Esther 7
1ဒီးစီၤပၤ,ဒီးစီၤဟၤမၣ်ဟဲဝဲဒ်သိးအကအီတၢ်ဒီးနီၢ်ပၤမုၣ်အ့ၤစတၢ်လီၤ. 2ဒီးခံနံၤတနံၤလၢတၢ်အီစပံးထံန့ၣ်စီၤပၤစံးကဒီးနီၢ်အ့ၤစတၢ်,နဃ့တၢ်လၢမနုၤတမံၤလဲၣ်,နီၢ်ပၤမုၣ်အ့ၤစတၢ်ဧၢ,တၢ်ကဟ့ၣ်လီၤနၤလီၤ.ဒီးနဃ့ကညးတၢ်လၢမနုၤတမံၤလဲၣ်.တၢ်ကမၤအီၤတုၤအဖးဖီယဘီယမုၢ်လီၤ. 3ဒီးနီၢ်ပၤမုၣ်အ့ၤစတၢ်စံးဆၢတၢ်,ဒီးစံးဝဲဒၣ်,စီၤပၤဧၢ,ယမ့ၢ်ဘၣ်ဘျုးဘၣ်ဖှိၣ်လၢနမဲာ်,ဒီးမ့ၢ်ဂ့ၤဒီးစီၤပၤဒီး,မ်တၢ်ဟ့ၣ်ယသးသမူလၢယဃ့တၢ်အဃိ,ဒီးယပှၤတကလုာ်လၢယဃ့ကညးတၢ်အဃိန့ၣ်တက့ၢ်. 4အဂ့ၢ်ဒ်အံၤ,ပဘၣ်တၢ်ဆါကွံာ်ပှၤ,ယဲဒၣ်ဒီးယပှၤတကလုာ်,ဒ်သိးတၢ်ကမၤဟးဂီၤပှၤ,ဒ်သိးတၢ်ကမၤသံပှၤ,ဒ်သိးတၢ်ကမၤဟါမၢ်ပှၤလီၤ.ပမ့ၢ်ဘၣ်တၢ်ဆါကွံာ်ပှၤလၢကုၢ်ပိာ်မုၣ်ဒီးကုၢ်ပိာ်ခွါအဂီၢ်ဒီး,ယကအိၣ်ဘှီၣ်ကလာ်လီၤ.ဘၣ်ဆၣ်ဒီးစီၤပၤအတၢ်လၢအကဟါမၢ်န့ၣ်တၢ်အဒုၣ်အဒါမၤတၢ်ထဲသိးသိးန့ၣ်တသ့ဘၣ်. 5ဒီးစီၤပၤအဃၤၡဝ့ရိၣ်စံးဆၢနီၢ်ပၤမုၣ်အ့ၤစတၢ်,ဒီးစံးဝဲဒၣ်,အဝဲဒၣ်န့ၣ်မ့ၢ်မတၤတဂၤလဲၣ်.ဒီးပှၤလၢအမၤပှဲၤအသးဒ်သိးအကမၤတၢ်ဒ်န့ၣ်ဘူၣ်ဝဲတဂၤန့ၣ်,မ့ၢ်အအိၣ်ဖဲလဲၣ်. 6ဒီးနီၢ်အ့ၤစတၢ်စံးဝဲဒၣ်,ပှၤထီဒါတၢ်,ဒီးပှၤအဒုၣ်အဒါန့ၣ်မ့ၢ်ပှၤအၢစီၤဟၤမၣ်တဂၤအံၤလီၤ.တုၤနုၤတဘျီစီၤဟၤမၣ်ပျံၤတၢ်လၢစီၤပၤ,ဒီးနီၢ်ပၤမုၣ်အမဲာ်ညါလီၤ. 7ဒီးစီၤပၤဂဲၤဆၢထၢၣ်လၢတၢ်အီစပံးထံအပူၤလၢအသးဒိၣ်ထီၣ်,ဒီးလဲၤဝဲဆူဟံၣ်အတၤသၣ်အလီၢ်ပူၤ,ဒီးစီၤဟၤမၣ်ဆၢထၢၣ်ဝဲဒ်သိးအကဃ့ကညးနီၢ်ပၤမုၣ်အ့ၤစတၢ်လၢအသးသမူအဂီၢ်လီၤ.အဂ့ၢ်ဒ်အံၤထံၣ်ဝဲလၢစီၤပၤတိာ်တၢ်အၢလၢအဂီၢ်လီၤ. 8ဒီးစီၤပၤဟဲက့ၤလၢဟံၣ်အတၤသၣ်အလီၢ်ပူၤဆူတၢ်အီစပံးထံအလီၢ်,ဒီးစီၤဟၤမၣ်ထိၣ်လီၤပှီၤအသးလၢလီၢ်မံအဖီခိၣ်ဖဲနီၢ်အ့ၤစတၢ်အိၣ်ဝဲလီၤ.ဒီးစီၤပၤစံးဝဲဒၣ်,ကဖိးဆူၣ်နီၢ်ပၤမုၣ်လၢဟံၣ်ပူၤအိၣ်ဒီးယၤစ့ၢ်ကီးဧါ.တုၤတၢ်ကတိၤတထံၣ်ထီၣ်ဖျဲးထီၣ်လၢစီၤပၤအထးခိၣ်ဒီး,ပှၤကျၢၢ်ဘၢစီၤဟၤမၣ်အမဲာ်လီၤ. 9ဒီးပှၤဒ့ဒံၣ်စီၤဃၤရဘိနၤစံးဝဲလၢစီၤပၤအမဲာ်ညါ,ကွၢ်ကွၢ်,သ့ၣ်တကျီၣ်အထီအပျၢ်ယဲၢ်ဆံလၢစီၤဟၤမၣ်မၤဝဲလၢစီၤမၢ်ဒကဲၤအဂီၢ်လၢအကတိၤတ့ၢ်တၢ်ဂ့ၤလၢစီၤပၤအဂီၢ်တဂၤန့ၣ်အိၣ်ဝဲထူၣ်ကလာ်စ့ၢ်ကီးလၢစီၤဟၤမၣ်အဟံၣ်ပူၤလီၤ.ဒီးစီၤပၤစံးဘၣ်အီၤ,ဘျးထီၣ်အီၤလၢအလိၤတက့ၢ်. 10ဒီးပှၤဘျးထီၣ်စီၤဟၤမၣ်လၢသ့ၣ်တကျီၣ်အလိၤလၢအကတဲာ်ကတီၤပာ်ဝဲလၢစီၤမၢ်ဒကဲၤအဂီၢ်လီၤ.ဒီးစီၤပၤအသးဒိၣ်ထီၣ်စၢ်လီၤဝဲလီၤ.
Copyright information for
KswSKMB