Ecclesiastes 6
1ယထံၣ်ဘၣ်တၢ်အၢတမံၤ,လၢမုၢ်အဖီလာ်,ဒီးဃၢဝဲလၢပှၤကညီအလိၤလီၤ. 2ပှၤကညီအိၣ်ဝဲလၢယွၤဟ့ၣ်လီၤအီၤလၢတၢ်ထူးတၢ်တီၤဒီးအစုလီၢ်အခီၣ်ခိၣ်,ဒီးတၢ်လၤကပီၤ,ဒီးတုၤအန့ၢ်ဘၣ်တၢ်အလီၢ်တအိၣ်ဘၣ်လၢကယဲၢ်တၢ်လၢအသးဆၢန့ၢ်အကျါ,မ့မ့ၢ်ယွၤတဟ့ၣ်အီၣ်အတၢ်ဘၣ်,မ့ၢ်ပှၤဂၤအီၣ်ဝဲလီၤ,အန့ၣ်မ့ၢ်တၢ်ကလီကလီလီၤ.ဒီးတၢ်အအၢနးမးလီၤ. 3ပှၤမ့ၢ်ထီၣ်ဖိတကယၤ,ဒီးမူဝဲအါနံၤ,ဒီးအနံၣ်အမုၢ်နံၤမ့ၢ်အါဘၣ်ဆၣ်ဒီး,အသးမ့ၢ်တဘျဲးအီၣ်ဘၣ်ဒီးတၢ်ဂ့ၤဘၣ်,ဒီးတၢ်ခူၣ်လီၤကွံာ်အီၤမ့ၢ်တအိၣ်ဘၣ်ဒီး,ယစံး,တၢ်လီၤလူးဂ့ၤန့ၢ်အီၤတက့ၢ်လီၤ. 4အဂ့ၢ်ဒ်အံၤ,ဟဲဝဲလၢတၢ်ကလီကလီလီၤ.ဒီးဟးထီၣ်ကွံာ်ဝဲလၢတၢ်ခံးကျါ,ဒီးတၢ်လုၣ်ဘၢအမံၤလၢတၢ်ခံးကျါလီၤ. 5ဒီးတထံၣ်ဘၣ်မုၢ်,ဒီးတသ့ၣ်ညါဘၣ်တၢ်ဘၣ်,အဝဲအံၤကအိၣ်ဒီးတၢ်အိၣ်ဘှံးအါန့ၢ်အဝဲန့ၣ်တက့ၢ်လီၤ. 6မ့ၢ်လံ,မ့ၢ်မူဝဲအနံၣ်တကထိခံစးဘၣ်ဆၣ်ဒီး,တထံၣ်ဘၣ်တၢ်ဂ့ၤဘၣ်.ပှၤခဲလၢာ်လဲၤဝဲဆူအလီၢ်တပူၤဃီ,တမ့ၢ်ဘၣ်ဧါ. 7ပှၤကညီအမၤတၢ်ခဲလၢာ်န့ၣ်မ့ၢ်လၢအထးခိၣ်အဂီၢ်ဘၣ်ဆၣ်ဒီး,တဘျဲးအီၣ်ဘၣ်. 8အဂ့ၢ်ဒ်အံၤ,ပှၤကူၣ်တၢ်သ့ဘၣ်ဘျုးဘၣ်ဖှိၣ်အါန့ၢ်ပှၤဟးဂီၤဖိလၢမနုၤတမံၤလဲၣ်.ဒီးပှၤဖှီၣ်ဖိယာ်ဖိလၢအသ့ၣ်ညါလဲၤတၢ်လၢပှၤမူအမဲာ်ညါန့ၣ်ဘၣ်ဘျုးလၢမနုၤတမံၤလဲၣ်. 9တၢ်လၢပမဲာ်ထံၣ်တၢ်န့ၣ်ဂ့ၤန့ၢ်ပသးဟးဝ့ၤဝီၤဆၢန့ၢ်တၢ်တက့ၢ်လီၤ.အဝဲန့ၣ်မ့ၢ်စ့ၢ်ကီးတၢ်ကလီကလီ,ဒီးတၢ်ဂုာ်မၤန့ၢ်ကလံၤလီၤ. 10တၢ်လၢအအိၣ်န့ၣ်တၢ်ကိးတ့ၢ်အမံၤလၢပျၢၤ,ဒီးတၢ်သ့ၣ်ညါလၢအမ့ၢ်ပှၤကညီလီၤ.ဒီးလိာ်ကွီၢ်ဒီးပှၤလၢအဆူၣ်န့ၢ်အီၤတက့ၢ်တဂၤန့ၣ်တသ့ဘၣ်. 11မ့ၢ်မးတၢ်မၤအါထီၣ်တၢ်ကလီကလီန့ၣ်အိၣ်ဝဲအါမံၤလီၤ.ပှၤကညီဘၣ်ဘျုးဘၣ်ဖှိၣ်လၢမနုၤတမံၤလဲၣ်. 12အဂ့ၢ်ဒ်အံၤ,မ့ၢ်မတၤသ့ၣ်ညါတၢ်ဂ့ၤလၢပှၤကညီအဂီၢ်လၢအသးသမူအဖၢမုၢ်လၢအသးသမူအမုၢ်နံၤကလီကလီအပူၤန့ၣ်တဂၤလဲၣ်.အဂ့ၢ်ဒ်အံၤ,လၢာ်ဝဲဒ်တၢ်အကဒုအသိးန့ၣ်လီၤ.မ့ၢ်မတၤသ့ၣ်ညါပှၤလၢအကအိၣ်ထီၣ်လၢအလီၢ်ခံလၢမုၢ်အဖီလာ်တဂၤလဲၣ်.
Copyright information for
KswSKMB