Exodus 7
1ဒီးယွၤစံးဘၣ်စီၤမိၤရှ့,ကွၢ်,ယပာ်နၤလၢယွၤအလီၢ်လၢဖၤရိၤအဂီၢ်,ဒီးနဒီပုၢ်ဝဲၢ်စီၤအၤဟရိၣ်ကကဲထီၣ်နဝံတဂၤလီၤ. 2နဘၣ်ကတိၤတၢ်လၢယမၤလိာ်နၤခဲလၢာ်,ဒီးနဒီပုၢ်ဝဲၢ်စီၤအၤဟရိၣ်ဘၣ်ကတိၤတၢ်ဒီးဖၤရိၤဒ်သိးအကပျၢ်ကွံာ်ပှၤအံၣ်စရ့လးဖိလၢအကီၢ်ပူၤလီၤ. 3ဒီးယကဒုးဆူၣ်ထီၣ်စီၤပၤဖၤရိၤအသး,ဒီးမၤအါထီၣ်ယတၢ်လီၤလးအပနီၣ်,ဒီးယတၢ်လီၤလိၢ်လီၤလးလၢအဲၤကူပတူးအကီၢ်ပူၤလီၤ. 4ဒီးဖၤရိၤတကနၣ်ဘၣ်သုကလုၢ်ဘၣ်,ဒီးယကပာ်လီၤယစုလၢအဲၤကူပတူးအလိၤ,ဒီးယကဒုးဟးထီၣ်ကွံာ်ယသုးမုၢ်တဖၣ်,ယပှၤဂီၢ်မုၢ်,ပှၤအံၣ်စရ့လးဖိ,လၢတၢ်စံၣ်ညီၣ်ဖးဒိၣ်တဖၣ်လၢအဲၤကူပတူးအကီၢ်ပူၤလီၤ. 5ဒီးတုၤယယူာ်ထီၣ်ယစုလၢအဲၤကူပတူးအဖီခိၣ်,ဒီးဒုးဟးထီၣ်ကွံာ်ပှၤအံၣ်စရ့လးဖိလၢအကျါဒီး,ပှၤအဲၤကူပတူးဖိကသ့ၣ်ညါလၢယမ့ၢ်ယွၤလီၤ. 6ဒီးစီၤမိၤရှ့,ဒီးစီၤအၤဟရိၣ်မၤဝဲ,ဒ်ယွၤမၤလိာ်အီၤအသိးန့ၣ်,မၤဝဲဒ်န့ၣ်သိးလီၤ. 7ဒီးလၢအကတိၤတၢ်ဒီးဖၤရိၤန့ၣ်စီၤမိၤရှ့အသးပှၢ်အနံၣ်ဃိးဆံ,ဒီးစီၤအၤဟရိၣ်အသးပှၢ်အနံၣ်ဃိးဆံသၢနံၣ်လီၤ. 8ဒီးယွၤစံးဘၣ်စီၤမိၤရှ့,ဒီးစီၤအၤဟရိၣ်ဒီးစံးဝဲဒၣ်, 9တုၤဖၤရိၤကတိၤတၢ်ဒီးသုဒီးစံးဝဲ,ဟ့ၣ်တၢ်လီၤလးတမံၤလၢသုဂီၢ်တက့ၢ်န့ၣ်ဒီး,နဘၣ်စံးဘၣ်စီၤအၤဟရိၣ်,ဟံးန့ၢ်နနီၣ်ထိးဘိ,ဒီးတ့ၢ်လီၤကွံာ်လၢဖၤရိၤအမဲာ်ညါတက့ၢ်.ကကဲထီၣ်ဝဲလၢဂုၢ်တဘိလီၤ. 