‏ Exodus 30

1ဒီးနဘၣ်မၤတၢ်လုၢ်လီၢ်လၢတၢ်ဆိၣ်ကဲၤတၢ်နၢမူအဂီၢ်လီၤ. 2အထီတပျၢ်,ဒီးအဒီၣ်ဃီၤတပျၢ်,ဘၣ်အိၣ်ဒီးအနၢၣ်လွံၢ်နၢၣ်ဒ်သိးသိးလီၤ.ဒီးအကစီၤထီၣ်ခံပျၢ်,ဒီးအနၢၤတဖၣ်ကဘၣ်မၤအသးလၢတၢ်တမံၤဃီလီၤ.

3ဒီးနဘၣ်ပီၤအီၤဒီးထူစီလၢအဖီခိၣ်,ဒီးလၢအကပၤဝးတရံးအီၤ,ဒီးအနၢၤတဖၣ်န့ၣ်လီၤ.နဘၣ်တ့အခိၣ်သလုးထူဝးတရံးအီၤလီၤ.

4ဒီးနဘၣ်တ့အကွီၤထူခံကွီၤလၢအခိၣ်ကျီၤအဖီလာ်လၢအနၢၣ်ခံနၢၣ်အဃၢၤလီၤ.နဘၣ်တ့အီၤလၢအကပၤခံခီအလိၤလီၤ.ဒီးကကဲထီၣ်အလီၢ်လၢနီၢ်ယိးဘိအဂီၢ်ဒ်သိးပှၤကစိာ်ထီၣ်အီၤလီၤ.

5ဒီးနဘၣ်မၤအနီၣ်ယိးဘိလၢသ့ၣ်ဖှ့ၡံးတၤ,ဒီးပီၤအီၤလၢထူလီၤ.

6ဒီးနဘၣ်ပာ်အီၤလၢတၢ်ဘျးထီၣ်အသးအမဲာ်ညါလၢအအိၣ်လၢတၢ်အၢၣ်လီၤအီလီၤအတလါအဃၢၤလၢတၢ်မၤပူၤဖျဲးအလီၢ်အမဲာ်ညါ,လၢအအိၣ်လၢတၢ်အၢၣ်လီၤအီၤလီၤအဖီခိၣ်န့ၣ်,ဖဲယကဟဲသဂၢၢ်နၤလီၤ.

7ဒီးစီၤအၤဟရိၣ်ဘၣ်ဆိၣ်ကဲၤတၢ်နၢမူလၢအဖီခိၣ်ကိးဂီၤဒဲးလီၤ.တုၤအကတဲာ်ကတီၤမ့ၣ်အူဒၢတဖၣ်န့ၣ်ဒီး,ဘၣ်ဆိၣ်ကဲၤတၢ်နၢမူလၢအဖီခိၣ်လီၤ. 8ဒီးတုၤစီၤအၤဟရိၣ်ဒွဲၣ်ထီၣ်မ့ၣ်အူဒၢတဖၣ်လၢမုၢ်ဟါဒီး,ဘၣ်ဆိၣ်ကဲၤတၢ်နၢမူလၢအဖီခိၣ်လီၤ.မ့ၢ်တၢ်ဆိၣ်ကဲၤနၢမူတထံၣ်ဃီလၢယွၤအမဲာ်ညါလီၤလၢသုစၢၤသုသွဲၣ်အစိၤစိၤအဃၣ်ဃၣ်လီၤ.

9ဒီးတၢ်ဆိၣ်ကဲၤနၢမူလီၤဆီမ့ၢ်ဂ့ၤ,တၢ်လုၢ်မ့ၣ်အူမ့ၢ်ဂ့ၤ,တၢ်မၤဘူၣ်ကိၣ်မ့ၢ်ဂ့ၤ,ဆိၣ်ကဲၤလၢအဖီခိၣ်တဂ့ၤ,ဒီးလူလီၤတၢ်လုၢ်အီလၢအဖီခိၣ်တဂ့ၤ.

