Exo 33 | KswSKMB | STEP | ဒီးယွၤစံးဘၣ်စီၤမိၤရှ့,ဟး,လဲၤထီၣ်လၢအံၤ,နဲဒၣ်,ဒီးပှၤဂီၢ်မုၢ်လၢနဒုးဟဲထီၣ်လၢကီၢ်အဲၤကူပတူးဆူကီၢ်တဘ့ၣ်လၢယဆိၣ်တၢ်ဒီးစီၤအၤဘြၤဟၣ်,ဒီးစီၤအံၤစဲး,ဒီးစီၤယၤကိာ်,ဒီးစံးဘၣ်အီၤ,ယကဟ့ၣ်လီၤအီၤလၢနချံနသၣ်န့ၣ်တက့ၢ်.

‏ Exodus 33

1 ဒီးယွၤစံးဘၣ်စီၤမိၤရှ့,ဟး,လဲၤထီၣ်လၢအံၤ,နဲဒၣ်,ဒီးပှၤဂီၢ်မုၢ်လၢနဒုးဟဲထီၣ်လၢကီၢ်အဲၤကူပတူးဆူကီၢ်တဘ့ၣ်လၢယဆိၣ်တၢ်ဒီးစီၤအၤဘြၤဟၣ်,ဒီးစီၤအံၤစဲး,ဒီးစီၤယၤကိာ်,ဒီးစံးဘၣ်အီၤ,ယကဟ့ၣ်လီၤအီၤလၢနချံနသၣ်န့ၣ်တက့ၢ်. 2 ဒီးယကမၢကလူးတဂၤလဲၤလၢနမဲာ်ညါလီၤ.ဒီးယကဟီထီၣ်ကွံာ်ပှၤကနၤဧၣ်ဖိ,ပှၤအမိၢ်ဖိ,ဒီးပှၤဃ့ၤသးဖိ,ဒီးပှၤပရးစၤဖိ,ဒီးပှၤဃံၤဝံၤဖိ,ဒီးပှၤယဘူၣ်ဖိ, 3 ဒီးကဆှၢနၤဆူကီၢ်လၢအယွၤဝဲဒီးတၢ်နုၢ်ထံဒီးကနဲစီလီၤ.နမ့ၢ်ပှၤအကိာ်ဆူၣ်တကလုာ်အဂ့ၢ်လီၤ.ယကဒုးအီၣ်ကွံာ်ဘၣ်ဖုးနၤလၢကျဲပူၤလီၤ.

4 ဒီးတုၤပှၤဂီၢ်မုၢ်နၢ်ဟူတၢ်ကတိၤအၢအသီၣ်န့ၣ်ဒီး,အသူၣ်အုးသးအုး,ဒီးတကယၢအသးနီတဂၤဘၣ်. 5 အဂ့ၢ်ဒ်အံၤ,ယွၤစံးတ့ၢ်စီၤမိၤရှ့,စံးဘၣ်ပှၤအံၣ်စရ့လးဖိ,သုမ့ၢ်ပှၤအကိာ်ဆူၣ်တကလုာ်လီၤ.ယမ့ၢ်ဟဲဆူသုကျါ,ထဲတစိၢ်ဖိဒီး,ယကမၤလၢာ်ကွံာ်သုလီၤ.ဒီးခဲကနံၣ်အံၤယကမၤနၤဒ်လဲၣ်ဒ်လဲၣ်န့ၣ်,ဒ်သိးယကသ့ၣ်ညါဒီး,ဘ့ၣ်လီၤကွံာ်နကယၢကယဲတက့ၢ်.

6 ဒီးပှၤအံၣ်စရ့လးဖိဘ့ၣ်လီၤကွံာ်အကယၢကယဲလၢကစၢၢ်ဃိၤရ့းအခီၣ်ထံးလီၤ.

