Deuteronomy 23
1ပှၤလၢအဒံၣ်ဘၣ်တၢ်မၤတံာ်မ့ၢ်ဂ့ၤ,ပှၤလၢအတၢ်ဘၣ်ဒီၣ်တဲာ်ကွံာ်မ့ၢ်ဂ့ၤ,တဘၣ်လဲၤနုာ်ဘၣ်ဆူယွၤအတၢ်အိၣ်ဖှိၣ်ဘၣ်. 2ပှၤဒၢဘၢဖိတဘၣ်လဲၤနုာ်ဘၣ်ဆူယွၤအတၢ်အိၣ်ဖှိၣ်အပူၤဘၣ်.တုၤလီၤလၢအစိၤဆံဆဲၣ်စိၤတစိၤတလဲၤနုာ်ဘၣ်ဆူယွၤအတၢ်အိၣ်ဖှိၣ်ဘၣ်. 3ပှၤဧၣ်မိၣ်ဖိမ့ၢ်ဂ့ၤ,ပှၤမိၤအးဖိမ့ၢ်ဂ့ၤ,တဘၣ်လဲၤနုာ်ဆူယွၤအတၢ်အိၣ်ဖှိၣ်ဘၣ်.တုၤလီၤလၢအစိၤဆံဆဲၣ်စိၤတစိၤတဘၣ်လဲၤနုာ်ဘၣ်ဆူယွၤအတၢ်အိၣ်ဖှိၣ်လီၤစိၤလီၤထီဘၣ်. 4အဂ့ၢ်ဒ်အံၤ,လၢသုဟးထီၣ်လၢအဲၤကူပတူးန့ၣ်အဝဲသ့ၣ်တဟဲသဂၢၢ်သုဒီးတၢ်အီၣ်လၢကျဲပူၤဘၣ်,ဒီးငါစီၤဘဧိၢ်အဖိခွါစီၤဘံးလၣ်,ပှၤပသူၢ်ဖိလၢကီၢ်မ့းစပတၤမံအပူၤတဂၤ,လၢစ့ဒ်သိးအကဆိၣ်အၢနၤလီၤ. 5ဘၣ်ဆၣ်ဒီးယွၤနကစၢ်တကနၣ်ဘၣ်စီၤဘံးလၣ်အကလုၢ်ဘၣ်.မ့မ့ၢ်ယွၤနကစၢ်မၢတၢ်ဆိၣ်အၢန့ၣ်ကဲထီၣ်တၢ်ဆိၣ်ဂ့ၤလၢနဂီၢ်လီၤ.အဂ့ၢ်ဒ်အံၤ,ယွၤနကစၢ်အဲၣ်နၤလီၤ. 6နတဘၣ်ဃုအတၢ်ဃူတၢ်ဖိးဂ့ၤ,အတၢ်ဂ့ၤတၢ်ဘၣ်ဂ့ၤ,တစိၤဒၣ်နၤလီၤထူလီၤယိာ်ဘၣ်လီၤ. 7နတဘၣ်သးဟ့ပှၤအဒိၣ်ဖိဘၣ်.အဂ့ၢ်ဒ်အံၤ,မ့ၢ်နဒီပုၢ်ဝဲၢ်လီၤ.နတဘၣ်သးဟ့ပှၤအဲၤကူပတူးဖိဘၣ်.အဂ့ၢ်ဒ်အံၤ,နမ့ၢ်တ့ၢ်ပှၤတခီဘီမုၢ်ဖိလၢအကီၢ်ပူၤလီၤ. 8အဖိအလံၤလၢအအိၣ်ဖျဲၣ်လၢအီၤသၢစိၤတစိၤန့ၣ်ကလဲၤနုာ်ဘၣ်ဝဲဆူယွၤအတၢ်အိၣ်ဖှိၣ်အပူၤလီၤ. 9တုၤပှၤသုးမုၢ်လဲၤထီဒါနဒုၣ်နဒါဒီး,ပလီၢ်နသးလၢကယဲၢ်တၢ်အၢတၢ်သီတက့ၢ်. 