Exodus 13
1ဒီးယွၤကတိၤတၢ်ဒီးစီၤမိၤရှ့,ဒီးစံးဝဲဒၣ်,ပာ်စီဆှံကယဲၢ်ဖိဝဲၢ်ကိခဲလၢာ်လၢယဂီၢ်တက့ၢ်. 2ကယဲၢ်တၢ်လၢအအိးထီၣ်ဆိတၢ်အဒၢလီၢ်လၢပှၤအံၣ်စရ့လးဖိအကျါ,ပှၤကညီမ့ၢ်ဂ့ၤ,ဆၣ်ဖိကီၢ်ဖိအဒၢမ့ၢ်ဂ့ၤ,မ့ၢ်ယတၢ်လီၤ. 3ဒီးစီၤမိၤရှ့စံးဘၣ်ပှၤဂီၢ်မုၢ်,သ့ၣ်နီၣ်ထီၣ်က့ၤမုၢ်တနံၤအံၤလၢသုဟးထီၣ်လၢကီၢ်အဲၤကူပတူးလၢပှၤကုၢ်ဖိအဟံၣ်ပူၤန့ၣ်တက့ၢ်.အဂ့ၢ်ဒ်အံၤ,ယွၤဒုးဟးထီၣ်ကွံာ်သုလၢအလီၢ်အံၤလၢအစုဆူၣ်လီၤ.ကိၣ်အိၣ်ဒီးကိၣ်မံၣ်န့ၣ်အီၣ်အီၤတဂ့ၤ. 4တၢ်လၢမုၢ်တနံၤအံၤသုဟးထီၣ်လၢလါအၤဘံာ်အပူၤလီၤ. 5ဒီးတုၤယွၤကဒုးဟဲနုာ်နၤလၢပှၤကနၤဧၣ်ဖိ,ဒီးပှၤဃ့ၤသးဖိ,ဒီးပှၤအမိၢ်ဖိ,ဒီးပှၤဃံၤဝံဖိ,ဒီးပှၤယဘူၣ်ဖိသ့ၣ်တဖၣ်အကီၢ်ပူၤလၢအဆိၣ်လီၤအသးဒီးနပၢ်တဖၣ်လၢအကဟ့ၣ်လီၤနၤ,ကီၢ်တဘ့ၣ်လၢအယွၤဝဲဒီးတၢ်နုၢ်ထံဒီးကနဲစီန့ၣ်ဒီး,တၢ်ကမၤအသးလၢသုဘၣ်မၤတၢ်မၤအံၤလၢလါတလါအံၤအပူၤလီၤ. 6နဘၣ်အီၣ်ကိၣ်တအိၣ်ဘၣ်ဒီးကိၣ်မံၣ်န့ၣ်နွံနံၤ,ဒီးနွံနံၤတနံၤန့ၣ်ကအိၣ်ဒီးတၢ်မၤဘူၣ်လၢယွၤလီၤ. 7ပှၤဘၣ်အီၣ်ကိၣ်တအိၣ်ဘၣ်ဒီးကိၣ်မံၣ်နွံနံၤ,ဒီးမ်ကိၣ်အိၣ်ဒီးကိၣ်မံၣ်န့ၣ်သုတအိၣ်ဒီးနၤတဂ့ၤ.ဒီးမ်တၢ်သုတထံၣ်ဘၣ်ကိၣ်မံၣ်န့ၣ်ဒီးနၤလၢနလီၢ်တဖၣ်နီတပူၤတဂ့ၤ. 8ဒီးတၢ်လၢမုၢ်နံၤန့ၣ်,နဘၣ်ဒုးနဲၣ်နဖိခွါဒီးစံး,မ့ၢ်တၢ်လၢယွၤမၤယၤလၢယဟဲထီၣ်လၢအဲၤကူပတူးအဂ့ၢ်လီၤ. 