‏ Exodus 16

1ဒီးဟးထီၣ်ဝဲလၢအ့လံၣ်,ဒီးလၢလါခံလါတလါထီၣ်တဆံယဲၢ်နံၤတနံၤလၢအဟးထီၣ်ကွံာ်လၢကီၢ်အဲၤကူပတူးအလီၢ်ခံန့ၣ်,ပှၤအံၣ်စရ့လးဖိအတၢ်အိၣ်ဖှိၣ်ခဲလၢာ်ဟဲတုၤလၢပှၢ်မုၢ်ကနၢစံၤလၢအအိၣ်လၢအ့လံၣ်ဒီးစံၤနါအဘၢၣ်စၢၤလီၤ.

2ဒီးပှၤအံၣ်စရ့လးဖိအတၢ်အိၣ်ဖှိၣ်ခဲလၢာ်ကဒူးကဒ့ၣ်တၢ်လၢစီၤမိၤရှ့ဒီးစီၤအၤဟရိၣ်အလိၤလၢပှၢ်မုၢ်ကနၢအပူၤန့ၣ်လီၤ. 3ဒီးပှၤအံၣ်စရ့လးဖိစံးဘၣ်အီၤ,လၢပဆ့ၣ်နီၤလၢတၢ်ညၣ်အသပၢၤအဃၢၤ,လၢပအီၣ်ကိၣ်ဘျဲးအီၣ်န့ၣ်,မ်ပသံတ့ၢ်လၢယွၤအစုလၢကီၢ်အဲၤကူပတူးအပူၤန့ၣ်တက့ၢ်.အဂ့ၢ်ဒ်အံၤ,သုဒုးဟဲထီၣ်ပှၤလၢပှၢ်မုၢ်ကနၢအံၤ,ဒ်သိးသုကဒုးသံတၢ်အိၣ်ဖှိၣ်ခဲလၢာ်အံၤလၢတၢ်သၣ်ဝံၤလီၤဒိလီၤ.

4ဒီးယွၤစံးဘၣ်စီၤမိၤရှ့,ကွၢ်ကွၢ်,ယကဒုးဟဲစူၤကိၣ်လၢမူခိၣ်လၢသုဂီၢ်,ဒီးပှၤဂီၢ်မုၢ်ကလဲၤထၢထီၣ်တနံၤအတၢ်အီၣ်လၢအဂီၢ်ဒၣ်ဝဲ,တနံၤလၢအဂီၢ်ဒၣ်ဝဲလီၤ.ကလဲၤလၢယတၢ်သိၣ်တၢ်သီအပူၤတလဲၤဘၣ်လဲၣ်န့ၣ်,ဒ်သိးယကမၤကွၢ်အီၤလီၤ.

5ဒီးဃုနံၤတနံၤန့ၣ်တၢ်ကမၤအသးလၢအဝဲသ့ၣ်တဖၣ်ဘၣ်ကတဲာ်ကတီၤတၢ်လၢအဟဲက့ၤစိာ်ဝဲ,ဒီးကအိၣ်အါန့ၢ်အထၢထီၣ်တနံၤတနံၤန့ၣ်ခံစးလီၤ.

6ဒီးစီၤမိၤရှ့ဒီးစီၤအၤဟရိၣ်စံးဘၣ်ပှၤအံၣ်စရ့လးဖိခဲလၢာ်,ခဲမုၢ်ဟါန့ၣ်သုကသ့ၣ်ညါလၢယွၤဒုးဟးထီၣ်သုလၢကီၢ်အဲၤကူပတူးအပူၤလီၤ. 7ဒီးမုၢ်ဆ့ၣ်ထီၣ်န့ၣ်သုကထံၣ်ဘၣ်ယွၤအလၤကပီၤ,လၢအနၢ်ဟူသုကဒူးကဒ့ၣ်တၢ်လၢယွၤအလိၤအဃိလီၤ.ဒီးလၢသုကဒူးကဒ့ၣ်တၢ်လၢပလိၤအံၤ,ပဝဲဒၣ်ပမ့ၢ်မတၤတဖၣ်လဲၣ်.

8ဒီးစီၤမိၤရှ့စံးဝဲဒၣ်,ခဲမုၢ်ဟါယွၤကဟ့ၣ်သုလၢတၢ်ညၣ်လၢသုကအီၣ်တၢ်အဂီၢ်,ဒီးမုၢ်ဆ့ၣ်ထီၣ်န့ၣ်ကိၣ်လၢသုကအီၣ်ဘျဲးအီၣ်တၢ်အဂီၢ်,လၢယွၤနၢ်ဟူသုကဒူးကဒ့ၣ်တၢ်,လၢသုကဒူးကဒ့ၣ်ဘၣ်အီၤအဃိလီၤ.ဒီးပဝဲဒၣ်တဖၣ်အံၤပမ့ၢ်မတၤတဖၣ်လဲၣ်.သုကဒူးကဒ့ၣ်တၢ်န့ၣ်ဘၣ်ပှၤတမ့ၢ်ဘၣ်,မ့ၢ်အဘၣ်ယွၤတခီလီၤ.

