Exo 34 | KswSKMB | STEP | ဒီးယွၤစံးဘၣ်စီၤမိၤရှ့,စိးပျၤလၢၢ်ဘ့ၣ်ဘၣ်ခံဘ့ၣ်ဒ်အခီၣ်ထံးတဖၣ်အသိးတက့ၢ်.ဒီးလၢတၢ်ဘ့ၣ်ဘၣ်တဖၣ်အလိၤန့ၣ်,ယကကွဲးတၢ်ကတိၤလၢအအိၣ်လၢတၢ်ဘ့ၣ်ဘၣ်အခီၣ်ထံးတဖၣ်လၢနမၤကၢ်ကွံာ်အီၤအလိၤန့ၣ်လီၤ.

‏ Exodus 34

1 ဒီးယွၤစံးဘၣ်စီၤမိၤရှ့,စိးပျၤလၢၢ်ဘ့ၣ်ဘၣ်ခံဘ့ၣ်ဒ်အခီၣ်ထံးတဖၣ်အသိးတက့ၢ်.ဒီးလၢတၢ်ဘ့ၣ်ဘၣ်တဖၣ်အလိၤန့ၣ်,ယကကွဲးတၢ်ကတိၤလၢအအိၣ်လၢတၢ်ဘ့ၣ်ဘၣ်အခီၣ်ထံးတဖၣ်လၢနမၤကၢ်ကွံာ်အီၤအလိၤန့ၣ်လီၤ.

2 ဒီးအိၣ်ကတဲာ်ကတီၤလၢမုၢ်ဂီၤ,ဒီးဟဲထီၣ်ဆူကစၢၢ်စံၤနါလၢမုၢ်ဂီၤ,ဒီးဆၢထၢၣ်လၢယအိၣ်လၢကစၢၢ်ဒီခိၣ်န့ၣ်တက့ၢ်. 3 ဒီးဒုးဟဲထီၣ်ပှၤဒီးနၤနီတဂၤတဂ့ၤ,ဒီးဒုးအိၣ်ဖျါပှၤလၢကစၢၢ်အလိၤနီတပူၤနီတဂၤတဂ့ၤ.ဒီးသိဒီးမဲာ်တဲးလဲး,ဒီးဂီၤဘုၣ်ဂီၤဖံးတဖၣ်န့ၣ်ဒုးအီၣ်အဆၣ်လၢကစၢၢ်အမဲာ်ညါန့ၣ်တဂ့ၤ.

4 ဒီးစိးပျၤလၢၢ်ဘ့ၣ်ဘၣ်ခံဘ့ၣ်ဒ်အခီၣ်ထံးအသိးန့ၣ်လီၤ.ဒီးမုၢ်ဆ့ၣ်ထီၣ်န့ၣ်စီၤမိၤရှ့ဂဲၤဆၢထၢၣ်ဂီၤဂီၤ,ဒီးလဲၤထီၣ်လၢကစၢၢ်စံၤနါအလိၤ,ဒ်ယွၤမၤလိာ်အီၤအသိးန့ၣ်,ဒီးဟံးန့ၢ်လၢၢ်ဘ့ၣ်ဘၣ်ခံဘ့ၣ်န့ၣ်လၢအစုပူၤလီၤ.

5 ဒီးယွၤဟဲလီၤလၢတၢ်အၢၣ်အပူၤ,ဒီးဆၢထၢၣ်ဒီးအီၤဖဲန့ၣ်,ဒီးကိးထီၣ်ယွၤအမံၤလီၤ. 6 ဒီးယွၤလဲၤပူၤလၢအမဲာ်ညါ,ဒီးကိးထီၣ်,ယွၤ,ကစၢ်ယွၤလၢအသးအိၣ်တၢ်,ဒီးသးကညီၤတၢ်,သးထီၣ်ကီ,ဒီးအဘျုးအဖှိၣ်ဒီးအမ့ၢ်အတီအိၣ်ဝဲအါမးလီၤ. 7 ဟံးဃာ်တၢ်ဘျုးတၢ်ဖှိၣ်လၢပှၤကထိတဖၣ်အဂီၢ်,ပျၢ်တၢ်အၢတၢ်သီဒီးတၢ်သရူးတၢ်ကမၣ်ဒီးတၢ်ဒဲးတူာ်တၢ်ဒဲးဘးလီၤ.ဒီးတကွၢ်ကပာ်တၢ်ဒဲးဘးလ့ၤတက့ၤဘၣ်.ဒုးအိၣ်သကိးပၢ်တဖၣ်အတၢ်ဒဲးဘးလၢဖိအလိၤ,ဒီးလၢအဖိတဖၣ်အဖိအလိၤတုၤလီၤလၢသၢစိၤတစိၤ,ဒီးလၢလွံၢ်စိၤတစိၤလီၤ.

