‏ Exodus 36

1ဒီးစီၤဘစၤလအ့လး,ဒီးစီၤအၤဟလံအာ်,ဒီးကယဲၢ်ပှၤလၢအသးကူၣ်တၢ်သ့လၢယွၤဒၢနုာ်တၢ်ကူၣ်သ့ဒီးတၢ်ကူၣ်တၢ်ဆးလၢအသးကံၢ်ပူၤ,ဒ်သိးအကသ့ၣ်ညါမၤကယဲၢ်တၢ်မၤတမံၤလၢ်လၢ်လၢအလီၢ်စီဆှံအတၢ်မၤအဂီၢ်န့ၣ်,မၤဝဲဒ်ကယဲၢ်တၢ်လၢယွၤမၤလိာ်ဝဲခဲလၢာ်အသိးန့ၣ်လီၤ.

2ဒီးစီၤမိၤရှ့ကိးန့ၢ်စီၤဘစၤလအ့လး,ဒီးစီၤအၤဟလံအာ်,ဒီးကယဲၢ်ပှၤလၢအသးကူၣ်တၢ်သ့,လၢယွၤဒၢနုာ်တၢ်ကူၣ်သ့လၢအသးကံၢ်ပူၤကိးဂၤဒဲး,ကယဲၢ်ပှၤလၢအသးထိၣ်ဂဲၤအီၤဒ်သိးအကဟဲမၤတၢ်န့ၣ်လီၤ.

3ဒီးအဝဲသ့ၣ်ဒိးန့ၢ်လၢစီၤမိၤရှ့အစုပူၤကယဲၢ်တၢ်မၤဘူၣ်လၢပှၤအံၣ်စရ့လးဖိဟဲစိာ်တ့ၢ်လၢလီၢ်စီဆှံအတၢ်မၤအမၤတၢ်အဂီၢ်,ဒ်သိးအကမၤဝဲလီၤ.ဒီးပှၤဟဲစိာ်ဒံးတၢ်မၤဘူၣ်လၢအဟ့ၣ်ဒၣ်တၢ်လၢဂီၤလၢဂီၤလီၤ.

4ဒီးကယဲၢ်ပှၤကူၣ်တၢ်သ့လၢအမၤလီၢ်စီဆှံအတၢ်မၤန့ၣ်,ဟဲက့ၤလၢအတၢ်မၤလၢအမၤဝဲကိးဂၤဒဲး, 5ဒီးကတိၤတၢ်ဒီးစီၤမိၤရှ့ဒီးစံးဝဲဒၣ်,ပှၤဟဲစိာ်တၢ်လၢတၢ်မၤအမၤတၢ်အဂီၢ်လၢယွၤမၤလိာ်တၢ်န့ၣ်,အါကဲာ်ဆိးဖးဒိၣ်ညါလီၤ.

6ဒီးစီၤမိၤရှ့မၤလိာ်တၢ်,ဒီးပှၤကိးထီၣ်လၢပှၤသူၣ်ဒဲအလီၢ်ပူၤဒီလီၢ်ညါဒီးစံးဝဲဒၣ်,ပိာ်မုၣ်မ့ၢ်ဂ့ၤ,ပိာ်ခွါမ့ၢ်ဂ့ၤ,မ်အသုတမၤလၢၤတၢ်မၤလၢတၢ်မၤဘူၣ်လၢလီၢ်စီဆှံအဂီၢ်တဂ့ၤ.ဒီးပှၤဂီၢ်မုၢ်ဘၣ်တၢ်တြီအဟဲစိာ်တၢ်လီၤ. 7အဂ့ၢ်ဒ်အံၤ,တၢ်လၢကယဲၢ်တၢ်မၤအဂီၢ်ဒ်သိးအကမၤအီၤန့ၣ်,လၢပှဲၤဝဲဒီးအါကဲၣ်ဆိးလီၤ.

8ဒီးကယဲၢ်ပှၤလၢအကူၣ်တၢ်သ့လၢအကျါ,လၢအမၤတၢ်အိၣ်ဝဲအလီၢ်အတၢ်မၤန့ၣ်,မၤဝဲလၢယၣ်သဒၢတၢ်လၢဖှီဝါကဆှၣ်အလုၣ်လ့ၢ်ဃံၤ,ဒီးတၢ်လါ,ဒီးတၢ်လုးတကုာ်,ဒီးတၢ်ဂီၤ,ဒီးခ့ရူာ်တဖၣ်လၢပှၤမၤတၢ်သ့မၤဝဲန့ၣ်,ဆံဆဲၣ်ဘ့ၣ်န့ၣ်လီၤ.