9ဒီးစီၤမိၤရှ့စံးဘၣ်စီၤအၤဟရိၣ်,စံးဘၣ်ပှၤအံၣ်စရ့လးဖိအတၢ်အိၣ်ဖှိၣ်ခဲလၢာ်,သုးဘူးသုသးဆူယွၤအမဲာ်ညါတက့ၢ်.အဂ့ၢ်ဒ်အံၤ,သုကဒူးကဒ့ၣ်တၢ်န့ၣ်နၢ်ဟူလံဝဲလံ.

10ဒီးတၢ်မၤအသးလၢစီၤအၤဟရိၣ်ကတိၤတၢ်ဒီးပှၤအံၣ်စရ့လးဖိအတၢ်အိၣ်ဖှိၣ်ခဲလၢာ်အဖၢမုၢ်န့ၣ်ဒီး,အဝဲသ့ၣ်တဖၣ်န့ၣ်ကွၢ်ဝဲဆူပှၢ်မုၢ်ကနၢ,ဒီးကွၢ်ကွၢ်,ယွၤအလၤအကပီၤအိၣ်ဖျါထီၣ်လၢတၢ်အၢၣ်အလိၤန့ၣ်လီၤ. 11ဒီးယွၤကတိၤတၢ်ဒီးစီၤမိၤရှ့ဒီးစံးဝဲဒၣ်, 12ပှၤအံၣ်စရ့လးဖိကဒူးကဒ့ၣ်တၢ်န့ၣ်ယနၢ်ဟူလံ.ကတိၤတၢ်ဒီးအီၤဒီးစံး,ခဲမုၢ်ဟါန့ၣ်သုကအီၣ်တၢ်ညၣ်,ဒီးမုၢ်ဆ့ၣ်ထီၣ်န့ၣ်သုကအီၣ်ဘျဲးအီၣ်ကိၣ်လီၤ.ဒီးသုကသ့ၣ်ညါလၢယမ့ၢ်ယွၤသုကစၢ်လီၤ.

13ဒီးတၢ်မၤအသးလၢမုၢ်ဟါန့ၣ်ထိၣ်ဘှၢၣ်ဟဲထီၣ်ဒီးမၤဘံးမၤဘၢသူၣ်ဒဲအလီၢ်,ဒီးလၢမုၢ်ဆ့ၣ်ထီၣ်န့ၣ်ပစီၤထံအိၣ်ဝးတရံးသူၣ်ဒဲအလီၢ်လီၤ. 14ဒီးတုၤပစီၤထံလၢအလီၤတ့ၢ်န့ၣ်ဟးထီၣ်ဒီးကွၢ်ကွၢ်,တၢ်ဖျၢၣ်သလၢာ်ပြံသဒံအိၣ်ဝဲလၢပှၢ်မုၢ်ကနၢအလိၤ,ဒ်ပစီၤထံလီၤသကၤလၢဟီၣ်ခိၣ်အဖီခိၣ်အသိးန့ၣ်လီၤ.

15ဒီးတုၤပှၤအံၣ်စရ့လးဖိထံၣ်ဘၣ်ဒီး,စံးဝဲတဂၤဒီးတဂၤ,အဝဲအံၤမ့ၢ်မနုၤလဲၣ်.အဂ့ၢ်ဒ်အံၤ,မ့ၢ်မနုၤမနုၤန့ၣ်တသ့ၣ်ညါဘၣ်ဝဲဘၣ်.ဒီးစီၤမိၤရှ့စံးဘၣ်အီၤ,အဝဲအံၤမ့ၢ်ကိၣ်လၢယွၤဟ့ၣ်လီၤလၢသုအီၣ်တၢ်အဂီၢ်လီၤ.

16ဒီးအအံၤမ့ၢ်တၢ်လၢယွၤမၤလိာ်,ထၢထီၣ်န့ၢ်ကိးဂၤဒဲးဒ်အအီၣ်လၢအီၣ်တၢ်အသိး,တဂၤအဂီၢ်တဧိၤမ့ၢ်,တဂၤအဂီၢ်တဧိၤမ့ၢ်န့ၣ်စုာ်စုာ်တက့ၢ်.ဟံးန့ၢ်တၢ်ဒ်တၢ်ဂံၢ်ပှၤအိၣ်လၢအဒဲပူၤအသိးစုာ်စုာ်တက့ၢ်.

