Exo 17 | KswSKMB | STEP | ဒီးကယဲၢ်ပှၤအံၣ်စရ့လးဖိအတၢ်အိၣ်ဖှိၣ်ခဲလၢာ်ဟးထီၣ်ဝဲလၢပှၢ်မုၢ်ကနၢစံၤအပူၤ,ဒ်အလဲၤတၢ်အသိး,ဖဲယွၤအထးခိၣ်,ဒီးသူၣ်အဒဲလၢရဖံၤဒံၣ်အပူၤလီၤ.ဒီးထံလၢပှၤဂီၢ်မုၢ်ကအီတၢ်အဂီၢ်န့ၣ်တအိၣ်ဘၣ်.

‏ Exodus 17

1 ဒီးကယဲၢ်ပှၤအံၣ်စရ့လးဖိအတၢ်အိၣ်ဖှိၣ်ခဲလၢာ်ဟးထီၣ်ဝဲလၢပှၢ်မုၢ်ကနၢစံၤအပူၤ,ဒ်အလဲၤတၢ်အသိး,ဖဲယွၤအထးခိၣ်,ဒီးသူၣ်အဒဲလၢရဖံၤဒံၣ်အပူၤလီၤ.ဒီးထံလၢပှၤဂီၢ်မုၢ်ကအီတၢ်အဂီၢ်န့ၣ်တအိၣ်ဘၣ်.

2 ဒီးပှၤဂီၢ်မုၢ်ထိၣ်အ့ၣ်လိာ်အသးဒီးစီၤမိၤရှ့,ဒီးစံးဝဲဒၣ်,ဟ့ၣ်လီၤပှၤလၢထံဒ်သိးပကအီတၢ်တက့ၢ်.ဒီးစီၤမိၤရှ့စံးဘၣ်အီၤ,ဘၣ်မနုၤလၢသုထိၣ်အ့ၣ်လိာ်သုသးဒီးယၤလဲၣ်.သုလ့ပစီယွၤမ့ၢ်အဘၣ်မနုၤလဲၣ်. 3 ဒီးတၢ်သူပှၤဂီၢ်မုၢ်အသးလၢထံဖဲန့ၣ်,ဒီးပှၤဂီၢ်မုၢ်ကဒူးကဒ့ၣ်တၢ်လၢစီၤမိၤရှ့အလိၤ,ဒီးစံးဝဲဒၣ်,တၢ်အံၤဘၣ်မနုၤလၢနဒုးဟးထီၣ်ပှၤလၢအဲၤကူပတူးအပူၤဒ်သိးနကဒုးသံပှၤ,ဒီးပဖိပလံၤ,ဒီးပဆၣ်ဖိကီၢ်ဖိအဒၢလၢတၢ်သူအသးလၢထံန့ၣ်လဲၣ်.

4 ဒီးစီၤမိၤရှ့ကိးထီၣ်ယွၤ,ဒီးစံးဝဲဒၣ်,ယကမၤပှၤဂီၢ်မုၢ်အံၤဒ်လဲၣ်.ဘူးဒီးအကကွံာ်ယၤလၢလၢၢ်လီၤ.

5 ဒီးယွၤစံးဘၣ်စီၤမိၤရှ့,လဲၤလၢပှၤဂီၢ်မုၢ်အမဲာ်ညါ,ဒီးဟံးန့ၢ်ပှၤလၢအံၣ်စရ့လးအသူၣ်က့သးပှၢ်အကျါတဖၣ်,ဒီးဟံးန့ၢ်နီၣ်ထိးဘိလၢနတီၢ်ထံမိၢ်ပှၢ်လၢအီၤန့ၣ်လၢနစုပူၤ,ဒီးလဲၤတၢ်တက့ၢ်. 6 ကွၢ်ကွၢ်,ယကဆၢထၢၣ်လၢနမဲာ်ညါဖဲန့ၣ်,ဖဲလၢၢ်အဖီခိၣ်လၢဃိၤရ့းအလိၤ,ဒီးနဘၣ်တီၢ်လၢၢ်န့ၣ်,ဒီးထံကဟဲထီၣ်လၢအပူၤ,ဒ်သိးပှၤဂီၢ်မုၢ်ကအီတၢ်လီၤ.ဒီးစီၤမိၤရှ့မၤဒ်န့ၣ်လၢအံၣ်စရ့လးအသူၣ်က့သးပှၢ်အမဲာ်ညါလီၤ.

