Exodus 4
1ဒီးစီၤမိၤရှ့စံးဆၢတၢ်,ဒီးစံးဝဲဒၣ်,ဘၣ်ဆၣ်ဒီး,ကွၢ်ကွၢ်,အဝဲသ့ၣ်တဖၣ်န့ၣ်တနာ်ဘၣ်ယၤဘၣ်,ဒီးတကနၣ်ဘၣ်ယကလုၢ်ဘၣ်.အဂ့ၢ်ဒ်အံၤ,ကစံးယွၤတလီၣ်ဖျါထီၣ်ဘၣ်အသးလၢနၤဘၣ်. 2ဒီးယွၤစံးဘၣ်အီၤ,တၢ်အိၣ်လၢနစုပူၤန့ၣ်မ့ၢ်မနုၤတမံၤလဲၣ်.ဒီးစံးဝဲဒၣ်,မ့ၢ်နီၣ်ထိးဘိလီၤ. 3ဒီးစံးဝဲဒၣ်,တ့ၢ်လီၤကွံာ်အီၤလၢဟီၣ်ခိၣ်တက့ၢ်.ဒီးတ့ၢ်လီၤလၢဟီၣ်ခိၣ်,ဒီးကဲထီၣ်ဝဲလၢဂုၢ်တဘိ,ဒီးစီၤမိၤရှ့ဃ့ၢ်လၢအမဲာ်ညါလီၤ. 4ဒီးယွၤစံးဘၣ်စီၤမိၤရှ့,ယူာ်ထီၣ်နစု,ဒီးဖီၣ်န့ၢ်အီၤလၢအမဲၢ်တက့ၢ်.(ဒီးယူာ်ထီၣ်အစု,ဒီးမၤန့ၢ်ဝဲ,ဒီးကဲထီၣ်က့ၤနီၣ်ထိးဘိလၢအစုပူၤ), 5ဒ်သိးအဝဲသ့ၣ်ကနာ်ဝဲလၢယွၤ,အပၢ်တဖၣ်အကစၢ်,စီၤအၤဘြၤဟၣ်အကစၢ်,ဒီးစီၤအံၤစဲးအကစၢ်,ဒီးစီၤယၤကိာ်အကစၢ်န့ၣ်လီၣ်ဖျါလံအသးလၢနမဲာ်ညါလံန့ၣ်လီၤ. 6ဒီးယွၤစံးဘၣ်ဒံးအီၤ,ဒၢနုာ်နစုလၢနသးနါပှၢ်အပူၤတက့ၢ်.ဒီးဒၢနုာ်အစုလၢအသးနါပှၢ်အပူၤ,ဒီးထုးထီၣ်ဝဲ,ဒီးကွၢ်ကွၢ်,အစုဆါအၢဒ်မူခိၣ်ဖီအသိးန့ၣ်လီၤ. 7ဒီးစံးဝဲဒၣ်,ဒၢနုာ်က့ၤနစုလၢနသးနါပှၢ်အပူၤတက့ၢ်.ဒီးဒၢနုာ်က့ၤအစုလၢအသးနါပှၢ်အပူၤ,ဒီးထုးထီၣ်က့ၤလၢအသးနါပှၢ်,ဒီးကွၢ်ကွၢ်,ကဲကဒါက့ၤဒ်အညၣ်အသိးန့ၣ်လီၤ. 8ဒီးတၢ်ကမၤအသးလၢအဝဲသ့ၣ်မ့ၢ်တနာ်ဘၣ်နၤ,ဒီးမ့ၢ်တနာ်ဘၣ်တၢ်ပနီၣ်အခီၣ်ထံးတမံၤအကလုၢ်ဒီး,ကနာ်တၢ်ပနီၣ်လၢခံတမံၤအကလုၢ်န့ၣ်လီၤ. 9ဒီးတၢ်ကမၤအသးလၢအဝဲသ့ၣ်တဖၣ်န့ၣ်မ့ၢ်တနာ်စ့ၢ်ကီးဘၣ်တၢ်ပနီၣ်ခံမံၤအံၤ,ဒီးတကနၣ်ဘၣ်နကလုၢ်ဘၣ်ဒီး,နဘၣ်မၤန့ၢ်ထံလၢထံမိၢ်ပှၢ်အပူၤ,ဒီးလူလီၤလၢခိလီၤ.ဒီးထံလၢနမၤန့ၢ်လၢထံမိၢ်ပှၢ်အပူၤန့ၣ်ကကဲထီၣ်တၢ်သွံၣ်လၢခိလီၤ. 10ဒီးစီၤမိၤရှ့စံးဘၣ်ယွၤ,ပျဲလၢ်တက့ၢ်,ကစၢ်ဧၢ,လၢသီမ့ၢ်ဂ့ၤ,လၢနကတိၤတၢ်ဒီးနကုၢ်နပှၤအလီၢ်ခံမ့ၢ်ဂ့ၤ,ယတမ့ၢ်ဘၣ်ပှၤကတိၤတၢ်သ့ဘၣ်.