Exodus 27
1ဒီးနဘၣ်မၤတၢ်လုၢ်အလီၢ်လၢသ့ၣ်ဖှ့ၡံးတၤ,အထီယဲၢ်ပျၢ်,ဒီးအဒီၣ်ဃီၤယဲၢ်ပျၢ်လီၤ.ဘၣ်မၤတၢ်လုၢ်အလီၢ်န့ၣ်လၢတၢ်လွံၢ်နၢၣ်ဒ်သိးသိး,ဒီးအကစီၤထီၣ်သၢပျၢ်လီၤ. 2ဒီးနဘၣ်မၤအနၢၤတဖၣ်လၢအသနၢၣ်လွံၢ်သနၢၣ်အဖီခိၣ်လၢတၢ်တလိၣ်ဃီလီၤ.ဒီးနဘၣ်ပီၤအီၤဒီးတိၢ်လီၤ. 3ဒီးနဘၣ်တ့အသပၢၤစိာ်ကွံာ်အဖၣ်ဆါတဖၣ်,ဒီးအတပူာ်တဖၣ်,ဒီးအသလၢဖှံတၢ်တဖၣ်,ဒီးအနီၣ်ကွးတဖၣ်,ဒီးအသပၢၤမ့ၣ်အူတဖၣ်လီၤ.နဘၣ်တ့အတၢ်ဖိတၢ်လံၤလၢတိၢ်ခဲလၢာ်လီၤ. 4ဒီးနဘၣ်တ့ဖၣ်ကပူၤအဒါလၢတိၢ်ဒ်ပထ့ပှာ်ဧိၤစၤဧိၤအသိးလီၤ.ဒီးနဘၣ်တ့အကွီၤတိၢ်လွံၢ်ကွီၤလၢဖၣ်ကပူၤအဒါလွံၢ်သနၢၣ်အဖီခိၣ်လီၤ. 5ဒီးနဘၣ်ပာ်အီၤလၢတၢ်ဝးတရံးတၢ်လုၢ်လီၢ်အခီၣ်ထံး,ဘၣ်ဃူဝဲဒီးတၢ်လုၢ်လီၢ်အဖးဖီလီၤ. 6ဒီးနဘၣ်မၤနီၣ်ယိးဘိတဖၣ်လၢတၢ်လုၢ်လီၢ်အဂီၢ်,နီၣ်ယိးဘိသ့ၣ်ဖှ့ၡံးတၤ,ဒီးနဘၣ်ပီၤအီၤလၢတိၢ်လီၤ. 7ဒီးပှၤဘၣ်ဒၢနုာ်နီၣ်ယိးဘိတဖၣ်လၢအကွီၤတဖၣ်အပူၤ,ဒီးနီၣ်ယိးဘိတဖၣ်ကအိၣ်လၢတၢ်လုၢ်လီၢ်ခံကပၤအလိၤ,ဒ်သိးပှၤကစိာ်ထီၣ်အီၤလီၤ. 8နဘၣ်မၤအီၤလၢသ့ၣ်ဘ့ၣ်ဘၣ်အိၣ်ဒီးအအိပူၤ,ဒ်တၢ်ဒုးထံၣ်ဘၣ်နၤလၢကစၢၢ်လိၤအသိးန့ၣ်,ပှၤဘၣ်မၤအီၤဒ်န့ၣ်သိးလီၤ. 9ဒီးနဘၣ်မၤတၢ်အိၣ်အလီၢ်အဂၢၤလီၤ.လၢအကပၤလၢကလံၤထံးတခီန့ၣ်ယၣ်လီၤစဲၤလၢဂၢၤအဂီၢ်မၤဝဲလၢဖှီဝါကဆှၣ်,အလုၣ်လ့ၢ်ဃံၤအသး,အထီအပျၢ်တကယၤန့ၣ်ဘၣ်အိၣ်လၢတခီအဂီၢ်, 10ဒီးအထူၣ်အထူၣ်ခံဆံ,ဒီးအခီၣ်တိၢ်အဖျၢၣ်ခံဆံလီၤ.ဒီးထူၣ်အနီၣ်ကွး,ဒီးအနီၣ်မၤစဲဘူးလိာ်အသးတဖၣ်ဘၣ်မၤလၢစ့လီၤ. 11ဒ်န့ၣ်အသိးလၢအကပၤလၢကလံၤစိးတခီအဂီၢ်န့ၣ်,ယၣ်လီၤစဲၤအထီအပျၢ်တကယၤ,ဒီးအထူၣ်အထူၣ်ခံဆံ,ဒီးအခီၣ်တိၢ်အဖျၢၣ်ခံဆံန့ၣ်ဘၣ်အိၣ်လီၤ.