‏ Exodus 39

1ဒီးလၢလါ,ဒီးတၢ်လုးတကုာ်,ဒီးတၢ်ဂီၤန့ၣ်အဝဲသ့ၣ်မၤတၢ်အခ့အပှၤအတၢ်မၤအကူအသိး,ဒ်သိးအကမၤတၢ်လၢအလီၢ်စီဆှံအပူၤ,ဒီးမၤအကူအသိးစီဆှံလၢစီၤအၤဟရိၣ်အဂီၢ်,ဒ်ယွၤမၤလိာ်စီၤမိၤရှ့အသိးန့ၣ်လီၤ. 2ဒီးမၤအ့ဖိးလၢထူ,ဒီးတၢ်လါ,ဒီးတၢ်လုးတကုာ်,ဒီးတၢ်ဂီၤ,ဒီးဖှီဝါကဆှၣ်အလုၣ်လ့ၢ်ဃံၤအသးလီၤ.

3ဒီးပိာ်ထူတုၤအကဲထီၣ်အဘ့ၣ်ဘၣ်ဘူသလါ,ဒီးတံာ်ကဲထီၣ်အီၤလၢလုၣ်,ဒီးဒၢနုာ်ဝဲလၢတၢ်လါ,ဒီးတၢ်လုးတကုာ်,ဒီးတၢ်ဂီၤ,ဒီးဖှီဝါကဆှၣ်,ပှၤမၤတၢ်သ့အတၢ်မၤလီၤ. 4ဒီးမၤဝဲလၢအဖံဘၣ်ခိၣ်တဖၣ်ဒ်သိးအကမၤစဲဘူးလိာ်အသးလီၤ.ဖဲအကနူၤခံခီစဲဘူးလိာ်အသးလီၤ.

5ဒီးအ့ဖိးအယီၢ်တကိးကံၣ်ဃ့လၢအအိၣ်လၢအဖီခိၣ်မၤအသးလၢတၢ်တဘ့ၣ်ဃီ,ဒ်အတၢ်မၤအသိးလၢထူ,ဒီးတၢ်လါ,ဒီးတၢ်လုးတကုာ်,ဒီးတၢ်ဂီၤ,ဒီးဖှီဝါကဆှၣ်အလုၣ်လ့ၢ်ဃံၤအသး,ဒ်ယွၤမၤလိာ်စီၤမိၤရှ့အသိးန့ၣ်လီၤ.

6ဒီးမၤဝဲလၢတၢ်မျၢ်မဟူယၤ,အိၣ်ဝးတရံးဝဲဒီးအမဲာ်ထူ,ဒီးကွဲးအီၤဒီးပှၤအံၣ်စရ့လးဖိအမံၤဒ်တၢ်စဲပနီၣ်ဃာ်အသိးလီၤ. 7ဒီးပာ်ဝဲလၢအ့ဖိးအဖံဘၣ်ခိၣ်,လၢၢ်တၢ်သ့ၣ်နီၣ်ထီၣ်က့ၤတၢ်လၢပှၤအံၣ်စရ့လးဖိအဂီၢ်,ဒ်ယွၤမၤလိာ်စီၤမိၤရှ့အသိးန့ၣ်လီၤ.

8ဒီးမၤတၢ်စံၣ်ညီၣ်အသဃိးလၢပှၤမၤတၢ်သ့အတၢ်မၤဒ်အ့ဖိးအတၢ်မၤအသိးန့ၣ်,မၤဝဲလၢထူ,လၢတၢ်လါ,လၢတၢ်လုးတကုာ်,ဒီးလၢတၢ်ဂီၤ,ဒီးလၢဖှီဝါကဆှၣ်အလုၣ်လ့ၢ်ဃံၤအသးန့ၣ်လီၤ. 9မၤချံးအီၤလၢအဖးဖီ,ဒီးမ့ၢ်တၢ်လွံၢ်နၢၣ်ဒ်သိးသိးလီၤ.အထီတထါ,ဒီးအဒီၣ်ဃီၤတထါချံးအသးလီၤ. 10ဒီးမၤပှဲၤအီၤဒီးလၢၢ်အဂ့ၢ်လွံၢ်ဂ့ၢ်လီၤ.တၢ်မျၢ်ဆီသွံၣ်တဖျၢၣ်,တၢ်မျၢ်ဘီအူးသပၤယၣ်တဖျၢၣ်,ဒီးတၢ်မျၢ်ဟ့မၠးတဖျၢၣ်န့ၣ်မ့ၢ်အခီၣ်ထံးတဂ့ၢ်လီၤ.