အဂ့ၢ်ဒ်အံၤ,ယဲဒၣ်အံၤယထးခိၣ်ဃၢ,ဒီးယပျ့ၤဃၢလီၤ. 11ဒီးယွၤစံးဘၣ်အီၤ,မ့ၢ်မတၤတ့ပှၤကညီအထးခိၣ်ဒီးမ့ၢ်မတၤတ့ပှၤတအုၣ်,ပှၤနၢ်တအၢ,ပှၤထံၣ်တၢ်သ့,ဒီးပှၤမဲာ်ဘျီၣ်န့ၣ်တဂၤလဲၣ်.ယၤ,ယွၤတမ့ၢ်ဘၣ်ဧါ. 12ဒီးခဲကနံၣ်အံၤလဲၤတၢ်တက့ၢ်.ဒီးယကအိးထီၣ်နထးခိၣ်,ဒီးနကကတိၤတၢ်ဒ်လဲၣ်ဒ်လဲၣ်န့ၣ်,ယကသိၣ်လိနၤလီၤ. 13ဒီးစံးဝဲဒၣ်,ကစၢ်ဧၢ,မၢလီၤလၢ်ပှၤလၢနကမၢလီၤအီၤတက့ၢ်. 14ဒီးယွၤအသးထီၣ်ကဲၤထီၣ်ဘၣ်စီၤမိၤရှ့,ဒီးစံးဝဲဒၣ်,ပှၤလ့ၤဝံဖိစီၤအၤဟရိၣ်မ့ၢ်နဒီပုၢ်ဝဲၢ်န့ၣ်,တမ့ၢ်ဘၣ်ဧါ.ယသ့ၣ်ညါလၢအဝဲဒၣ်ကတိၤတၢ်သ့လီၤ.ဒီးကွၢ်ကွၢ်,ဟဲထီၣ်သဂၢၢ်နၤစ့ၢ်ကီး,ဒီးတုၤအထံၣ်ဘၣ်နၤဒီး,အသူၣ်ကခုအသးကခုလီၤ.ဒီးနဘၣ်ကတိၤတၢ်ဒီးအီၤ,ဒီးပာ်တၢ်ကတိၤလၢအထးခိၣ်,ဒီးယကအိၣ်ဒီးနထးခိၣ်,ဒီးအဝဲဒၣ်အထးခိၣ်,ဒီးသုကမၤဒ်လဲၣ်ဒ်လဲၣ်န့ၣ်,ယကသိၣ်လိသုလီၤ. 15ဒီးနဘၣ်ကတိၤတၢ်ဒီးအီၤ,ဒီးပာ်တၢ်ကတိၤလၢအထးခိၣ်,ဒီးယကအိၣ်ဒီးနထးခိၣ်,ဒီးအဝဲဒၣ်အထးခိၣ်,ဒီးသုကမၤဒ်လဲၣ်ဒ်လဲၣ်န့ၣ်,ယကသိၣ်လိသုလီၤ. 16ဒီးအဝဲဒၣ်န့ၣ်ကကတိၤတၢ်ဒီးပှၤဂီၢ်မုၢ်လၢနဂီၢ်,ဒီးအဝဲဒၣ်န့ၣ်ကအိၣ်လၢနဂီၢ်လၢထးခိၣ်အလီၢ်,ဒီးနဲဒၣ်နကအိၣ်လၢအဂီၢ်လၢယွၤအလီၢ်လီၤ. 17ဒီးနဘၣ်ဟံးန့ၢ်နီၣ်ထိးဘိအံၤလၢနစုပူၤ,ဒီးနကမၤတၢ်လီၤလးတဖၣ်လၢအီၤလီၤ. 18ဒီးစီၤမိၤရှ့လဲၤတၢ်ဒီးက့ၤက့ၤဝဲဆူအမံၤပှၢ်စီၤယံးသရိၤအအိၣ်,ဒီးစံးဘၣ်အီၤ,ပျဲဟးထီၣ်ယၤ,ဒီးပျဲက့ၤက့ၤယၤဆူယဒီပုၢ်ဝဲၢ်အအိၣ်လၢအဲၤကူပတူးအပူၤတက့ၢ်.ဒီးမ့ၢ်အမူဒံးဧါန့ၣ်ယကထံၣ်ဘၣ်လီၤ.ဒီးစီၤယံးသရိၤစံးဘၣ်စီၤမိၤရှ့,လဲၤတၢ်မုာ်မုာ်တက့ၢ်. 19ဒီးယွၤစံးဘၣ်စီၤမိၤရှ့လၢမံးဒယၣ်အပူၤန့ၣ်,လဲၤတၢ်,ဒီးက့ၤက့ၤဆူအဲၤကူပတူးအပူၤတက့ၢ်.အဂ့ၢ်ဒ်အံၤ,ပှၤလၢအဃုနသးသမူန့ၣ်သံလံခဲလၢာ်လံ. 20ဒီးစီၤမိၤရှ့ဟံးန့ၢ်အမါ,ဒီးအဖိခွါတဖၣ်,ဒီးဒုးဒိးအီၤလၢကသ့ၣ်ယီၤ,ဒီးက့ၤက့ၤဝဲဆူကီၢ်အဲၤကူပတူးလီၤ.