Exodus 18
1ဒီးပှၤလုၢ်တၢ်အဒိၣ်လၢကီၢ်မံးဒယၣ်,စီၤမိၤရှ့အမံၤပှၢ်စီၤယံးသရိၤတဂၤန့ၣ်နၢ်ဟူကယဲၢ်တၢ်လၢယွၤမၤဝဲလၢစီၤမိၤရှ့အဂီၢ်,ဒီးလၢပှၤဂီၢ်မုၢ်အံၣ်စရ့လးအဂီၢ်,လၢယွၤဒုးဟးထီၣ်အံၣ်စရ့လးလၢအဲၤကူပတူးအပူၤလီၤ. 2ဒီးစီၤမိၤရှ့အမံၤပှၢ်စီၤယံးသရိၤဟံးန့ၢ်စီၤမိၤရှ့အမါနီၢ်စံးဖိရၤ,လၢအမၢအက့ၤက့ၤအလီၢ်ခံန့ၣ်, 3ဒီးအဖိခွါခံဂၤလီၤ.တဂၤအမံၤမ့ၢ်စီၤက့ရၡိၣ်လီၤ.အဂ့ၢ်ဒ်အံၤ,စံးဝဲဒၣ်,ယမ့ၢ်တ့ၢ်ပှၤတမှံၤလၢတခီဘီမုၢ်အပူၤလီၤ. 4ဒီးအဝဲတဂၤအမံၤမ့ၢ်စီၤအလံၤဧ့စ့ၢ်လီၤ.အဂ့ၢ်ဒ်အံၤ,ယပၢ်အကစၢ်မ့ၢ်တၢ်မၤစၢၤယၤ,ဒီးမၤပူၤမၤဖျဲးယၤဒီးဖၤရိၤအဘီအနးလီၤ. 5ဒီးစီၤမိၤရှ့အမံၤပှၢ်,စီၤယံးသရိၤဟဲဝဲဒီးစီၤမိၤရှ့အဖိခွါတဖၣ်ဒီးအမါဆူစီၤမိၤရှ့အအိၣ်လၢပှၢ်မုၢ်ကနၢ,ဖဲအသူၣ်ဒဲလၢကစၢ်အကစၢၢ်အလိၤန့ၣ်လီၤ. 6ဒီးစံးဘၣ်စီၤမိၤရှ့,ယဲဒၣ်အံၤနမံၤပှၢ်စီၤယံးသရိၤ,ယဟဲဒီးနမါဒီးအဖိခွါခံဂၤအိၣ်ဒီးအီၤဆူနအိၣ်လီၤ. 7ဒီးစီၤမိၤရှ့လဲၤသဂၢၢ်ထီၣ်အီၤ,ဒီးတီၤလီၤကဒွံကျိာ်ဒီးနၢမူအီၤ,ဒီးသံကွၢ်လိာ်အသးတဂၤဒီးတဂၤ,လၢအတၢ်မုာ်အဂ့ၢ်အကျိၤ,ဒီးဟဲက့ၤဝဲဆူဒဲပူၤလီၤ. 8ဒီးစီၤမိၤရှ့စံၣ်တဲၤတဲလီၤအမံၤပှၢ်လၢကယဲၢ်တၢ်လၢယွၤမၤဘၣ်ဖၤရိၤ,ဒီးပှၤအဲၤကူပတူးဖိလၢအံၣ်စရ့လးအဂီၢ်,ကယဲၢ်တၢ်မၤဘှံးအသးလၢအဘၣ်အီၤလၢကျဲပူၤ,ဒီးယွၤမၤထူၣ်ဖျဲးအီၤအဂ့ၢ်လီၤ. 9ဒီးစီၤယံးသရိၤအသူၣ်ဖှံအသးညီလၢကယဲၢ်တၢ်ဂ့ၤအဃိလၢယွၤမၤဘၣ်အံၣ်စရ့လး,လၢအမၤပူၤမၤဖျဲးအီၤဒီးပှၤအဲၤကူပတူးဖိအစုပူၤလီၤ. 