Exodus 2
1ဒီးပှၤလၢလ့ၤဝံအပှၤဟံၣ်ဖိအကျါတဂၤလဲၤန့ၢ်မါလၢပှၤလ့ၤဝံဖိမုၣ်တဂၤလီၤ. 2ဒီးပိာ်မုၣ်န့ၣ်ဒၢထီၣ်,ဒီးဆံးစၢ်န့ၢ်အဖိခွါ,ဒီးထံၣ်ဘၣ်ဝဲလၢအမ့ၢ်အဂ့ၤ,ဒီးပာ်ခူသူၣ်အီၤသၢလါလီၤ. 3ဒီးပာ်ခူသူၣ်ဝဲတသ့လၢၤဘၣ်ဒီး,ဟံးန့ၢ်ဆှဲကိမ့ၤအချံဖိ,ဒီးဖှူဝဲဒီးကျဲတံးကိၢ်လိၣ်,ဒီးဆှိအထုး,ဒီးပာ်ဖိသၣ်ပိာ်ခွါလၢအပူၤ,ဒီးပာ်လီၤအီၤလၢဆှဲကျါလၢထံမိၢ်ပှၢ်အနံၤန့ၣ်လီၤ. 4ဒီးတၢ်ကမၤအီၤဒ်လဲၣ်ဒ်လဲၣ်န့ၣ်,ဒ်သိးအကသ့ၣ်ညါဒီး,အဝဲၢ်မုၣ်တဂၤဆၢထၢၣ်စၢၢ်တလၢၢ်လီၤ. 5ဒီးဖၤရိၤအဖိမုၣ်တဂၤဟဲလီၤလုၣ်ထံလၢထံမိၢ်ပှၢ်,ဒီးအကုၢ်အပှၤပိာ်မုၣ်တဖၣ်ဟးဝဲလၢထံမိၢ်ပှၢ်နံၤ,ဒီးထံၣ်ဘၣ်ချံဖိအိၣ်လၢဆှဲကျါ,ဒီးမၢအကုၢ်ပိာ်မုၣ်တဂၤလဲၤဟံးန့ၢ်ဝဲလီၤ. 6ဒီးအိးထီၣ်ဝဲ,ဒီးထံၣ်ဘၣ်ဖိသၣ်ပိာ်ခွါ,ဒီးကွၢ်ကွၢ်,ဖိသၣ်န့ၣ်ဟီၣ်ဝဲလီၤ.ဒီးသးကညီၤအီၤ,ဒီးစံးဝဲဒၣ်,အဝဲအံၤမ့ၢ်ပှၤဧ့ၤဘြံၤဖိအဖိသၣ်ပိာ်ခွါတဂၤလီၤ. 7ဒီးအဝဲၢ်မုၣ်စံးဘၣ်ဖၤရိၤအဖိမုၣ်,ယဘၣ်လဲၤကိးန့ၢ်နၤလၢပှၤဧ့ၤဘြံၤမုၣ်လၢအဒုးအီၣ်နုၢ်တၢ်တဂၤ,ဒ်သိးအကဒုးအီၣ်နုၢ်ဖိသၣ်အံၤလၢနဂီၢ်စ့ၢ်ကီးဧါ. 8ဒီးဖၤရိၤအဖိမုၣ်န့ၣ်စံးဘၣ်အီၤ,လဲၤတက့ၢ်.ဒီးပမုၣ်ကနီၤတဂၤန့ၣ်လဲၤကိးန့ၢ်ဖိသၣ်အမိၢ်လီၤ. 9ဒီးဖၤရိၤအဖိမုၣ်စံးဘၣ်အီၤ,က့ၤစိာ်ဖိသၣ်တဂၤအံၤ,ဒီးဒုးအီၣ်နုၢ်အီၤလၢယဂီၢ်တက့ၢ်.ဒီးယကဟ့ၣ်နဘူးနလဲလီၤ.ဒီးပိာ်မုၣ်န့ၣ်ဟံးန့ၢ်ဖိသၣ်,ဒီးဒုးအီၣ်နုၢ်အီၤလီၤ. 10ဒီးဖိသၣ်ပိာ်ခွါန့ၣ်ဒိၣ်ထီၣ်,ဒီးအမိၢ်ဟဲက့ၤစိာ်အီၤဆူဖၤရိၤအဖိမုၣ်အအိၣ်,ဒီးကဲထီၣ်အဖိခွါ,ဒီးယုၢ်ဝဲအမံၤလၢစီၤမိၤရှ့,အဂ့ၢ်ဒ်အံၤ,စံးဝဲဒၣ်,ယထုးထီၣ်အီၤလၢထံကျါလီၤ. 11ဒီးတၢ်မၤအသးလၢမုၢ်နံၤတဖၣ်န့ၣ်တုၤစီၤမိၤရှ့ဒိၣ်ထီၣ်ဒီး,လဲၤထီၣ်ဆူအဒီပုၢ်ဝဲၢ်အအိၣ်,ဒီးကွၢ်အတၢ်ဝံတၢ်ယိး,ဒီးထံၣ်ဘၣ်ပှၤအဲၤကူပတူးဖိကျီပှၤဧ့ၤဘြံၤဖိ,အဒီပုၢ်ဝဲၢ်တဂၤလီၤ. 12ဒီးဃၣ်ကွံာ်ဝဲလၢအံၤတခီဒီးလၢန့ၣ်တခီ,တထံၣ်ပှၤနီတဂၤဘၣ်ဒီး,ကျီသံပှၤအဲၤကူပတူးဖိ,ဒီးမၤဘၢကွံာ်အီၤလၢမဲးကျါလီၤ. 13ဒီးလဲၤထီၣ်ဝဲခံနံၤတနံၤဒီး,ကွၢ်ကွၢ်,ပှၤဧ့ၤဘြံၤဖိခံဂၤတီၢ်လိာ်အသး,ဒီးစံးဘၣ်ပှၤလၢအမၤတတီဘၣ်တဂၤ,နကျီနသကိးဘၣ်မနုၤလဲၣ်. 