Deu 33 | KswSKMB | STEP | ဒီးအအံၤမ့ၢ်တၢ်ဆိၣ်ဂ့ၤလၢယွၤအပှၤကညီစီၤမိၤရှ့,လၢအတချုးသံဒံးဘၣ်,ဆိၣ်ဂ့ၤပှၤအံၣ်စရ့လးဖိန့ၣ်လီၤ.ဒီးစံးဝဲဒၣ်,

‏ Deuteronomy 33

1 ဒီးအအံၤမ့ၢ်တၢ်ဆိၣ်ဂ့ၤလၢယွၤအပှၤကညီစီၤမိၤရှ့,လၢအတချုးသံဒံးဘၣ်,ဆိၣ်ဂ့ၤပှၤအံၣ်စရ့လးဖိန့ၣ်လီၤ.ဒီးစံးဝဲဒၣ်,

2 ယွၤဟဲလၢစံၤနါ,

ဒီးဟဲထီၣ်န့ၢ်အီၤလၢစ့ဧၢ်ဆူအအိၣ်,

ကပီၤထီၣ်ဝဲလၢကစၢၢ်ပၤရၣ်,

ဒီးဟဲဝဲဒီးအပှၤစီဆှံတကလး,

3 မ့ၢ်မးအအဲၣ်အပှၤဂီၢ်မုၢ်,

အပှၤစီဆှံခဲလၢာ်အိၣ်လၢအစုပူၤ,

ဒီးဆ့ၣ်နီၤဝဲလၢနခီၣ်ထံး,

ကဒိးန့ၢ်နကလုၢ်ကထါလီၤ.

4 စီၤမိၤရှ့မၤလိာ်န့ၢ်ပှၤလၢတၢ်သိၣ်တၢ်သီ,

စီၤယၤကိာ်အတၢ်အိၣ်ဖှိၣ်အတၢ်န့ၢ်သါ,

5 ဒီးလၢပှၤဂီၢ်မုၢ်အခိၣ်တဖၣ်အိၣ်ဖှိၣ်,

အံၣ်စရ့လးအဒူၣ်တဖၣ်အိၣ်တပူၤဃီန့ၣ်,

မ့ၢ်စီၤပၤလၢယရှူရိၣ်လီၤ.

6 မ်ရူၤဘ့ၣ်မူတက့ၢ်,မ်အသုတသံတဂ့ၤ,

ဒီးမ်အပှၤကညီအိၣ်စှၤဂၤတက့ၢ်.

7 ဒီးအအံၤမ့ၢ်လၢယူဒၤအဂ့ၢ်အကျိၤ,ဒီးစံးဝဲဒၣ်,

ကနၣ်,ယွၤဧၢ,ယူဒၤအကလုၢ်

ဒီးဒုးလဲၤနုာ်အီၤဆူအပှၤဂီၢ်မုၢ်တက့ၢ်,

မ်အစုတဖၣ်အါလၢအဂီၢ်တက့ၢ်,

ဒီးကဲထီၣ်နဲတၢ်မၤစၢၤအီၤလၢအဒုၣ်အဒါန့ၣ်တက့ၢ်.

8 ဒီးလၢလ့ၤဝံအဂ့ၢ်အကျိၤစံးဝဲဒၣ်,

မ်နတူမံၣ်ဒီးနအူရံၣ်အိၣ်ဒီးနပှၤစီဆှံတဂၤ,

လၢနလ့ပစီအီၤလၢမးစၤ,

လၢနမၤကွၢ်အီၤဖဲထံမရံၤဘါ,

9 လၢအစံးလၢအမိၢ်ဒီးအပၢ်အဂ့ၢ်,ယတထံၣ်ဘၣ်အီၤ,

ဒီးတပာ်သ့ၣ်ညါအသးလၢအဒီပုၢ်ဝဲၢ်တဖၣ်,

ဒီးတသ့ၣ်ညါဘၣ်အဖိဒၣ်ဝဲဘၣ်,

အဂ့ၢ်ဒ်အံၤ,တိၢ်န့ၢ်နကလုၢ်ကထါ,

ဒီးကွၢ်က့ၤနတၢ်အၢၣ်လီၤအီလီၤလီၤ.

10 ကသိၣ်လိယၤကိာ်လၢနတၢ်စံၣ်ညီၣ်တဖၣ်,

ဒီးအံၣ်စရ့လးလၢနတၢ်သိၣ်တၢ်သီ,

ကပာ်ထီၣ်တၢ်ဆိၣ်ကဲၤနၢမူလၢနမဲာ်ညါ,

ဒီးနတၢ်လုၢ်မ့ၣ်အူဒီဒုလၢနတၢ်လုၢ်အလီၢ်အဖီခိၣ်.