11ဒီးခံဂ့ၢ်တဂ့ၢ်န့ၣ်မ့ၢ်တၢ်မျၢ်ဂီၤတဖျၢၣ်,တၢ်မျၢ်နံၤလါတဖျၢၣ်,ဒီးတၢ်မျၢ်မဟူယၤတိၤအသးတဖျၢၣ်လီၤ.

12ဒီးသၢဂ့ၢ်တဂ့ၢ်န့ၣ်မ့ၢ်တၢ်မျၢ်ဂီၤဘီတဖျၢၣ်,တၢ်မျၢ်မဟူယၤကံၣ်ဃ့တဖျၢၣ်,ဒီးတၢ်မျၢ်သကီၤဖီတဖျၢၣ်လီၤ.

13ဒီးလွံၢ်ဂ့ၢ်တဂ့ၢ်န့ၣ်မ့ၢ်တၢ်မျၢ်ဟ့ဘီတဖျၢၣ်,ဒီးတၢ်မျၢ်မဟူယၤတဖျၢၣ်,ဒီးတၢ်မျၢ်နကၤသွဲးတဖျၢၣ်လီၤ.အိၣ်ဝးတရံးဝဲဒီးအမဲာ်ထူလၢတၢ်မျၢ်အလီၢ်အပူၤလီၤ.

14ဒီးလၢၢ်တဖၣ်န့ၣ်ဘၣ်အိၣ်ဒီးပှၤအံၣ်စရ့လးဖိအမံၤ,တဆံခံမံၤဒ်အမံၤအသိးန့ၣ်,တၢ်စဲပနီၣ်ဃာ်အတၢ်ကွဲးန့ၣ်လီၤ.တဂၤဒီးအမံၤဒၣ်ဝဲ,ဒ်ပှၤတဆံခံဒူၣ်အသိးန့ၣ်လီၤ.

15ဒီးတ့သွဲထူစီထ့အသးလၢသဃိးအစိးနါလီၤ. 16ဒီးတ့တၢ်မျၢ်အလီၢ်အမဲာ်ထူခံဖျၢၣ်,ဒီးကွီၤထူခံကွီၤလၢသဃိးအလိၤ,ဒီးပာ်ကွီၤခံကွီၤန့ၣ်လၢသဃိးအစိးနါခံခီလီၤ. 17ဒီးဒၢနုာ်သွဲထူထ့အသးခံဘိလၢကွီၤခံကွီၤအိၣ်လၢသဃိးအစိးနါတဖၣ်လီၤ. 18ဒီးသွဲထ့အသးအစိၤနါခံခီန့ၣ်စၢဃာ်ဒီးတၢ်မျၢ်အလီၢ်အမဲာ်,ဒီးပာ်အီၤလၢအ့ဖိးအဖံဘၣ်ခိၣ်လၢအမဲာ်ညါတခီလီၤ.

19ဒီးတ့ကွီၤထူခံကွီၤ,ဒီးပာ်အီၤလၢသဃိးအစိးနါခံခီလၢအကနူၤဆူအ့ဖိးအညါပူၤလီၤ.

20ဒီးတ့ကွီၤထူခံကွီၤ,ဒီးပာ်အီၤလၢအ့ဖိးအဖံဘၣ်ခိၣ်ခံခီလၢအဖီလာ်ဆူအမဲာ်ညါတခီသဃီၤဒီးတၢ်စဲဘူးလိာ်အသး,လၢအ့ဖိး,အယီၢ်တကိးကံၣ်ဃ့အဖီခိၣ်လီၤ.

21ဒီးစၢဃာ်သဃိးလၢအကွီၤ,ဒီးအ့ဖိးအကွီၤလၢပျံၤလါ,ဒ်သိးအကအိၣ်ဝဲလၢအ့ဖိးအယီၢ်တကိးကံၣ်ဃ့အဖီခိၣ်,ဒီးဒ်သိးသဃိးအသုတထူၣ်ဖျဲးဒီးအ့ဖိးန့ၣ်တဂ့ၤ,ဒ်ယွၤမၤလိာ်စီၤမိၤရှ့အသိးန့ၣ်လီၤ.