10ပှၤမ့ၢ်အိၣ်လၢသုကျါလၢအတကဆှီဘၣ်လၢတၢ်တကဆှီလၢအဘၣ်အီၤလၢမုၢ်နၤအဃိတဂၤဂၤဒီး,ကဘၣ်ဟးထီၣ်ဆူပှၤသူၣ်ဒဲအလီၢ်လၢခိလီၤ.တဘၣ်ဟဲနုာ်ဆူပှၤသူၣ်ဒဲအလီၢ်ပူၤဘၣ်. 11ဒီးတၢ်ကမၤအသးလၢတုၤမုၢ်ဟါလီၤဒီး,ဘၣ်လုၣ်ထံ,ဒီးတုၤမုၢ်လီၤနုာ်ဒီး,ကဟဲက့ၤနုာ်ဆူပှၤသူၣ်ဒဲအလီၢ်ပူၤလီၤ. 12နဘၣ်အိၣ်ဒီးအလီၢ်လၢပှၤသူၣ်ဒဲအလီၢ်လၢခိ,ဒီးနဘၣ်လဲၤထီၣ်ဆူခိဖဲန့ၣ်လီၤ. 13ဒီးနဘၣ်အိၣ်ဒီးတပူာ်လၢနစုကဝဲၤအကျါ,ဒီးတုၤနလဲၤဆူခိဒီး,တၢ်ကမၤအသးလၢနဘၣ်ခူၣ်လီၤတၢ်လၢအီၤ,ဒီးနဘၣ်ဃၣ်နသးဒီးမၤဘၢကွံာ်တၢ်လၢအဟဲလီၤလၢနၤလီၤ. 14အဂ့ၢ်ဒ်အံၤ,ယွၤနကစၢ်လဲၤတၢ်လၢနသူၣ်ဒဲအလီၢ်ပူၤဒ်သိးအကမၤပူၤဖျဲးနၤ,ဒီးဒ်သိးအကဟ့ၣ်လီၤကွံာ်နဒုၣ်နဒါလၢအမဲာ်ညါလီၤ.ဒီးနသူၣ်ဒဲအလီၢ်ဘၣ်အိၣ်စီဆှံ,ဒ်သိးအသုတထံၣ်တၢ်တကဆှီဘၣ်လၢနပူၤ,ဒီးဃၣ်ဒူၣ်ချၢအသးလၢနၤတဂ့ၤလီၤ. 15ပှၤကုၢ်ဖိလၢအဃ့ၢ်ပူၤဖျဲးဒီးအကစၢ်ဆူနအိၣ်တဂၤဂၤန့ၣ်နတဘၣ်ဟ့ၣ်လီၤကွံာ်အီၤလၢအကစၢ်ဘၣ်. 16ကအိၣ်ကဆိးဒီးနၤလၢသုကျါ,လၢအလီၢ်ပူၤဖဲအကဃုထၢလၢသုပဲတရီအပူၤတပူၤပူၤ,ဖဲဒၣ်အဂ့ၤလၢအမဲာ်ညါတပူၤလီၤ.နတဘၣ်မၤနးမၤဖှီၣ်အီၤဘၣ်. 17ပှၤဃဲသဲမုၣ်တဘၣ်အိၣ်လၢပှၤအံၣ်စရ့လးအဖိမုၣ်အကျါဘၣ်,ဒီးပှၤအဲၣ်ပကၢၤဖိတဘၣ်အိၣ်လၢပှၤအံၣ်စရ့လးအဖိခွါအကျါဘၣ်. 18ပှၤဃဲသဲမုၣ်အဘူးအလဲမ့ၢ်ဂ့ၤ,ထွံၣ်အပှ့ၤမ့ၢ်ဂ့ၤ,နတဘၣ်ဟဲစိာ်အီၤဆူယွၤနကစၢ်အဟံၣ်ပူၤလၢနတၢ်မၤဘူၣ်ဘၣ်ဃးဒီးဆိၣ်တၢ်တမံၤမံၤအဂီၢ်ဘၣ်.