‏ Exodus 26

1ဒီးနဘၣ်မၤတၢ်အိၣ်အလီၢ်န့ၣ်အိၣ်ဒီးယၣ်သဒၢတၢ်ဖှီဝါကဆှၣ်အလုၣ်လ့ၢ်ဃံၤအသး,ဒီးတၢ်လါ,ဒီးတၢ်လုးတကုာ်,ဒီးတၢ်ဂီၤ,ဆံဆဲၣ်ဘ့ၣ်လီၤ.နဘၣ်မၤအီၤဒီးခ့ရူာ်တဖၣ်လၢပှၤမၤတၢ်သ့အတၢ်မၤလီၤ.

2ယၣ်သဒၢတၢ်တဘ့ၣ်အထီခံဆံဃိးပျၢ်,ဒီးယၣ်သဒၢတၢ်တဘ့ၣ်အဒီၣ်ဃီၤလွံၢ်ပျၢ်,ဒီးယၣ်သဒၢတၢ်တဖၣ်န့ၣ်ဘၣ်အိၣ်တုၤသိးသိးကိးဘ့ၣ်ဒဲးလီၤ.

3ဒီးယၣ်သဒၢတၢ်ယဲၢ်ဘဘ့ၣ်န့ၣ်ဘၣ်စဲဘူးလိာ်အသးတဘ့ၣ်ဒီးတဘ့ၣ်,ဒီးယၣ်ယဲၢ်ဘ့ၣ်ဒၣ်ဘၣ်စဲဘူးလိာ်အသးတဘ့ၣ်ဒီးတဘ့ၣ်လီၤ.

4ဒီးနဘၣ်မၤကွီၤတဖၣ်လၢတၢ်လါလၢယၣ်သဒၢတၢ်တဘ့ၣ်အကနူၤလၢအအိၣ်လၢတၢ်စဲဘူးလိာ်အသးဖဲအကတၢၢ်လီၤ.နဘၣ်မၤတၢ်ဒ်န့ၣ်သိးလၢယၣ်သဒၢတၢ်တဘ့ၣ်လၢအအိၣ်လၢတၢ်စဲဘူးလိာ်အသးခံဘ့ၣ်တဘ့ၣ်ဖဲအကနူၤန့ၣ်လီၤ. 5နဘၣ်မၤကွီၤယဲၢ်ဆံလၢယၣ်သဒၢတၢ်တဘ့ၣ်အလိၤ,ဒီးသဃီၤလိာ်အသးဒီးအဝဲသ့ၣ်န့ၣ်နဘၣ်မၤကွီၤယဲၢ်ဆံလၢယၣ်သဒၢတၢ်တဘ့ၣ်အလိၤလၢအအိၣ်လၢတၢ်စဲဘူးလိာ်အသးခံဘ့ၣ်တဘ့ၣ်,ဖဲအကနူၤလီၤ.

6ဒီးနဘၣ်မၤနီၣ်ကွးထူယဲၢ်ဆံ,ဒီးဒုးစဲဘူးယၣ်သဒၢတၢ်တဖၣ်လၢနီၣ်ကွး,ဒီးကကဲထီၣ်တၢ်အိၣ်အလီၢ်တဖျၢၣ်လီၤ.

7ဒီးနဘၣ်မၤယၣ်သဒၢတၢ်တဖၣ်လၢမဲာ်တဲးလဲးအဆူၣ်လၢဒဲလၢတၢ်အိၣ်အလီၢ်အဖီခိၣ်အဂီၢ်လီၤ.နဘၣ်မၤယၣ်သဒၢတၢ်တဆံတဘ့ၣ်လီၤ. 8ဒီးယၣ်သဒၢတၢ်တဘ့ၣ်အထီန့ၣ်သၢဆံပျၢ်ဒီးယၣ်သဒၢတၢ်တဘ့ၣ်အဒီၣ်ဃီၤလွံၢ်ပျၢ်,ဒီးယၣ်သဒၢတၢ်တဆံတဘ့ၣ်န့ၣ်ကဘၣ်တုၤသိးသိးလီၤ.