9ဒီးယၣ်သဒၢတၢ်တဘ့ၣ်အထီခံဆံဃိးပျၢ်,ဒီးယၣ်သဒၢတၢ်တဘ့ၣ်အဒီၣ်ဃီၤလွံၢ်ပျၢ်လီၤ.ယၣ်သဒၢတၢ်တဖၣ်န့ၣ်တုၤသိးသိးလီၤ.

10ဒီးယၣ်သဒၢတၢ်ယဲၢ်ဘ့ၣ်န့ၣ်,မၤစဲဘူးလိာ်အသးတဘ့ၣ်ဒီးတဘ့ၣ်,ဒီးယၣ်သဒၢတၢ်ယဲၢ်ဘ့ၣ်ဒၣ်,မၤစဲဘူးလိာ်အသးတဘ့ၣ်ဒီးတဘ့ၣ်လီၤ.

11ဒီးမၤဝဲကွီၤတဖၣ်လၢတၢ်လါလၢယၣ်သဒၢတၢ်တဘ့ၣ်အကနူၤလၢအအိၣ်လၢတၢ်စဲဘူးလိာ်အသးအကတၢၢ်လီၤ.မၤတၢ်ဒ်န့ၣ်သိးလၢယၣ်သဒၢတၢ်တဘ့ၣ်လၢအကနူၤအိၣ်လၢတၢ်စဲဘူးလိာ်အသးခံဘ့ၣ်တဘ့ၣ်အကတၢၢ်န့ၣ်လီၤ.

12မၤဝဲလၢကွီၤယဲၢ်ဆံလၢယၣ်သဒၢတၢ်တဘ့ၣ်အလိၤ,ဒီးသဃီၤလိာ်အသးဒီးအဝဲန့ၣ်မၤကွီၤယဲၢ်ဆံလၢယၣ်သဒၢတၢ်တဘ့ၣ်အလိၤလၢအအိၣ်လၢတၢ်စဲဘူးလိာ်အသးခံဘ့ၣ်တဘ့ၣ်အကတၢၢ်န့ၣ်လီၤ. 13ဒီးမၤဝဲနီၣ်ကွးထူယဲၢ်ဆံ,ဒီးဒုးစဲဘူးယၣ်သဒၢတၢ်တဖၣ်လၢနီၣ်ကွး,ဒီးကဲထီၣ်တၢ်အိၣ်အလီၢ်တဖျၢၣ်ဃီလီၤ.

14ဒီးမၤဝဲလၢယၣ်သဒၢတၢ်တဖၣ်လၢမဲာ်တဲးလဲးအဆူၣ်လၢဒဲလၢတၢ်အိၣ်အလီၢ်အဖီခိၣ်အဂီၢ်လီၤ.မၤဝဲယၣ်သဒၢတၢ်တဆံတဘ့ၣ်လီၤ. 15ဒီးယၣ်သဒၢတၢ်တဘ့ၣ်အထီန့ၣ်အပျၢ်သၢဆံ,ဒီးယၣ်သဒၢတၢ်တဘ့ၣ်အဒီၣ်ဃီၤလွံၢ်ပျၢ်,ဒီးယၣ်သဒၢတၢ်တဆံတဘ့ၣ်န့ၣ်မ့ၢ်တုၤသိးသိးလီၤ.

16ဒီးမၤစဲဘူးလိာ်အသးလၢယၣ်သဒၢတၢ်ယဲၢ်ဘ့ၣ်တပူၤ,ဒီးယၣ်သဒၢတၢ်ဃုဘ့ၣ်တပူၤဒၣ်န့ၣ်လီၤ.

17ဒီးမၤဝဲလၢကွီၤယဲၢ်ဆံလၢယၣ်သဒၢတၢ်တဘ့ၣ်အကနူၤလၢအအိၣ်လၢတၢ်စဲဘူးလိာ်အသးအကတၢၢ်လီၤ.ဒီးမၤကွီၤယဲၢ်ဆံလၢယၣ်သဒၢတၢ်တဘ့ၣ်အပူၤလၢအအိၣ်လၢတၢ်စဲဘူးလိာ်အသးခံဘ့ၣ်တဘ့ၣ်အကတၢၢ်လီၤ.

