Deu 19 | KswSKMB | STEP | တုၤယွၤဒီၣ်တဲာ်ကွံာ်ပှၤကလုာ်တဖၣ်လၢယွၤဟ့ၣ်လီၤအထံအကီၢ်လၢနၤ,ဒီးနမၤန့ၢ်အတၢ်,ဒီးနအိၣ်လၢအဝ့ၢ်ပူၤ,ဒီးအဟံၣ်ပူၤဒီး,

‏ Deuteronomy 19

1 တုၤယွၤဒီၣ်တဲာ်ကွံာ်ပှၤကလုာ်တဖၣ်လၢယွၤဟ့ၣ်လီၤအထံအကီၢ်လၢနၤ,ဒီးနမၤန့ၢ်အတၢ်,ဒီးနအိၣ်လၢအဝ့ၢ်ပူၤ,ဒီးအဟံၣ်ပူၤဒီး, 2 နဘၣ်နီၤဖးဝ့ၢ်သၢဖျၢၣ်လၢနဂီၢ်လၢနကီၢ်တဘ့ၣ်အသးကံၢ်ပူၤ,လၢယွၤဟ့ၣ်လီၤနၤဒ်သိးနကမၤန့ၢ်အီၤလီၤ.

3 နဘၣ်ကတဲာ်ကတီၤကျဲတဘိလၢနဂီၢ်,ဒီးနီၤဖးနကီၢ်အဃၢၤလၢယွၤဟ့ၣ်လီၤနၤဒ်သိးနကမၤန့ၢ်အီၤ,လၢသၢပူၤ,ဒ်သိးကယဲၢ်ပှၤလၢအမၤသံပှၤကညီကဃ့ၢ်ဆူန့ၣ်ကိးဂၤဒဲးလီၤ.

4 ဒီးပှၤလၢအမၤသံပှၤကညီဒီးဃ့ၢ်ဆူန့ၣ်ဒ်သိးအကမူဝဲန့ၣ်မ့ၢ်တၢ်အံၤ,ပှၤလၢအတသ့ၣ်ညါဘၣ်ဒီးမၤသံပှၤလၢအဃၢၤလၢအတသးဟ့ဘၣ်အီၤလၢမဟါမဟိလီၤ. 5 မ့ၢ်ဒ်အံၤ,ပှၤလၢအလဲၤတၢ်ဒီးပှၤလၢအဃၢၤဆူပှၢ်လၢ်ကျါဒ်သိးအကကူာ်သ့ၣ်,ဒီးယၤထီၣ်အစုအိၣ်ဒီးကွါတဘ့ၣ်,ဒ်သိးအကကူာ်လီၤသ့ၣ်,ဒီးကွါအကနၣ်ဖျုထီၣ်လၢအတိၢ်,ဒီးဘၣ်ပှၤလၢအဃၢၤ,ဒီးသံဝဲဒၣ်လီၤ.အဝဲဒၣ်တဂၤကဃ့ၢ်ဆူဝ့ၢ်န့ၣ်တဖျၢၣ်ဖျၢၣ်အပူၤဒီးကမူဝဲလီၤ.)

6 မ့တမ့ၢ်ဘၣ်ဒ်န့ၣ်ဒီးပှၤမၤကၣ်တၢ်သွံၣ်လၢအသးကိၢ်အဖၢမုၢ်န့ၣ်ကလူၤပှၤမၤသံတၢ်,ဒီးကချုးန့ၢ်အီၤလၢကျဲယံၤအဃိ,ဒီးကမၤသံဘၣ်ဖုးအီၤလီၤ.ဘၣ်ဆၣ်ဒီးတကြၢးသံဘၣ်.အဂ့ၢ်ဒ်အံၤ,တသးဟ့တ့ၢ်အီၤလၢမဟါမဟိဘၣ်.

7 မၤသးဒ်န့ၣ်ဒီးယမၤလိာ်နၤ,ဒီးစံး,နဘၣ်နီၤဖးဝ့ၢ်သၢဖျၢၣ်လၢနဂီၢ်လီၤ. 8 ဒီးယွၤနကစၢ်မ့ၢ်မၤလဲၢ်ထီၣ်နကီၢ်အဃၢၤတဖၣ်,ဒ်အဆိၣ်တၢ်ဒီးနပၢ်တဖၣ်,ဒီးဟ့ၣ်လီၤနကီၢ်ဒီဘ့ၣ်ညါလၢအစံးလၢအကဟ့ၣ်လီၤနပၢ်တဖၣ်ဒီး, 9 နမ့ၢ်တိၢ်န့ၢ်တၢ်မၤလိာ်ဒ်သိးနကမၤအီၤ,လၢယမၤလိာ်နၤလၢမုၢ်မဆါတနံၤအံၤ,ဒ်သိးနကအဲၣ်ယွၤနကစၢ်,ဒီးပိာ်အကျဲတဖၣ်ကိးမုၢ်နံၤမုၢ်နၤဒဲးဒီး,နဘၣ်ပာ်ဖှိၣ်ဒံးဝ့ၢ်သၢဖျၢၣ်လၢဝ့ၢ်သၢဖျၢၣ်န့ၣ်အဖီခိၣ်လၢနဂီၢ်, 10 ဒ်သိးတၢ်သွံၣ်လၢအတၢ်ဒဲးဘးတအိၣ်ဘၣ်အသုတဂၢ်လီၤအသးလၢနကီၢ်ပူၤလၢယွၤနကစၢ်ဟ့ၣ်လီၤနၤလၢတၢ်န့ၢ်သါအဂီၢ်တဂ့ၤ,ဒီးတၢ်သွံၣ်အသုတဘၣ်နလိၤတဂ့ၤလီၤ.

