Exodus 38
1ဒီးမၤဝဲလၢတၢ်လုၢ်လီၢ်မ့ၣ်အူလၢသ့ၣ်ဖှ့ၡံးတၤ,အထီယဲၢ်ပျၢ်,ဒီးအဒီၣ်ဃီၤယဲၢ်ပျၢ်လီၤ.တၢ်လုၢ်လီၢ်န့ၣ်မ့ၢ်တၢ်လွံၢ်နၢၣ်ဒ်သိးသိး,ဒီးအကစီၤထီၣ်သၢပျၢ်လီၤ. 2ဒီးမၤအနၢၤတဖၣ်လၢအနၢၣ်လွံၢ်နၢၣ်အဖီခိၣ်လၢတၢ်တလိၣ်ဃီလီၤ.ဒီးပီၤအီၤဒီးတိၢ်လီၤ. 3ဒီးတ့တၢ်လုၢ်လီၢ်အတၢ်ဖိတၢ်လံၤခဲလၢာ်,အသပၢၤတဖၣ်,ဒီးအတပူာ်တဖၣ်,ဒီးအသလၢဖှံတၢ်တဖၣ်,ဒီးအနီၣ်ကွးတဖၣ်,ဒီးအသပၢၤမ့ၣ်အူတဖၣ်လီၤ.တ့အတၢ်ဖိတၢ်လံၤလၢတိၢ်ခဲလၢာ်လီၤ. 4ဒီးတ့ဖၣ်ကပူၤလၢတိၢ်ဒ်ပထ့ပှာ်ဧိၤစၤဧိၤအသိးလၢတၢ်ဝးတရံးတၢ်လုၢ်လီၢ်အဖီလာ်,ဒီးဃူဝဲဒီးတၢ်လုၢ်လီၢ်အဖးဖီလၢတၢ်လုၢ်လီၢ်အဂီၢ်လီၤ. 5ဒီးတ့အကွီၤတိၢ်လွံၢ်ကွီၤလၢဖၣ်ကပူၤတိၢ်လွံၢ်နၢၣ်အဂီၢ်လၢနီၣ်ယိးဘိတဖၣ်အလီၢ်အဂီၢ်လီၤ. 6ဒီးမၤနီၣ်ယိးဘိတဖၣ်လၢသ့ၣ်ဖှ့ၡံးတၤ,ဒီးပီၤအီၤဒီးတိၢ်လီၤ. 7ဒီးဒၢနုာ်နီၣ်ယိးဘိတဖၣ်လၢအကွီၤတဖၣ်အပူၤ,ဒ်သိးပှၤကယိးထီၣ်ဝဲဒီးအီၤလီၤ.မၤတၢ်လုၢ်လီၢ်လၢသ့ၣ်ဘ့ၣ်ဘၣ်အိၣ်ဒီးအအိပူၤလီၤ. 8ဒီးတ့သရာ်တဖျၢၣ်လၢတိၢ်,ဒီးအခီၣ်လၢတိၢ်,လၢပိာ်မုၣ်လၢအအိၣ်ဖှိၣ်,လၢအအိၣ်ဖှိၣ်လၢတၢ်အိၣ်ဖှိၣ်အဒဲအကျဲစၢၤတဖၣ်,အမဲာ်ထံကလၤတိၢ်န့ၣ်လီၤ. 9ဒီးမၤတၢ်အိၣ်အလီၢ်အဂၢၤလီၤ.လၢအကပၤပှၤလၢကလံၤထံးတခီန့ၣ်ယၣ်လီၤစဲၤလၢဂၢၤအဂီၢ်မၤဝဲလၢဖှီဝါကဆှၣ်,အလုၣ်လ့ၢ်ဃံၤအသးအထီအပျၢ်တကယၤ, 10ဒီးအထူၣ်အကျီၣ်ခံဆံ,ဒီးအခီၣ်ခံဆံလၢတိၢ်လီၤ.ဒီးထူၣ်အနီၣ်ကွးတဖၣ်,ဒီးအနီၣ်စဲဘူးလိာ်အသးတဖၣ်မ့ၢ်စ့လီၤ. 11ဒီးလၢအကပၤလၢကလံၤစိးတခီအဂီၢ်,ယၣ်လီၤစဲၤအထီအပျၢ်တကယၤ,ဒီးအထူၣ်အကျီၣ်ခံဆံ,ဒီးအခီၣ်တိၢ်ခံဆံန့ၣ်အိၣ်ဝဲလီၤ.အထူၣ်တဖၣ်အနီၣ်ကွးတဖၣ်ဒီးအနီၣ်စဲဘူးလိာ်အသးတဖၣ်န့ၣ်,မ့ၢ်စ့လီၤ. 