11 ဆိၣ်ဂ့ၤ,ယွၤဧၢ,အတၢ်ဖိတၢ်လံၤ,

ဒီးအမၤတၢ်လၢအစုန့ၣ်မ်အဘၣ်နသးတက့ၢ်.

ပှၤအဂဲၤဆၢထၢၣ်ထီဒါအီၤ,ကျီဖျိအယီၢ်ဒ့တက့ၢ်,

ဒီးလၢပှၤအသးဟ့အီၤ,ဒ်သိးအသုတဂဲၤဆၢထၢၣ်က့ၤတဂ့ၤ.

12 ဒီးလၢဘံၣ်ယၤမံၣ်အဂ့ၢ်အကျိၤစံးဝဲဒၣ်,

ပှၤလၢယွၤအဲၣ်အီၤကအိၣ်ဝဲလၢအဃၢၤခၢၣ်သနၢၢ်,

ကကွၢ်က့ၤအီၤသ့တနံၤကျၢၤ,

ကအိၣ်ကဆိးဝဲလၢအဖံဘၣ်ခိၣ်အကဆူးလီၤ.

13 ဒီးလၢယိၤသးအဂ့ၢ်အကျိၤစံးဝဲဒၣ်,

မ်ယွၤဆိၣ်ဂ့ၤအထံအကီၢ်တက့ၢ်.

လၢမူခိၣ်အတၢ်လုၢ်ဒိၣ်ပှ့ၤဒိၣ်,လၢပစီၤထံ,

ဒီးလၢတၢ်ယိာ်ပူၤလၢအကိာ်လီၤလၢလာ်ခီ,

14 ဒီးလၢတၢ်လုၢ်ဒိၣ်ပှ့ၤဒိၣ်လၢမုၢ်ဒုးဟဲသၣ်ထီၣ်,

ဒီးလၢတၢ်လုၢ်ဒိၣ်ပှ့ၤဒိၣ်လၢလါတဖၣ်ဒုးဟဲသၣ်ထီၣ်,

15 ဒီးလၢကစၢၢ်ကလိလၢပျၢၤအတၢ်အဒိၣ်တဖၣ်,

ဒီးလၢတၢ်စိခိၣ်အထူအယိာ်အတၢ်လုၢ်ဒိၣ်ပှ့ၤဒိၣ်,

16 လၢဟီၣ်ခိၣ်အတၢ်လုၢ်ဒိၣ်ပှ့ၤဒိၣ်,ဒီးအတၢ်ပှဲၤ,

ဒီးလၢတၢ်ဘၣ်ပှၤအသးလၢအအိၣ်လၢသ့ၣ်တၤဆှုၣ်တခိၣ်အပူၤ,

မ်အဟဲဘၣ်စီၤယိၤသးအခိၣ်,

လၢအဒီပုၢ်ဝဲၢ်အပဒိၣ်ဖးဒိၣ်အခိၣ်ဒီခိၣ်တက့ၢ်.

17 အဂီၤဖံးဝဲၢ်ကိန့ၣ်မ့ၢ်အကဟုကညီၢ်,

အနၢၤန့ၣ်မ့ၢ်ဒ်တၤဖးအနၢၤအသိး,

ကသနိၣ်ထီၣ်ပှၤဂီၢ်မုၢ်တပူၤဃီလၢအီၤ,

ဆူဟီၣ်ခိၣ်အကတၢၢ်လီၤ.

အဝဲန့ၣ်မ့ၢ်အ့ဖရဲၣ်အပှၤကလးတဖၣ်,

ဒီးအဝဲန့ၣ်မ့ၢ်မနၤရှ့ၤအပှၤကထိတဖၣ်န့ၣ်လီၤ.

18 ဒီးလၢစဘူလိၣ်အဂ့ၢ်အကျိၤစံးဝဲဒၣ်,

သးခု,စဘူလိၣ်ဧၢ,လၢနလဲၤတၢ်,

ဒီးယံးစၣ်ကၢ်ဧၢ,လၢနဒဲပူၤန့ၣ်တက့ၢ်.

19 ကကိးန့ၢ်ပှၤဂီၢ်မုၢ်ဆူကစၢၢ်တဖျၢၣ်န့ၣ်,

ဖဲန့ၣ်ကလုၢ်တၢ်တီတၢ်လိၤအတၢ်လုၢ်တဖၣ်,

အဂ့ၢ်ဒ်အံၤ,ကစူၢ်ထီၣ်ပီၣ်လဲၣ်အတၢ်ပှဲၤ,

ဒီးတၢ်လုၢ်ဒိၣ်အိၣ်ခူသူၣ်လၢမဲးကျါလီၤ.