10ဒီးစီၤအၤဟရိၣ်ဘၣ်မၤတၢ်ပူၤဖျဲးတၢ်လၢအနၢၤအဖီခိၣ်လၢတၢ်မၤပူၤဖျဲးတၢ်ဒဲးဘးအသွံၣ်န့ၣ်တနံၣ်တဘျီလီၤ.တနံၣ်တဘျီန့ၣ်ဘၣ်မၤတၢ်ပူၤဖျဲးတၢ်လၢအဖီခိၣ်လီၤလၢသုစၢၤသုသွဲၣ်အစိၤစိၤအဃၣ်ဃၣ်လီၤ.မ့ၢ်တၢ်စီဆှံကတၢၢ်လၢယွၤအဂီၢ်လီၤ.

11ဒီးယွၤကတိၤတၢ်ဒီးစီၤမိၤရှ့ဒီးစံးဝဲဒၣ်, 12တုၤနဂံၢ်ပှၤအံၣ်စရ့လးဖိဒီး,ဒ်အတၢ်ဂံၢ်အိၣ်ဝဲအသိးန့ၣ်,ပှၤဘၣ်ဟ့ၣ်ယွၤလၢတၢ်ပှ့ၤက့ၤအသးတဂၤလၢအဂီၢ်ဒၣ်ဝဲ,တဂၤလၢအဂီၢ်ဒၣ်ဝဲ,ဖဲနဂံၢ်အီၤဒ်သိးတုၤနဂံၢ်အီၤဒီး,တၢ်သံသတြိာ်အသုတဘၣ်အီၤတဂ့ၤန့ၣ်လီၤ.

13ဒီးဘၣ်ဟ့ၣ်အအံၤ,ကယဲၢ်ပှၤလၢအခီဂာ်ဆူပှၤဘၣ်တၢ်ဂံၢ်အီၤအကျါတဂၤလၢ်လၢ်န့ၣ်ဘၣ်ဟ့ၣ်စ့ဖးဖီၡက့လးဒ်အလီၢ်စီဆှံအၡက့လးအသိး(တၡက့လးန့ၣ်မ့ၢ်က့ရၤခံဆံလီၤ.)ဖးဖီၡက့လးန့ၣ်ကကဲထီၣ်တၢ်မၤဘူၣ်ယွၤလီၤ.

14ကယဲၢ်ပှၤလၢအသးပှၢ်အနံၣ်ခံဆံဒီးအါန့ၢ်အန့ၣ်တက့ၢ်လၢအခီဂာ်ဆူပှၤဘၣ်တၢ်ဂံၢ်အီၤအကျါကိးဂၤဒဲးန့ၣ်,ဘၣ်မၤဘူၣ်တၢ်လၢယွၤလီၤ.

15တုၤသုမၤဘူၣ်တၢ်လၢယွၤဒ်သိးသုကမၤတၢ်ပူၤဖျဲးလၢသုသးအဂီၢ်ဒီး,ပှၤအထူးအတီၤတဟ့ၣ်ဘၣ်အါန့ၢ်ဖးဖီၡက့လးဘၣ်.ဒီးပှၤဖှီၣ်ဖိယာ်ဖိတဟ့ၣ်ဘၣ်စှၤန့ၢ်အဝဲန့ၣ်ဘၣ်လီၤ.

16ဒီးနဘၣ်ဟံးန့ၢ်တၢ်မၤပူၤဖျဲးတၢ်အစ့လၢပှၤအံၣ်စရ့လးဖိအစုပူၤ,ဒီးပာ်အီၤလၢတၢ်အိၣ်ဖှိၣ်အဒဲအတၢ်မၤအဂီၢ်,ဒ်သိးအကကဲထီၣ်တၢ်သ့ၣ်နီၣ်က့ၤလၢပှၤအံၣ်စရ့လးဖိအဂီၢ်လၢယွၤအမဲာ်ညါ,ဒ်သိးအကမၤတၢ်ပူၤဖျဲးလၢသုသးအဂီၢ်လီၤ.

