Deu 25 | KswSKMB | STEP | ဒီးပှၤမ့ၢ်လိာ်ကွီၢ်လိာ်အသး,ဒီးဟဲဆူတၢ်စံၣ်ညီၣ်ကွီၢ်,လၢတၢ်ကစံၣ်ညီၣ်ဝဲဒီး,တၢ်ကပာ်တီပှၤအတီ,ဒီးပာ်အၢပှၤအအၢ,

‏ Deuteronomy 25

1 ဒီးပှၤမ့ၢ်လိာ်ကွီၢ်လိာ်အသး,ဒီးဟဲဆူတၢ်စံၣ်ညီၣ်ကွီၢ်,လၢတၢ်ကစံၣ်ညီၣ်ဝဲဒီး,တၢ်ကပာ်တီပှၤအတီ,ဒီးပာ်အၢပှၤအအၢ, 2 ဒီးတၢ်ကမၤအသးလၢပှၤအၢမ့ၢ်ဂ့ၤဘၣ်တၢ်တီၢ်အီၤဒီး,ပှၤစံၣ်ညီၣ်ကွီၢ်ကဒုးမံလီၤအီၤ,ဒီးဒုးတီၢ်ပှၤလၢအီၤလၢအမဲာ်ညါအဘျီပှဲၤအံၤပှဲၤနုၤ,ဒ်အတၢ်ကမၣ်အသိးန့ၣ်လီၤ.

3 ကတီၢ်အီၤအဘျီလွံၢ်ဆံ,ဒီးတဘၣ်မၤအါထီၣ်ဝဲဘၣ်.မ့ၢ်မၤအါထီၣ်တၢ်တဖၣ်,ဒီးတီၢ်အီၤအါန့ၢ်အန့ၣ်လၢတၢ်တီၢ်အါဘျီဒီး,နဒီပုၢ်ဝဲၢ်ကလီၤဘှါလၢနမဲာ်ညါလီၤ.

4 တုၤဂီၤဘုၣ်ဂီၤဖံးယီၢ်ဘုဒီး,ပသံးဃာ်အထးခိၣ်တဂ့ၤ.

5 ဒီပုၢ်ဝဲၢ်ခွါတဖၣ်မ့ၢ်အိၣ်ဝဲဆိးဝဲတပူၤဃီဒီး,ပှၤတဂၤမ့ၢ်သံဒီးအဖိတအိၣ်ဘၣ်ဒီး,ပှၤလၢအသံတဂၤအမါန့ၣ်တဘၣ်န့ၢ်ဝၤလၢပှၤတဒူၣ်ဒၣ်ဖိဘၣ်.အဝၤအဒီပုၢ်ဝဲၢ်တဂၤဘၣ်လဲၤနုာ်ဆူအအိၣ်,ဒီးန့ၢ်မါလၢအီၤဒီးမၤအဝၤအဒီပုၢ်ဝဲၢ်အတၢ်လၢအဂီၢ်လီၤ.

6 ဒီးတၢ်ကမၤအသးလၢပှၤဖိဝဲၢ်ကိလၢအဆံးစၢ်န့ၢ်ဝဲတဂၤကထီၣ်ဘးဝဲလၢအဒီပုၢ်ဝဲၢ်လၢအသံတဂၤအမံၤ,ဒ်သိးအမံၤအသုတဟါမၢ်ဘၣ်လၢအံၣ်စရ့လးအပူၤတဂ့ၤလီၤ.