20 ဒီးလၢကးအဂ့ၢ်အကျိၤစံးဝဲဒၣ်,

ပှၤလၢအမၤလဲၢ်ထီၣ်ကးန့ၣ်မ်အဘၣ်တၢ်ဆိၣ်ဂ့ၤတက့ၢ်,အိၣ်ဝဲဆိးဝဲဒ်ခ့ယုၢ်မိၢ်အသိး,

ဒီးအ့ၣ်ဖှီတၢ်အစုဒီးအခိၣ်ဒီလီၤ.

21 ဒီးကွၢ်န့ၢ်တၢ်ဆိကတၢၢ်လၢအဂီၢ်ဒၣ်ဝဲ,

အဂ့ၢ်ဒ်အံၤ,ဖဲန့ၣ်တၢ်အဂီၢ်အိၣ်ပာ်စၢၤလၢပှၤစံၣ်ညီၣ်တၢ်အဂီၢ်,

ဒီးဟဲဒီးပှၤဂီၢ်မုၢ်အခိၣ်တဖၣ်,

မၤဝဲလၢယွၤအတၢ်တီတၢ်လိၤ,

ဒီးအတၢ်စံၣ်ညီၣ်ဒီးအံၣ်စရ့လးလီၤ.

22 ဒီးလၢဒၣ်အဂ့ၢ်အကျိၤစံးဝဲဒၣ်,

ဒၣ်မ့ၢ်ခ့ယုၢ်အဖိတဒု,

စံၣ်ဝဲလၢဘၤၡၣ်လီၤ.

23 ဒီးလၢနးသၤလံအဂ့ၢ်အကျိၤစံးဝဲဒၣ်,

နးသၤလံဧၢ,ဘၣ်တၢ်အသးန့ၣ်နန့ၢ်ဘျဲးန့ၢ်,

ဒီးနပှဲၤဒီးယွၤအတၢ်ဆိၣ်ဂ့ၤန့ၣ်,

မၤန့ၢ်နဲလၢတၢ်မုၢ်နုာ်ဒီးတၢ်ကလံၤထံးန့ၣ်တက့ၢ်.

24 ဒီးလၢအၤရှ့ၢ်အဂ့ၢ်အကျိၤ,စံးဝဲဒၣ်,

မ်အၤရှ့ၢ်ဘၣ်တၢ်ဆိၣ်ဂ့ၤလၢဖိသၣ်တဖၣ်,

မ်အဘၣ်အဒီပုၢ်ဝဲၢ်အသး,

မ်အဘျၢအခီၣ်လၢသိပူၤတက့ၢ်.

25 ထးဒီးတိၢ်မ့ၢ်နခီၣ်ဖံး,

ဒီးဒ်နမုၢ်နံၤတဖၣ်အသိးန့ၣ်နဂံၢ်နဘါကအိၣ်လီၤ.

26 တၢ်ဒ်ယရှူရိၣ်အကစၢ်အသိးတအိၣ်,

ပှၤလၢအဒိးမူခိၣ်လၢအကမၤစၢၤနၤ,

ဒီးဒိးတၢ်အၢၣ်လၢအလၤကပီၤအပူၤလီၤ.

27 ယွၤအထူအယိာ်န့ၣ်မ့ၢ်နအိၣ်နဆိးအလီၢ်,

ဒီးတၢ်အစုအထူအယိာ်တဖၣ်န့ၣ်အိၣ်လၢနဖီလာ်.

ဒီးကဟီထီၣ်ကွံာ်တၢ်အဒုၣ်အဒါလၢနမဲာ်ညါ,

ဒီးကစံး,မၤဟးဂီၤတၢ်တက့ၢ်.

28 ဒီးအံၣ်စရ့လးကအိၣ်ကဆိးခၢၣ်သနၢၢ်,

စီၤယၤကိာ်အထံထီၣ်ပၢၢ်တပူၤဒၣ်,

လၢထံဧိၤကီၢ်ဧိၤအိၣ်ဒီးဘုကၠူၣ်,ဒီးစပံးထံအပူၤလီၤ.

အမူခိၣ်ကလီၤစီၤပစီၤထံစ့ၢ်ကီးလီၤ.

29 အံၣ်စရ့လးဧၢ,နဘၣ်တၢ်ဆိၣ်ဂ့ၤလီၤ.

မ့ၢ်မတၤလီၤဂာ်ဒီးနၤ,ပှၤဂီၢ်မုၢ်ဧၢ,

လၢအဘၣ်တၢ်အုၣ်က့ၤခီၣ်က့ၤအီၤလၢယွၤ,

တၢ်မၤစၢၤနၤအကတီၤတဘ့ၣ်,

ဒီးနကဟုကညီၢ်အနးတဘ့ၣ်န့ၣ်လဲၣ်.

နဒုၣ်နဒါတဖၣ်ကပာ်ဆီၣ်လီၤအသးလၢနဖီလာ်,

ဒီးနကယီၢ်ဘၣ်အလီၢ်ထီၣ်ထီတဖၣ်န့ၣ်လီၤ.