9ဒီးနဘၣ်မၤစဲဘူးလိာ်အသးလၢယၣ်သဒၢတၢ်ယဲၢ်ဘ့ၣ်အပူၤ,ဒီးယၣ်သဒၢတၢ်ဃုဘ့ၣ်အပူၤ,ဒီးနဘၣ်ချံးယၣ်သဒၢတၢ်ဃုဘ့ၣ်တဘ့ၣ်လၢဒဲအမဲာ်ညါလိၤလိၤလီၤ.

10ဒီးနဘၣ်မၤကွီၤယဲၢ်ဆံလၢယၣ်သဒၢတၢ်တဘ့ၣ်အကနူၤလၢအအိၣ်လၢတၢ်စဲဘူးလိာ်အသးအကနူၤလီၤ.ဒီးနဘၣ်မၤကွီၤယဲၢ်ဆံလၢယၣ်သဒၢတဘ့ၣ်အကနူၤလၢအအိၣ်လၢတၢ်စဲဘူးလိာ်အသးခံဘ့ၣ်တဘ့ၣ်အကနူၤလီၤ.

11ဒီးနဘၣ်မၤနီၣ်ကွးတိၢ်,ဒီးကွးထီၣ်ကွီၤလၢနီၣ်ကွးတဖၣ်န့ၣ်,ဒီးမၤစဲဘူးဒဲ,ဒီးကကဲထီၣ်တၢ်တဖျၢၣ်ဃီလီၤ.

12ဒီးတၢ်အိၣ်လုၣ်ကွံာ်လၢအအိၣ်လီၤတဲာ်လၢဒဲအယၣ်သဒၢတၢ်,ယၣ်သဒၢတၢ်တဝာ်လၢအအိၣ်လုၣ်ကွံာ်န့ၣ်ကလီၤစဲၤဝဲလၢတၢ်အိၣ်အလီၢ်အချၢဃံန့ၣ်လီၤ.

13ဒီးတပျၢ်လၢအကပၤတခီ,ဒီးတပျၢ်လၢအဝဲတခီ,လၢအအိၣ်လုၣ်ကွံာ်လၢဒဲအယၣ်သဒၢတၢ်တဖၣ်အထီန့ၣ်ကလီၤစဲၤလၢတၢ်အိၣ်အလီၢ်အကပၤအအံၤတခီ,ဒီးလၢအဝဲတခီ,ဒ်သိးအကကျၢၢ်ဘၢအီၤလီၤ.

14ဒီးနဘၣ်မၤတၢ်ကျၢၢ်ဘၢလၢသိဖါအဖံးစုၣ်ဂီၤလၢဒဲအဂီၢ်,ဒီးတၢ်ကျၢၢ်ဘၢလၢအဖီခိၣ်လၢတၢ်ဖံးလီၤ.

15ဒီးနဘၣ်မၤသ့ၣ်ဘ့ၣ်ဘၣ်လၢသ့ၣ်ဖှ့ၡံးတၤဒူၣ်ဆၢထၢၣ်အသးလၢတၢ်အိၣ်အလီၢ်အဂီၢ်န့ၣ်လီၤ.

16သ့ၣ်ဘ့ၣ်ဘၣ်တဘ့ၣ်န့ၣ်အထီအပျၢ်တဆံ,ဒီးအဒီၣ်ဃီၤတပျၢ်ဒီးတထါလီၤ.

17သ့ၣ်ဘ့ၣ်ဘၣ်တဘ့ၣ်ကအိၣ်ဒီးအစုခံခီသဃီၤလိာ်အသးလီၤ.နဘၣ်မၤတၢ်အိၣ်အလီၢ်အသ့ၣ်ဘ့ၣ်ဘၣ်ဒ်န့ၣ်အသိးခဲလၢာ်လီၤ.

18ဒီးနဘၣ်မၤသ့ၣ်ဘ့ၣ်ဘၣ်အဘ့ၣ်ခံဆံလၢတၢ်အိၣ်အလီၢ်အဂီၢ်လၢကလံၤထံးတခီလီၤ.