9ဒီးကကဲထီၣ်တၢ်အပနီၣ်လၢနစုလိၤ,ဒီးတၢ်သ့ၣ်နီၣ်ထီၣ်က့ၤလၢနမဲာ်အဘၢၣ်စၢၤ,ဒ်သိးယွၤအတၢ်သိၣ်တၢ်သီကအိၣ်လၢနထးခိၣ်လီၤ.အဂ့ၢ်ဒ်အံၤ,ယွၤဒုးဟဲထီၣ်နၤလၢအဲၤကူပတူးအပူၤဒီးအစုဆူၣ်လီၤ. 10ဒီးနဘၣ်တိၢ်န့ၢ်တၢ်အလုၢ်အလၢ်အံၤလၢအဆၢအကတီၢ်ဒၣ်ဝဲတနံၣ်ဘၣ်တနံၣ်လီၤ. 11ဒီးတုၤယွၤကဒုးဟဲထီၣ်နၤဆူပှၤကနၤဧၣ်ဖိအကီၢ်ပူၤ,ဒ်အဆိၣ်လီၤအသးဒီးနၤဒီးနပၢ်တဖၣ်အသိးန့ၣ်,ဒီးကဟ့ၣ်လီၤနၤလၢအီၤဒီး, 12တၢ်ကမၤအသးလၢနဘၣ်ပာ်ကယဲၢ်ဖိလၢအအိးထီၣ်ဆိတၢ်ဒၢလီၢ်,ဒီးကယဲၢ်ဖိဝဲၢ်ကိလၢအဟဲထီၣ်လၢဆၣ်ဖိကီၢ်ဖိလၢအအိၣ်ဒီးနၤအကျါန့ၣ်,လၢယွၤအဂီၢ်လီၤ.အဖါတဖၣ်မ့ၢ်ယွၤအတၢ်လီၤ. 13ဒီးကယဲၢ်ကသ့ၣ်ယီၤအဖိဝဲၢ်ကိတဒုလၢ်လၢ်န့ၣ်,နဘၣ်ပှ့ၤဒီးသိဖိတဒုလီၤ.ဒီးနမ့ၢ်တပှ့ၤဘၣ်အီၤဒီး,နဘၣ်မၤကၢ်အကိာ်လီၤ.ကယဲၢ်ပှၤကညီအဖိဝဲၢ်ကိလၢနဖိတဖၣ်အကျါန့ၣ်,နဘၣ်ပှ့ၤအီၤလီၤ. 14ဒီးတုၤနဖိခွါကသံကွၢ်နၤခဲကိာ်န့ၣ်ဒီးစံးတၢ်အံၤမ့ၢ်မနုၤလဲၣ်ဒီး,တၢ်ကမၤအသးလၢနဘၣ်စံးဘၣ်အီၤ,ယွၤဒုးဟဲထီၣ်ပှၤလၢအဲၤကူပတူးအပူၤလၢပှၤကုၢ်ဖိအဟံၣ်ပူၤ,လၢအစုဆူၣ်လီၤ. 15ဒီးတုၤဖၤရိၤပာ်ကီအသးဒ်သိးအသုတပျၢ်ပှၤတဂ့ၤဒီး,တၢ်မၤအသးလၢယွၤမၤသံကယဲၢ်ဖိဝဲၢ်ကိလၢကီၢ်အဲၤကူပတူးအပူၤလၢပှၤကညီအဖိဝဲၢ်ကိပၢၢ်လၢဆၣ်ဖိကီၢ်ဖိအဖိဝဲၢ်ကိလီၤ.မၤသးဒ်န့ၣ်ဒီးယလုၢ်ယွၤလၢကယဲၢ်တၢ်အဖါလၢအအိးထီၣ်ဆိတၢ်ဒၢလီၢ်လီၤ.မ့မ့ၢ်ကယဲၢ်ဖိဝဲၢ်ကိလၢယဖိခွါအကျါန့ၣ်ယပှ့ၤအီၤလီၤ. 