Est 1 | KswSKMB | STEP | လၢစီၤအဃၤၡဝ့ရိၣ်အမုၢ်နံၤတဖၣ်န့ၣ်(အဝဲဒၣ်မ့ၢ်စီၤအဃၤၡှဝ့ရိာ်လၢအကဲစီၤပၤလၢဟံၣ်ဒူၤပၢၢ်လၢကူၤၡး,လၢကီၢ်တကယၤခံဆံနွံဘ့ၣ်အဖီခိၣ်လီၤ.)

‏ Esther 1

1 လၢစီၤအဃၤၡဝ့ရိၣ်အမုၢ်နံၤတဖၣ်န့ၣ်(အဝဲဒၣ်မ့ၢ်စီၤအဃၤၡှဝ့ရိာ်လၢအကဲစီၤပၤလၢဟံၣ်ဒူၤပၢၢ်လၢကူၤၡး,လၢကီၢ်တကယၤခံဆံနွံဘ့ၣ်အဖီခိၣ်လီၤ.) 2 တၢ်မၤအသးလၢမုၢ်နံၤတဖၣ်န့ၣ်တုၤစီၤပၤအဃၤၡဝ့ရိၣ်ဆ့ၣ်နီၤလၢအဘီမုၢ်အလီၢ်ပစိာ်အဖီခိၣ်န့ၣ်လၢအအိၣ်ဝဲလၢနူၢ်ရှူၡၣ်အပူၤ 3 ဒီးလၢအကဲစီၤပၤသၢနံၣ်တနံၣ်န့ၣ်မၤဝဲတၢ်အီၣ်တၢ်အီလၢအပဒိၣ်ဖးဒိၣ်,ဒီးအခ့အပှၤခဲလၢာ်အဂီၢ်လီၤ.ဒီးပၤရာ်ဒီးမၤဒဲအစိအကမီၤ,ပှၤအခိၣ်တဖၣ်,ကီၢ်အပဒိၣ်ဖးဒိၣ်တဖၣ်န့ၣ်အိၣ်ဝဲလၢအမဲာ်ညါလီၤ. 4 တုၤနုၤတစုဒုးနဲၣ်ဝဲအဘီအမုၢ်အလၤကပီၤ,အတၢ်ထူးတၢ်တီၤ,ဒီးအကဟုအကညီၢ်အလၤကပီၤအါနံၤအါသီ,အနံၤတကယၤဃိးဆံညါလီၤ.

5 ဒီးတုၤမုၢ်နံၤတဖၣ်န့ၣ်ပှဲၤထီၣ်ဝံၤဒီး,စီၤပၤမၤတၢ်အီၣ်တၢ်အီလၢကယဲၢ်ပှၤအဂီၢ်လၢအအိၣ်ဝဲလၢနူၢ်ရှူၡၣ်အပူၤ,ဒီးဒိၣ်ဒီးဆံးလၢစီၤပၤအနူၢ်အတၤသၣ်အလီၢ်အဂၢၤပူၤနွံနံၤလီၤ. 6 တၢ်ဝါ,တၢ်ဝါကၢ်ပၣ်,ဒီးတၢ်လါစၢဃာ်အသးဒီးကွီၤစ့,ဒီးထူၣ်လၢၢ်ဝါလၢပျံၤဖှီဝါကဆှၣ်,ဒီးတၢ်လုးတကုာ်အိၣ်ဝဲလီၤ.လီၢ်မံအလီၢ်န့ၣ်မ့ၢ်ထူဒီးစ့လၢအအိၣ်ဝဲလၢတၢ်ဒါကံၣ်ဃ့ဒီးလၢၢ်ဘဟး,ဒီးလၢၢ်ဝါ,ဒီးလၢၢ်ဒၢ်,ဒီးလၢၢ်သူအဖီခိၣ်လီၤ. 7 ဒီးဒုးအီဝဲလၢလီခီထူ,(လီခီန့ၣ်မ့ၢ်အလီၤဆီလိာ်အသးလီၤ.)ဒီးဘီမုၢ်အစပံးထံအိၣ်အါအါကလဲာ်ဒ်လၢစီၤပၤအစုပူၤအသိးန့ၣ်လီၤ.

8 ဒီးပှၤအီတၢ်န့ၣ်မၤသးဒ်တၢ်မၤလိာ်အသိးန့ၣ်,ပှၤတမၤဆူၣ်ဘၣ်ပှၤနီတဂၤဘၣ်.အဂ့ၢ်ဒ်အံၤ,စီၤပၤမၤလိာ်အပဒိၣ်တဖၣ်ဒ်န့ၣ်,ဒ်သိးအကမၤဖဲဒၣ်ပှၤတဂၤအသး,ဖဲဒၣ်ပှၤတဂၤအသးစုာ်စုာ်လီၤ.