11 မ့မ့ၢ်ပှၤမ့ၢ်သးဟ့ပှၤလၢအဃၢၤ,ဒီးအိၣ်ခိးခူသူၣ်အီၤ,ဒီးဂဲၤဆၢထၢၣ်လၢအလိၤ,ဒီးကျီအီၤ,တုၤအသံဒီး,ဃ့ၢ်ဝဲဆူဝ့ၢ်န့ၣ်တဖျၢၣ်ဖျၢၣ်ဒီး, 12 ပှၤသူၣ်က့သးပှၢ်လၢအဝ့ၢ်န့ၣ်ဘၣ်မၢလီၤပှၤဟဲက့ၤစိာ်အီၤ,ဒီးဟ့ၣ်လီၤအီၤလၢပှၤမၤကၣ်တၢ်သွံၣ်အစုပူၤဒ်သိးအကသံလီၤ. 13 နမဲာ်တဘၣ်သးလီအီၤဘၣ်.ဒီးနဘၣ်ပာ်ကွံာ်တၢ်သွံၣ်လၢအတၢ်ဒဲးဘးတအိၣ်ဘၣ်လၢအံၣ်စရ့လးအပူၤ,ဒ်သိးတၢ်ကဂ့ၤထီၣ်လၢနဂီၢ်လီၤ.

14 ပှၤလၢနဃၢၤအဟီၣ်ခိၣ်အပနီၣ်လၢပှၤလၢသီပာ်လၢနတၢ်န့ၢ်သါလၢနကန့ၢ်ဘၣ်သါလၢကီၢ်ပူၤလၢယွၤနကစၢ်ဟ့ၣ်လီၤနၤဒ်သိးနကမၤန့ၢ်အီၤန့ၣ်,နတဘၣ်သုးအလီၢ်ဘၣ်.

15 ပှၤအုၣ်အသးတဂၤဧိၤတဘၣ်ဂဲၤဆၢထၢၣ်ထီဒါပှၤကညီလၢတၢ်အၢတမံၤမံၤအဃိမ့ၢ်ဂ့ၤ,လၢတၢ်ကမၣ်တမံၤမံၤလၢအမၤကမၣ်တၢ်အဃိမ့ၢ်ဂ့ၤန့ၣ်ဘၣ်.ဖဲပှၤအုၣ်အသးခံဂၤအထးခိၣ်မ့ၢ်ဂ့ၤ,ဖဲပှၤအုၣ်အသးသၢဂၤအထးခိၣ်မ့ၢ်ဂ့ၤ,တၢ်အကွီၢ်ကအိၣ်ဂၢၢ်ဆိးကျၢၤလီၤ.

16 ပှၤအုၣ်အသးကဘျံးကဘျၣ်တဂၤမ့ၢ်ဂဲၤဆၢထၢၣ်ထီဒါပှၤတဂၤဂၤဒ်သိးအကအုၣ်အသးလၢတၢ်အၢလၢအဂ့ၢ်ဒီး, 17 ပှၤခံဂၤလၢအလိာ်ကွီၢ်န့ၣ်ဘၣ်ဆၢထၢၣ်လၢယွၤအမဲာ်ညါ,လၢပှၤလုၢ်တၢ်အဒိၣ်,ဒီးပှၤစံၣ်ညီၣ်ကွီၢ်တဖၣ်အမဲာ်ညါလၢအကအိၣ်လၢမုၢ်နံၤတဖၣ်, 18 ဒီးပှၤစံၣ်ညီၣ်ကွီၢ်ဘၣ်သံကွၢ်တၢ်ထံထံ,ဒီးကွၢ်ကွၢ်,ပှၤအုၣ်အသးမ့မ့ၢ်ပှၤအုၣ်တၢ်ကဘျံးကဘျၣ်လၢအဒီပုၢ်ဝဲၢ်အဂ့ၢ်ဒီး, 19 သုဘၣ်မၤအီၤဒ်အဆိကမိၣ်လၢအကမၤအဒီပုၢ်ဝဲၢ်အသိးန့ၣ်လီၤ.ဒီးသုဘၣ်ပာ်ကွံာ်တၣ်တၢ်အၢလၢသုကျါလီၤ.

20 ဒီးပှၤလၢအအိၣ်လီၤတဲာ်တဖၣ်န့ၣ်ကနၢ်ဟူ,ဒီးပျံၤတၢ်,ဒီးတမၤလၢၤဘၣ်တၢ်အၢဒ်န့ၣ်သိးလၢသုကျါဘၣ်. 21 ဒီးနမဲာ်တဘၣ်သးလီဘၣ်,သးလၢသးအဂီၢ်,မဲာ်လၢမဲာ်အဂီၢ်,မဲလၢမဲအဂီၢ်,စုလၢစုအဂီၢ်,ခီၣ်လၢခီၣ်အဂီၢ်လီၤ.