17ဒီးယွၤကတိၤတၢ်ဒီးစီၤမိၤရှ့ဒီးစံးဝဲဒၣ်, 18နဘၣ်တ့သရာ်တိၢ်အိၣ်ဒီးအခီၣ်တိၢ်,ဒ်သိးပှၤကသ့စီတၢ်လီၤ.ဒီးနဘၣ်ပာ်အီၤလၢတၢ်အိၣ်ဖှိၣ်အဒဲဒီးတၢ်လုၢ်လီၢ်အဘၢၣ်စၢၤ,ဒီးနဘၣ်ဒၢနုာ်ထံလၢအပူၤလီၤ. 19ဒီးစီၤအၤဟရိၣ်ဒီးအဖိခွါတဖၣ်ဘၣ်သ့စီအစုဒီးအခီၣ်လၢအပူၤလီၤ. 20တုၤအလဲၤနုာ်လၢတၢ်အိၣ်ဖှိၣ်အဒဲပူၤဒီးဘၣ်သ့စီတၢ်ဒီးထံ,ဒ်သိးအသုတသံတဂ့ၤ.ဒီးတုၤအဟဲဘူးဒီးတၢ်လုၢ်လီၢ်ဒ်သိးအကမၤတၢ်အခ့အပှၤအတၢ်,ဒ်သိးအကဆိၣ်ကဲၤတၢ်ဒီးမ့ၣ်အူလၢယွၤအဂီၢ်န့ၣ်လီၤ. 21ဘၣ်သ့စီအစုဒီးအခီၣ်ဒ်သိးအသုတသံတဂ့ၤလီၤ.ဒီးကကဲထီၣ်တၢ်အလုၢ်အလၢ်လီၤစိၤလီၤထီလၢအဂီၢ်,လၢအဝဲဒၣ်ဒီးအချံအသၣ်လီၤလၢအစၢၤအသွဲၣ်အစိၤစိၤအဃၣ်ဃၣ်လီၤ.

22ဒီးယွၤကတိၤတၢ်ဒီးစီၤမိၤရှ့,ဒီးစံးဝဲဒၣ်, 23နဲဒၣ်အံၤဟံးန့ၢ်တၢ်နၢမူအခိၣ်ကျၢၢ်တဖၣ်,မူရၣ်လၢအဟဲထီၣ်ဒၣ်အတၢ်လီၤတယၢၢ်ၡက့လးယဲၢ်ကယၤ,ဒီးကဒါရါနၢမူဖးဖီတၢ်န့ၣ်,ခံကယၤယဲၢ်ဆံ,ဒီးလီၢ်ဟ့ၣ်ၡက့လးခံကယၤယဲၢ်ဆံ, 24ဒီးကဒါရါၡက့လးယဲၢ်ကယၤ,ဒ်ၡက့လးဘၣ်ဃးဒီးတၢ်အလီၢ်စီဆှံအသိးန့ၣ်,ဒီးသ့ၣ်စၤယံးသိတဟံၣ်လီၤ.

25ဒီးနဘၣ်မၤအီၤလၢတၢ်ဖှူစီဆှံအသိ,ဒီးနဘၣ်တိၢ်မၤဃါဃုာ်အီၤဒ်ပှၤတိၢ်မၤဃါဃုာ်တၢ်နၢမူဖိမၤဝဲအသိးန့ၣ်လီၤ.ဒီးကကဲထီၣ်တၢ်ဖှူစီဆှံလီၤ. 26ဒီးနဘၣ်ဖှူတၢ်အိၣ်ဖှိၣ်အဒဲလၢအီၤ,ဒီးတၢ်အၢၣ်လီၤအီလီၤအတလါ, 27ဒီးစီၢ်နီၤခိၣ်,ဒီးအလီခီခဲလၢာ်,ဒီးမ့ၣ်အူဒၢမိၢ်ပှၢ်ဒီးအတၢ်ဖိတၢ်လံၤ,ဒီးတၢ်ဆိၣ်ကဲၤနၢမူအတၢ်လုၢ်လီၢ်, 28ဒီးတၢ်လုၢ်မ့ၣ်အူအတၢ်လုၢ်လီၢ်ဒီးအတၢ်ဖိတၢ်လံၤခဲလၢာ်,ဒီးသရာ်တဖျၢၣ်ဒီးအခီၣ်လီၤ.