18ဒီးမၤဝဲနီၣ်ကွးတိၢ်,ဒ်သိးပှၤကကွးထီၣ်ဒဲ,ဒီးကကဲထီၣ်တၢ်တဖျၢၣ်ဃီလီၤ.

19ဒီးမၤဝဲတၢ်ကျၢၢ်ဘၢလၢသိဖါအဖံးစုၣ်ဂီၤလၢဒဲအဂီၢ်,ဒီးတၢ်ကျၢၢ်ဘၢလၢအဖီခိၣ်လၢတၢ်ဖံးလီၤ.

20ဒီးမၤဝဲလၢသ့ၣ်ဘ့ၣ်ဘၣ်လၢသ့ၣ်ဖှ့ၡံးတၤ,အိၣ်ဆၢထၢၣ်အသးလၢတၢ်အိၣ်အလီၢ်အဂီၢ်န့ၣ်လီၤ. 21သ့ၣ်ဘ့ၣ်ဘၣ်တဘ့ၣ်န့ၣ်အထီအပျၢ်တဆံ,ဒီးအဒီၣ်ဃီၤတပျၢ်ဒီးတထါလီၤ.

22သ့ၣ်ဘ့ၣ်ဘၣ်တဘ့ၣ်အိၣ်ဒီးအစုခံခီသဃိၤလိာ်အသးလီၤ.မၤတၢ်အိၣ်အလီၢ်အသ့ၣ်ဘ့ၣ်ဘၣ်ဒ်န့ၣ်အသိးခဲလၢာ်လီၤ.

23ဒီးမၤဝဲလၢသ့ၣ်ဘ့ၣ်ဘၣ်အဘ့ၣ်ခံဆံလၢတၢ်အိၣ်အလီၢ်အဂီၢ်လၢကလံၤထံးတခီလီၤ.

24ဒီးလၢသ့ၣ်ဘ့ၣ်ဘၣ်အဘ့ၣ်ခံဆံအဖီလာ်န့ၣ်တ့ဝဲလၢအခီၣ်စ့အဖျၢၣ်လွံၢ်ဆံလီၤ.အခီၣ်ခံဖျၢၣ်လၢသ့ၣ်ဘ့ၣ်ဘၣ်တဘ့ၣ်အဖီလာ်လၢအစုခံခီအဂီၢ်,ဒီးအခီၣ်ခံဖျၢၣ်လၢသ့ၣ်ဘ့ၣ်ဘၣ်တဘ့ၣ်ဒၣ်လၢအစုခံခီအဂီၢ်လီၤ.

25ဒီးတၢ်အိၣ်အလီၢ်အကပၤခံခီတခီလၢကလံၤစိးန့ၣ်,မၤဝဲလၢသ့ၣ်ဘ့ၣ်ဘၣ်အဘ့ၣ်ခံဆံ, 26ဒီးအခီၣ်စ့အဖျၢၣ်လွံၢ်ဆံလီၤ.သ့ၣ်ဘ့ၣ်ဘၣ်တဘ့ၣ်အိၣ်ဒီးအခီၣ်စ့ခံဖျၢၣ်လၢအဖီလာ်,သ့ၣ်ဘ့ၣ်ဘၣ်တဘ့ၣ်ဒၣ်အိၣ်ဒီးအခီၣ်စ့ခံဖျၢၣ်လၢအဖီလာ်လီၤ.