8 ဒီးစီၤမိၤရှ့မၤချ့ချ့,ဒီးဆုးလီၤအခိၣ်ဆူဟီၣ်ခိၣ်,ဒီးဘါတၢ်လီၤ. 9 ဒီးစံးဝဲဒၣ်,ယမ့ၢ်ဘၣ်ဘျုးဘၣ်ဖှိၣ်လၢနမဲာ်ညါ,ကစၢ်ဧၢ,မ်ကစၢ်လဲၤတၢ်လၢပကျါတက့ၢ်.အဂ့ၢ်ဒ်အံၤ,အဝဲအံၤမ့ၢ်ပှၤဂီၢ်မုၢ်အကိာ်ဆူၣ်,ဒီးပျၢ်ပတၢ်သရူးတၢ်ကမၣ်ဒီးပတၢ်ဒဲးတူာ်တၢ်ဒဲးဘး,ဒီးပာ်ပှၤလၢနတၢ်န့ၢ်သါန့ၣ်တက့ၢ်.

10 ဒီးစံးဝဲဒၣ်,ကွၢ်ကွၢ်,ယမၤတၢ်အၢၣ်လီၤအီလီၤလီၤ.လၢနပှၤဂီၢ်မုၢ်ခဲလၢာ်အမဲာ်ညါ,ယကမၤတၢ်လီၤလိၢ်လီၤလးလၢတၢ်တမၤဘၣ်လၢဟီၣ်ခိၣ်ဒီဘ့ၣ်ညါ,ဒီးလၢပှၤအကျါနီတကလုာ်ဘၣ်,ဒီးကယဲၢ်ပှၤဂီၢ်မုၢ်လၢနအိၣ်လၢအကျါန့ၣ်ကထံၣ်ဘၣ်ယွၤအတၢ်မၤခဲလၢာ်လီၤ.အဂ့ၢ်ဒ်အံၤ,တၢ်လၢယကမၤနၤန့ၣ်မ့ၢ်တၢ်မၤပျံၤအလီၢ်လီၤ.

11 တၢ်လၢယမၤလိာ်နၤလၢမုၢ်မဆါတနံၤအံၤ,တိၢ်န့ၢ်တက့ၢ်.ကွၢ်ကွၢ်,ယကဟီထီၣ်ကွံာ်လၢနမဲာ်ညါပှၤအမိၢ်ဖိ,ဒီးပှၤကနၤဧၣ်ဖိ,ဒီးပှၤဃ့ၤသးဖိ,ဒီးပှၤပရးစၤဖိ,ဒီးပှၤဃံၤဝံၤဖိ,ဒီးပှၤယဘူၣ်ဖိလီၤ.

12 ဒီးပလီၢ်နသးဒ်သိးနသုတမၤတၢ်အၢၣ်လီၤအီလီၤဒီးပှၤကီၢ်ဖိဖဲနလဲၤတၢ်န့ၣ်တဂ့ၤ.ကကဲထီၣ်ဘၣ်ဖုးတၢ်အပျံၤသကွီၤလၢသုကျါလီၤ. 13 မ့မ့ၢ်သုဘၣ်မၤဟးဂီၤအတၢ်လုၢ်လီၢ်,ဒီးမၤကၢ်ကွံာ်အတၢ်ဂီၤ,ဒီးကူာ်ကွံာ်အအရှ့ရၤန့ၣ်တက့ၢ်. 14 အဂ့ၢ်ဒ်အံၤ,နတဘၣ်ဘါကစၢ်အဂၤဘၣ်.အဂ့ၢ်ဒ်အံၤ,ယွၤလၢအမံၤမ့ၢ်တၢ်သးက့ၣ်တဂၤန့ၣ်,မ့ၢ်အသးက့ၣ်တၢ်လီၤ. 15 မၤသးဒ်န့ၣ်ဒီးအၢၣ်လီၤအီလီၤတၢ်ဒီးပှၤကီၢ်ဖိတဂ့ၤ.အဂ့ၢ်ဒ်အံၤ,အဝဲသ့ၣ်ကမၤကမၣ်ထွဲအကစၢ်တဖၣ်အခံ,ဒီးလုၢ်အကစၢ်တဖၣ်ဒီးပှၤကကိးနၤ,ဒီးနကအီၣ်ဘၣ်ဖုးအတၢ်လုၢ်လီၤ. 16 ဒီးနကဟံးန့ၢ်ဘၣ်ဖုးအဖိမုၣ်တဖၣ်လၢနဖိခွါတဖၣ်အဂီၢ်ဒီးအဖိမုၣ်ကလဲၤမၤကမၣ်တၢ်ထွဲအကစၢ်တဖၣ်အခံ,ဒီးကဒုးမၤကမၣ်နဖိခွါတဖၣ်ထွဲအဝဲသ့ၣ်အကစၢ်အခံလီၤ.

