Ephesians 5
1မၤသးဒ်န့ၣ်ဒီး,ကဲထီၣ်ပှၤကွၢ်လိယွၤဒ်ဖိသးဘိအသိးန့ၣ်တက့ၢ်. 2လဲၤသုဝဲလၢတၢ်အဲၣ်တၢ်ကွံအပူၤ,ဒ်ခရံာ်အဲၣ်ပှၤကွံပှၤ,ဒီးဟ့ၣ်လီၤကွံာ်အသးလၢပဂီၢ်လၢတၢ်မၤဘူၣ်ဒီးတၢ်လုၢ်လၢယွၤလၢတၢ်နၢမူအဂီၢ်အသိးတက့ၢ်. 3မ့မ့ၢ်တၢ်မၤကမၣ်မုၣ်ကမၣ်ခွါ,ဒီးတၢ်တကဆှီဘၣ်ထီရီၤတမံၤမ့ၢ်ဂ့ၤ,တၢ်သးကွံမ့ၢ်ဂ့ၤထဲအမံၤ,မ်ပှၤသုတပှ့ၤဘၣ်လၢသုကျါတဂ့ၤ,ဒ်ပှၤစီဆှံဂ့ၤမၤဝဲအသိးန့ၣ်လီၤ. 4ဒီးတၢ်ကတိၤဆူဖျိးဆူပျၤ,ဒီးတၢ်ကတိၤဟးဂူာ်ဟးဂီၤ,ဒီးတၢ်ကတိၤလိာ်ဃိၢ်လိာ်ကွဲန့ၣ်,မ့ၢ်အတဂ့ၤတဘၣ်ဘၣ်ဒီး,သုတကတိၤအီၤတဂ့ၤ,အခိၣ်တလိာ်,ကတိၤတၢ်လၢတၢ်စံးထီၣ်ပတြၢၤယွၤအဘျုးအဖှိၣ်တက့ၢ်. 5အဂ့ၢ်ဒ်အံၤ,တၢ်အံၤသုသ့ၣ်ညါလၢကယဲၢ်ပှၤမၤကမၣ်မုၣ်ကမၣ်ခွါမ့ၢ်ဂ့ၤ,ပှၤအဲၣ်တလ့ၤအဲၣ်တဘီမ့ၢ်ဂ့ၤ,ပှၤသးကွံတၢ်မ့ၢ်ဂ့ၤ,(လၢအမ့ၢ်ပှၤဘါတၢ်ဂီၤ,)န့ၢ်ဘၣ်သါတၢ်လၢခရံာ်ဒီးယွၤအဘီအမုၢ်အပူၤတသ့ဘၣ်နီတဂၤဘၣ်. 6သုတဒုးလီသုသးလၢပှၤအတၢ်ကတိၤကလီကလီနီတဂၤတဂ့ၤ.အဂ့ၢ်ဒ်အံၤ,မ့ၢ်တၢ်န့ၣ်တဖၣ်အဃိဒီး,ယွၤအတၢ်သးဒိၣ်ဟဲဘၣ်ပှၤတစူၢ်ဘၣ်တၢ်ဘၣ်တဖၣ်န့ၣ်လီၤ. 7မၤသးဒ်န့ၣ်ဒီး,သုတမၤဃုာ်ဒီးအီၤတဂ့ၤ. 8အဂ့ၢ်ဒ်အံၤ,လၢသီန့ၣ်သုမ့ၢ်တၢ်ခံး,မ့မ့ၢ်ခဲကနံၣ်အံၤသုမ့ၢ်တၢ်ကပီၤလၢကစၢ်အပူၤလီၤ.လဲၤတၢ်ဒ်တၢ်ကပီၤဖိအသိးန့ၣ်တက့ၢ်. 9အဂ့ၢ်ဒ်အံၤ,တၢ်ကပီၤအတၤသၣ်မ့ၢ်ကယဲၢ်တၢ်မၤဂ့ၤ,ဒီးတၢ်တီတၢ်လိၤ,ဒီးတၢ်မ့ၢ်တၢ်တီလီၤ. 10ဂုာ်ဃုသ့ၣ်ညါတၢ်လၢအဘၣ်ကစၢ်အသးတက့ၢ်. 11ဒီးသုတမၤဃုာ်ဒီးတၢ်ခံးအတၢ်မၤလၢအတၤသၣ်တအိၣ်ဘၣ်န့ၣ်တဂ့ၤ,အခိၣ်တလိာ်,သိၣ်ဃီၣ်အီၤတက့ၢ်. 