12ဒီးယၣ်လီၤစဲၤအထီအပျၢ်ယဲၢ်ဆံအိၣ်ဝဲလၢဂၢၤလၢမုၢ်နုာ်တခီအဂီၢ်လီၤ.အထူၣ်ဆံဆဲၣ်ကျီၣ်ဒီးအခီၣ်ဆံဆဲၣ်ဖျၢၣ်အိၣ်ဝဲလီၤ.အထူၣ်အနီၣ်ကွးတဖၣ်,ဒီးအနီၣ်စဲဘူးလိာ်အသးတဖၣ်မ့ၢ်စ့လီၤ. 13ဒီးဂၢၤလၢအကပၤလၢမုၢ်ထီၣ်ဆူမုၢ်ထီၣ်တခီန့ၣ်အပျၢ်ယဲၢ်ဆံ, 14ဒီးယၣ်လီၤစဲၤလၢကျဲစၢၤတခီန့ၣ်အထီတဆံယဲၢ်ပျၢ်,အထူၣ်သၢကျီၣ်,ဒီးအခီၣ်သၢဖျၢၣ်အိၣ်ဝဲလီၤ. 15ဒီးလၢဂၢၤအကျဲစၢၤလၢအကပၤတခီဒၣ်,ယၣ်လီၤစဲၤလၢအံၤတခီဒီးလၢန့ၣ်တခီအထီတဆံယဲၢ်ပျၢ်,အထူၣ်သၢကျီၣ်,ဒီးအခီၣ်သၢဖျၢၣ်အိၣ်ဝဲလီၤ. 16ဒီးကယဲၢ်အဂၢၤအယၣ်လီၤစဲၤဝးတရံးန့ၣ်မ့ၢ်ဖှီဝါကဆှၣ်အလုၣ်လ့ၢ်ဃံၤအသးခဲလၢာ်လီၤ. 17ဒီးထူၣ်အခီၣ်တဖၣ်န့ၣ်မ့ၢ်တိၢ်,ဒီးထူၣ်အနီၣ်ကွးတဖၣ်ဒီးနီၣ်စဲဘူးလိာ်အသးတဖၣ်န့ၣ်မ့ၢ်စ့,ဒီးအခိၣ်ပီၤအသးလၢစ့,ဒီးဂၢၤအထူၣ်ခဲလၢာ်အိၣ်ဒီးနီၣ်စဲဘူးလိာ်အသးလၢစ့လီၤ. 18ဒီးယၣ်လီၤစဲၤလၢဂၢၤအကျဲစၢၤအဂီၢ်,မ့ၢ်တၢ်ကံၣ်ဃ့လၢတၢ်လါ,ဒီးတၢ်လုးတကုာ်,ဒီးတၢ်ဂီၤ,ဒီးဖှီဝါကဆှၣ်အလုၣ်လ့ၢ်ဃံၤအသးလီၤ.အထီမ့ၢ်အပျၢ်ခံဆံ,ဒီးအဒီၣ်ဃီၤယဲၢ်ပျၢ်,ဒ်ဂၢၤအယၣ်လီၤစဲၤအသိးန့ၣ်လီၤ. 19ဒီးအထူၣ်မ့ၢ်လွံၢ်ထူၣ်,ဒီးအခီၣ်တိၢ်လွံၢ်ဖျၢၣ်လၢတိၢ်,ဒီးအနီၣ်ကွးလၢစ့,ဒီးတၢ်ပီၤအခိၣ်တဖၣ်ဒီးအနီၣ်စဲဘူးလိာ်အသးတဖၣ်န့ၣ်လၢစ့လီၤ. 20ဒီးကယဲၢ်တၢ်အိၣ်အလီၢ်,ဒီးဂၢၤအိၣ်ဝးတရံးအတၢ်ကမိာ်ခံတဖၣ်န့ၣ်မ့ၢ်လၢတိၢ်ခဲလၢာ်လီၤ. 21ဒီးအအံၤမ့ၢ်စရီဘၣ်ဃးဒီးတၢ်အိၣ်အလီၢ်,တၢ်အုၣ်အသးအတၢ်အိၣ်အလီၢ်,ဒ်အဘၣ်တၢ်ဂံၢ်အသးလၢပှၤလုၢ်တၢ်အဒိၣ်စီၤအၤဟရိၣ်အဖိခွါစီၤအံသမၢ်အစုပူၤအသိးန့ၣ်,ဒ်စီၤမိၤရှ့အတၢ်မၤလိာ်,လၢပှၤလ့ၤဝံဖိအတၢ်မၤအဂီၢ်အသိးန့ၣ်လီၤ. 