22ဒီးမၤအ့ဖိးအဆ့ထါအသးလၢတၢ်လါဒီဘ့ၣ်ညါလီၤ. 23ဒီးအိၣ်ဒီးအကိာ်ပူၤလၢအခိၣ်ဖးဖီလီၤ.အိၣ်ဝဲဒီးအကနူၤဆးသနံၣ်ဝးတရံးအကိာ်ပူၤ,ဒ်သဃိးသုးအသိးန့ၣ်ဒ်သိးအသုတယာ်တဂ့ၤလီၤ.

24ဒီးလၢအခီၣ်ထံးအသရ့ၤန့ၣ်မ့ၢ်မၤသလဲသၣ်လၢတၢ်လါ,ဒီးလၢတၢ်လုးတကုာ်,ဒီးလၢတၢ်ဂီၤဖှီဝါလ့ၢ်ဃံၤအသးလီၤ. 25ဒီးတ့ပှ့ၤသၣ်ထူစီ,ဒီးပာ်ပှ့ၤသၣ်န့ၣ်လၢသလဲသၣ်အဘၢၣ်စၢၤဝးတရံးဝဲလၢဆ့အခီၣ်ထံးအသရ့ၤလီၤ. 26ပှ့ၤသၣ်ထူတဖျၢၣ်ဒီးသလဲသၣ်တဖျၢၣ်,ပှ့ၤသၣ်ထူတဖျၢၣ်ဒီးတဖျၢၣ်ဒီးသလဲသၣ်တဖျၢၣ်လၢဆ့အခီၣ်ထံးအသရ့ၤဝးတရံးဝဲ,ဒ်သိးတၢ်ကမၤတၢ်အခ့အပှၤအတၢ်မၤဒ်ယွၤမၤလိာ်စီၤမိၤရှ့အသိးန့ၣ်လီၤ.

27ဒီးမၤဆ့ထါအသးလၢဖှီဝါကဆှၣ်,လၢစီၤအၤဟရိၣ်ဒီးအဖိခွါတဖၣ်အဂီၢ်, 28ဒီးခိၣ်သလုးလၢဖှီဝါကဆှၣ်,ဒီးခိၣ်ဖျီၣ်ဂ့ၤလၢဖှီဝါကဆှၣ်,ဒီးတၢ်ဖျီၣ်ခံလၢဖှီဝါကဆှၣ်အလုၣ်လ့ၢ်ဃံၤအသး, 29ဒီးယီၢ်တကိးလၢဖှီဝါကဆှၣ်အလုၣ်လ့ၢ်ဃံၤအသး,ဒီးတၢ်လါ,ဒီးတၢ်လုးတကုာ်,ဒီးတၢ်ဂီၤ,ကံၣ်ဃ့ဒ်ယွၤမၤလိာ်စီၤမိၤရှ့အသိးန့ၣ်လီၤ.

30ဒီးမၤခိၣ်သလုးစီဆှံအတၢ်ဘ့ၣ်ဘၣ်ထူစီတဘ့ၣ်,ဒီးဒ်တၢ်စဲပနီၣ်ဃာ်အတၢ်ကွဲးအသိးန့ၣ်,ကွဲးဝဲလၢအလိၤ,တၢ်စီဆှံလၢယွၤလီၤ. 31ဒီးစၢဃာ်အီၤဒီးပျံၤဘ့ၣ်ဘၣ်လါတဘိဒ်သိးအကမၤဃာ်အီၤလၢအဖီခိၣ်လၢခိၣ်သလုးအလိၤ,ဒ်ယွၤမၤလိာ်စီၤမိၤရှ့အသိးန့ၣ်လီၤ.