12အဂ့ၢ်ဒ်အံၤ,တၢ်လၢအဝဲသ့ၣ်မၤလၢတၢ်ခူသူၣ်န့ၣ်,ထဲပစံၣ်ဃဲၤအီၤဒီး,မ့ၢ်တၢ်မဲာ်ဆှးလီၤ. 13ဘၣ်ဆၣ်ဒီးကယဲၢ်တၢ်လၢအဘၣ်တၢ်သိၣ်ဃီၣ်န့ၣ်,မ့ၢ်အဘၣ်တၢ်လီၣ်ဖျါထီၣ်အီၤလၢတၢ်ကပီၤလီၤ.အဂ့ၢ်ဒ်အံၤ,ကယဲၢ်တၢ်လၢအမၤဖျါတၢ်န့ၣ်မ့ၢ်တၢ်ကပီၤလီၤ. 14မၤသးဒ်န့ၣ်ဒီးတၢ်စံးဝဲဒၣ်ပှၤလၢအမံ,နၤဧၢ,ဖုသံနီၣ်တက့ၢ်.ဂဲၤဆၢထၢၣ်က့ၤလၢတၢ်သံတက့ၢ်,ဒီးခရံာ်ကဟ့ၣ်လီၤနၤလၢတၢ်ကပီၤလီၤ,ပှၤလၢအမံ,နၤဧၢ,ဖုသံနီၣ်တက့ၢ်.ဂဲၤဆၢထၢၣ်က့ၤလၢတၢ်သံတက့ၢ်,ဒီးခရံာ်ကဟ့ၣ်လီၤနၤလၢတၢ်ကပီၤလီၤ. 15မၤသးဒ်န့ၣ်ဒီးတိၢ်သုသးဒ်သိးသုကလဲၤကွၢ်ဟုၣ်ကွၢ်စုးတၢ်,တမ့ၢ်ဘၣ်ဒ်ပှၤဟးဂီၤဖိအသိးဘၣ်,မ့ၢ်ဒ်ပှၤကူၣ်တၢ်သ့အသိးန့ၣ်တက့ၢ်. 16ပှ့ၤက့ၤအဆၢကတီၢ်တက့ၢ်.အဂ့ၢ်ဒ်အံၤ,မုၢ်နံၤတဖၣ်န့ၣ်မ့ၢ်အအၢအသီလီၤ. 17မၤသးဒ်န့ၣ်ဒီး,ကဲထီၣ်လၢပှၤဟးဂီၤဖိတဂ့ၤ,မ့မ့ၢ်တၢ်ဘၣ်ကစၢ်အသးဒ်လဲၣ်ဒ်လဲၣ်န့ၣ်သ့ၣ်ညါနၢ်ပၢၢ်တက့ၢ်. 18ဒီးအီမူၤသုသးလၢစပံးထံတဂ့ၤ.လၢအဝဲန့ၣ်အပူၤ,မ့ၢ်တၢ်လုၣ်ကိလုၣ်ကပာ်လီၤ.မ့မ့ၢ်အိၣ်လၢပှဲၤဒီးသးန့ၣ်တက့ၢ်. 19ကတိၤလိာ်သုသးလၢထါစံးထီၣ်ပတြၢၤ,ဒီးတၢ်သးဝံၣ်,ဒီးထါဘၣ်ဃးဒီးသးန့ၣ်,ဒီးအုၣ်ထီၣ်,ဒီးစံးထီၣ်ပတြၢၤကစၢ်လၢသုသူၣ်ကံၢ်သးလဲတက့ၢ်. 20စံးထီၣ်ပတြၢၤပၢ်ယွၤအဘျုးအဖှိၣ်တဘိယူၢ်ဃီလၢတၢ်ခဲလၢာ်အဃိ,လၢပကစၢ်ယ့ၣ်ရှူးခရံာ်အမံၤန့ၣ်တက့ၢ်. 21ပာ်လီၤလိာ်သုသးသကိးသကိးလၢသုဖီလာ်လၢတၢ်ပျံၤခရံာ်အပူၤတက့ၢ်. 22ပိာ်မုၣ်သ့ၣ်ဧၢ,ပာ်လီၤသုသးလၢသုဝၤအဖီလာ်,ဒ်လၢကစၢ်န့ၣ်အသိးတက့ၢ်. 