14ဒီးစံးဝဲဒၣ်,မ့ၢ်မတၤပာ်နၤလၢပှၤပဒိၣ်ဖးဒိၣ်,ဒီးပှၤစံၣ်ညီၣ်ကွီၢ်လၢပဖီခိၣ်တဂၤလဲၣ်.နစံးလၢနကမၤသံယၤ,ဒ်နမၤသံပှၤအဲၤကူပတူးဖိအသိးစ့ၢ်ကီးဧါ.ဒီးစီၤမိၤရှ့ပျံၤတၢ်,ဒီးစံးဝဲဒၣ်,မ့ၢ်မးပှၤသ့ၣ်ညါတၢ်န့ၣ်တမံၤလီၤ. 15ဒီးဖၤရိၤနၢ်ဟူတၢ်တမံၤန့ၣ်,ဒီးဃုမၤသံစီၤမိၤရှ့လီၤ.ဒီးစီၤမိၤရှ့ဃ့ၢ်တၢ်လၢဖၤရိၤအမဲာ်ညါ,ဒီးအိၣ်လၢကီၢ်မံးဒယၣ်,ဒီးဆ့ၣ်နီၤလၢထံပူၤအဃၢၤလီၤ. 16ဒီးကီၢ်မံးဒယၣ်အပှၤလုၢ်တၢ်အဒိၣ်အိၣ်ဒီးအဖိမုၣ်နွံဂၤ,ဒီးအဝဲသ့ၣ်ဟဲဒၢၣ်ထံ,ဒီးမၤပှဲၤထံကျိးဒ်သိးအကဒုးအီအပၢ်အသိဒီးအမဲာ်တဲးလဲးတဖၣ်အထံလီၤ. 17ဒီးပှၤကွၢ်တၢ်ဖိတဖၣ်ဟဲဟီထီၣ်ကွံာ်အီၤ,ဒီးစီၤမိၤရှ့ဂဲၤဆၢထၢၣ်အုၣ်က့ၤခီၣ်က့ၤအီၤ,ဒီးဒုးအီအသိဒီးအမဲာ်တဲးလဲးအထံလီၤ. 18ဒီးအဝဲသ့ၣ်တဖၣ်န့ၣ်ဟဲဆူအပၢ်စီၤရူၤအ့လးအအိၣ်,ဒီးအဝဲဒၣ်စံး,လၢမုၢ်မဆါတနံၤအံၤသုဟဲချ့သဒံးမ့ၢ်အဘၣ်မနုၤလဲၣ်. 19ဒီးစံးဝဲဒၣ်,ပှၤအဲၤကူပတူးဖိတဂၤမၤပူၤဖျဲးပှၤဒီးပှၤကွၢ်တၢ်ဖိအစုပူၤ,ဒီးဒၢၣ်ထံလၢလၢပှဲၤပှဲၤလၢပဂီၢ်,ဒီးဒုးအီသိဒီးမဲာ်တဲးလဲးတဖၣ်အထံလီၤ. 20ဒီးစံးဘၣ်အဖိမုၣ်တဖၣ်န့ၣ်,ဒီးမ့ၢ်အအိၣ်ဖဲလဲၣ်,သုဟဲသဒၣ်ပှၤတဂၤန့ၣ်ဘၣ်မနုၤလဲၣ်,ကိးန့ၢ်အီၤဒ်သိးအကအီၣ်တၢ်အီၣ်တက့ၢ်. 21ဒီးဘၣ်စီၤမိၤရှ့အသးလၢအကအိၣ်ဝဲဆိးဝဲဒီးပှၤတဂၤန့ၣ်,ဒီးဟ့ၣ်စီၤမိၤရှ့လၢအဖိမုၣ်နီၢ်စံးဖိရၤလီၤ. 22ဒီးဆံးစၢ်န့ၢ်အဖိခွါ,ဒီးယုၢ်ဝဲအမံၤလၢစီၤက့ရၡိၣ်လီၤ.အဂ့ၢ်ဒ်အံၤ,စံးဝဲဒၣ်,ယမ့ၢ်တ့ၢ်ပှၤတမှံၤလၢတခီဘီမုၢ်အပူၤလီၤ. 23ဒီးအါနံၤအါသီပူၤကွံာ်ဒီး,တၢ်မၤအသးလၢအဲၤကူပတူးအစီၤပၤသံဝဲလီၤ.ဒီးပှၤအံၣ်စရ့လးဖိကအုကစွါလၢအမၤကုၢ်အတၢ်မၤအဃိ,ဒီးအကိးပသူထီၣ်,ဒီးအဃ့ကညးတၢ်မၤလၢအမၤကုၢ်အတၢ်မၤအဃိန့ၣ်,ထီၣ်ဘးလၢယွၤအအိၣ်, 24ဒီးယွၤနၢ်ဟူအတၢ်ကအုကစွါတၢ်,ဒီးယွၤသ့ၣ်နီၣ်ထီၣ်က့ၤအတၢ်အၢၣ်လီၤအီလီၤဒီးစီၤအၤဘြၤဟၣ်,ဒီးစီၤအံၤစဲး,ဒီးစီၤယၤကိာ်, 25ဒီးယွၤကွၢ်လီၤပှၤအံၣ်စရ့လးဖိ,ဒီးယွၤသ့ၣ်ညါဝဲလီၤ.
Copyright information for
KswSKMB