‏ Exodus 25

1ဒီးယွၤစံးဘၣ်စီၤမိၤရှ့,ဒီးစံးဝဲဒၣ်, 2စံးဘၣ်ပှၤအံၣ်စရ့လးဖိလၢအဘၣ်ဟဲစိာ်န့ၢ်ယၤလၢတၢ်မၤဘူၣ်တက့ၢ်.ကယဲၢ်ပှၤလၢအဟ့ၣ်ဒၣ်တၢ်လၢအသးတဂၤလၢ်လၢ်န့ၣ်သုဘၣ်ဟံးန့ၢ်ယတၢ်မၤဘူၣ်လၢအီၤလီၤ.

3ဒီးအအံၤမ့ၢ်တၢ်မၤဘူၣ်လၢသုဘၣ်ဟံးန့ၢ်လၢအီၤန့ၣ်,ထူဧိၤလွဲဧိၤ,ဒီးကျိၣ်ဧိၤစ့ဧိၤ,ဒီးတိၢ်ဧိၤတြၤဧိၤ, 4ဒီးတၢ်လါ,ဒီးတၢ်လုးတကုာ်,ဒီးတၢ်ဂီၤ,ဒီးဖှီဝါကဆှၣ်,ဒီးမဲာ်တဲးလဲၤအဆူၣ်, 5ဒီးသိဖါအဖံးစုၣ်ဂီၤ,ဒီးတၢ်အဖံး,ဒီးသ့ၣ်ဖှ့ၡံးတၤ, 6ဒီးသိလၢမ့ၣ်အူဒၢအဂီၢ်,ဒီးတၢ်နၢမူလၢသိဖှူတၢ်အဂီၢ်,ဒီးလၢဆိၣ်ကဲၤတၢ်နၢမူအဂီၢ်, 7တၢ်မျၢ်မဟူယၤ,ဒီးလၢၢ်လၢတၢ်ကဒၢနုာ်လၢအ့ဖိးအဂီၢ်,ဒီးလၢသဃိးအဂီၢ်လီၤ.

8ဒီးဒ်သိးယကအိၣ်ကဆိးလၢအကျါဒီး,မ်အမၤတၢ်အလီၢ်စီဆှံလၢယဂီၢ်တက့ၢ်. 9ဒ်ကယဲၢ်တၢ်လၢယဒုးထံၣ်ဘၣ်နၤ,တၢ်အိၣ်တၢ်ဆိးအလီၢ်အဒိအတဲာ်,ဒီးအတၢ်ဖိတၢ်လံၤအဒိအတဲာ်အသိးန့ၣ်,သုဘၣ်မၤအီၤဒ်န့ၣ်သိးလီၤ.

10ဒီးဘၣ်မၤတလါလၢသ့ၣ်ဖှ့ၡံးတၤတဖျၢၣ်လီၤ.အထီခံပျၢ်ဒီးတထါ,ဒီးအဒီၣ်ဃီၤတပျၢ်ဒီးတထါ,ဒီးအကစီၤထီၣ်တပျၢ်ဒီးတထါလီၤ. 11ဒီးနဘၣ်ပီၤအီၤဒီးထူစီလီၤ.လၢခိမ့ၢ်ဂ့ၤ,လၢညါမ့ၢ်ဂ့ၤ,နဘၣ်ပီၤအလိၤ,ဒီးနဘၣ်မၤတၢ်ခိၣ်ကျီၤထူဝးတရံးလၢအဖီခိၣ်လီၤ. 12ဒီးနဘၣ်သိအကွီၤထူလွံၢ်ဘိလၢအဂီၢ်,ဒီးပာ်အီၤလၢအခီၣ်လွံၢ်ခီ,ဒီးကွီၤခံဘိကအိၣ်လၢအကပၤတခီ,ဒီးကွီၤခံဘိကအိၣ်လၢတခီဒၣ်လီၤ. 13ဒီးနဘၣ်မၤနီၣ်ယိးဘိခံဘိလၢသ့ၣ်ဖှ့ၡံးတၤ,ဒီးပီၤအီၤဒီးထူလီၤ. 14ဒီးနဘၣ်ဒၢနုာ်နီၣ်ယိးဘိတဖၣ်လၢကွီၤအပူၤလၢတလါအကပၤ,ဒ်သိးပှၤကစိာ်တလါလၢအီၤလီၤ. 15ဒီးနီၣ်ယိးဘိတဖၣ်ကအိၣ်ဒၣ်တၢ်လၢတလါအကွီၤပူၤလီၤ.ဒီးပှၤတဘၣ်ဟံးထီၣ်ဘၣ်အီၤလၢအပူၤဘၣ်.

16ဒီးနဘၣ်ဒၢနုာ်တၢ်အၢၣ်လီၤအီလီၤလၢယကဟ့ၣ်လီၤနၤလၢတလါပူၤလီၤ.