10ဒီးစီၤယံးသရိၤစံးဝဲဒၣ်,ယွၤလၢအမၤပူၤမၤဖျဲးသုလၢပှၤအဲၤကူပတူးဖိအစုပူၤ,ဒီးဖၤရိၤအစုပူၤ,လၢအမၤပူၤမၤဖျဲးပှၤဂီၢ်မုၢ်လၢပှၤအဲၤကူပတူးဖိအစုအဖီလာ်တဂၤန့ၣ်,မ်အဘၣ်ဆိၣ်ဂ့ၤတက့ၢ်. 11ခဲကနံၣ်အံၤ,ယသ့ၣ်ညါလၢယွၤဒိၣ်န့ၢ်ကယဲၢ်ကစၢ်ခဲလၢာ်တက့ၢ်န့ၣ်လီၤ.မ့ၢ်မး,လၢတၢ်တမံၤလၢအဝဲသ့ၣ်ပာ်ထီၣ်ထီအသးလၢအဖီခိၣ်န့ၣ်လီၤ. 12ဒီးစီၤမိၤရှ့အမံၤပှၢ်စီၤယံးသရိၤဟံးန့ၢ်တၢ်လုၢ်မ့ၣ်အူ,ဒီးတၢ်လုၢ်လၢယွၤအဂီၢ်,ဒီးစီၤအၤဟရိၣ်ဟဲဒီးအံၣ်စရ့လးအသူၣ်က့သးပှၢ်ခဲလၢာ်လၢအကအီၣ်ကိၣ်ဒီးစီၤမိၤရှ့အမံၤပှၢ်လၢယွၤအမဲာ်ညါလီၤ. 13ဒီးတၢ်မၤအသးလၢမုၢ်ဆ့ၣ်ထီၣ်တနံၤန့ၣ်စီၤမိၤရှ့ဆ့ၣ်နီၤစံၣ်ညီၣ်ပှၤဂီၢ်မုၢ်,ဒီးပှၤဂီၢ်မုၢ်ဆၢထၢၣ်လၢအဃၢၤလၢမုၢ်ဂီၤတုၤလီၤလၢမုၢ်ဟါလီၤ. 14ဒီးတုၤစီၤမိၤရှ့အမံၤပှၢ်ထံၣ်ဘၣ်ကယဲၢ်တၢ်လၢအမၤဘၣ်ပှၤဂီၢ်မုၢ်ခဲလၢာ်ဒီး,စံးဝဲဒၣ်,နမၤဘၣ်တၢ်အံၤလၢပှၤဂီၢ်မုၢ်ဒ်လဲၣ်.နဆ့ၣ်နီၤတဂၤဃီ,ဒီးပှၤဂီၢ်မုၢ်ဆၢထၢၣ်လၢနဃၢၤလၢမုၢ်ဂီၤတုၤလီၤလၢမုၢ်ဟါန့ၣ်မ့ၢ်အဘၣ်မနုၤလဲၣ်. 15ဒီးစီၤမိၤရှ့စံးဘၣ်အမံၤပှၢ်,မ့ၢ်လၢပှၤဂီၢ်မုၢ်ဟဲဆူယအိၣ်ဒ်သိးအကသံကွၢ်တၢ်လၢယွၤလီၤ. 16တုၤအလိာ်ကွီၢ်အလီၢ်အိၣ်ဒီး,အဝဲသ့ၣ်တဖၣ်ဟဲဆူယအိၣ်,ဒီးယစံၣ်ညီၣ်တၢ်တဂၤဒီးတဂၤအဘၢၣ်စၢၤ,ဒီးယဘိးဘၣ်သ့ၣ်ညါအီၤလၢယွၤအတၢ်မၤလိာ်,ဒီးအတၢ်သိၣ်တၢ်သီလီၤ. 17ဒီးစီၤမိၤရှ့အမံၤပှၢ်စံးဘၣ်အီၤ,တၢ်လၢနမၤန့ၣ်တဂ့ၤဘၣ်. 18နၤမ့ၢ်ဂ့ၤ,ပှၤဂီၢ်မုၢ်လၢအအိၣ်ဒီးနၤအံၤမ့ၢ်ဂ့ၤ,ကလီၤဘှံးလီၤတီၤသပှၢ်တၢၢ်လီၤ.အဂ့ၢ်ဒ်အံၤ,တၢ်အံၤတမံၤဃၢကဲၣ်ဆိးလၢနဂီၢ်လီၤ.နမၤအီၤတဂၤဃီတကဲဘၣ်. 19ခဲကနံၣ်အံၤကနၣ်ယကလုၢ်တက့ၢ်.ယကဟ့ၣ်ကူၣ်ဘၣ်နၤ,ဒီးမ်ယွၤအိၣ်ဒီးနၤတက့ၢ်.