Deuteronomy 29
1တၢ်တဖၣ်န့ၣ်မ့ၢ်တၢ်အၢၣ်လီၤအီလီၤအတၢ်ကတိၤလၢယွၤမၤလိာ်စီၤမိၤရှ့,လၢအကမၤဒီးပှၤအံၣ်စရ့လးဖိ,လၢကီၢ်မိၤအးအပူၤ,လၢတၢ်အၢၣ်လီၤအီလီၤလၢအမၤဒီးအီၤလၢဃိၤရ့းအလိၤအဖီခိၣ်န့ၣ်လီၤ. 2ဒီးစီၤမိၤရှ့ကိးထီၣ်ဆူအံၣ်စရ့လးခဲလၢာ်ဒီးစံးဘၣ်အီၤ,သုထံၣ်ဘၣ်လံကယဲၢ်တၢ်လၢယွၤမၤဝဲလၢသုမဲာ်ညါလၢကီၢ်အဲၤကူပတူးအပူၤ,လၢဖၤရိၤ,ဒီးလၢအခ့အပှၤခဲလၢာ်,ဒီးလၢအကီၢ်ဒီဘ့ၣ်ညါ, 3တၢ်လ့ပစီဖးဒိၣ်လၢနမဲာ်ထံၣ်ဘၣ်လံ,တၢ်ပနီၣ်လီၤလး,ဒီးတၢ်လီၤလိၢ်လီၤလးဖးဒိၣ်တဖၣ်န့ၣ်လီၤ. 4ဘၣ်ဆၣ်ဒီးယွၤတဟ့ၣ်လီၤဘၣ်သုသးလၢအသ့ၣ်ညါတၢ်,ဒီးသုမဲာ်လၢအထံၣ်တၢ်,ဒီးသုနၢ်လၢအနၢ်ဟူတၢ်တုၤမုၢ်မဆါတနံၤအံၤဘၣ်. 5ဒီးယဆှၢသုလၢပှၢ်မုၢ်ကနၢအနံၣ်လွံၢ်ဆံလီၤ.သုကူသုသိးတလီၢ်လံၤဘၣ်လၢသုလိၤဘၣ်.ဒီးနခီၣ်ဖံးတလီၢ်လံၤဘၣ်လၢနခီၣ်လိၤဘၣ်, 6သုတအီၣ်ဘၣ်ကိၣ်,ဒီးစပံးထံမ့ၢ်ဂ့ၤ,သံးဧိၤမ့ၤဧိၤမ့ၢ်ဂ့ၤ,သုတအီဘၣ်,ဒ်သိးသုကသ့ၣ်ညါလၢယမ့ၢ်ယွၤသုကစၢ်လီၤ. 7ဒီးတုၤသုဟဲတုၤလၢအလီၢ်ဖဲအံၤဒီး,ဃ့ၡဘိၣ်အစီၤပၤစံဃိၣ်,ဒီးဘၤၡၣ်အစီၤပၤဧိာ်ဟဲသဂၢၢ်ဒုးသုးဒီးပှၤ,ဒီးပကျီကွံာ်အီၤလီၤ. 8ဒီးပမၤန့ၢ်အထံအကီၢ်,ဒီးပဟ့ၣ်လီၤအီၤလၢတၢ်န့ၢ်သါလၢပှၤရူၤဘ့ၣ်ဖိ,ဒီးလၢပှၤကးဖိ,ဒီးလၢပှၤမနၤရှ့ၤဖိတခီဒူၣ်လီၤ. 9ဒီးတိၢ်န့ၢ်တၢ်အၢၣ်လီၤအီလီၤအံၤအတၢ်ကတိၤ,ဒီးမၤအီၤဒ်သိးသုကဘီၣ်ထီၣ်ညီထီၣ်လၢကယဲၢ်တၢ်လၢသုမၤအီၤန့ၣ်တက့ၢ်. 10တၢ်လၢမုၢ်မဆါတနံၤအံၤသုဆၢထၢၣ်ခဲလၢာ်လၢယွၤသုကစၢ်အမဲာ်ညါ,သုဒူၣ်တဖၣ်အခိၣ်တဖၣ်,သုသူၣ်က့သးပှၢ်,ဒီးသုပှၤကွဲးလံာ်,အံၣ်စရ့လးအပှၤကညီခဲလၢာ်, 11သုဖိဒံဖိသၣ်,သုဖိသုမါ,ဒီးနပှၤတခီဘီမုၢ်ဖိလၢအအိၣ်လၢနသူၣ်ဒဲအလီၢ်ပူၤလၢပှၤကူာ်နသ့ၣ်မုၣ်တုၤလၢပှၤဒၢၣ်နထံ, 