10ဒီးစီၤမိၤရှ့ဒီးစီၤအၤဟရိၣ်လဲၤနုာ်ဆူဖၤရိၤအအိၣ်,ဒီးမၤဝဲဒ်ယွၤမၤလိာ်တၢ်အသိး,ဒီးစီၤအၤဟရိၣ်တ့ၢ်လီၤအနီၣ်ထိးဘိလၢဖၤရိၤအမဲာ်ညါ,ဒီးလၢအခ့အပှၤအမဲာ်ညါ,ဒီးကဲထီၣ်ဂုၢ်တဘိလီၤ. 11ဒီးဖၤရိၤကိးန့ၢ်စ့ၢ်ကီးပှၤကူၣ်တၢ်သ့,ဒီးပှၤမၤကဒါပမဲာ်လီၤ.ဒီးအဝဲသ့ၣ်တဖၣ်န့ၣ်,အဲၤကူပတူးအပှၤကွဲးလံာ်တဖၣ်,မၤစ့ၢ်ကီးဝဲဒ်န့ၣ်အသိးလၢအနီၣ်မၤကဒါပမဲာ်တဖၣ်လီၤ. 12ဒီးတ့ၢ်လီၤတဂၤအနီၣ်ထိးဘိ,တဂၤအနီၣ်ထိးဘိ,ဒီးကဲထီၣ်ဝဲလၢဂုၢ်တဖၣ်လီၤ.ဘၣ်ဆၣ်ဒီးစီၤအၤဟရိၣ်အနီၣ်ထိးဘိန့ၣ်ယူၢ်လီၤကွံာ်အနီၣ်ထိးဘိတဖၣ်လီၤ. 13ဒီးဖၤရိၤအသးဆူၣ်ထီၣ်ဒီးတကနၣ်ဘၣ်အကလုၢ်ဘၣ်,ဒ်ယွၤစံးဝဲအသိးန့ၣ်လီၤ. 14ဒီးယွၤစံးဘၣ်စီၤမိၤရှ့,ဖၤရိၤအသူၣ်ဃၢအသးဃၢ,ဒီးပျၢ်ပှၤဂီၢ်မုၢ်န့ၣ်ဂ့ၢ်လိာ်ဝဲလီၤ. 15မုၢ်ဆ့ၣ်ထီၣ်န့ၣ်လဲၤဆူဖၤရိၤအအိၣ်တက့ၢ်.ကွၢ်ကွၢ်,လဲၤဝဲဆူထံနံၤလီၤ.ဒီးနဘၣ်ဆၢထၢၣ်လၢနကဘၣ်သဃိာ်အီၤအဂီၢ်လၢထံမိၢ်ပှၢ်အနံၤ,ဒီးနီၣ်ထိးဘိလၢအကဲထီၣ်ဂုၢ်တဘိ,နဘၣ်ဟံးန့ၢ်လၢနစုပူၤလီၤ. 16ဒီးနဘၣ်စံးဘၣ်အီၤ,ယွၤ,ပှၤဧ့ၤဘြံၤဖိအကစၢ်,မၢယဟဲဆူနအိၣ်,ဒီးစံးဝဲဒၣ်,ပျၢ်ယပှၤဂီၢ်မုၢ်ဒ်သိးအလဲၤမၤယတၢ်လၢပှၢ်လၢ်ကျါန့ၣ်တက့ၢ်.ဒီးကွၢ်ကွၢ်,တုၤခဲကနံၣ်အံၤနတကနၣ်ဘၣ်. 17ယွၤစံးဒ်အံၤ,နကသ့ၣ်ညါလၢယမ့ၢ်ယွၤလၢတၢ်အံၤအဃိ,ကွၢ်ကွၢ်,ယကတီၢ်ထံလၢထံမိၢ်ပှၢ်အပူၤလၢနီၣ်ထိးဘိအိၣ်လၢယစုပူၤ,ဒီးကကဲထီၣ်ဝဲလၢတၢ်သွံၣ်လီၤ. 18ဒီးဒ့ၣ်ဧိၤညၣ်ဧိၤအိၣ်လၢထံမိၢ်ပှၢ်အပူၤကသံ,ဒီးထံမိၢ်ပှၢ်ကနၢအုၣ်,ဒီးအဲၤကူပတူးဖိကသးဘၣ်အၢထံမိၢ်ပှၢ်အထံလၢတၢ်အီအဂီၢ်လီၤ. 