Esther 6
1တၢ်လၢမုၢ်တနၤန့ၣ်စီၤပၤမံတန့ၢ်ဘၣ်,ဒီးမၤလိာ်ပှၤဟဲစိာ်လံာ်ကွဲးနီၣ်တၢ်တနံၤဘၣ်တနံၤ,ဒီးပှၤဖးအီၤလၢစီၤပၤအမဲာ်ညါလီၤ. 2ဒီးပှၤထံၣ်န့ၢ်တၢ်ကွဲးအသးလၢစီၤမၢ်ဒကဲၤစံးဘၣ်တ့ၢ်လၢစီၤပၤအပှၤဒ့ဒံၣ်စီၤဘံးကသၤနၤ,ဒီးစီၤတ့ရ့ၣ်လၢအပၢၤကျဲစၢၤခံဂၤန့ၣ်ဃုပာ်အစုလၢစီၤပၤအဃၤၡဝ့ရိၣ်အလိၤလီၤ. 3ဒီးစီၤပၤစံးဝဲဒၣ်,ပှၤမၤစီၤမၢ်ဒကဲၤလၢတၢ်အလၤကပီၤဒီးတၢ်အဒိၣ်အထီလၢတၢ်တမံၤအံၤအဃိ,လၢမနုၤတမံၤလဲၣ်.ဒီးစီၤပၤအခ့အပှၤလၢအမၤတၢ်တဖၣ်စံးဘၣ်အီၤ,ပှၤတမၤဘၣ်အီၤလၢတၢ်နီတမံၤဘၣ်. 4ဒီးစီၤပၤစံးဝဲဒၣ်,မ့ၢ်မတၤအိၣ်ဝဲလၢဂၢၤပူၤတဂၤလဲၣ်.ဒီးစီၤဟၤမၣ်ဟဲနုာ်လၢစီၤပၤအဟံၣ်အဂၢၤပူၤလၢခိတဂၢၤ,ဒ်သိးအကစံးဘၣ်စီၤပၤလၢအကဘျးထီၣ်စီၤမၢ်ဒကဲၤလၢသ့ၣ်တကျီၣ်အလိၤလၢအကတဲာ်ကတီၤပာ်လၢအဂီၢ်လီၤ. 5ဒီးစီၤပၤအခ့အပှၤစံးဘၣ်အီၤ,ကွၢ်ကွၢ်,စီၤဟၤမၣ်ဆၢထၢၣ်လၢဂၢၤပူၤလီၤ.ဒီးစီၤပၤစံးဝဲဒၣ်,မ်အဟဲနုာ်တက့ၢ်. 6ဒီးစီၤဟၤမၣ်ဟဲနုာ်,ဒီးစီၤပၤစံးဘၣ်အီၤ,ပှၤလၢအဘၣ်စီၤပၤအသးလၢအကမၤလၤကပီၤအီၤတဂၤန့ၣ်ပှၤကမၤအီၤလၢမနုၤတမံၤလဲၣ်.(ဒီးစီၤဟၤမၣ်ဆိကမိၣ်လၢအသးကံၢ်ပူၤ,ပှၤဘၣ်စီၤပၤအသးလၢအကမၤလၤကပီၤအီၤဒိၣ်န့ၢ်ယၤတက့ၢ်,မ့ၢ်မတၤတဂၤလဲၣ်.) 7ဒီးစီၤဟၤမၣ်စံးဆၢစီၤပၤ,လၢပှၤလၢအဘၣ်စီၤပၤအသးလၢအကမၤလၤကပီၤအီၤတဂၤဂၤအဂီၢ်န့ၣ်, 8မ်ပှၤဟဲစိာ်စီၤပၤအယၣ်လၢစီၤပၤကၤဝဲ,ဒီးကသ့ၣ်လၢစီၤပၤဒိးဝဲ,ဒီးစီၤပၤအခိၣ်သလုးလၢအပာ်လၢအခိၣ်, 