19ဒီးလၢသ့ၣ်ဘ့ၣ်ဘၣ်အဘ့ၣ်ခံဆံအဖီလာ်န့ၣ်နဘၣ်တ့အခီၣ်စ့အဖျၢၣ်လွံၢ်ဆံလီၤ.အခီၣ်ခံဖျၢၣ်လၢသ့ၣ်ဘ့ၣ်ဘၣ်တဘ့ၣ်အဖီလာ်လၢအစုခံခီအဂီၢ်,ဒီးအခီၣ်ခံဖျၢၣ်လၢသ့ၣ်ဘ့ၣ်ဘၣ်တဘ့ၣ်ဒၣ်လၢအစုခံခီအဂီၢ်လီၤ.

20ဒီးတၢ်အိၣ်အလီၢ်အကပၤခံခီတခီလၢကလံၤစိးန့ၣ်ဘၣ်အိၣ်ဒီးသ့ၣ်ဘ့ၣ်ဘၣ်အဘ့ၣ်ခံဆံ, 21ဒီးအခီၣ်စ့အဖျၢၣ်လွံၢ်ဆံလီၤ.သ့ၣ်ဘ့ၣ်ဘၣ်တဘ့ၣ်အိၣ်ဒီးအခီၣ်စ့ခံဖျၢၣ်လၢအဖီလာ်,သ့ၣ်ဘ့ၣ်ဘၣ်တဘ့ၣ်ဒၣ်အိၣ်ဒီးအခီၣ်စ့ခံဖျၢၣ်လၢအဖီလာ်လီၤ.

22ဒီးနဘၣ်မၤသ့ၣ်ဘ့ၣ်ဘၣ်ဃုဘ့ၣ်လၢတၢ်အိၣ်အလီၢ်အကပၤလၢမုၢ်နုာ်တခီအဂီၢ်လီၤ. 23ဒီးနဘၣ်မၤသ့ၣ်ဘ့ၣ်ဘၣ်ခံဘ့ၣ်လၢတၢ်အိၣ်အလီၢ်အနၢၣ်တဖၣ်လၢအကပၤခံခီလီၤ. 24ဒီးဘၣ်အိၣ်သဃံာ်လၢအဖီလာ်,ဒီးဘၣ်အိၣ်သဃံာ်လၢအခိၣ်အဖီခိၣ်ဆူကွီၤတကွီၤဃီလီၤ.ခံဘ့ၣ်လၢာ်ဘၣ်အိၣ်ဒ်န့ၣ်လီၤ.အဝဲသ့ၣ်န့ၣ်ကအိၣ်လၢခံနၢၣ်အဂီၢ်လီၤ. 25ဒီးသ့ၣ်ဘ့ၣ်ဘၣ်ဃိးဘ့ၣ်,ဒီးအခီၣ်စ့တဆံဃုဖျၢၣ်ဘၣ်အိၣ်လီၤ.သ့ၣ်ဘ့ၣ်ဘၣ်တဘ့ၣ်အိၣ်ဒီးအခီၣ်ခံဖျၢၣ်လၢအဖီလာ်,သ့ၣ်ဘ့ၣ်ဘၣ်တဘ့ၣ်အိၣ်ဒီးအခီၣ်ခံဖျၢၣ်လၢအဖီလာ်လီၤ.

26ဒီးနဘၣ်မၤနီၣ်ဘိလၢသ့ၣ်ဖှ့ၡံးတၤလီၤ.ယဲၢ်ဘိလၢသ့ၣ်ဘ့ၣ်ဘၣ်လၢတၢ်အိၣ်အလီၢ်တခီအဂီၢ်, 27ဒီးနီၣ်ဘိယဲၢ်ဘိလၢသ့ၣ်ဘ့ၣ်ဘၣ်လၢတၢ်အိၣ်အလီၢ်လၢတခီဒၣ်အဂီၢ်,ဒီးနီၣ်ဘိယဲၢ်ဘိလၢသ့ၣ်ဘ့ၣ်ဘၣ်လၢတၢ်အိၣ်အလီၢ်အကပၤလၢမုၢ်နုာ်တခီအဂီၢ်လီၤ.

28ဒီးနီၣ်ဘိအခၢၣ်သးတဘိလၢသ့ၣ်ဘ့ၣ်ဘၣ်အဖးဖီန့ၣ်အထီဘၣ်တုၤလၢအကတၢၢ်တခီပၢၢ်လၢအကတၢၢ်အဝဲတခီလီၤ.