အိၣ်နဲလၢပှၤဂီၢ်မုၢ်အဂီၢ်လၢယွၤအမဲာ်ညါ,ဒီးဒုးဟဲထီၣ်အတၢ်ဆူယွၤအအိၣ်န့ၣ်တက့ၢ်, 20ဒီးနဘၣ်သိၣ်လိအီၤလၢတၢ်မၤလိာ်ဒီးတၢ်သိၣ်တၢ်သီ,ဒီးနဘၣ်ဘိးဘၣ်သ့ၣ်ညါအီၤလၢကျဲလၢအဘၣ်ပိာ်,ဒီးတၢ်မၤလၢအဘၣ်မၤန့ၣ်လီၤ. 21ဒီးနဘၣ်ကွၢ်ဃုန့ၢ်ပှၤလၢအမၤတၢ်သ့,လၢအပျံၤယွၤ,ပှၤအမ့ၢ်အတီ,ပှၤလၢအသးဟ့တၢ်အီၣ်ကဘျံးအီၣ်ကဘျၣ်တၢ်တဖၣ်လၢပှၤဂီၢ်မုၢ်ခဲလၢာ်အကျါလီၤ.ဒီးနဘၣ်ပာ်အီၤလၢပှၤတကထိအခိၣ်,ပှၤတကယၤအခိၣ်,ပှၤယဲၢ်ဆံအခိၣ်,ဒီးပှၤဆံဆဲၣ်အခိၣ်လၢအဖီခိၣ်လီၤ. 22ဒီးမ်အစံၣ်ညီၣ်ပှၤဂီၢ်မုၢ်ကိးအဆၢအကတီၢ်ဒဲးတက့ၢ်.ဒီးတၢ်ကမၤအသးလၢအဘၣ်ဒုးဟဲထီၣ်တၢ်အဒိၣ်ကိးအမံၤဒဲးဆူနအိၣ်,မ့မ့ၢ်တၢ်အဆံးကိးအမံၤဒဲးန့ၣ်ကစံၣ်ညီၣ်ဒၣ်ဝဲလီၤ.ဒီးကညီတက့ၢ်လၢနဂီၢ်,ဒီးပှၤကဝံစၢၤတၢ်ဒီးနၤလီၤ. 23နမ့ၢ်မၤတၢ်အံၤ,ဒီးယွၤမၤလိာ်ဝဲဒီး,နဆၢထၢၣ်ကကဲ,ဒီးပှၤဂီၢ်မုၢ်ခဲလၢာ်အံၤ,ကက့ၤက့ၤစ့ၢ်ကီးဆူအလီၢ်တဖၣ်မုာ်မုာ်လီၤ. 24ဒီးစီၤမိၤရှ့ဒိကနၣ်အမံၤပှၢ်အကလုၢ်,ဒီးမၤကယဲၢ်တၢ်လၢအစံးဝဲန့ၣ်လီၤ. 25ဒီးစီၤမိၤရှ့ဃုထၢပှၤလၢအမၤတၢ်သ့လၢအံၣ်စရ့လးခဲလၢာ်အကျါ,ဒီးပာ်အီၤလၢပှၤတကထိအခိၣ်,ပှၤတကယၤအခိၣ်,ပှၤယဲၢ်ဆံအခိၣ်,ဒီးပှၤဆံဆဲၣ်အခိၣ်,လၢပှၤဂီၢ်မုၢ်အဖီခိၣ်လီၤ. 26ဒီးအဝဲသ့ၣ်တဖၣ်န့ၣ်စံၣ်ညီၣ်ပှၤဂီၢ်မုၢ်ကိးအဆၢအကတီၢ်ဒဲး,ဒီးဒုးဟဲထီၣ်တၢ်အကီတမံၤလၢ်လၢ်န့ၣ်ဆူစီၤမိၤရှ့အအိၣ်,မ့မ့ၢ်ကယဲၢ်တၢ်အဆံးတမံၤလၢ်လၢ်န့ၣ်စံၣ်ညီၣ်အကစၢ်ဒၣ်ဝဲလီၤ. 27ဒီးစီၤမိၤရှ့ပျၢ်အမံၤပှၢ်,ဒီးက့ၤက့ၤဆူအကီၢ်ဒၣ်ဝဲန့ၣ်လီၤ.
Copyright information for
KswSKMB