16ဒီးကကဲထီၣ်ဝဲလၢတၢ်ပနီၣ်လၢနစုလိၤလီၤ.ဒီးတၢ်ကွဲးပနီၣ်လၢနမဲာ်အဘၢၣ်စၢၤလီၤ.အဂ့ၢ်ဒ်အံၤ,ယွၤဒုးဟးထီၣ်ပှၤလၢကီၢ်အဲၤကူပတူးအပူၤ,လၢအစုဆူၣ်လီၤ. 17ဒီးတုၤဖၤရိၤပျၢ်ပှၤဂီၢ်မုၢ်ဒီး,တၢ်မၤအသးလၢပှၤဖလ့ၡသးဖိအကီၢ်အိၣ်ဘူးဘၣ်ဆၣ်ဒီး,ယွၤတဆှၢဘၣ်အီၤလၢကီၢ်န့ၣ်အကျဲဘၣ်.အဂ့ၢ်ဒ်အံၤ,ယွၤစံးဝဲဒၣ်,တုၤပှၤဂီၢ်မုၢ်ထံၣ်ဘၣ်တၢ်ဒုးတၢ်ယၤဒီး,ကပီၢ်ယၢ်လီၤက့ၤဘၣ်ဖုးအသး,ဒီးကက့ၤကဒါက့ၤဆူအဲၤကူပတူးလီၤ. 18ဒီးယွၤဆှၢတရံးပှၤဂီၢ်မုၢ်လၢကျဲလၢပှၢ်မုၢ်ကနၢဘၣ်ဃးဒီးပီၣ်လဲၣ်ဂီၤလီၤ.ဒီးပှၤအံၣ်စရ့လးဖိဟးထီၣ်ကတဲာ်ကတီၤအသးလၢကီၢ်အဲၤကူပတူးအပူၤလီၤ. 19ဒီးစီၤမိၤရှ့ဟံးန့ၢ်စီၤယိၤသးအဃံဒီးအီၤလီၤ.အဂ့ၢ်ဒ်အံၤ,အဝဲဒၣ်ဒုးဆိၣ်လီၤပှၤအံၣ်စရ့လးဖိအသးသပှၢ်ပှၢ်,ဒီးစံးဝဲဒၣ်,ယွၤကဟဲအိၣ်သကိးသုသပှၢ်တၢၢ်ဒီးသုဘၣ်စိာ်ထီၣ်ကွံာ်ယဃံဒီးသုဖဲအံၤလီၤ. 20ဒီးဟးထီၣ်ဝဲလၢစူးကိၤသးန့ၣ်,ဒီးသူၣ်အဒဲလၢအ့သၣ်အလီၢ်လၢပှၢ်မုၢ်ကနၢအဃၢၤန့ၣ်လီၤ. 21ဒီးလၢမုၢ်ဆါခီန့ၣ်ယွၤလဲၤလၢအမဲာ်ညါလၢတၢ်အၢၣ်အထူၣ်ဒ်သိးအကဆှၢအီၤလၢကျဲပူၤ,ဒီးလၢမုၢ်နၤန့ၣ်လၢမ့ၣ်အူအထူၣ်ဒ်သိးအကဒုးကပီၤထီၣ်အီၤန့ၣ်,လၢအကလဲၤတၢ်လၢမုၢ်ဆါဒီးလၢမုၢ်နၤအဂီၢ်လီၤ. 22ဒီးတၢ်အၢၣ်အထူၣ်လၢမုၢ်ဆါခီမ့ၢ်ဂ့ၤ,မ့ၣ်အူအထူၣ်လၢမုၢ်နၤမ့ၢ်ဂ့ၤ,တဟံးထီၣ်ကွံာ်ဘၣ်ဝဲလၢပှၤဂီၢ်မုၢ်အမဲာ်ညါဘၣ်.
Copyright information for
KswSKMB