17ဒီးပှၤအံၣ်စရ့လးဖိမၤဝဲဒ်န့ၣ်,ဒီးထၢထီၣ်န့ၢ်တၢ်အါတနီၤစှၤတနီၤလီၤ. 18ဒီးဃီၣ်ဝဲဒီးဧိၤမ့ၢ်တဖျၢၣ်,ဒီးပှၤလၢအထၢထီၣ်န့ၢ်တၢ်အါတဂၤန့ၣ်အတၢ်အိၣ်ဘျဲၣ်တအိၣ်ဘၣ်.ဒီးပှၤလၢအထၢထီၣ်န့ၢ်တၢ်စှၤတဂၤန့ၣ်အတၢ်တစှၤကဲာ်ဆိးဘၣ်.ပှၤထၢထီၣ်တၢ်ဒ်အထးခိၣ်အအီၣ်တၢ်အသိးန့ၣ်စုာ်စုာ်လီၤ.

19ဒီးစီၤမိၤရှ့စံးဝဲဒၣ်,မ်ပှၤသုတပာ်လီၤတဲာ်လၢအီၤတုၤမုၢ်ဆ့ၣ်ထီၣ်န့ၣ်တဂ့ၤ, 20ဒီးတဒိကနၣ်ဘၣ်စီၤမိၤရှ့အကလုၢ်ဘၣ်ဒီး,ပှၤတနီၤနီၤလၢအကျါပာ်လီၤတဲာ်ဝဲတုၤမုၢ်ဆ့ၣ်ထီၣ်,ဒီးလၢၣ်အိၣ်ထီၣ်လၢအပူၤ,ဒီးနၢအုၣ်ဝဲ,ဒီးစီၤမိၤရှ့အသးထီၣ်အီၤလီၤ.

21ဒီးပှၤထၢထီၣ်ကိးဂီၤဒဲး,တဂၤဒ်အထးခိၣ်အီၣ်တၢ်အသိး,တဂၤဒ်အထးခိၣ်အီၣ်တၢ်အသိးန့ၣ်လီၤ.ဒီးတုၤတၢ်ကိၢ်ထီၣ်ဒီး,ပှံၢ်ထီၣ်ဝဲလီၤ.

22ဒီးဃုနံၤတနံၤန့ၣ်တၢ်မၤအသးလၢပှၤထၢထီၣ်ကိၣ်ခံဧိၤမ့ၢ်လၢတဂၤအဂီၢ်,အါန့ၢ်အလီၢ်ခံစးလီၤ.ဒီးတၢ်အိၣ်ဖှိၣ်အပဒိၣ်ခဲလၢာ်ဟဲစံးဘၣ်စီၤမိၤရှ့န့ၣ်လီၤ.

23ဒီးအဝဲဒၣ်စံးဘၣ်အီၤ,အဝဲအံၤမ့ၢ်တၢ်လၢယွၤစံးဝဲန့ၣ်လီၤ.ခဲဂီၤတနံၤန့ၣ်မ့ၢ်တၢ်အိၣ်ဘှံး,တၢ်အိၣ်ဘှံးအနံၤစီဆှံလၢယွၤအဂီၢ်လီၤ.တၢ်လၢသုကကုၢ်န့ၣ်ကုၢ်တက့ၢ်.ဒီးတၢ်လၢသုကချီန့ၣ်ချီတက့ၢ်,ဒီးတၢ်လၢအအိၣ်လီၤတဲာ်န့ၣ်ပာ်လၢသုဂီၢ်,ဒ်သိးအကအိၣ်တုၤမုၢ်ဆ့ၣ်ထီၣ်န့ၣ်တက့ၢ်.

24ဒီးပာ်ဝဲတုၤမုၢ်ဆ့ၣ်ထီၣ်ဒ်စီၤမိၤရှ့မၤလိာ်ဝဲအသိးန့ၣ်,ဒီးတနၢအုၣ်ဘၣ်,ဒီးလၢၣ်တအိၣ်ဘၣ်လၢအပူၤနီတဘိဘၣ်. 25ဒီးစီၤမိၤရှ့စံးဝဲဒၣ်,အီၣ်တၢ်န့ၣ်လၢမုၢ်မဆါတနံၤအံၤတက့ၢ်.အဂ့ၢ်ဒ်အံၤ,တၢ်လၢမုၢ်တနံၤအံၤမ့ၢ်လၢတၢ်အိၣ်ဘှံးအနံၤလၢယွၤအဂီၢ်လီၤ.လၢမုၢ်မဆါတနံၤအံၤသုတထံၣ်န့ၢ်ဘၣ်တၢ်လၢပျီပူၤဘၣ်. 26သုဘၣ်ထၢထီၣ်အီၤဃုနံၤလီၤ.မ့မ့ၢ်မုၢ်နွံနံၤတနံၤန့ၣ်,တၢ်အိၣ်ဘှံးအနံၤ,တအိၣ်ထီၣ်ဘၣ်လီၤ.