7 ဒီးတၢ်အလီၢ်န့ၣ်ကိးဝဲအမံၤလၢမးစၤ,ဒီးမရံၤဘါ,လၢပှၤအံၣ်စရ့လးဖိအတၢ်ထိၣ်အ့ၣ်လိာ်အသးအဃိ,ဒီးလၢအလ့ပစီယွၤအဃိ,ဖဲအစံး,ယွၤအိၣ်လၢပကျါ,တအိၣ်လဲၣ်န့ၣ်လီၤ.

8 ဒီးပှၤဧမၤလ့းဖိဟဲဒုးတၢ်ဒီးအံၣ်စရ့လးလၢရဖံၤဒံၣ်အပူၤလီၤ. 9 ဒီးစီၤမိၤရှ့စံးဘၣ်စီၤယိၤရှူ,ဃုထၢန့ၢ်ပှၤကညီတဖၣ်လၢပဂီၢ်ဒီးလဲၤထီၣ်ဒုးတၢ်ဒီးပှၤဧမၤလ့းဖိတက့ၢ်,ဒီးခဲဂီၤကိာ်ယကဆၢထၢၣ်လၢတၢ်စိခိၣ်အဖီခိၣ်,အိၣ်ဒီးယွၤအနီၣ်ထိးဘိလၢယစုပူၤလီၤ.

10 ဒီးစီၤယိၤရှူမၤဝဲဒ်စီၤမိၤရှ့စံးဘၣ်အီၤအသိး,ဒီးဒုးတၢ်ဒီးပှၤဧမၤလ့းဖိ,ဒီးစီၤမိၤရှ့,ဒီးစီၤအၤဟရိၣ်,ဒီးစီၤဃူၢ်လဲၤထီၣ်ဆူတၢ်စိခိၣ်အဒီခိၣ်န့ၣ်လီၤ. 11 ဒီးတုၤစီၤမိၤရှ့ယူာ်ထီၣ်အစုဒီး,တၢ်မၤအသးလၢအံၣ်စရ့လးမၤနၢၤတၢ်,ဒီးတုၤအယၤလီၤအစုဒီးပှၤဧမၤလ့းဖိမၤနၢၤတၢ်လီၤ.

12 ဒီးစီၤမိၤရှ့အစုဃၢဝဲ,ဒီးအဝဲသ့ၣ်တဖၣ်န့ၣ်ဟံးန့ၢ်လၢၢ်တဖျၢၣ်,ဒီးပာ်လၢအဖီလာ်,ဒီးဆ့ၣ်နီၤဝဲလၢအဖီခိၣ်,ဒီးစီၤအၤဟရိၣ်,ဒီးစီၤဃူၢ်ဟံးစိာ်ထီၣ်အစုတဂၤတခီတဂၤတခီ,ဒီးအစုအိၣ်ဂၢၢ်ဆိးကျၢၤတုၤမုၢ်လီၤနုာ်လီၤ. 13 ဒီးစီၤယိၤရှူမၤနၢၤမၤဃၣ်ပှၤဧမၤလ့းဖိ,ဒီးအပှၤဂီၢ်မုၢ်လၢနးအကနၣ်လီၤ.

14 ဒီးယွၤစံးဘၣ်စီၤမိၤရှ့,ကွဲးတၢ်န့ၣ်လၢတၢ်သ့ၣ်နီၣ်ထီၣ်က့ၤလၢလံာ်ပူၤ,ဒီးစံၣ်ဃဲၤအီၤလၢစီၤယိၤရှူအနၢ်ပူၤလၢယကတြူာ်ကွံာ်တၢ်သ့ၣ်နီၣ်ထီၣ်က့ၤဧမၤလ့းလၢမူခိၣ်အဖီလာ်သပှၢ်တၢၢ်န့ၣ်တက့ၢ်.

15 ဒီးစီၤမိၤရှ့မၤတၢ်လုၢ်လီၢ်,ဒီးကိးဝဲအမံၤလၢယွၤနံးစံးလီၤ. 16 အဂ့ၢ်ဒ်အံၤ,စံးဝဲဒၣ်,တၢ်အစုအိၣ်ဝဲလၢယွၤအလီၢ်ပစိာ်အဖီခိၣ်,ယွၤကဒုးတၢ်ဒီးပှၤဧမၤလ့းဖိအစိၤစိၤအဃၣ်ဃၣ်လီၤ.