9 ဒီးနီၢ်ပၤမုၣ်ဝးၡတံၤမၤတၢ်အီၣ်တၢ်အီလၢပိာ်မုၣ်အဂီၢ်လၢဘီမုၢ်အဟံၣ်လၢအအိၣ်ဒီးစီၤပၤအဃၤၡဝ့ရိၣ်လီၤ.

10 နွံနံၤတနံၤန့ၣ်တုၤစီၤပၤအသးမုာ်ဝဲဒီးစပံးထံဒီး,မၤလိာ်စီၤမဟူမၣ်,စီၤဘံးစသၤ,စီၤဃၤရဘိနၤ,စီၤဘံးကယၤ,ဒီးစီၤအဘၤကသၤ,စီၤစ့သၢ်,ဒီးစီၤကၤရကၣ်,ပှၤဒ့ဒံၣ်နွံဂၤလၢအမၤတၢ်လၢစီၤပၤအဃၤၡဝ့ရိၣ်အမဲာ်ညါ, 11 ဒ်သိးအကဟဲစိာ်နီၢ်ပၤမုၣ်ဝးၡတံၤဆူစီၤပၤအမဲာ်ညါအိၣ်ဒီးဘီမုၢ်အခိၣ်သလုးဒ်သိးအကဒုးနဲၣ်ပှၤဂီၢ်မုၢ်,ဒီးပဒိၣ်ဖးဒိၣ်တဖၣ်လၢအတၢ်ဃံတၢ်လီၤလီၤ.အဂ့ၢ်ဒ်အံၤ,အက့ၢ်အဂီၤဂ့ၤဝဲလီၤ.

12 ဒီးနီၢ်ပၤမုၣ်ဝးၡံတံၤဂ့ၢ်လိာ်ဝဲ,ဒီးတဟဲဘၣ်လၢစီၤပၤအကလုၢ်လၢအပှၤဒ့ဒံၣ်အစုပူၤဘၣ်အဃိဒီး,စီၤပၤအသးထီၣ်ဒိၣ်မး,ဒီးအသးဒိၣ်ထီၣ်ကဲၤထီၣ်လၢအပူၤလီၤ.

13 ဒီးစီၤပၤစံးဘၣ်ပှၤကူၣ်တၢ်သ့လၢအသ့ၣ်ညါတၢ်အဆၢအကတီၢ်တဖၣ်န့ၣ်,(အဂ့ၢ်ဒ်အံၤ,စီၤပၤအလုၢ်အလၢ်လၢကယဲၢ်ပှၤလၢအသ့တၢ်သိၣ်တၢ်သီ,ဒီးတၢ်စံၣ်ညီၣ်ခဲလၢာ်အမဲာ်ညါမ့ၢ်ဒ်န့ၣ်လီၤ. 14 ဒီးဘူးဒီးအီၤန့ၣ်မ့ၢ်စီၤကၢ်ၡၤနၤ,စီၤရှ့သၢ်,စီၤအၤဒမါသၤ,စီၤတၢ်ၡံၣ်,စီၤမ့ရ့း,စီၤမၢ်စနၤ,စီၤမမူကၣ်သ့ၣ်တဖၣ်,ပၤရၣ်ဒီးမၤဒဲအခိၣ်နွံဂၤလၢအထံၣ်ဘၣ်စီၤပၤအမဲာ်,ဒီးဆ့ၣ်နီၤလၢပှၤအမဲာ်ညါလၢဘီမုၢ်အပူၤလီၤ.) 15 ဒ်တၢ်သိၣ်တၢ်သီအသိးန့ၣ်မ့ၢ်နီၢ်ပၤမုၣ်ဝးၡတံၤတတိၢ်န့ၢ်ဘၣ်စီၤပၤအဃၤၡဝ့ရိၣ်အတၢ်မၤလိာ်လၢပှၤဒ့ဒံၣ်အစုပူၤဘၣ်သတးဒီး,ပကမၤအီၤလၢမနုၤတမံၤလဲၣ်.