32တၢ်အိၣ်အလီၢ်အတၢ်အိၣ်ဖှိၣ်အဒဲအတၢ်မၤဝံၤဝဲဒ်န့ၣ်ခဲလၢာ်,ဒီးပှၤအံၣ်စရ့လးဖိမၤဝဲဒ်ကယဲၢ်တၢ်လၢယွၤမၤလိာ်စီၤမိၤရှ့အသိးန့ၣ်မၤဝဲဒ်န့ၣ်လီၤ. 33ဒီးဆူစီၤမိၤရှ့အအိၣ်န့ၣ်ဟဲစိာ်ဝဲတၢ်အိၣ်အလီၢ်အဒဲ,ဒီးအတၢ်ဖိတၢ်လံၤခဲလၢာ်,အနီၣ်ကွးတဖၣ်,အသ့ၣ်ဘ့ၣ်ဘၣ်တဖၣ်,ဒီးအနီၣ်ဘိတဖၣ်ဒီးအထူၣ်တဖၣ်,ဒီးအခီၣ်တဖၣ်, 34ဒီးတၢ်ကျၢၢ်ဘၢလၢသိဖါအဖံးစုၣ်ဂီၤ,ဒီးတၢ်ကျၢၢ်ဘၢတၢ်ဖံး,ဒီးတၢ်ကျၢၢ်ဘၢအယၣ်နီၣ်ကျၢၢ်ဘၢတၢ်, 35တၢ်အၢၣ်လီၤအီလီၤအတလါဒီးအနီၣ်ယိးဘိတဖၣ်,ဒီးတၢ်မၤပူၤဖျဲးတၢ်အလီၢ်, 36စီၢ်နီၤခိၣ်,အလီခီခဲလၢာ်,ဒီးတၢ်မဲာ်ညါအကိၣ်, 37မ့ၣ်အူဒၢမိၢ်ပှၢ်အစီ,ဒီးအမ့ၣ်အူဒၢ,မ့ၣ်အူဒၢလၢအဘၣ်ကတဲာ်ကတီၤအီၤ,ဒီးအတၢ်ဖိတၢ်လံၤခဲလၢာ်,ဒီးသိလၢတၢ်ကပီၤအဂီၢ်, 38ဒီးတၢ်လုၢ်လီၢ်ထူ,ဒီးသိဖှူတၢ်,ဒီးတၢ်ဆိၣ်ကဲၤနၢမူ,ဒီးယၣ်နီၣ်ကျၢၢ်ဘၢတၢ်လၢဒဲအကျဲစၢၤအဂီၢ်, 39တၢ်လုၢ်လီၢ်တိၢ်,ဒီးအဖၣ်ကပူၤတိၢ်ထ့အသးဒ်စၤအသိး,အနီၣ်ယိးဘိတဖၣ်,ဒီးအတၢ်ဖိတၢ်လံၤခဲလၢာ်,သရာ်ဒီးအခီၣ်, 40တၢ်အဂၢၤအယၣ်လီၤစဲၤတဖၣ်,အထူၣ်တဖၣ်ဒီးအခီၣ်တဖၣ်,ဒီးယၣ်နီၣ်ကျၢၢ်ဘၢတၢ်လၢဂၢၤအပဲတရီအဂီၢ်,အပျံၤတဖၣ်,ဒီးအတၢ်ကမိာ်ခံတဖၣ်,ဒီးကယဲၢ်အတၢ်ဖိတၢ်လံၤဘၣ်ဃးဒီးတၢ်အိၣ်အလီၢ်အတၢ်မၤလၢတၢ်အိၣ်ဖှိၣ်အဒဲအဂီၢ်, 41တၢ်အခ့အပှၤအတၢ်မၤအကူအသိး,ဒ်သိးအကမၤတၢ်လၢတၢ်အလီၢ်စီဆှံအပူၤ,ဒီးအကူအသိးစီဆှံလၢပှၤလုၢ်တၢ်အဒိၣ်စီၤအၤဟရိၣ်အဂီၢ်,ဒီးအဖိခွါတဖၣ်အကူအသိး,ဒ်သိးအကမၤပှၤလုၢ်တၢ်အဒိၣ်အတၢ်မၤလၢအပူၤလီၤ. 42ဒ်ကယဲၢ်တၢ်လၢယွၤမၤလိာ်စီၤမိၤရှ့အသိးန့ၣ်ပှၤအံၣ်စရ့လးဖိမၤတၢ်မၤခဲလၢာ်လီၤ.

43ဒီးစီၤမိၤရှ့ကွၢ်ကယဲၢ်အမၤတၢ်ခဲလၢာ်,ဒီးကွၢ်ကွၢ်,ပှၤမၤတ့ၢ်ဝဲ,ဒ်ယွၤမၤလိာ်တၢ်အသိး,မၤဝဲဒ်န့ၣ်အသိးလီၤ.ဒီးစီၤမိၤရှ့ဆိၣ်ဂ့ၤအီၤလီၤ.