19ဒီးယွၤစံးဘၣ်စီၤမိၤရှ့စံးဘၣ်စီၤအၤဟရိၣ်,ဟံးန့ၢ်နနီၣ်ထိးဘိ,ဒီးယူာ်ထီၣ်နစုလၢအဲၤကူပတူးအထံဧိၤနိဧိၤအဖီခိၣ်,လၢအထံကျိအဖီခိၣ်,လၢအထံမိၢ်ပှၢ်အဖီခိၣ်,ဒီးလၢအကမါအဖီခိၣ်,ဒီးလၢအနိၣ်ခဲလၢာ်အဖီခိၣ်,ဒ်သိးအကကဲထီၣ်တၢ်သွံၣ်,ဒီးတၢ်သွံၣ်ကအိၣ်လၢအဲၤကူပတူးအကီၢ်ဒီဘ့ၣ်ညါအပူၤ,လၢသ့ၣ်ပူၤဒီးလၢလၢၢ်ပူၤန့ၣ်တက့ၢ်. 20ဒီးစီၤမိၤရှ့ဒီးစီၤအၤဟရိၣ်မၤဒ်န့ၣ်,ဒ်ယွၤမၤလိာ်ဝဲအသိးန့ၣ်ဒီးယူာ်ထီၣ်အနီၣ်ထိးဘိဒီးတီၢ်ထံလၢထံမိၢ်ပှၢ်အပူၤလၢဖၤရိၤအမဲာ်ညါ,ဒီးလၢအခ့အပှၤအမဲာ်ညါ,ဒီးထံအိၣ်လၢထံမိၢ်ပှၢ်အပူၤကဲထီၣ်တၢ်သွံၣ်ခဲလၢာ်လီၤ. 21ဒီးဒ့ၣ်ဧိၤညၣ်ဧိၤအိၣ်လၢထံမိၢ်ပှၢ်အပူၤသံဝဲ,ဒီးထံမိၢ်ပှၢ်နၢအုၣ်,ဒီးပှၤအဲၤကူပတူးဖိအီထံလၢထံမိၢ်ပှၢ်အပူၤတကဲဘၣ်ဒီးတၢ်သွံၣ်အိၣ်ဝဲလၢအဲၤကူပတူးအကီၢ်ဒီဘ့ၣ်ညါအပူၤလီၤ. 22ဒီးအဲၤကူပတူးအပှၤကွဲးလံာ်မၤဝဲဒ်န့ၣ်လၢအတၢ်မၤကဒါပမဲာ်,ဒီးဖၤရိၤအသးဆူၣ်ထီၣ်,ဒီးတကနၣ်ဘၣ်အကလုၢ်,ဒ်ယွၤစံးဝဲအသိးန့ၣ်လီၤ. 23ဒီးဖၤရိၤဃၣ်ကဒါအသး,ဒီးက့ၤထီၣ်က့ၤဆူအဟံၣ်,ဒီးတပာ်စ့ၢ်ကီးဘၣ်တၢ်န့ၣ်တမံၤလၢအသးဘၣ်. 24ဒီးကယဲၢ်ပှၤအဲၤကူပတူးဖိခူၣ်တၢ်လၢထံမိၢ်ပှၢ်အဃၢၤဒ်သိးအကန့ၢ်ဘၣ်ထံလၢအကအီဝဲလီၤ.အဂ့ၢ်ဒ်အံၤ,အီထံလၢထံမိၢ်ပှၢ်အပူၤတကဲဘၣ်. 25ဒီးလၢယွၤတီၢ်ထံမိၢ်ပှၢ်အလီၢ်ခံ,နွံနံၤပှဲၤထီၣ်ဝဲလီၤ.
Copyright information for
KswSKMB