9ဒီးယၣ်တဘ့ၣ်န့ၣ်,ဒီးကသ့ၣ်တဒုန့ၣ်မ်ပှၤဟ့ၣ်ဝဲလၢစီၤပၤအပဒိၣ်ဖးဒိၣ်တဖၣ်အခိၣ်တဂၤအစုပူၤ,ဒ်သိးအကဒုးကၤပှၤလၢအဘၣ်စီၤပၤအသးလၢအကမၤလၤမၤကပီၤအီၤတဂၤ,ဒီးဒုးဒိးအီၤလၢကသ့ၣ်လၢဝ့ၢ်အကျဲဧိၤကပူၤဧိၤ,ဒီးကိးထီၣ်လၢအမဲာ်ညါ,ပှၤလၢအဘၣ်စီၤပၤအသးလၢအကမၤလၤကပီၤအီၤတဂၤန့ၣ်ပှၤကမၤအီၤဒ်အံၤလီၤ. 10ဒီးစီၤပၤစံးဘၣ်စီၤဟၤမၣ်,မၤချ့ချ့,ဟံးန့ၢ်ယၣ်တဘ့ၣ်န့ၣ်,ဒီးကသ့ၣ်တဒုန့ၣ်ဒ်နစံးအသိး,ဒီးမၤပှၤယူဒၤဖိစီၤမၢ်ဒကဲၤလၢအဆ့ၣ်နီၤလၢစီၤပၤအပဲတရီအပူၤဒ်န့ၣ်အသိးတက့ၢ်.လၢကယဲၢ်တၢ်လၢနကတိၤတၢ်အကျါန့ၣ်မၤကပာ်ကွံာ်နီတမံၤတဂ့ၤ. 11ဒီးစီၤဟၤမၣ်ဟံးန့ၢ်ယၣ်တဘ့ၣ်ဒီးကသ့ၣ်တဒု,ဒီးဒုးကၤစီၤမၢ်ဒကဲၤ,ဒီးဒုးဒိးအီၤလၢကသ့ၣ်လၢဝ့ၢ်အကျဲဧိၤကပူၤဧိၤ,ဒီးကိးထီၣ်ဝဲလၢအမဲာ်ညါ,ပှၤလၢအဘၣ်စီၤပၤအသးလၢအကမၤလၤမၤကပီၤအီၤတဂၤန့ၣ်ပှၤကမၤအီၤဒ်အံၤလီၤ. 12ဒီးစီၤမၢ်ဒကဲၤဟဲက့ၤဆူစီၤပၤအပဲတရီ,ဒီးစီၤဟၤမၣ်က့ၤက့ၤချ့ချ့ဆူအဟံၣ်,ဒီးအသူၣ်အုးသးအုး,ဒီးအခိၣ်ကျၢၢ်ဘၢအသးလီၤ. 13ဒီးစီၤဟၤမၣ်စံးဘၣ်အမါနီၢ်စ့ရၣ်,ဒီးပှၤလၢအအဲၣ်အီၤခဲလၢာ်လၢကယဲၢ်တၢ်လၢအဘၣ်အီၤလီၤ.ဒီးအပှၤကူၣ်တၢ်သ့တဖၣ်,ဒီးအမါနီၢ်စ့ရ့ၣ်စံးဘၣ်အီၤ,စီၤမၢ်ဒကဲၤလၢနလီၤဃံၤသီလၢအမဲာ်ညါတဂၤန့ၣ်မ့မ့ၢ်လၢပှၤယူဒၤဖိအချံအသၣ်ဒီး,နတမၤနၢၤဘၣ်အီၤဘၣ်.မ့မ့ၢ်နကလီၤဃံၤသပှၢ်တၢၢ်လၢအမဲာ်ညါလီၤ. 14ဒီးကတိၤတၢ်ဒီးအီၤအဖၢမုၢ်ဒီး,စီၤပၤအပှၤဒ့ဒံၣ်ဟဲချ့ချ့ဒ်သိးအကဒုးဟဲစီၤဟၤမၣ်ဆူတၢ်အီလၢနီၢ်အ့ၤစတၢ်ကတဲာ်ကတီၤဝဲလီၤ.
Copyright information for
KswSKMB