7 ဒီးစီၤမိၤရှ့ဟံးန့ၢ်ဝဲ,ဒီးသူၣ်အီၤလၢပှၤသူၣ်ဒဲတဖၣ်အလီၢ်လၢခိ,စၢၢ်တလၢၢ်ဒီးပှၤသူၣ်ဒဲအလီၢ်,ဒီးယုၢ်ဝဲအမံၤလၢတၢ်အိၣ်ဖှိၣ်အဒဲလီၤ.ဒီးတၢ်မၤအသးလၢကယဲၢ်ပှၤလၢအဃုယွၤတဂၤလၢ်လၢ်န့ၣ်လဲၤထီၣ်ဆူတၢ်အိၣ်ဖှိၣ်အဒဲလၢအအိၣ်လၢပှၤသူၣ်ဒဲတဖၣ်အလီၢ်လၢခိလီၤ.

8 ဒီးတုၤစီၤမိၤရှ့လဲၤထီၣ်လၢဒဲပူၤန့ၣ်ဒီး,တၢ်မၤအသးလၢပှၤဂီၢ်မုၢ်ဂဲၤဆၢထၢၣ်ခဲလၢာ်,ဒီးဆၢထၢၣ်တဂၤလၢအဒဲကျဲစၢၤ,တဂၤလၢအဒဲကျဲစၢၤ,ဒီးကွၢ်ထွဲစီၤမိၤရှ့အခံတုၤအလဲၤနုာ်လၢဒဲပူၤန့ၣ်လီၤ.

9 ဒီးတုၤစီၤမိၤရှ့လဲၤနုာ်လၢဒဲပူၤဒီး,တၢ်မၤအသးလၢတၢ်အၢၣ်အထူၣ်ဟဲလီၤဒီးအိၣ်ဆၢထၢၣ်လၢဒဲအကျဲစၢၤန့ၣ်,ဒီးယွၤကတိၤတၢ်ဒီးစီၤမိၤရှ့လီၤ.

10 ဒီးပှၤဂီၢ်မုၢ်ခဲလၢာ်ထံၣ်ဘၣ်တၢ်အၢၣ်အထူၣ်အိၣ်ဆၢထၢၣ်လၢဒဲအကျဲစၢၤန့ၣ်,ဒီးပှၤဂီၢ်မုၢ်ခဲလၢာ်ဂဲၤဆၢထၢၣ်ဝဲ,ဒီးဘါထီၣ်ဝဲ,တဂၤလၢအဒဲအကျဲစၢၤ,တဂၤလၢအဒဲအကျဲစၢၤစုာ်စုာ်လီၤ.

11 ဒီးယွၤကတိၤတၢ်ဒီးစီၤမိၤရှ့မဲာ်သကိးမဲာ်,ဒ်ပှၤကညီကတိၤတၢ်ဒီးအတံၤအသကိးအသိးန့ၣ်လီၤ.ဒီးက့ၤကဒါက့ၤဆူပှၤသူၣ်ဒဲတဖၣ်အလီၢ်ပူၤလီၤ.မ့မ့ၢ်အခ့အပှၤ,ပှၤဖိၣ်သၣ်ခွါ,စီၤနူၣ်အဖိခွါ,စီၤယိၤရှူတဂၤန့ၣ်တဟးထီၣ်ဘၣ်လၢဒဲပူၤန့ၣ်ဘၣ်.

12 ဒီးစီၤမိၤရှ့စံးဘၣ်ယွၤ,ကွၢ်တက့ၢ်,နစံးဘၣ်ယၤ,ဒုးဟဲထီၣ်ပှၤဂီၢ်မုၢ်အံၤတက့ၢ်.ဒီးနကမၢမတၤမတၤလဲၤဒီးယၤန့ၣ်နတဘိးဘၣ်သ့ၣ်ညါဒံးဘၣ်ယၤဘၣ်.ဘၣ်ဆၣ်ဒီးနစံးဘၣ်ယၤ,ယသ့ၣ်ညါနၤလၢနမံၤ,ဒီးနဘၣ်ဘျုးဘၣ်ဖှိၣ်လၢယမဲာ်ညါန့ၣ်လီၤ. 13 ဒီးခဲကနံၣ်အံၤယမ့ၢ်ဘၣ်ဘျုးဘၣ်ဖှိၣ်လၢနမဲာ်ညါဒီး,ဘိးဘၣ်သ့ၣ်ညါလၢ်ယၤလၢနကျဲဒ်သိးယကသ့ၣ်ညါနၤ,လၢယကဘၣ်ဘျုးဘၣ်ဖှိၣ်လၢနမဲာ်ညါတက့ၢ်.ဒီးကွၢ်ဆိကမိၣ်လၢပှၤတကလုာ်အံၤမ့ၢ်နပှၤဂီၢ်မုၢ်တက့ၢ်.