အဂ့ၢ်ဒ်အံၤ,အဝဲန့ၣ်ခံမံၤလိာ်မ့ၢ်တၢ်သးဘၣ်အၢလၢယွၤအမဲာ်ညါလီၤ. 19စ့အအ့ၣ်မ့ၢ်ဂ့ၤ,တၢ်အီၣ်အအ့ၣ်မ့ၢ်ဂ့ၤ,ဖဲဒၣ်တၢ်တမံၤမံၤလၢပှၤဒုးလိၢ်လၢအအ့ၣ်အဂီၢ်န့ၣ်နတဘၣ်ဒုးလိၢ်တၢ်လၢနဒီပုၢ်ဝဲၢ်လၢတၢ်အ့ၣ်အဂီၢ်ဘၣ်. 20နကဒုးလိၢ်တၢ်လၢပှၤတခီဘီမုၢ်ဖိလၢတၢ်အ့ၣ်အဂီၢ်လီၤ.မ့မ့ၢ်နဒီပုၢ်ဝဲၢ်န့ၣ်နတဘၣ်ဒုးလိၢ်တၢ်လၢအီၤလၢတၢ်အ့ၣ်အဂီၢ်ဘၣ်,ဒ်သိးယွၤနကစၢ်ကဆိၣ်ဂ့ၤနၤလၢကယဲၢ်တၢ်လၢနပာ်နစုလၢအလိၤလၢကီၢ်ပူၤဖဲနလဲၤမၤန့ၢ်အီၤအဂ့ၢ်လီၤ. 21တုၤနဆိၣ်တၢ်ဆိၣ်လၢနကမၤဘူၣ်တၢ်လၢယွၤနကစၢ်ဒီး,သုးနံၤသုးသီလၢနကဟ့ၣ်အီၤတဂ့ၤ.အဂ့ၢ်ဒ်အံၤ,ယွၤနကစၢ်ကဃုဝဲလၢနၤသပှၢ်တၢၢ်,ဒီးကကဲထီၣ်တၢ်ဒဲးဘးလၢနလိၤလီၤ. 22မ့မ့ၢ်နမ့ၢ်ကီၤနသးဒ်သိးနသုတဆိၣ်တၢ်လၢနကမၤဘူၣ်တၢ်တဂ့ၤဒီး,တၢ်ဒဲးဘးတအိၣ်ဘၣ်လၢနလိၤဘၣ်. 23တၢ်လၢအထီၣ်ဖျဲးလၢနထးခိၣ်န့ၣ်တိၢ်န့ၢ်,ဒီးမၤတက့ၢ်.တၢ်လၢနကမၤဘူၣ်ဒၣ်တၢ်န့ၣ်,ဒ်နဆိၣ်တၢ်လၢယွၤနကစၢ်အမဲာ်ညါလၢနကတိၤတၢ်လၢနထးခိၣ်အသိးန့ၣ်,မၤတက့ၢ်. 24တုၤနလဲၤနုာ်ဆူပှၤလၢနဃၢၤအစပံးအလီၢ်အပူၤဒီး,နကအီၣ်ဘၣ်စပံးသၣ်ဖဲဒၣ်နသးတုၤနဘျဲးအီၣ်လီၤ.ဘၣ်ဆၣ်ဒီးနတဘၣ်ဒၢနုာ်တၤသၣ်လၢတၢ်အပူၤဘၣ်. 25တုၤနလဲၤလၢပှၤလၢနဃၢၤအဘုအိၣ်ဆၢထၢၣ်အကျါဒီး,နကဒဲးဘၣ်အစဲၤလၢနစုလီၤ.မ့မ့ၢ်နထါဂဲာ်န့ၣ်နတဘၣ်ဝၢ်အီၤဆူပှၤလၢနဃၢၤအဘုအိၣ်ဆၢထၢၣ်ဘၣ်လီၤ.
Copyright information for
KswSKMB