Exodus 37
1ဒီးစီၤဘစၤလအ့လးန့ၣ်မၤတလါန့ၣ်လၢသ့ၣ်ဖှ့ၡံးတၤလီၤ.အထီခံပျၢ်ဒီးတထါ,ဒီးအဒီၣ်ဃီၤတပျၢ်ဒီးတထါ,ဒီးအကစီၤထီၣ်တပျၢ်ဒီးတထါလီၤ. 2ဒီးလၢခိမ့ၢ်ဂ့ၤ,လၢညါမ့ၢ်ဂ့ၤပီၤအီၤဒီးထူစီလီၤ.ဒီးမၤခိၣ်ကျီၤထူဝးတရံးလၢအဖီခိၣ်လီၤ. 3ဒီးသိအကွီၤထူလွံၢ်ကွီၤလၢအဂီၢ်,ဒီးပာ်အီၤလၢအသနၢၣ်လွံၢ်နၢၣ်,ဒီးကွီၤခံကွီၤအိၣ်လၢတခီ,ဒီးကွီၤခံကွီၤအိၣ်လၢတခီဒၣ်လီၤ. 4ဒီးမၤနီၣ်ယိးဘိတဖၣ်လၢသ့ၣ်ဖှ့ၡံးတၤ,ဒီးပီၤအီၤဒီးထူလီၤ. 5ဒီးဒၢနုာ်နီၣ်ယိးဘိတဖၣ်လၢကွီၤအပူၤလၢတလါအကပၤ,ဒ်သိးပှၤကယိးတလါလၢအီၤလီၤ. 6ဒီးမၤတၢ်မၤပူၤဖျဲးအလီၢ်လၢထူစီလီၤ.အထီခံပျၢ်ဒီးတထါ,ဒီးအဒီၣ်ဃီၤတပျၢ်ဒီးတထါလီၤ. 7ဒီးတ့ခ့ရူာ်ထူခံဂၤလီၤ.ပိာ်န့ၢ်အီၤဖဲတၢ်မၤပူၤဖျဲးအလီၢ်အစိးနါခံခီလီၤ. 8တ့ခ့ရူာ်တဂၤလၢအစိးနါအဝဲတခီ,ခ့ရူာ်တဂၤလၢအစိးနါလၢအဝဲတခီလီၤ.တ့ခ့ရူာ်တဖၣ်လၢတၢ်တလိၣ်ဃီဒီးတၢ်မၤပူၤဖျဲးအလီၢ်ဖဲအစိးနါခံခီလီၤ. 9ဒီးခ့ရူာ်တဖၣ်အိၣ်ဒီးအဒံးဆ့ယူာ်ထီၣ်အသး,အဒံးဆ့ကျၢၢ်ဘၢတၢ်မၤပူၤဖျဲးအလီၢ်,ဒီးအမဲာ်ကွၢ်လိာ်အသးလီၤ.ခ့ရူာ်တဖၣ်အမဲာ်အိၣ်ဆူတၢ်မၤပူၤဖျဲးအလီၢ်လီၤ. 10မၤစ့ၢ်ကီးစီၢ်နီၤခိၣ်န့ၣ်လၢသ့ၣ်ဖှ့ၡံးတၤလီၤ.အထီခံပျၢ်,ဒီးအဒီၣ်ဃီၤတပျၢ်,ဒီးအကစီၤထီၣ်တပျၢ်ဒီးတထါလီၤ. 11ဒီးပီၤအီၤဒီးထူစီ,ဒီးမၤအခိၣ်ကျီၤထူဝးတရံးအီၤလီၤ. 12ဒီးမၤသကျီၤအလဲၢ်တဖံးဝးတရံး,ဒီးမၤခိၣ်ကျီၤထူလၢသကျီၤအဖီခိၣ်,ဝးတရံးဝဲလီၤ. 13ဒီးသိကွီၤထူလွံၢ်ကွီၤလၢအဂီၢ်,ဒီးပာ်ကွီၤလၢအသနၢၣ်လွံၢ်သနၢၣ်လၢအအိၣ်လၢအခီၣ်လွံၢ်ခီအလိၤလီၤ. 14ကွီၤတဖၣ်န့ၣ်အိၣ်သဃီၤဒီးသကျီၤလၢနီၣ်ယိးဘိအလီၢ်,လၢပှၤကယိးထီၣ်စီၢ်နီၤခိၣ်န့ၣ်အဂီၢ်လီၤ. 15ဒီးမၤနီၣ်ယိးဘိလၢသ့ၣ်ဖှ့ၡံးတၤ,ဒီးပီၤအီၤဒီးထူ,ဒ်သိးပှၤကစိာ်ထီၣ်စီၢ်နီၤခိၣ်လၢအီၤလီၤ. 16ဒီးတ့လီခီလၢအအိၣ်လၢစီၢ်နီၤခိၣ်အလိၤ,အလီခီဘ့ၣ်ဘၣ်တဖၣ်,ဒီးအနီၣ်တၢၤတဖၣ်,ဒီးအသလၢတဖၣ်ဒီးအကိလၢပှၤလူလီၤတၢ်လၢအီၤတဖၣ်န့ၣ်လၢထူစီလီၤ. 17ဒီးတ့မ့ၣ်အူဒၢမိၢ်ပှၢ်လၢထူစီလီၤ.