14 ဒီးစံးဝဲဒၣ်,ယမဲာ်ကလဲၤတၢ်ဒီးနၤ,ဒီးယကဒုးအိၣ်ဘှံးနၤလီၤ.

15 ဒီးစံးဝဲဒၣ်,နမဲာ်မ့ၢ်တလဲၤဘၣ်ဒီး,ဒုးလဲၤထီၣ်ပှၤလၢအံၤတဂ့ၤ, 16 ဒီးပှၤကသ့ၣ်ညါဖဲအံၤလၢယဘၣ်ဘျုးဘၣ်ဖှိၣ်လၢနမဲာ်ညါ,ယၤဒီးနပှၤဂီၢ်မုၢ်လၢမနုၤတမံၤလဲၣ်.မ့ၢ်လၢနလဲၤတၢ်ဒီးပှၤအံၤတမ့ၢ်ဘၣ်ဧါ.ဒီးယၤဒီးနပှၤဂီၢ်မုၢ်န့ၣ်ပကအိၣ်လီၤဆီန့ၢ်ပှၤလၢအအိၣ်လၢဟီၣ်ခိၣ်ချၢဒီဘ့ၣ်ညါခဲလၢာ်တက့ၢ်လီၤ.

17 ဒီးယွၤစံးဘၣ်စီၤမိၤရှ့,ယကမၤတၢ်အံၤတမံၤလၢနစံးတၢ်စ့ၢ်ကီးလီၤ.အဂ့ၢ်ဒ်အံၤ,နဘၣ်ဘျုးဘၣ်ဖှိၣ်လၢယမဲာ်ညါ,ဒီးယသ့ၣ်ညါနၤလၢနမံၤလီၤ.

18 ဒီးစံးဝဲဒၣ်,ဒုးထံၣ်ဘၣ်လၢ်ယၤလၢနလၤကပီၤတက့ၢ်.

19 ဒီးစံးဝဲဒၣ်,ယကဒုးလဲၤပူၤကွံာ်ယတၢ်ဂ့ၤခဲလၢာ်လၢနမဲာ်ညါ,ဒီးယကကိးထီၣ်ယွၤအမံၤလၢနမဲာ်ညါ,ဒီးပှၤလၢယကဟ့ၣ်အီၤလၢတၢ်ဘျုးတၢ်ဖှိၣ်န့ၣ်ယကဟ့ၣ်အီၤလၢတၢ်ဘျုးတၢ်ဖှိၣ်လီၤ.ဒီးပှၤလၢယကသးကညီၤအီၤန့ၣ်ယကသးကညီၤအီၤလီၤ. 20 ဒီးစံးဝဲဒၣ်,နထံၣ်ဘၣ်ယမဲာ်တကဲဘၣ်.အဂ့ၢ်ဒ်အံၤ,ပှၤကညီလၢအထံၣ်ဘၣ်ယမဲာ်န့ၣ်တမူဘၣ်ဘၣ်. 21 ဒီးယွၤစံးဝဲဒၣ်,ကွၢ်ကွၢ်,အလီၢ်တပူၤအိၣ်ဒီးယၤ,ဒီးနဆၢထၢၣ်လၢလၢၢ်တဖျၢၣ်အဖီခိၣ်လီၤ. 22 ဒီးတၢ်မၤအသးလၢယလၤကပီၤလဲၤပူၤကွံာ်အဖၢမုၢ်ဒီး,ယကပာ်နၤလၢလၢၢ်အအိပူၤ,ဒီးယကကျၢၢ်ဘၢနၤလၢယစုတုၤယလဲၤပူၤကွံာ်လီၤ. 23 ဒီးယကဟံးထီၣ်ယစု,ဒီးနကထံၣ်ဘၣ်ယချၢဃံလီၤ.မ့မ့ၢ်ယမဲာ်တဘၣ်အိၣ်ဖျါဘၣ်.