17 တ့ကစၢ်သိအသးတဖၣ်လၢနဂီၢ်တဂ့ၤ.

18 ဘူၣ်ကိၣ်တအိၣ်ဘၣ်ဒီးကိၣ်မံၣ်န့ၣ်တိၢ်န့ၢ်တက့ၢ်.နဘၣ်အီၣ်ကိၣ်တအိၣ်ဘၣ်ဒီးကိၣ်မံၣ်န့ၣ်နွံနံၤ,ဒ်ယမၤလိာ်နၤလၢအဆၢအကတီၢ်လၢလါအၤဘံာ်အပူၤအသိးန့ၣ်လီၤ.အဂ့ၢ်ဒ်အံၤ,နဟဲထီၣ်လၢအဲၤကူပတူးလၢလါအၤဘံာ်အပူၤလီၤ.

19 ကယဲၢ်တၢ်လၢအအိးထီၣ်ဒၢလီၢ်,ဒီးကယဲၢ်နဆၣ်ဖိကီၢ်ဖိအဒၢအဝဲၢ်ကိအဖါ,ဂီၤဖံးမ့ၢ်ဂ့ၤ,သိမ့ၢ်ဂ့ၤ,မ့ၢ်ယတၢ်ခဲလၢာ်လီၤ.

20 မ့မ့ၢ်ကသ့ၣ်ယီၤအဝဲၢ်ကိန့ၣ်,နဘၣ်ပှ့ၤက့ၤအီၤဒီးသိဖိတဒုလီၤ.ဒီးနမ့ၢ်တပှ့ၤက့ၤဘၣ်ဒီး,နဘၣ်မၤကၢ်အကိာ်လီၤ.ကယဲၢ်နဖိခွါဝဲၢ်ကိတဂၤလၢ်လၢ်န့ၣ်နဘၣ်ပှ့ၤက့ၤအီၤလီၤ.ဒီးအိၣ်ဖျါလၢယမဲာ်ညါအိၣ်ကလီနီတဂၤတဂ့ၤ.

21 ဃုနံၤန့ၣ်နမၤဘၣ်တၢ်လီၤ.မ့မ့ၢ်နွံနံၤတနံၤန့ၣ်နဘၣ်အိၣ်ဘှံးလီၤ.ထဲၣ်တၢ်အခါဒီးကူးတၢ်အခါန့ၣ်,နဘၣ်အိၣ်ဘှံးလီၤ. 22 ဒီးနဘၣ်တိၢ်န့ၢ်ဘူၣ်နွံတဖၣ်,ဘူၣ်ကူးဘုကၠူၣ်သၣ်ဆိ,ဒီးဘူၣ်ထၢဖှိၣ်တၢ်လၢနံၣ်အကတၢၢ်န့ၣ်လီၤ.

23 တနံၣ်အတီၢ်ပူၤန့ၣ်,ကယဲၢ်သုဖိပိာ်ခွါဘၣ်အိၣ်ဖျါသၢဘျီလၢကစၢ်ယွၤ,အံၣ်စရ့လးအကစၢ်,အမဲာ်ညါခဲလၢာ်လီၤ. 24 အဂ့ၢ်ဒ်အံၤ,ယကဟီထီၣ်ကွံာ်ပှၤကလုာ်တဖၣ်လၢနမဲာ်ညါ,ဒီးမၤလဲၢ်ထီၣ်နဃၢၤတဖၣ်လီၤ.ဒီးတုၤနလဲၤပာ်ဖျါနသးလၢယွၤနကစၢ်အမဲာ်ညါတနံၣ်သၢဘျီဒီး,ပှၤတဆၢန့ၢ်ဘၣ်နဟီၣ်ခိၣ်နီတဂၤဘၣ်လီၤ.

25 လုၢ်ယတၢ်လုၢ်အသွံၣ်အိၣ်ဒီးကိၣ်မံၣ်န့ၣ်တဂ့ၤ.ဒီးဘူၣ်လဲၤကပာ်အတၢ်လုၢ်န့ၣ်,ပာ်အီၤတုၤမုၢ်ဆ့ၣ်ထီၣ်န့ၣ်တဂ့ၤ. 26 ဟီၣ်ခိၣ်အသၣ်ဆိအဂံၢ်ခိၣ်တဖၣ်န့ၣ်ဟဲစိာ်ဆူယွၤနကစၢ်အဟံၣ်ပူၤတက့ၢ်.ချီမဲာ်တဲးလဲးဖိလၢအမိၢ်နုၢ်ထံအကျါတဂ့ၤ. 27 ဒီးယွၤစံးဘၣ်စီၤမိၤရှ့,ကွဲးလီၤတၢ်ကတိၤတဖၣ်န့ၣ်တက့ၢ်.အဂ့ၢ်ဒ်အံၤ,ဒ်တၢ်ကတိၤတဖၣ်အံၤဟဲဝဲအသိးန့ၣ်ယမၤလံတၢ်အၢၣ်လီၤအီလီၤဒီးနၤဒီးအံၣ်စရ့လးလံလီၤ.