12ဒ်သိးနကနုာ်လၢတၢ်အၢၣ်လီၤအီလီၤဒီးယွၤနကစၢ်အပူၤ,ဒီးလၢအဆိၣ်တၢ်လၢအဆိၣ်ဒီးနၤလၢမုၢ်မဆါတနံၤအံၤအပူၤ, 13ဒ်သိးအကဒုးအိၣ်ကျၢၤနၤလၢပှၤတကလုာ်လၢအဂီၢ်ဒၣ်ဝဲ,ဒီးကဲထီၣ်နကစၢ်,ဒ်အကတိၤတၢ်ဒီးနၤအသိးဒီးဒ်အဆိၣ်တၢ်ဒီးနပၢ်တဖၣ်,ဒီးစီၤအၤဘြၤဟၣ်,ဒီးစီၤအံၤစဲး,ဒီးစီၤယၤကိာ်အသိးန့ၣ်လီၤ. 14ဒီးယမၤတၢ်အၢၣ်လီၤအီလီၤဒီးတၢ်ဆိၣ်အံၤထဲလၢသုဝဲဧိၤတမ့ၢ်ဘၣ်, 15မ့ၢ်လၢပှၤလၢအဆၢထၢၣ်ဒီးပှၤလၢမုၢ်မဆါတနံၤအံၤဒီးပှၤလၢအတအိၣ်ဘၣ်ဒီးပှၤလၢမုၢ်မဆါတနံၤအံၤစ့ၢ်ကီးလီၤ. 16(အဂ့ၢ်ဒ်အံၤ,သုသ့ၣ်ညါလၢပအိၣ်ပဆိးလၢကီၢ်အဲၤကူပတူးအပူၤ,ဒီးပခီဂာ်ပှၤကလုာ်တဖၣ်လၢပခီဂာ်, 17ဒီးသုထံၣ်ဘၣ်လံအတၢ်သးဘၣ်အၢ,ဒီးအတၢ်ဂီၤ,သ့ၣ်ဧိၤဝၣ်ဧိၤ,ဒီးလၢၢ်ဧိၤလ့ဧိၤ,ဒီးကျိၣ်ဧိၤစ့ဧိၤ,ဒီးထူဧိၤလွဲဧိၤ,လၢအအိၣ်လၢအကျါလံ). 18ပှၤပိာ်ခွါတဂၤဂ့ၤ,ပှၤပိာ်မုၣ်တဂၤဂ့ၤ,ပှၤတဒူၣ်ဂ့ၤ,ပှၤတဟံၣ်ဂ့ၤ,ကအိၣ်ဘၣ်ဖုးလၢသုကျါလၢအဃၣ်ကွံာ်အသးလၢယွၤပကစၢ်လၢမုၢ်မဆါတနံၤအံၤ,ဒ်သိးအကလဲၤမၤပှၤကလုာ်တဖၣ်န့ၣ်အကစၢ်သ့ၣ်အတၢ်မၤလီၤ.ကအိၣ်ဘၣ်ဖုးလၢသုကျါလၢတၢ်အဂံၢ်လၢအကဲထီၣ်သ့ၣ်ဖိစုၣ်,ဒီးသဘူးအပၤစံၣ်တူး, 19ဒီးတုၤအနၢ်ဟူတၢ်ဆိၣ်အၢအံၤအတၢ်ကတိၤဒီး,တၢ်ကမၤအသးလၢအကဆိၣ်ဂ့ၤလီၤအသးလၢအသးကံၢ်ပူၤ,ဒီးကစံး,ယမ့ၢ်လဲၤတၢ်လၢယသးကီဒ်သိးယကပာ်တၢ်အီမူၤသံးလၢတၢ်သူယသးလၢထံအဖီခိၣ်နာ်သက့ဒီး,ယကအိၣ်ဃူအိၣ်ဖိးလီၤန့ၣ်လီၤ. 20ယွၤတပျၢ်ဘၣ်အီၤဘၣ်.မ့မ့ၢ်ယွၤအသးကထီၣ်,ဒီးအသးက့ၣ်န့ၣ်ကခုၣ်ထီၣ်ဘၣ်ပှၤတဂၤန့ၣ်,ဒီးကယဲၢ်တၢ်ဆိၣ်အၢလၢအကွဲးအသးလၢလံာ်ပူၤအံၤခဲလၢာ်ကဘၣ်အီၤ,ဒီးယွၤကတြူာ်ကွံာ်အမံၤလၢမူခိၣ်အဖီလာ်လီၤ. 