17ဒီးနဘၣ်မၤတၢ်မၤပူၤဖျဲးအလီၢ်လၢထူစီလီၤ.အထီခံပျၢ်ဒီးတထါ,ဒီးအဒီၣ်ဃီၤတပျၢ်ဒီးတထါလီၤ.

18နဘၣ်တ့ခ့ရူာ်ထူကိၢ်လိၣ်ခံဂၤလီၤ.နဘၣ်တ့အီၤဖဲတၢ်မၤပူၤဖျဲးအလီၢ်အစိးနါခံခီလီၤ.

19တ့ခ့ရူာ်တဂၤလၢအနါစ့ၤလၢအဝဲတခီ,ဒီးခ့ရူာ်အဝဲတဂၤလၢအနါစ့ၤလၢအဝဲတခီလီၤ.သုဘၣ်တ့ခ့ရူာ်တဖၣ်လၢတၢ်တလိၣ်ဃီဒီးတၢ်မၤပူၤဖျဲးအလီၢ်ဖဲအစိးနါခံခီလီၤ.

20ခ့ရူာ်တဖၣ်ကအိၣ်ဒီးအဒံးဆ့ယူာ်ထီၣ်အသး,အဒံးဆ့ကျၢၢ်ဘၢတၢ်မၤပူၤဖျဲးအလီၢ်အဖီခိၣ်,ဒီးအမဲာ်ကကွၢ်လိာ်အသးလီၤ.ခ့ရူာ်တဖၣ်အမဲာ်ကအိၣ်ဆူတၢ်မၤပူၤဖျဲးအလီၢ်အအိၣ်လီၤ.

21ဒီးနဘၣ်ပာ်တၢ်မၤပူၤဖျဲးအလီၢ်လၢတလါအဖီခိၣ်,ဒီးနဘၣ်ဒၢနုာ်တၢ်အၢၣ်လီၤအီလီၤလၢယကဟ့ၣ်လီၤနၤလၢတလါအပူၤလီၤ.

22ဒီးယကအိၣ်သဂၢၢ်နၤဖဲန့ၣ်,ဒီးယကကတိၤတၢ်ဒီးနၤလၢတၢ်မၤပူၤဖျဲးအလီၢ်အဖီခိၣ်,လၢခ့ရူာ်အဘၢၣ်စၢၤလၢအအိၣ်လၢတၢ်အၢၣ်လီၤအီလီၤအတလါအဖီခိၣ်လၢတၢ်ခဲလၢာ်လၢယကမၤလိာ်နၤလၢပှၤအံၣ်စရ့လးဖိအဂီၢ်လီၤ.

23နဘၣ်မၤစ့ၢ်ကီးစီၢ်နီၤခိၣ်တဖျၢၣ်လၢသ့ၣ်ဖှ့ၡံးတၤလီၤ.အထီခံပျၢ်,ဒီးအဒီၣ်ဃီၤတပျၢ်,ဒီးအကစီၤထီၣ်တပျၢ်ဒီးတထါလီၤ. 24ဒီးနဘၣ်ပီၤအီၤဒီးထူစီ,ဒီးမၤအခိၣ်ကျီၤထူဝးတရံးအီၤလီၤ. 25ဒီးနဘၣ်မၤသကျီၤအလဲၢ်တဖံးလဲၤဝးတရံးအီၤ,ဒီးနဘၣ်မၤခိၣ်ကျီၤထူလၢသကျီၤအဖီခိၣ်ဝးတရံးအီၤလီၤ. 26ဒီးနဘၣ်မၤကွီၤထူလွံၢ်ဘိလၢအဂီၢ်,ဒီးနဘၣ်ပာ်ကွီၤလၢအသနၢၣ်လွံၢ်နၢၣ်လၢအအိၣ်လၢအခီၣ်လွံၢ်ခီအလိၤလီၤ.

27ကွီၤတဖၣ်န့ၣ်ဘၣ်အိၣ်သဃီၤဒီးသကျီၤလၢနီၣ်ယိးဘိအလီၢ်အဂီၢ်,ဒီးပှၤကစိာ်ထီၣ်စီၢ်နီၤခိၣ်န့ၣ်အဂီၢ်လီၤ.

28ဒီးနဘၣ်မၤနီၣ်ယိးဘိလၢသ့ၣ်ဖှ့ၡံးတၤ,ဒီးပီၤအီၤဒီးထူ,ဒ်သိးပှၤကစိာ်ထီၣ်စီၢ်နီၤခိၣ်လၢအီၤလီၤ.