16 ဒီးစီၤမမူကၣ်စံးဝဲလၢစီၤပၤ,ဒီးပဒိၣ်ဖးဒိၣ်တဖၣ်အမဲာ်ညါ,နီၢ်ပၤမုၣ်ဝးၡံတံၤမၤကမၣ်ဘၣ်ထဲစီၤပၤဧိၤတမ့ၢ်ဘၣ်.မ့ၢ်စ့ၢ်ကီးပဒိၣ်ဖးဒိၣ်ခဲလၢာ်,ဒီးပှၤဂီၢ်မုၢ်ခဲလၢာ်လၢအအိၣ်ဝဲဒီးစီၤပၤအဃၤၡဝ့ရိၣ်အထံအကီၢ်ကိးဘ့ၣ်ဒဲးအပူၤလီၤ. 17 အဂ့ၢ်ဒ်အံၤ,နီၢ်ပၤမုၣ်အတၢ်မၤအံၤကလဲၤထီၣ်လၢပှၤပိာ်မုၣ်ခဲလၢာ်အကျါ,ဒီးတုၤအနၢ်ဟူဝဲလၢစီၤပၤအဃၤၡဝ့ရိၣ်မၤလိာ်နီၢ်ပၤမုၣ်ဝးၡတံၤလၢအကဟဲဆူအအိၣ်,ဒီးတဟဲဘၣ်ဝဲဘၣ်ဒီး,တပးကဲဘၣ်အဝၤလၢအမဲာ်ညါဘၣ်. 18 တၢ်လၢမုၢ်မဆါတနံၤအံၤပၤရၣ်ဒီးမၤဒဲပဒိၣ်မုၣ်တဖၣ်လၢအနၢ်ဟူနီၢ်ပၤမုၣ်အတၢ်မၤန့ၣ်ကကတိၤတၢ်ဒီးစီၤပၤအပဒိၣ်ဖးဒိၣ်ခဲလၢာ်ဒ်န့ၣ်လီၤ.ဒီးတၢ်မၤတရီတပါ,ဒီးတၢ်သးဒိၣ်ထီၣ်ကအါထီၣ်ဝဲလီၤ.

19 မ့ၢ်ဂ့ၤဒီးစီၤပၤဒီး,မ်ဘီမုၢ်အတၢ်မၤလိာ်လဲၤထီၣ်လၢစီၤပၤအအိၣ်,ဒီးမ်အဘၣ်ကွဲးအသးလၢပှၤပၤရၣ်ဖိ,ဒီးပှၤမၤဒဲဖိအတၢ်သိၣ်တၢ်သီအကျါ,ဒ်သိးအသုတကဒံကဒါတဂ့ၤ,လၢနီၢ်ဝးၡတံၤတဟဲလၢၤဘၣ်ဆူစီၤပၤအဃၤၡဝ့ရိၣ်အမဲာ်ညါဘၣ်.ဒီးမ်စီၤပၤဟ့ၣ်လီၤအဘီမုၢ်အလီၢ်လၢပှၤဂၤလၢအဂ့ၤန့ၢ်အီၤတက့ၢ်န့ၣ်တက့ၢ်. 20 ဒီးတုၤပှၤနၢ်ဟူစီၤပၤအတၢ်မၤလိာ်လၢအကမၤလိာ်ဝဲလၢအဘီမုၢ်ဒီဘ့ၣ်ညါအပူၤဒီး,(အဂ့ၢ်ဒ်အံၤ,ဒိၣ်နီၢ်မးလီၤ.)ပှၤအဖိအမါခဲလၢာ်ကမၤလၤကပီၤအဝၤဒီးဒိၣ်ဒီးဆံးလီၤ.

21 ဒီးတၢ်ကတိၤန့ၣ်ဂ့ၤဝဲလၢစီၤပၤဒီးပဒိၣ်ဖးဒိၣ်တဖၣ်အမဲာ်,ဒီးစီၤပၤမၤဝဲဒ်စီၤမမူကၣ်အတၢ်ကတိၤအသိးန့ၣ်လီၤ.

22 ဒီးဟ့ၣ်ယုၢ်လံာ်လၢစီၤပၤအထံအကီၢ်ခဲလၢာ်အပူၤဆူကီၢ်တဘ့ၣ်ဘၣ်တဘ့ၣ်အပူၤ,ဒ်တၢ်ကွဲးအသးအသိးန့ၣ်,ဒီးလၢပှၤအကလုာ်ကလုာ်ဒ်အတၢ်ကတိၤအကျိာ်အသိး,ဒ်သိးပှၤပိာ်ခွါကကဲဒိၣ်လၢအဟံၣ်ဒၣ်ဝဲအပူၤကိးဂၤဒဲး,ဒီးဒ်သိးအကဒုးဟူထီၣ်သါလီၤဝဲဒ်အပှၤတကလုာ်ဒၣ်ဝဲအကျိာ်အသိးန့ၣ်လီၤ.