Ecc 8 | KswSKMB | STEP | မ့ၢ်မတၤလီၤဂာ်ပှၤကူၣ်တၢ်သ့တဂၤလဲၣ်.ဒီးမ့ၢ်မတၤသ့ၣ်ညါတၢ်ကတိၤအဒိၣ်အယိာ်လဲၣ်.ပှၤကညီအတၢ်ကူၣ်သ့န့ၣ်ဒုးကပီၤထီၣ်အမဲာ်,ဒီးအမဲာ်ဒူလဲလိာ်အသးလီၤ.

‏ Ecclesiastes 8

1 မ့ၢ်မတၤလီၤဂာ်ပှၤကူၣ်တၢ်သ့တဂၤလဲၣ်.ဒီးမ့ၢ်မတၤသ့ၣ်ညါတၢ်ကတိၤအဒိၣ်အယိာ်လဲၣ်.ပှၤကညီအတၢ်ကူၣ်သ့န့ၣ်ဒုးကပီၤထီၣ်အမဲာ်,ဒီးအမဲာ်ဒူလဲလိာ်အသးလီၤ.

2 မ့ၢ်လၢတၢ်ဆိၣ်ဘၣ်ဃးဒီးယွၤအဃိဒီး,ယဟ့ၣ်ကူၣ်နၤ,တိၢ်န့ၢ်စီၤပၤအတၢ်မၤလိာ်တက့ၢ်. 3 ဟးထီၣ်လၢအမဲာ်ညါချ့ချ့တဂ့ၤ.ဆၢထၢၣ်လၢတၢ်အၢအပူၤတဂ့ၤ.အဂ့ၢ်ဒ်အံၤ,မၤဖဲဒၣ်တၢ်လၢအဘၣ်အသးလီၤ.

4 ဖဲစီၤပၤအကလုၢ်အိၣ်န့ၣ်တၢ်စိတၢ်ကမီၣ်အိၣ်ဝဲလီၤ.ဒီးနမၤဒ်လဲၣ်န့ၣ်မ့ၢ်မတၤကစံးလၢအီၤတဂၤလဲၣ်.

5 ပှၤလၢအတိၢ်န့ၢ်တၢ်မၤလိာ်န့ၣ်တသ့ၣ်ညါဘၣ်တၢ်အၢဘၣ်.ဒီးပှၤကူၣ်တၢ်သ့တဂၤအသးန့ၣ်သ့ၣ်ညါတၢ်အဆၢအကတီၢ်ဒီးတၢ်စံၣ်ညီၣ်လီၤ.

6 အဂ့ၢ်ဒ်အံၤ,တၢ်ခဲလၢာ်အိၣ်ဝဲဒီးအဆၢအကတီၢ်,ဒီးအတၢ်စံၣ်ညီၣ်လီၤ.အဂ့ၢ်ဒ်အံၤ,ပှၤကညီအတၢ်အၢလၢအဘၣ်အီၤမ့ၢ်အအါမးလီၤ. 7 အဂ့ၢ်ဒ်အံၤ,တၢ်ကမၤသးန့ၣ်တသ့ၣ်ညါဘၣ်ဝဲဘၣ်.အဂ့ၢ်ဒ်အံၤ,ကမၤအသးဒ်လဲၣ်ဒ်လဲၣ်န့ၣ်မ့ၢ်မတၤစံးဘၣ်တဲဘၣ်သ့တဂၤလဲၣ်.

8 ပှၤအိၣ်ဒီးအစိအကမီၤလၢအသးအဖီခိၣ်ဒ်သိးအသးအသုတဟးထီၣ်ကွံာ်တဂ့ၤန့ၣ်တအိၣ်နီတဂၤဘၣ်.ဒီးလၢတၢ်သံအမုၢ်တနံၤအဖီခိၣ်န့ၣ်အစိအကမီၤတအိၣ်ဘၣ်.တၢ်ပျၢ်ပှၤတအိၣ်ဘၣ်လၢတၢ်ဒုးသုးအံၤအပူၤဘၣ်.ဒီးတၢ်တတီတလိၤန့ၣ်မၤပူၤမၤဖျဲးပှၤလၢအအိၣ်ဒီးအီၤတသ့ဘၣ်.

9 တၢ်ခဲလၢာ်အံၤယထံၣ်,ဒီးယပာ်ယသးလၢကယဲၢ်တၢ်လၢအမၤအသးလၢမုၢ်အဖီလာ်လီၤ.တၢ်အဆၢအကတီၢ်အိၣ်ဝဲဖဲပှၤပၢပှၤဂၤလၢအတၢ်အၢအဂီၢ်လီၤ. 10 ဒီးယထံၣ်ဘၣ်ပှၤတတီတလိၤဘၣ်တၢ်ခူၣ်လီၤကွံာ်အီၤဒီးလဲၤလီၤဆူပျုၤပူၤလီၤ.မ့မ့ၢ်ပှၤလၢအမၤတၢ်လိၤလၢအဟဲဒီးဟးထီၣ်ကွံာ်လၢတၢ်စီဆှံအလီၢ်,ဒီးဘၣ်တၢ်သးပ့ၤနီၣ်အီၤလၢဝ့ၢ်ပူၤဖဲအမၤတ့ၢ်ဝဲဒ်န့ၣ်လီၤ.အန့ၣ်မ့ၢ်စ့ၢ်ကီးတၢ်ကလီကလီလီၤ.