7 ဒီးဟံးန့ၢ်အဒီပုၢ်ဝဲၢ်အမါန့ၣ်မ့ၢ်တဘၣ်ဘၣ်ပှၤတဂၤန့ၣ်အသးဒီး,အဒီပုၢ်ဝဲၢ်အမါကလဲၤဆူပဲတရီလၢပှၤသူၣ်က့သးပှၢ်အအိၣ်ဒီးစံး,ယဝၤအဒီပုၢ်ဝဲၢ်တဂၤတအၢၣ်လီၤအီလီၤဒုးအိၣ်ထီၣ်အဒီပုၢ်ဝဲၢ်အမံၤလၢအံၣ်စရ့လးအပူၤဘၣ်.မၤယဝၤအဒီပုၢ်ဝဲၢ်အတၢ်န့ၣ်အသးတအိၣ်ဘၣ်. 8 ဒီးဝ့ၢ်အပှၤသူၣ်က့သးပှၢ်ဘၣ်ကိးန့ၢ်အီၤ,ဒီးကတိၤတၢ်ဒီးအီၤ,ဒီးအဝဲဒၣ်မ့ၢ်ဆၢထၢၣ်ဒီးစံး,ဟံးန့ၢ်ပိာ်မုၣ်န့ၣ်ယသးတအိၣ်ဘၣ်န့ၣ်ဒီး, 9 အဒီပုၢ်ဝဲၢ်အမါဘၣ်လဲၤဆူအအိၣ်လၢပှၤသူၣ်က့သးပှၢ်အမဲာ်ညါ,ဒီးဃ့ၣ်လီၤကွံာ်အခီၣ်ဖံးလၢအခီၣ်လိၤ,ဒီးထူးပှဲာ်လၢအမဲာ်,ဒီးကစံးဆၢတၢ်ဒီးစံး,ပှၤလၢအတမၤထီၣ်ဘၣ်အဒီပုၢ်ဝဲၢ်အဟံၣ်န့ၣ်ကဘၣ်တၢ်မၤအီၤဒ်န့ၣ်သိးလီၤ. 10 ဒီးတၢ်ကကိးအမံၤလၢအံၣ်စရ့လးအပူၤလၢပှၤလၢအဘၣ်တၢ်ဃ့ၣ်လီၤကွံာ်အခီၣ်ဖံးန့ၣ်လီၤ. 11 ဒီးပှၤမ့ၢ်အ့ၣ်လိာ်ဆိးက့လိာ်အသးတဂၤဒီးတဂၤဒီး,အဝဲတဂၤအမါသုးဘူးအသးဒ်သိးအကမၤပူၤဖျဲးအဝၤလၢပှၤလၢအတီၢ်ဝဲအစုပူၤ,ဒီးယူာ်ထီၣ်အစု,ဒီးဟံးန့ၢ်အီၤလၢတၢ်မဲာ်ဆှးအလီၢ်ဒီး, 12 နဘၣ်ဒီၣ်တဲာ်ကွံာ်အစုလီၤ.နမဲာ်တဘၣ်သးလီဘၣ်အီၤဘၣ်.

13 နတဘၣ်အိၣ်ဒီးစီၤပီၢ်သၣ်တမံၤ,ဒီးစီၤပီၢ်သၣ်တမံၤဒၣ်,အဒိၣ်ဒီးအဆံးလၢနထၢၣ်ပူၤဘၣ်.

14 နတဘၣ်အိၣ်ဒီးနီၣ်ဃီၣ်တၢ်တမံၤ,ဒီးနီၣ်ဃီၣ်တၢ်တမံၤဒၣ်,အဒိၣ်ဒီးအဆံးလၢနဟံၣ်ပူၤဘၣ်.

15 နဘၣ်အိၣ်ဒီးစီၤပီၢ်သၣ်အလၢအပှဲၤ,အတီအလိၤ,နဘၣ်အိၣ်ဒီးနီၣ်ဃီၣ်တၢ်အလၢအပှဲၤ,အတီအလိၤ,ဒ်သိးနမုၢ်နံၤလၢနအိၣ်လၢထံဧိၤကီၢ်ဧိၤအပူၤလၢယွၤနကစၢ်ဟ့ၣ်လီၤနၤတဖၣ်န့ၣ်ကထုးထီထီၣ်အသးလီၤ.

16 အဂ့ၢ်ဒ်အံၤ,ကယဲၢ်ပှၤလၢအမၤတၢ်န့ၣ်တဖၣ်,ကယဲၢ်ပှၤလၢအမၤတၢ်တတီဘၣ်န့ၣ်မ့ၢ်တၢ်သးဘၣ်အၢလၢယွၤနကစၢ်အမဲာ်ညါလီၤ.

17 လၢသုဟးထီၣ်ကွံာ်လၢအဲၤကူပတူးန့ၣ်ဧမၤလ့းမၤနၤလၢကျဲပူၤဒ်လဲၣ်ဒ်လဲၣ်န့ၣ်သ့ၣ်နီၣ်ထီၣ်က့ၤတက့ၢ်.

18 သဂၢၢ်နၤလၢကျဲပူၤ,ဒီးတုၤနသးလီၤဘှါဒီး,ဒီးတၢ်ဘှံးနသးဒီး,ကျီကွံာ်ပှၤလၢအဂံၢ်စၢ်ဘါစၢ်လၢနလီၢ်ခံကတၢၢ်,ဒီးတပျံၤဘၣ်ယွၤဘၣ်.

19 ဒီးတၢ်ကမၤအသးဖဲယွၤနကစၢ်ကဒုးအိၣ်ဘှံးနၤလၢနဒုၣ်နဒါအိၣ်ဝးတရံးနၤလၢထံဧိၤကီၢ်ဧိၤအပူၤလၢယွၤနကစၢ်ဟ့ၣ်လီၤနၤလၢတၢ်န့ၢ်သါအဂီၢ်လၢသုကမၤန့ၢ်အီၤဒီး,နဘၣ်တြူာ်ကွံာ်တၢ်သ့ၣ်နီၣ်ထီၣ်က့ၤဧမၤလ့းလၢမူခိၣ်အဖီလာ်လီၤ.သုတသးပ့ၤနီၣ်တဂ့ၤ.