မ့ၢ်အူဒၢမိၢ်ပှၢ်န့ၣ်ဘၣ်ပိာ်န့ၢ်လီၤ.အဘိ,ဒီးအဒ့တဖၣ်,အခိၣ်မီၣ်တဖၣ်,အကမိာ်တဖၣ်,အဖီတဖၣ်န့ၣ်မ့ၢ်တၢ်တလိၣ်ဃီဒီးအီၤလီၤ. 18ဒီးအဒ့ဃုဒ့ဟဲထီၣ်လၢအကပၤတဖၣ်န့ၣ်လီၤ.မ့ၣ်အူဒၢမိၢ်ပှၢ်အဒ့သၢဒ့လၢအဝဲတခီ,ဒီးမ့ၣ်အူဒၢမိၢ်ပှၢ်အဒ့သၢဒ့လၢအဝဲတခီလီၤ. 19အခိၣ်မီၣ်လီၤဂာ်ၡၤကးသၣ်သၢဖျၢၣ်,အကမိာ်တဖျၢၣ်,ဒီးဖီတဖိးအိၣ်လၢအဝဲတဒ့,ဒီးအခိၣ်မီာ်လီၤဂာ်ၡၤကးသၣ်သၢဖျၢၣ်,အကမိာ်တဖျၢၣ်,ဒီးဖီတဖိးအိၣ်လၢအဝဲတဒ့လီၤ.ဒ်န့ၣ်အသိးလၢဒ့ဃုဒ့လၢအဟဲထီၣ်လၢမ့ၣ်အူဒၢမိၢ်ပှၢ်လီၤ. 20ဒီးမ့ၣ်အူဒၢမိၢ်ပှၢ်န့ၣ်အိၣ်ဒီးအခိၣ်မီၣ်လီၤဂာ်ၡၤကးသၣ်လွံၢ်ဖျၢၣ်,အကမိာ်တဖၣ်,ဒီးအဖီတဖၣ်လီၤ. 21ဒီးအကမိာ်တဖျၢၣ်အိၣ်လၢဒ့ခံဒ့အဖီလာ်လၢတၢ်တလိၣ်ဃီဒီးအကမိာ်တဖျၢၣ်အိၣ်လၢဒ့ခံဒ့အဖီလာ်လၢတၢ်တလိၣ်ဃီ,ဒီးအကမိာ်တဖျၢၣ်အိၣ်လၢဒ့ခံဒ့အဖီလာ်လၢတၢ်တလိၣ်ဃီ,ဒ်အဒ့ဃုဒ့လၢအဟဲထီၣ်လၢမ့ၣ်အူဒၢမိၢ်ပှၢ်အလိၤအသိးန့ၣ်လီၤ. 22အကမိာ်တဖၣ်,ဒီးအဒ့တဖၣ်မ့ၢ်တၢ်တလိၣ်ဃီလီၤ.အတၢ်ခဲလၢာ်မ့ၢ်တၢ်ပိာ်န့ၢ်တလိၣ်ဃီလၢထူစီလီၤ. 23ဒီးတ့အမ့ၣ်အူဒၢနွံဖျၢၣ်,ဒီးအနီၣ်တံာ်မ့ၣ်အူ,ဒီးအနီၣ်တံာ်အလီခီတဖၣ်လၢထူစီလီၤ. 24ဒီးတ့အီၤဒီးအတၢ်ဖိတၢ်လံၤတဖၣ်ခဲလၢာ်န့ၣ်လၢထူစီလီၤတယၢၢ်တကံကၢ်လီၤ. 25ဒီးမၤတၢ်လုၢ်လီၢ်ဆိၣ်ကဲၤတၢ်နၢမူလၢသ့ၣ်ဖှ့ၡံးတၤလီၤ.အထီတပျၢ်,ဒီးအဒီၣ်ဃီၤတပျၢ်,အိၣ်ဒီးအနၢၣ်လွံၢ်နၢၣ်ဒ်သိးသိးလီၤ.ဒီးအကစီၤထီၣ်ခံပျၢ်လီၤ.ဒီးအနၢၣ်တဖၣ်မၤအသးလၢတၢ်တလိၣ်ဃီလီၤ. 26ဒီးပီၤအီၤဒီးထူစီလၢအဖီခိၣ်,ဒီးလၢအကပၤဝးတရံးအီၤ,ဒီးအနၢၤတဖၣ်န့ၣ်လီၤ.ဒီးတ့အခိၣ်ကျီၤထူဝးတရံးအီၤလီၤ. 27ဒီးတ့အကွီၤထူခံကွီၤလၢအဂီၢ်,လၢအခိၣ်ကျီၤအဖီလာ်လၢအနၢၣ်ခံနၢၣ်အဃၢၤလၢအကပၤခံခီအလိၤလီၤ.မ့ၢ်အလီၢ်လၢနီၣ်ယိးဘိအဂီၢ်ဒ်သိးပှၤကယိးထီၣ်ဝဲလၢအီၤလီၤ. 28ဒီးမၤအနီၣ်ယိးဘိလၢသ့ၣ်ဖှ့ၡံးတၤ,ဒီးပီၤအီၤလၢထူလီၤ. 29ဒီးမၤဝဲလၢသိဖှူစီဆှံ,ဒီးတၢ်ဆိၣ်ကဲၤနၢမူစီထံလၢတၢ်နၢမူဒ်ပှၤတိၢ်မၤဃါဃုာ်တၢ်နၢမူဖိမၤဝဲအသိးန့ၣ်လီၤ.
Copyright information for
KswSKMB