22ဒီးပှၤယူဒၤအဒူၣ်ဖိစီၤဃူၢ်အဖိခွါ,စီၤအူရံၤအဖိခွါ,စီၤဘစၤလအ့လးတဂၤမၤကယဲၢ်တၢ်လၢယွၤမၤလိာ်စီၤမိၤရှ့န့ၣ်လီၤ. 23ဒီးအိၣ်ဒီးအီၤမ့ၢ်ပှၤဒၣ်အဒူၣ်ဖိစီၤအဃံစမးအဖိခွါစီၤအၤဟလံအာ်,ပှၤကွဲးတၢ်ဖိ,ဒီးပှၤကူၣ်တၢ်ဘၣ်,ဒီးပှၤလၢအမၤကံၣ်ဃ့တၢ်လၢတၢ်လုးတကုာ်,ဒီးတၢ်ဂီၤ,ဒီးဖှီဝါကဆှၣ်လီၤ. 24ဒီးကယဲၢ်ထူလၢအလၢာ်လၢတၢ်မၤဘၣ်ဃးဒီးအလီၢ်စီဆှံအတၢ်မၤခဲလၢာ်အထူလၢတၢ်မၤဘူၣ်န့ၣ်မ့ၢ်ခံဆံခွံကံကၢ်ဒီးၡက့လးနွံကယၤသၢဆံ,ဒ်ၡက့လးဘၣ်ဃးဒီးအလီၢ်စီဆှံအသိးန့ၣ်လီၤ. 25ဒီးပှၤလၢအဘၣ်တၢ်ဂံၢ်အီၤဘၣ်ဃးဒီးတၢ်အိၣ်ဖှိၣ်တဖၣ်အစ့န့ၣ်,မ့ၢ်ကံကၢ်တကယၤဒီးတကထိနွံကယၤနွံဆံယဲၢ်ၡက့လး,ဒ်ၡက့လးဘၣ်ဃးဒီးအလီၢ်စီဆှံအသိးန့ၣ်လီၤ. 26တဂၤတဘ့ကၤ,တဂၤတဘ့ကၤ,ဒ်ပစံးတၢ်အသိး,တခီၡက့လးဒ်ၡက့လးဘၣ်ဃးဒီးအလီၢ်စီဆှံအသိးလၢကယဲၢ်ပှၤလၢအလဲၤဒီးတၢ်ဂံၢ်အီၤလၢအသးပှၢ်အနံၣ်ခံဆံဒီးဆူအဖီခိၣ်န့ၣ်အဂီၢ်,လၢပှၤဃုကကလီၤဒီးသၢကထိဒီးယဲၢ်ကယၤဒီးယဲၢ်ဆံအဂီၢ်လီၤ. 27ဒီးပှၤသိတၢ်အလီၢ်စီဆှံအခီၣ်,ဒီးယၣ်ဘျးထီၣ်အသးလၢအခီၣ်လၢစ့ကံကၢ်တကယၤလီၤ.တဖျၢၣ်တကံကၢ်,တဖျၢၣ်တကံကၢ်,အခီၣ်တကယၤန့ၣ်ကံကၢ်တကယၤလီၤ. 28ဒီးတ့နီၣ်ကွးလၢထူၣ်အဂီၢ်,ဒီးပီၤအခိၣ်,ဒီးတ့နီၣ်စဲဘူးလိာ်အသးန့ၣ်လၢစ့တကထိနွံကယၤနွံဆံယဲၢ်ၡက့လးလီၤ. 29ဒီးတိၢ်လၢအဘၣ်တၢ်မၤဘူၣ်အီၤန့ၣ်,မ့ၢ်ကံကၢ်နွံဆံဒီးၡက့လးခံကထိလွံၢ်ကယၤလီၤ. 30ဒီးလၢတၢ်န့ၣ်တ့ဝဲလၢတၢ်အိၣ်ဖှိၣ်အဒဲအကျဲစၢၤအခီၣ်တဖၣ်,တၢ်လုၢ်အလီၢ်တိၢ်,အဖၣ်ကပူၤတိၢ်ထ့အသးဒ်စၤအသိး,ဒီးကယဲၢ်တၢ်လုၢ်လီၢ်အတၢ်ဖိတၢ်လံၤ, 31ဒီးတၢ်ဂၢၤဝးတရံးအခီၣ်တဖၣ်,ဒီးတၢ်ဂၢၤအကျဲစၢၤအခီၣ်ထူၣ်,ဒီးကယဲၢ်တၢ်ကမိာ်ခံဘၣ်ဃးဒီးတၢ်အိၣ်အလီၢ်,ဒီးတၢ်ဂၢၤဝးတရံးခဲလၢာ်လီၤ.
Copyright information for
KswSKMB