိၣ်ဘၣ်လၢသုကျါလီၤ.

10 တုၤနလဲၤထီၣ်ဒုးသုးဒီးနဒုၣ်နဒါ,ဒီးယွၤနကစၢ်ဟ့ၣ်လီၤအီၤလၢနစုပူၤ,ဒီးနဖီၣ်န့ၢ်မၢကဲကုၢ်အီၤ, 11 ဒီးနထံၣ်ဘၣ်လၢပှၤကဲကုၢ်ဖိအကျါပိာ်မုၣ်တဂၤလၢအက့ၢ်အဂီၤဂ့ၤ,ဒီးတၢ်မိၣ်န့ၢ်ဘၣ်နသးလၢအီၤလၢနမါဒီး,

12 နဘၣ်ဟဲစိာ်အီၤဆူနဟံၣ်ပူၤ,ဒီးအဝဲဒၣ်ဘၣ်လူၤအခိၣ်,ဒီးသွဲၣ်အစုမ့ၣ်, 13 ဒီးဘၣ်ဘ့ၣ်ကွံာ်အတၢ်အကုၢ်အပှၤအကူအသိး,ဒီးအိၣ်လၢနဟံၣ်,ဒီးဟီၣ်လၢအမိၢ်အပၢ်အဃိတလါညါ,ဒီးလၢအလီၢ်ခံန့ၣ်နကလဲၤနုာ်ဘၣ်ဆူအအိၣ်,ဒီးကဲထီၣ်အဝၤ,ဒီးအဝဲဒၣ်ကကဲထီၣ်နမါလီၤ.

14 ဒီးမ့ၢ်တဘၣ်ဘၣ်နသးလၢအီၤဘၣ်ဒီး,တၢ်ကမၤအသးလၢနဘၣ်ဟ့ၣ်အလဲၤတၢ်ဖဲဒၣ်အသးလီၤ.နတဘၣ်ဆါကွံာ်အီၤလၢစ့လ့ၤတက့ၤဘၣ်.နတဘၣ်ကဲဘၣ်အကစၢ်ဘၣ်.အဂ့ၢ်ဒ်အံၤ,နဆီၣ်လီၤတ့ၢ်အီၤလီၤ.

15 ပှၤမ့ၢ်အိၣ်ဒီးအမါခံဂၤ,တဂၤဘၣ်တၢ်အဲၣ်အီၤ,ဒီးတဂၤဘၣ်တၢ်သးဟ့အီၤ,ဒီးမ့ၢ်ဆံးစၢ်န့ၢ်အဖိလၢအဂီၢ်,ပှၤလၢအဘၣ်တၢ်အဲၣ်အီၤ,ဒီးပှၤလၢအဘၣ်တၢ်သးဟ့အီၤခံဂၤလိာ်,ဒီးအဖိဝဲၢ်ကိမ့ၢ်ပိာ်မုၣ်လၢအဘၣ်တၢ်သးဟ့အီၤအဖိဒီး, 16 တုၤအဒုးန့ၢ်သါအဖိခွါတဖၣ်လၢတၢ်လၢအအိၣ်ဒီးအီၤဒီး,တၢ်ကမၤအသးလၢအတဘၣ်ပာ်ပှၤလၢအဘၣ်တၢ်အဲၣ်အီၤတဂၤအဖိခွါလၢပှၤလၢအဘၣ်တၢ်သးဟ့အီၤတဂၤအဖိခွါအဖိဝဲၢ်ကိအမဲာ်ညါဘၣ်.

17 မ့ၢ်အဟ့ၣ်လီၤအီၤအဂီၢ်ခံစးလၢကယဲၢ်အတၢ်အိၣ်ဒီးအီၤအကျါသတးဒီး,ဘၣ်အၢၣ်လီၤအီလီၤပှၤလၢအဘၣ်တၢ်သးဟ့အီၤတဂၤအဖိလၢအမ့ၢ်အဖိဝဲၢ်ကိလီၤ.အဂ့ၢ်ဒ်အံၤ,အဝဲန့ၣ်မ့ၢ်အဂံၢ်အဘါအခိၣ်,တၢ်စံၣ်ညီၣ်ဘၣ်ဃးဒီးဝဲၢ်ကိအလီၢ်န့ၣ်မ့ၢ်အဝဲဒၣ်န့ၣ်အတၢ်လီၤ.

18 ပှၤမ့ၢ်အိၣ်ဒီးအဖိခွါလၢအနၢ်က့ၣ်လၢအပူထီၣ်,ဒီးတဒိကနၣ်ဘၣ်အပၢ်အကလုၢ်မ့ၢ်ဂ့ၤ,အမိၢ်အကလုၢ်မ့ၢ်ဂ့ၤ,ဒီးတုၤအသိၣ်ဃီၣ်အီၤဒီး,တဒိကနၣ်ဘၣ်ဒီး, 19 အမိၢ်အပၢ်ဘၣ်ဟံးန့ၢ်အီၤ,ဒီးဟဲစိာ်အီၤဆူအဝ့ၢ်အပှၤသူၣ်က့သးပှၢ်အအိၣ်,ဒီးဆူအလီၢ်အပဲတရီလီၤ. 20 ဒီးဘၣ်စံးဘၣ်အဝ့ၢ်အပှၤသူၣ်က့သးပှၢ်,ပဖိခွါတဂၤအံၤမ့ၢ်အနၢ်က့ၣ်ဒီးပူထီၣ်ဝဲလီၤ,တကနၣ်ဘၣ်ပကလုၢ်ဘၣ်,မ့ၢ်ပှၤအီၣ်လုၣ်ကိဒီးအီလုၣ်ကပာ်တၢ်လီၤ. 21 ဒီးပှၤဝ့ၢ်ဖိခဲလၢာ်န့ၣ်ဘၣ်ကွံာ်အီၤလၢလၢၢ်တုၤအသံလီၤ.ဒီးနဘၣ်ပာ်ကွံာ်တၢ်အၢလၢသုကျါ,ဒီးအံၣ်စရ့လးခဲလၢာ်ကနၢ်ဟူ,ဒီးပျံၤတၢ်လီၤ.

22 ဒီးပှၤမ့ၢ်မၤတၢ်ကမၣ်လၢအကြၢးသံ,ဒီးမ့ၢ်ဘၣ်တၢ်မၤသံအီၤဒီး,နမ့ၢ်ဘျးထီၣ်အီၤလၢသ့ၣ်လိၤဒီး, 23 အစိၣ်တဘၣ်အိၣ်လၢသ့ၣ်လိၤသီတနၤကျၢၤဘၣ်.နဘၣ်ခူၣ်လီၤကွံာ်အီၤလၢမုၢ်တနံၤဃီန့ၣ်,(အဂ့ၢ်ဒ်အံၤ,ပှၤလၢအလီၤစဲၤလၢသ့ၣ်လိၤန့ၣ်ဘၣ်တၢ်ဆိၣ်အၢလၢယွၤလီၤ),ဒ်သိးနကီၢ်လၢယွၤနကစၢ်ဟ့ၣ်လီၤနၤလၢတၢ်န့ၢ်သါအဂီၢ်အသုတဘၣ်တၢ်မၤဘၣ်အၢအီၤတဂ့ၤလီၤ.