11 မ့ၢ်တၢ်တမၤဘၣ်ချ့သဒံးလၢတၢ်စံၣ်ညီၣ်ဃၣ်တၢ်မၤအၢဘၣ်ဒီး,ပှၤကညီဖိအသးအိၣ်ပှဲၤဆၢၣ်ကလာ်လၢအကမၤတၢ်အၢလီၤ. 12 ပှၤတၢ်ဒဲးဘးဖိမ့ၢ်မၤအၢတၢ်အဘျီတကယၤ,ဒီးအနံၤအါထီၣ်ဘၣ်ဆၣ်ဒီး,မ့ၢ်မးယသ့ၣ်ညါလၢတၢ်ဂ့ၤကအိၣ်လၢပှၤပျံၤယွၤအဂီၢ်,ပှၤလၢအပျံၤတၢ်လၢအမဲာ်ညါအဂီၢ်လီၤ.

13 မ့မ့ၢ်တၢ်ဂ့ၤတဘၣ်ဘၣ်ပှၤတတီတလိၤဘၣ်,ဒီးအမုၢ်နံၤလၢအမၤအသးဒ်တၢ်ကဒုအသိးတအါထီၣ်ဘၣ်.အဂ့ၢ်ဒ်အံၤ,မ့ၢ်အတပျံၤဘၣ်လၢယွၤအမဲာ်ညါဘၣ်.

14 တၢ်ကလီကလီတမံၤမၤအသးလၢဟီၣ်ခိၣ်ချၢလီၤ.ပှၤတီပှၤလိၤလၢအဘၣ်တၢ်ဒ်ပှၤတတီတလိၤမၤတၢ်အသိးန့ၣ်,ဒီးပှၤတတီတလိၤဘၣ်လၢအဘၣ်တၢ်ဒ်ပှၤတီပှၤလိၤအမၤတၢ်အသိးန့ၣ်အိၣ်ဝဲလီၤ.ယစံး,အဝဲန့ၣ်မ့ၢ်စ့ၢ်ကီးတၢ်ကလီကလီလီၤ. 15 တုၤနုၤတစုယစံးထီၣ်ပတြၢၤတၢ်သူၣ်ဖှံသးညီလီၤ.အဂ့ၢ်ဒ်အံၤ,ပှၤအီၣ်တၢ်,ဒီးအီတၢ်,ဒီးပာ်မုာ်လၤအသးန့ၣ်တၢ်ဂ့ၤန့ၢ်အန့ၣ်တအိၣ်ဘၣ်.အဂ့ၢ်ဒ်အံၤ,အဝဲန့ၣ်အိၣ်ဒီးအီၤလၢအမၤတၢ်အဂီၢ်လၢအသးသမူအမုၢ်နံၤလၢယွၤဟ့ၣ်လီၤအီၤလၢမုၢ်အဖီလာ်အဖၢမုၢ်န့ၣ်လီၤ.

16 တုၤယပာ်ယသးဒ်သိးယကသ့ၣ်ညါတၢ်ကူၣ်သ့ဒီးကွၢ်ဆိကမိၣ်တၢ်မၤအသးလၢဟီၣ်ခိၣ်ချၢ(အဂ့ၢ်ဒ်အံၤ,လၢမုၢ်နၤမ့ၢ်ဂ့ၤ,လၢမုၢ်ဆါမ့ၢ်ဂ့ၤ,ပှၤတမံဘၣ်လၢအမဲာ်ဘၣ်,) 17 ဒီးယထံၣ်လၢယွၤအတၢ်မၤခဲလၢာ်,လၢပှၤကညီဃုနၢ်ပၢၢ်တၢ်မၤအသးလၢမုၢ်အဖီလာ်န့ၣ်တသ့ဘၣ်,ပှၤကညီမ့ၢ်မၤဒ်သိးအကထံၣ်န့ၢ်အီၤနာ်သက့,တထံၣ်န့ၢ်ဘၣ်ဝဲဘၣ်.လၢန့ၣ်အမဲာ်ညါပှၤလၢအကူၣ်တၢ်သ့န့ၣ်မ့ၢ်ဆိကမိၣ်လၢအကသ့ၣ်ညါဘၣ်ဆၣ်ဒီး,တထံၣ်န့ၢ်ဘၣ်ဝဲဘၣ်လီၤ.