28 ဒီးအိၣ်ဝဲဖဲန့ၣ်ဒီးယွၤအနံၤလွံၢ်ဆံဒီးအနၤလွံၢ်ဆံ,ဒီးတအီၣ်ဘၣ်ကိၣ်,ဒီးတအီဘၣ်ထံဘၣ်.ဒီးကွဲးတၢ်အၢၣ်လီၤအီလီၤအတၢ်ကတိၤ,တၢ်ကတိၤဆံဆဲၣ်ထံၣ်လၢတၢ်ဘ့ၣ်ဘၣ်အလိၤန့ၣ်လီၤ.

29 ဒီးတုၤစီၤမိၤရှ့ဟဲလီၤလၢကစၢၢ်စံၤနါအလိၤအိၣ်ဒီးတၢ်အၢၣ်လီၤအီလီၤအဘ့ၣ်ဘၣ်ခံဘ့ၣ်လၢစီၤမိၤရှ့အစုပူၤ,ဖဲအဟဲလီၤလၢကစၢၢ်အလိၤ,တၢ်မၤအသးလၢစီၤမိၤရှ့တသ့ၣ်ညါဘၣ်လၢအကတိၤတၢ်ဒီးအီၤအဖၢမုၢ်ဒီး,အမဲာ်ဖံးကပီၤကပြုၢ်ကပြီၤဘၣ်န့ၣ်လီၤ.

30 ဒီးတုၤစီၤအၤဟရိၣ်,ဒီးပှၤအံၣ်စရ့လးဖိခဲလၢာ်ထံၣ်ဘၣ်စီၤမိၤရှ့ဒီး,ကွၢ်ကွၢ်,အမဲာ်ဖံးကပီၤကပြုၢ်ကပြီၤ,ဒီးသုးဘူးအသးဆူအအိၣ်တဘူၣ်ဘၣ်လီၤ. 31 ဒီးစီၤမိၤရှ့ကိးထီၣ်လၢအီၤ,ဒီးစီၤအၤဟရိၣ်ဒီးတၢ်အိၣ်ဖှိၣ်အပဒိၣ်တဖၣ်ခဲလၢာ်ဟဲက့ၤဆူအအိၣ်,ဒီးစီၤမိၤရှ့ကတိၤတၢ်ဒီးအီၤလီၤ.

32 လၢခံက့ၤဒီးပှၤအံၣ်စရ့လးဖိဟဲဘူးထီၣ်ဝဲခဲလၢာ်,ဒီးအဝဲဒၣ်မၤလိာ်အီၤလၢကယဲၢ်တၢ်လၢယွၤစံးဘၣ်အီၤလၢကစၢၢ်စံၤနါအလိၤလီၤ. 33 ဒီးတုၤစီၤမိၤရှ့ကတိၤတၢ်လၢာ်ဝံၤဒီး,ပာ်နီၢ်ကျၢၢ်ဘၢလၢအမဲာ်လိၤလီၤ.

34 ဒီးတုၤစီၤမိၤရှ့လဲၤနုာ်ဆူယွၤအမဲာ်ညါဒ်သိးအကကတိၤတၢ်ဒီးအီၤဒီး,ဘ့ၣ်လီၤကွံာ်နီၣ်ကျၢၢ်ဘၢတုၤအကဟဲက့ၤထီၣ်န့ၣ်လီၤ.ဒီးဟဲက့ၤထီၣ်,ဒီးစံးဘၣ်တဲဘၣ်ပှၤအံၣ်စရ့လးဖိလၢတၢ်လၢတၢ်မၤလိာ်အီၤလီၤ. 35 ဒီးပှၤအံၣ်စရ့လးဖိထံၣ်ဘၣ်စီၤမိၤရှ့အမဲာ်လၢအမဲာ်ဖံးကပီၤကပြုၢ်ကပြီၤလီၤ.ဒီးစီၤမိၤရှ့ပာ်ကဒီးနီၣ်ကျၢၢ်ဘၢလၢအမဲာ်လိၤတုၤလီၤလၢအလဲၤနုာ်ကတိၤတၢ်ဒီးအီၤလီၤ.