29ဒီးနဘၣ်မၤစီဆှံအီၤဒ်သိးအကကဲထီၣ်တၢ်စီဆှံကတၢၢ်လီၤ.ကယဲၢ်တၢ်လၢအထိးဘၣ်အီၤတမံၤလၢ်လၢ်န့ၣ်ကကဲထီၣ်တၢ်စီဆှံလီၤ.

30ဒီးနဘၣ်ဖှူစီၤအၤဟရိၣ်ဒီးအဖိခွါတဖၣ်,ဒီးမၤစီဆှံအီၤဒ်သိးအကမၤပှၤလုၢ်တၢ်အဒိၣ်အတၢ်လၢယဂီၢ်လီၤ.

31ဒီးနဘၣ်ကတိၤတၢ်ဒီးပှၤအံၣ်စရ့လးဖိ,ဒီးစံးဘၣ်အီၤ,အအံၤကကဲထီၣ်တၢ်ဖှူစီဆှံလၢယဂီၢ်လီၤလၢသုစၢၤသုသွဲၣ်အစိၤစိၤအဃၣ်ဃၣ်လီၤ. 32လူလီၤအီၤလၢပှၤကညီအညၣ်လိၤတဂ့ၤ.မၤတၢ်လီၤဂာ်လၢအီၤဒ်အလီၤတယၢၢ်အသိးန့ၣ်တဂ့ၤ.မ့ၢ်တၢ်စီဆှံလီၤ.ကကဲထီၣ်တၢ်စီဆှံလၢသုမဲာ်ညါလီၤ.

33ပှၤလၢအတိၢ်မၤဃါဃုာ်တၢ်လီၤဂာ်လၢအီၤ,ဒီးပှၤလၢအပာ်အီၤတနီၤလၢပှၤတခီဘီမုၢ်အလိၤတဂၤဂၤန့ၣ်ကဘၣ်တၢ်ဒီၣ်တဲာ်ကွံာ်အီၤဒီးအပှၤကလုာ်ဒၣ်အီၤန့ၣ်လီၤ.

34ဒီးယွၤစံးဘၣ်စီၤမိၤရှ့,ဟံးန့ၢ်တၢ်နၢမူတဖၣ်,သ့ၣ်နၤတဖၣ်အထုးဒီးသ့ၣ်ၡဃ့လ့းအထုး,ဒီးသံခိၣ်ဝါ,တၢ်နၢမူသ့ၣ်တဖၣ်ဒီးလီၢ်ဘၣ်တက့ၢ်.ဘၣ်အိၣ်လီၤတယၢၢ်တမံၤဒီးတမံၤထဲသိးသိးလီၤ.

35ဒီးနဘၣ်မၤအီၤလၢတၢ်နၢမူလၢအမၤအသးဒ်ပှၤတိၢ်မၤဃါဃုာ်တၢ်နၢမူဖိမၤဝဲအသိးန့ၣ်,မၤဝဲဒီးအံသၣ်န့ၣ်,စီဝဲဆှံဝဲလီၤ.

36ဒီးနဘၣ်တိၢ်သဘှံးအီၤတနီၤ,ဒီးပာ်အီၤလၢတၢ်အၢၣ်လီၤအီလီၤအမဲာ်ညါ,လၢတၢ်အိၣ်ဖှိၣ်အဒဲပူၤဖဲယကဟဲသဂၢၢ်နၤ,ဒီးကကဲထီၣ်တၢ်စီဆှံကတၢၢ်လၢသုမဲာ်ညါလီၤ.

37ဒီးတၢ်နၢမူလၢနဘၣ်မၤအီၤန့ၣ်,မၤလၢသုဂီၢ်ဒၣ်သုဝဲ,ဒ်အလီၤတယၢၢ်အသိးန့ၣ်တဂ့ၤ.ကကဲထီၣ်တၢ်စီတၢ်ဆှံလၢယွၤအဂီၢ်လၢနမဲာ်ညါလီၤ.

38ပှၤလၢအမၤတၢ်ဒ်န့ၣ်သိး,ဒ်သိးအကနၢအီၤတဂၤဂၤန့ၣ်ကဘၣ်တၢ်ဒီၣ်တဲာ်ကွံာ်အီၤဒီးအပှၤတကလုာ်ဒၣ်အီၤန့ၣ်လီၤ.