21ဒီးယွၤကနီၤဖးအီၤလၢပှၤအံၣ်စရ့လးဖိကိးဒူၣ်ဒဲးအကျါ,လၢတၢ်အၢအဂီၢ်,ဒ်တၢ်အၢၣ်လီၤအီလီၤအတၢ်ဆိၣ်အၢခဲလၢာ်လၢအကွဲးအသးလၢလံာ်တၢ်သိၣ်တၢ်သီအံၤအပူၤအသိးန့ၣ်လီၤ. 22ဒီးပှၤတစိၤလၢသုလီၢ်ခံ,သုဖိသုလံၤ,လၢအကဂဲၤဆၢထၢၣ်လၢသုလီၢ်ခံ,ဒီးပှၤတခီဘီမုၢ်ဖိလၢအကဟဲလၢထံယံၤကီၢ်ယံၤတဖၣ်န့ၣ်ကစံး,တုၤအထံၣ်ဘၣ်ထံဧိၤကီၢ်ဧိၤအတၢ်နးတၢ်ဖှီၣ်,ဒီးတၢ်ဆူးတၢ်ဆါတဖၣ်လၢယွၤပာ်လၢအပူၤ, 23ဒီးမ့ၣ်အူအီၣ်ကီၢ်ဒီဘ့ၣ်ညါဒီးကးဒီးအံသၣ်,ဒီးတဒိးတၢ်ဖှံအီၤ,ဒီးတသၣ်ထီၣ်ဘၣ်,ဒီးနီၣ်ဧိၤမံၤဧိၤတမဲထီၣ်ဘၣ်လၢအပူၤ,ဒ်တၢ်မၤဟးဂီၤစဒိၣ်,ဒီးဂမိၤရၤ,အၤဒမၤ,ဒီးစဘိအံၣ်လၢယွၤမၤဟးဂီၤလၢအသးထီၣ်,ဒီးအသးကိၢ်လူးအသိးန့ၣ်ဒီး, 24ပှၤကလုာ်ခဲလၢာ်န့ၣ်ကစံး,ယွၤမၤကီၢ်တဘ့ၣ်အံၤဒ်အံၤသိးဘၣ်မနုၤလဲၣ်,တၢ်သးထီၣ်ကဲၤထီၣ်ကိၢ်ထဲအံၤမ့ၢ်ဒ်လဲၣ်. 25ဒီးပှၤကစံး,အဂ့ၢ်ဒ်အံၤ,မ့ၢ်အဝဲသ့ၣ်တဖၣ်လဲၤသဒၣ်ယွၤအပၢ်တဖၣ်အကစၢ်အတၢ်အၢၣ်လီၤအီလီၤလၢအအၢၣ်လီၤအီလီၤဝဲဒီးအီၤ,ဖဲအဒုးဟးထီၣ်ကွံာ်အီၤလၢကီၢ်အဲၤကူပတူးအပူၤလီၤ. 26အဂ့ၢ်ဒ်အံၤ,လဲၤမၤဝဲလၢကစၢ်အဂၤတဖၣ်အတၢ်,ဒီးဘါထီၣ်အီၤ,ကစၢ်တဖၣ်လၢအဝဲသ့ၣ်တသ့ၣ်ညါဘၣ်အီၤ,ဒီးလၢတၢ်တဟ့ၣ်လၢအဂီၢ်ဘၣ်လီၤ. 27ဒီးယွၤအသးထီၣ်ကဲၤထီၣ်ဘၣ်ကီၢ်တဘ့ၣ်အံၤတုၤအဒုးဘၣ်အီၤလၢကယဲၢ်တၢ်ဆိၣ်အၢတဖၣ်လၢအကွဲးအသးလၢလံာ်ပူၤအံၤ, 28ဒီးယွၤထဲးကွံာ်အီၤလၢကီၢ်ပူၤလၢတၢ်သူၣ်ထီၣ်,ဒီးတၢ်သးဟ့,ဒီးတၢ်သးကိၢ်လူးဒိၣ်ဒိၣ်ကလဲာ်,ဒီးကွံာ်တ့ၢ်ကွံာ်အီၤဆူကီၢ်အဂၤတဘ့ၣ်အပူၤ,ဒ်မုၢ်မဆါတနံၤအံၤအသိးန့ၣ်လီၤ. 29တၢ်အိၣ်ခူသူၣ်တဖၣ်န့ၣ်အိၣ်ဒီးယွၤပကစၢ်လီၤ.မ့မ့ၢ်တၢ်လၢတၢ်လီၣ်ဖျါအီၤတဖၣ်န့ၣ်အိၣ်ဒီးပှၤဒီးပဖိပလံၤလီၤစိၤလီၤထီ,ဒ်သိးပကတိၢ်န့ၢ်တၢ်သိၣ်တၢ်သီအံၤအတၢ်ကတိၤခဲလၢာ်လီၤ.
Copyright information for
KswSKMB