29ဒီးနဘၣ်ပီၤသ့ၣ်ဘ့ၣ်ဘၣ်ဒီးထူ,ဒီးတ့အကွီၤနီၣ်ဘိအလီၢ်လၢထူ,ဒီးနဘၣ်ပီၤနီၣ်ဘိဒီးထူလီၤ.

30ဒီးနဘၣ်သူၣ်ထီၣ်တၢ်အိၣ်အလီၢ်န့ၣ်ဒ်တၢ်အဒိအတဲာ်လၢတၢ်ဒုးထံၣ်ဘၣ်နၤလၢကစၢၢ်လိၤန့ၣ်အသိးလီၤ.

31ဒီးနဘၣ်မၤယၣ်ဘျးထီၣ်အသးလၢတၢ်လါ,ဒီးတၢ်လုးတကုာ်,ဒီးတၢ်ဂီၤ,ဒီးဖှီဝါကဆှၣ်အလုၣ်လ့ၢ်ဃံၤအသးလၢပှၤမၤတၢ်သ့အတၢ်မၤလီၤ.ဘၣ်မၤအီၤအိၣ်ဒီးခ့ရူာ်တဖၣ်လီၤ.

32ဒီးနဘၣ်ဘျးထီၣ်အီၤလၢသ့ၣ်ဖှ့ၡံးတၤအထူၣ်ပီၤအသးလၢထူလွံၢ်ထူၣ်အလိၤ,ဒီးအိၣ်ဝဲဒီးအနီၣ်ကွးထူ,ဒီးအိၣ်လၢအခီၣ်စ့လွံၢ်ဖျၢၣ်အဖီခိၣ်လီၤ. 33ဒီးနဘၣ်ဘျးထီၣ်ယၣ်ဘျးထီၣ်အသးလၢနီၣ်ကွးတဖၣ်အဖီလာ်,ဒ်သိးနကဟဲစိာ်ဖဲန့ၣ်တၢ်အၢၣ်လီၤအီလီၤအတလါလၢတၢ်ဘျးထီၣ်အသးအပူၤလၢညါတပူၤလီၤ.ဒီးယၣ်ဘျးထီၣ်အသးန့ၣ်ကနီၤဖးန့ၢ်သုလၢတၢ်အလီၢ်စီဆှံဒီးတၢ်အလီၢ်စီဆှံကတၢၢ်အဆၢန့ၣ်လီၤ.

34ဒီးနဘၣ်ပာ်တၢ်မၤပူၤဖျဲးအလီၢ်လၢတၢ်အၢၣ်လီၤအီလီၤအတလါအဖီခိၣ်လၢတၢ်အလီၢ်စီဆှံကတၢၢ်အပူၤလီၤ.

35ဒီးနဘၣ်ပာ်စီၢ်နီၤခိၣ်လၢယၣ်ဘျးထီၣ်အသးလၢခိတခီ,ဒီးမ့ၣ်အူဒၢမိၢ်ပှၢ်သဃီၤဒီးစီၢ်နီၤခိၣ်လၢတၢ်အိၣ်အလီၢ်လၢကလံၤထံးတခီ,ဒီးနဘၣ်ပာ်စီၢ်နီၤခိၣ်လၢကလံၤစိးတခီလီၤ.

36ဒီးလၢဒဲအကျဲစၢၤအဂီၢ်န့ၣ်နဘၣ်မၤနီၣ်ကျၢၢ်ဘၢတၢ်တဘ့ၣ်လၢတၢ်လါ,ဒီးလၢတၢ်လုးတကုာ်,ဒီးလၢတၢ်ဂီၤ,ဒီးလၢဖှီဝါကဆှၣ်ကံၣ်ဃ့အလုၣ်လ့ၢ်ဃံၤအသးန့ၣ်လီၤ.

37ဒီးလၢနီၣ်ကျၢၢ်ဘၢတၢ်အဂီၢ်န့ၣ်နဘၣ်မၤအထူၣ်လၢသ့ၣ်ဖှ့ၡံးတၤယဲၢ်ထူၣ်,ဒီးပီၤအီၤဒီးထူ,ဒီးကအိၣ်ဒီးအနီၣ်ကွးထူ,ဒီးနဘၣ်သိအခီၣ်တိၢ်ယဲၢ်ဖျၢၣ်လၢအဂီၢ်လီၤ.