အထူၣ်တဖၣ်အနီၣ်ကွး,ဒီးအနီၣ်မၤစဲဘူးလိာ်အသးဘၣ်မၤလၢစ့လီၤ. 12ဒီးယၣ်လီၤစဲၤအထီအပျၢ်ယဲၢ်ဆံဘၣ်အိၣ်လၢဂၢၤအဒီၣ်ဃီၤလၢမုၢ်နုာ်တခီအဂီၢ်န့ၣ်လီၤ.အထူၣ်ဆံဆဲၣ်ထူၣ်,ဒီးအခီၣ်ဆံဆဲၣ်ဖျၢၣ်လီၤ. 13ဒီးဂၢၤအဒီၣ်ဃီၤလၢအကပၤလၢမုၢ်ထီၣ်တခီန့ၣ်အပျၢ်ယဲၢ်ဆံ, 14ဒီးယၣ်လီၤစဲၤလၢကျဲစၢၤတခီန့ၣ်အထီတဆံယဲၢ်ပျၢ်,အထူၣ်သၢထူၣ်,ဒီးအခီၣ်သၢဖျၢၣ်ကဘၣ်အိၣ်လီၤ. 15ဒီးယၣ်လီၤစဲၤလၢအဝဲတခီန့ၣ်အထီတဆံယဲၢ်ပျၢ်,အထူၣ်သၢထူၣ်,ဒီးအခီၣ်သၢဖျၢၣ်ကဘၣ်အိၣ်လီၤ. 16ဒီးလၢဂၢၤကျဲစၢၤအဂီၢ်န့ၣ်ယၣ်လီၤစဲၤအထီအပျၢ်ခံဆံမၤအသးလၢတၢ်လါ,ဒီးလၢတၢ်လုးတကုာ်,ဒီးလၢတၢ်ဂီၤ,ဒီးလၢဖှီဝါကဆှၣ်ကံၣ်ဃ့အလုၣ်လ့ၢ်ဃံၤအသးန့ၣ်,အထူၣ်လွံၢ်ထူၣ်,ဒီးအခီၣ်လွံၢ်ဖျၢၣ်ဘၣ်အိၣ်လီၤ. 17ဒီးကယဲၢ်ထူၣ်ဝးတရံးအဂၢၤဘၣ်အိၣ်ဒီးနီၣ်မၤစဲဘူးလိာ်အသးစ့,အနီၣ်ကွးစ့,ဒီးအခီၣ်တိၢ်လီၤ. 18ဒီးဂၢၤန့ၣ်အထီဘၣ်မ့ၢ်အပျၢ်တကယၤ,ဒီးအဒီၣ်ဃီၤအပျၢ်ယဲၢ်ဆံကိးပူၤဒဲး,ဒီးအကစီၤထီၣ်ယဲၢ်ပျၢ်မၤအသးလၢဖှီဝါကဆှၣ်လ့ၢ်ဃံၤအသး,ဒီးအခီၣ်လၢတိၢ်န့ၣ်လီၤ. 19ဒီးကယဲၢ်တၢ်အိၣ်အလီၢ်အတၢ်ဖိတၢ်လံၤလၢပှၤမၤအတၢ်ခဲလၢာ်,ဒီးကယဲၢ်အဘိကမိာ်ခံ,ဒီးဂၢၤအဘိကမိာ်ခံခဲလၢာ်န့ၣ်ဘၣ်မၤလၢတိၢ်လီၤ. 20ဒီးနဘၣ်မၤလိာ်ပှၤအံၣ်စရ့လးဖိ,လၢအကဟဲစိာ်ဆူနအိၣ်သ့ၣ်စၤယံးအသိစီတိၢ်အသးလၢမ့ၣ်အူဒၢအဂီၢ်,ဒ်သိးမ့ၣ်အူဒၢကကဲၤထီၣ်တထံၣ်ဃီလီၤ. 21ဒီးတၢ်အိၣ်ဖှိၣ်အဒဲလၢတၢ်ဘျးထီၣ်အသးလၢခိတခီလၢအအိၣ်လၢတၢ်အၢၣ်လီၤအီလီၤအမဲာ်ညါန့ၣ်.စီၤအၤဟရိၣ်ဒီးအဖိခွါတဖၣ်ဘၣ်ကတဲာ်ကတီၤအီၤလၢမုၢ်ဟါတုၤလၢမုၢ်ဂီၤလၢယွၤအမဲာ်ညါလီၤ.မ့ၢ်တၢ်မၤလိာ်အထူအယိာ်လီၤလၢအစၢၤအသွဲၣ်လၢပှၤအံၣ်စရ့လးဖိအဂီၢ်လီၤ.
Copyright information for
KswSKMB