ဒီးစီၤမိၤရှ့ဟံးန့ၢ်ယွၤအနီၣ်ထိးဘိလၢအစုပူၤလီၤ. 21ဒီးယွၤစံးဘၣ်စီၤမိၤရှ့,တုၤနလဲၤတၢ်ဒ်သိးနကက့ၤက့ၤဆူအဲၤကူပတူးန့ၣ်ဒီး,ကွၢ်,ကယဲၢ်တၢ်လီၤလးအပနီၣ်လၢယပာ်လၢနစုပူၤန့ၣ်,မၤအီၤလၢဖၤရိၤအမဲာ်ညါတက့ၢ်.ဒီးယကဒုးဆူၣ်ထီၣ်အသး,ဒီးတပျၢ်ဘၣ်ပှၤဂီၢ်မုၢ်ဘၣ်. 22ဒီးနဘၣ်စံးဘၣ်ဖၤရိၤ,ယွၤစံးဒ်အံၤ,အံၣ်စရ့လးမ့ၢ်ယဖိခွါ,ယဖိဝဲၢ်ကိလီၤ. 23ဒီးယစံးဘၣ်နၤ,ပျၢ်ယဖိခွါဒ်သိးအကမၤယတၢ်န့ၣ်တက့ၢ်.ဒီးနမ့ၢ်ဂ့ၢ်လိာ်,ဒီးတပျၢ်ဘၣ်အီၤဒီး,ကွၢ်ကွၢ်,ယကမၤသံနဖိခွါ,နဖိဝဲၢ်ကိလီၤ. 24ဒီးတၢ်မၤအသးလၢကျဲပူၤ,ဖဲအိၣ်ဘှံးအလီၢ်န့ၣ်ယွၤသဂၢၢ်အီၤ,ဒီးဃုမၤသံအီၤလီၤ. 25ဒီးနီၢ်စံးဖိရၤဟံးန့ၢ်လၢၢ်ဖိ,ဒီးကူးတရံးအဖိခွါအတၢ်အခိၣ်ဖံး,ဒီးတ့ၢ်လီၤလၢအခီၣ်ထံး,ဒီးစံးဝဲဒၣ်,မ့ၢ်မးနမ့ၢ်တၢ်သွံၣ်အတလးမူးပိာ်ခွါတဂၤလၢယဂီၢ်လီၤ. 26ဒီးပျၢ်အီၤလီၤ.တုၤနုၤတစုနီၢ်စံးဖိရၤစံးဝဲဒၣ်,နမ့ၢ်တၢ်သွံၣ်အတလးမူးပိာ်ခွါလၢတၢ်ကူးတရံးအဃိလီၤ. 27ဒီးယွၤစံးဘၣ်စီၤအၤဟရိၣ်,လဲၤသဂၢၢ်စီၤမိၤရှ့လၢပှၢ်မုၢ်ကနၢအပူၤတက့ၢ်.ဒီးအဝဲဒၣ်လဲၤသဂၢၢ်အီၤလၢကစၢ်အကစၢၢ်,ဒီးနၢမူအီၤလီၤ. 28ဒီးစီၤမိၤရှ့စံၣ်တဲၤတဲလီၤစီၤအၤဟရိၣ်လၢယွၤလၢအမၢလီၤအီၤအတၢ်ကတိၤခဲလၢာ်,ဒီးတၢ်လီၤလးလၢအမၤလိာ်တ့ၢ်ခဲလၢာ်လီၤ. 29ဒီးစီၤမိၤရှ့ဒီးစီၤအၤဟရိၣ်လဲၤဒုးအိၣ်ဖှိၣ်ရိဖှိၣ်ပှၤအံၣ်စရ့လးဖိအသူၣ်က့သးပှၢ်ခဲလၢာ်လီၤ. 30ဒီးစီၤအၤဟရိၣ်စံၣ်တဲၤတဲလီၤတၢ်ကတိၤလၢယွၤစံးဘၣ်စီၤမိၤရှ့ခဲလၢာ်,ဒီးမၤတၢ်လီၤလးတဖၣ်လၢပှၤဂီၢ်မုၢ်အမဲာ်ညါလီၤ. 31ဒီးပှၤဂီၢ်မုၢ်စူၢ်က့ၤနာ်က့ၤဝဲ,ဒီးနၢ်ဟူဝဲလၢယွၤအိၣ်သကိးလံပှၤအံၣ်စရ့လးဖိ,ဒီးကွၢ်လံအတၢ်နးတၢ်ဖှီၣ်လံဒီး,ဆုးလီၤအခိၣ်,ဒီးဘူၣ်တၢ်ဘါတၢ်လီၤ.
Copyright information for
KswSKMB