23အဂ့ၢ်ဒ်အံၤ,ဝၤမ့ၢ်မါအခိၣ်,ဒ်ခရံာ်မ့ၢ်တၢ်အိၣ်ဖှိၣ်အခိၣ်အသိးန့ၣ်,ဒီးအဝဲဒၣ်န့ၣ်မ့ၢ်ပှၤအုၣ်က့ၤခီၣ်က့ၤပနီၢ်ခိတဂၤလီၤ. 24မၤသးဒ်န့ၣ်ဒီးဒ်တၢ်အိၣ်ဖှိၣ်အိၣ်လၢခရံာ်အဖီလာ်အသိးန့ၣ်,မ်မါသ့ၣ်တဖၣ်ပာ်လီၤအသးလၢအဝၤဒၣ်ဝဲအဖီလာ်လၢတၢ်ခဲလၢာ်အပူၤဒ်န့ၣ်သိးတက့ၢ်. 25ပိာ်ခွါသ့ၣ်ဧၢ,အဲၣ်သုမါ,ဒ်ခရံာ်အဲၣ်တၢ်အိၣ်ဖှိၣ်,ဒီးဟ့ၣ်လီၤကွံာ်အသးလၢအဂီၢ်, 26ဒ်သိးကမၤစီဆှံအီၤလၢတၢ်သ့စီလၢထံ,လၢတၢ်အကလုၢ်အကထါအဃိ, 27ဒ်သိးအကပာ်အီၤလၢအမဲာ်ညါဒၣ်ဝဲ,တၢ်အိၣ်ဖှိၣ်အိၣ်ဒီးအလၤအကပီၤ,ဒီးအမဲၣ်သူမဲၣ်ဂီၤမ့ၢ်ဂ့ၤ,အဖံးသွံးမ့ၢ်ဂ့ၤ,တၢ်ဒ်န့ၣ်သိးတဖၣ်မ့ၢ်ဂ့ၤ,တအိၣ်ဘၣ်,မ့ၢ်ဒ်သိးအကစီကဆှံ,ဒီးတသံၣ်သူတမီၢ်ကျာ်ဘၣ်လီၤ. 28ဒ်န့ၣ်အသိးပိာ်ခွါသ့ၣ်တဖၣ်ဂ့ၤအဲၣ်အမါဒၣ်ဝဲ,ဒ်အအဲၣ်အနီၢ်ခိဒၣ်ဝဲအသိးန့ၣ်လီၤ.ပှၤလၢအအဲၣ်အမါဒၣ်ဝဲန့ၣ်အဲၣ်အသးဒၣ်ဝဲလီၤ. 29အဂ့ၢ်ဒ်အံၤ,ပှၤလၢအသးဟ့အညၣ်ဒၣ်ဝဲတအိၣ်ဘၣ်နီတဂၤဘၣ်.မ့ၢ်အလုၢ်ဝဲ,ဒီးအံးက့ၤကွၢ်က့ၤဝဲ,ဒ်ခရံာ်အံးက့ၤကွၢ်က့ၤအတၢ်အိၣ်ဖှိၣ်အသိးန့ၣ်လီၤ. 30အဂ့ၢ်ဒ်အံၤ,ပမ့ၢ်အနီၢ်ခိအဂီၤတဖၣ်(ဒီးလၢအညၣ်,ဒီးအဃံတဖၣ်)လီၤ. 31မ့ၢ်တၢ်န့ၣ်အဃိဒီး,ပိာ်ခွါကဟးသဒၣ်အမိၢ်ဒီးအပၢ်,ဒီးကဘျုးအသးဒီးအမါ,ဒီးအဝဲခံဂၤန့ၣ်ကကဲထီၣ်တညၣ်ဃီလီၤ. 32တၢ်အံၤမ့ၢ်တၢ်ခူသူၣ်ဖးဒိၣ်လီၤ.ဘၣ်ဆၣ်ဒီးယစံးတၢ်န့ၣ်မ့ၢ်လၢခရံာ်ဒီးအတၢ်အိၣ်ဖှိၣ်အဂ့ၢ်လီၤ. 33ဘၣ်ဆၣ်ဒီးသုဝဲဒၣ်အံၤ,ဒ်သုအဲၣ်လီၤသုသးအသိး,တဂၤအဲၣ်အမါ,တဂၤအဲၣ်အမါဒၣ်ဝဲတက့ၢ်.ဒီးပိာ်မုၣ်န့ၣ်မ်အယူးယီၣ်အဝၤတက့ၢ်.
Copyright information for
KswSKMB