27ဒီးမၤဝဲလၢသ့ၣ်ဘ့ၣ်ဘၣ်ဃုဘ့ၣ်လၢတၢ်အိၣ်အလီၢ်အကပၤလၢမုၢ်နုာ်တခီအဂီၢ်လီၤ. 28ဒီးမၤဝဲလၢသ့ၣ်ဘ့ၣ်ဘၣ်ခံဘ့ၣ်လၢတၢ်အိၣ်အလီၢ်အသနၢၣ်တဖၣ်လၢအကပၤခံခီလီၤ. 29ဒီးအိၣ်သဃံာ်လၢအဖီလာ်,ဒီးအိၣ်သဃံာ်လၢအခိၣ်အဖီခိၣ်ဆူကွီၤတကွီၤဃီလီၤ.မၤဝဲလၢခံဘ့ၣ်လိာ်ဒ်န့ၣ်လၢခံသနၢၣ်အဂီၢ်လီၤ. 30ဒီးသ့ၣ်ဘ့ၣ်ဘၣ်ဃိးဘ့ၣ်,ဒီးအခီၣ်စ့တဆံဃုဖျၢၣ်အိၣ်ဝဲလီၤ.သ့ၣ်ဘ့ၣ်ဘၣ်တဘ့ၣ်အိၣ်ဒီးအခီၣ်ခံဖျၢၣ်လၢအဖီလာ်,သ့ၣ်ဘ့ၣ်ဘၣ်တဘ့ၣ်အိၣ်ဒီးအခီၣ်ခံဖျၢၣ်လၢအဖီလာ်လီၤ.

31ဒီးမၤဝဲလၢနီၣ်ဘိလၢသ့ၣ်ဖှ့ၡံးတၤလီၤ.ယဲၢ်ဘိလၢသ့ၣ်ဘ့ၣ်ဘၣ်လၢတၢ်အိၣ်အလီၢ်တခီအဂီၢ်, 32ဒီးနီၣ်ဘိယဲၢ်ဘိလၢသ့ၣ်ဘ့ၣ်ဘၣ်လၢတၢ်အိၣ်အလီၢ်တခီဒၣ်အဂီၢ်,ဒီးနီၣ်ဘိယဲၢ်ဘိလၢသ့ၣ်ဘ့ၣ်ဘၣ်လၢတၢ်အိၣ်အလီၢ်အကပၤလၢမုၢ်နုာ်တခီအဂီၢ်လီၤ.

33ဒီးနီၣ်ဘိအသးကံၢ်ပူၤလၢသ့ၣ်ဘ့ၣ်ဘၣ်အသးကံၢ်ပူၤတဘိန့ၣ်မၢအတုၤလၢအကတၢၢ်တခီပၢၢ်လၢအကတၢၢ်တခီလီၤ.

34ဒီးပီၤသ့ၣ်ဘ့ၣ်ဘၣ်ဒီးထူ,ဒီးတ့အကွီၤတဖၣ်လၢထူ,လၢနီၣ်ဘိအလီၢ်အဂီၢ်,ဒီးပီၤနီၣ်ဘိဒီးထူလီၤ.

35ဒီးမၤဝဲလၢယၣ်ဘျးထီၣ်အသးလၢတၢ်လါ,ဒီးတၢ်လုးတကုာ်,ဒီးတၢ်ဂီၤ,ဒီးဖှီဝါကဆှၣ်အလုၣ်လ့ၢ်ဃံၤအသးလီၤ.မၤအီၤအိၣ်ဒီးခ့ရူာ်တဖၣ်လၢပှၤမၤတၢ်သ့အတၢ်မၤလီၤ.

36ဒီးမၤဝဲလၢသ့ၣ်ဖှ့ၡံးတၤအထူၣ်လွံၢ်ထူၣ်,ဒီးပီၤအီၤဒီးထူလီၤ.ဒီးအနီၣ်ကွးတဖၣ်န့ၣ်မ့ၢ်ထူ,ဒီးသိဝဲအခီၣ်စ့လွံၢ်ဖျၢၣ်လၢအဂီၢ်လီၤ.

37ဒီးလၢဒဲအကျဲစၢၤအဂီၢ်န့ၣ်,မၤဝဲလၢနီၣ်ကျၢၢ်ဘၢတၢ်တဘ့ၣ်လၢတၢ်လါ,ဒီးလၢတၢ်လုးတကုာ်,ဒီးလၢတၢ်ဂီၤ,ဒီးလၢဖှီဝါကဆှၣ်ကံၣ်ဃ့အလုၣ်လ့ၢ်ဃံၤအသးန့ၣ်, 38ဒီးအထူၣ်ယဲၢ်ထူၣ်,ဒီးအနီၣ်ကွးတဖၣ်လီၤ.ဒီးပီၤအထူၣ်အခိၣ်တဖၣ်,ဒီးအနီၣ်စဲဘူးလိာ်အသးတဖၣ်န့ၣ်ဒီးထူလီၤ.မ့မ့ၢ်အခီၣ်ယဲၢ်ဖျၢၣ်မ့ၢ်တိၢ်လီၤ.