29ဒီးနဘၣ်မၤအလီခီတဖၣ်ဒီးအနီၣ်တၢၤတဖၣ်,ဒီးအကိတဖၣ်,ဒီးအသလၢလၢပှၤလူလီၤတၢ်အီၤတဖၣ်လီၤ.နဘၣ်မၤအီၤလၢထူစီလီၤ.

30ဒီးနဘၣ်ပာ်တၢ်မဲာ်ညါအကိၣ်လၢစီၢ်နီၤခိၣ်အလိၤလၢယမဲာ်ညါတထံၣ်ဃီလီၤ.

31ဒီးနဘၣ်တ့မ့ၣ်အူဒၢမိၢ်ပှၢ်လၢထူစီလီၤ.မ့ၣ်အူဒၢမိၢ်ပှၢ်န့ၣ်ကဘၣ်တၢ်ပိာ်န့ၢ်အီၤလီၤ.အဘိ,ဒီးအဒ့တဖၣ်,အခိၣ်မီၣ်တဖၣ်,အကမိာ်တဖၣ်,အဖီတဖၣ်ဘၣ်မၤလၢတၢ်တလိၣ်ဃီဒီးအီၤန့ၣ်လီၤ.

32ဒီးအဒ့ဃုဒ့ကဟဲထီၣ်လၢအကပၤတဖၣ်လီၤ.မ့ၣ်အူဒၢမိၢ်ပှၢ်အဒ့သၢဒ့လၢအဝဲတခီ,ဒီးမ့ၣ်အူဒၢမိၢ်ပှၢ်အဒ့သၢဒ့လၢအဝဲတခီလီၤ. 33အခိၣ်မီၣ်လီၤဂာ်ၡၤကးသၣ်သၢဖျၢၣ်,အကမိာ်တဖျၢၣ်,ဒီးဖီတဖိးအိၣ်ဝဲလၢအဝဲတဒ့,ဒီးအခိၣ်မီၣ်လီၤဂာ်ၡၤကးသၣ်သၢဖျၢၣ်,အကမိာ်တဖျၢၣ်,ဒီးဖီတဖိးအိၣ်လၢအဝဲတဒ့လီၤ.ဒ်န့ၣ်အသိးလၢဒ့ဃုဒ့လၢအဟဲထီၣ်လၢမ့ၣ်အူဒၢမိၢ်ပှၢ်လီၤ.

34ဒီးမ့ၣ်အူဒၢမိၢ်ပှၢ်န့ၣ်ကဘၣ်အိၣ်ဒီးအခိၣ်မီၣ်လီၤဂာ်ၡၤကးသၣ်လွံၢ်ဖျၢၣ်,အကမိာ်တဖၣ်,ဒီးအဖီတဖၣ်လီၤ.

35ဒီးအကမိာ်တဖျၢၣ်ကအိၣ်လၢအဒ့ခံဒ့အဖီလာ်လၢတၢ်တလိၣ်ဃီ,ဒီးအကမိာ်တဖျၢၣ်ကအိၣ်လၢအဒ့ခံဒ့အဖီလာ်လၢတၢ်တလိၣ်ဃီ,ဒီးအကမိာ်တဖျၢၣ်ကအိၣ်လၢအဒ့ခံဒ့အဖီလာ်လၢတၢ်တလိၣ်ဃီ,ဒ်အဒ့ဃုဒ့လၢအဟဲထီၣ်လၢမ့ၣ်အူဒၢမိၢ်ပှၢ်အလိၤအသိးန့ၣ်လီၤ.

36အကမိာ်တဖၣ်,ဒီးအဒ့တဖၣ်ဘၣ်မၤအသးလၢတၢ်တလိၣ်ဃီလီၤ.အတၢ်ခဲလၢာ်ကဘၣ်တၢ်ပိာ်န့ၢ်အီၤလၢထူစီတလိၣ်ဃီလီၤ.

37ဒီးနဘၣ်တ့အမ့ၣ်အူဒၢနွံဖျၢၣ်,ဒီးပှၤဘၣ်ပာ်ထီၣ်မ့ၣ်အူဒၢ,ဒီးကကပီၤထီၣ်ဝဲသဃီၤဒီးအမဲာ်ညါလီၤ.

38ဒီးအနီၣ်တံာ်မ့ၣ်အူ,ဒီးနီၣ်တံာ်အလီခီတဖၣ်ဘၣ်မၤအသးလၢထူစီလီၤ.

39ဒီးဘၣ်တ့အီၤဒီးအတၢ်ဖိတၢ်လံၤတဖၣ်ခဲလၢာ်,လၢထူစီလီၤတယၢၢ်တကံကၢ်လီၤ.

40ဒီးကွၢ်,ဒီးမၤအီၤဒ်တၢ်လၢတၢ်ဒုးထံၣ်ဘၣ်နၤလၢကစၢၢ်လိၤအသိးန့ၣ်လီၤ.