27ဒီးတၢ်မၤအသးလၢပှၤတနီၤနီၤလဲၤထီၣ်လၢမုၢ်နွံနံၤတနံၤဒ်သိးအကထၢထီၣ်တၢ်,ဒီးတထံၣ်န့ၢ်ဘၣ်ဝဲဘၣ်. 28ဒီးယွၤစံးဘၣ်စီၤမိၤရှ့,ဒ်သိးသုသုတတိၢ်န့ၣ်ယတၢ်မၤလိာ်ဒီးယတၢ်သိၣ်တၢ်သီတဂ့ၤဒီး,သုကဂ့ၢ်လိာ်ဆံးယံာ်လဲၣ်. 29ကွၢ်,မ့ၢ်ယွၤဟ့ၣ်လီၤသုလၢအိၣ်ဘှံးအနံၤလီၤ.မၤသးဒ်န့ၣ်ဒီးမုၢ်ဃုနံၤတနံၤန့ၣ်ဟ့ၣ်လီၤသုလၢကိၣ်လၢခံနံၤအဂီၢ်လီၤ.မ်ပှၤအိၣ်လၢအအိၣ်အဆိးအလီၢ်တက့ၢ်.မ်ပှၤသုတဟးထီၣ်လၢအလီၢ်လၢမုၢ်နွံနံၤတနံၤန့ၣ်နီတဂၤတဂ့ၤ. 30ဒီးပှၤဂီၢ်မုၢ်အိၣ်ဘှံးဝဲလၢမုၢ်နွံနံၤတနံၤလီၤ.

31ဒီးပှၤအံၣ်စရ့လးအဟံၣ်ဖိကိးတၢ်န့ၣ်အမံၤလၢမၤနၤလီၤ.ဒီးမၤသးဒ်နၣ်နၣ်အချံအသိး,ဝါဝဲ,ဒီးပအီၣ်ကွၢ်မၤသးဒ်ကိၣ်ဘ့ၣ်ဘၣ်ဒီးကနဲစီအသိးလီၤ.

32ဒီးစီၤမိၤရှ့စံးဝဲဒၣ်,အဝဲအံၤမ့ၢ်တၢ်လၢယွၤမၤလိာ်ဝဲ,မၤပှဲၤထီၣ်ဧိၤမ့ၢ်တဖျၢၣ်ဒီးအီၤလၢအကဘၣ်တၢ်ပာ်ဃာ်အီၤလၢသုစၢၤသုသွဲၣ်အဂီၢ်,ဒ်သိးအကထံၣ်ဘၣ်ကိၣ်လၢယဒုးအီၣ်သုလၢပှၢ်မုၢ်ကနၢဖဲယဒုးဟးထီၣ်သုလၢကီၢ်အဲၤကူပတူးအပူၤန့ၣ်တက့ၢ်.

33ဒီးစီၤမိၤရှ့စံးဘၣ်စီၤအၤဟရိၣ်,ဟံးန့ၢ်လီခီတဖျၢၣ်,ဒီးဒၢနုာ်မၤနၤတဧိၤမ့ၢ်လၢအပူၤ,ဒီးပာ်အီၤလၢယွၤအမဲာ်ညါလၢအကဘၣ်တၢ်ပာ်ဃာ်အီၤလၢသုစၢၤသုသွဲၣ်အဂီၢ်န့ၣ်တက့ၢ်.

34ဒ်ယွၤမၤလိာ်စီၤမိၤရှ့အသိးန့ၣ်,စီၤအၤဟရိၣ်ပာ်အီၤလၢတၢ်အၢၣ်လီၤအီလီၤအမဲာ်ညါဒ်သိးအကဘၣ်တၢ်ပာ်ဃာ်အီၤလီၤ.

35ဒီးပှၤအံၣ်စရ့လးဖိအီၣ်မၤနၤအနံၣ်လွံၢ်ဆံတုၤအတုၤလၢကီၢ်တဘ့ၣ်အိၣ်ဒီးပှၤကညီလီၤ.အီၣ်မၤနၤတုၤအတုၤလၢကီၢ်ကနၤဧၣ်အဃၢၤန့ၣ်လီၤ.

36ဒီးဧိၤမ့ၢ်တဖျၢၣ်မ့ၢ်ထဲသိးသိးဒီးအ့ဖးဆံဆဲၣ်ပူတပူလီၤ.