‏ Exodus 40

1ဒီးယွၤကတိၤတၢ်ဒီးစီၤမိၤရှ့ဒီးစံးဝဲဒၣ်, 2လါအခီၣ်ထံး,လါထီၣ်တနံၤန့ၣ်နဘၣ်သူၣ်ထီၣ်တၢ်အိၣ်အလီၢ်,တၢ်အိၣ်ဖှိၣ်အဒဲလီၤ.

3ဒီးနဘၣ်ပာ်တၢ်အၢၣ်လီၤအီလီၤအတလါလၢအပူၤ,ဒီးကျၢၢ်ဘၢတလါန့ၣ်ဒီးယၣ်ဘျးထီၣ်အသးလီၤ.

4ဒီးနဘၣ်ဟဲစိာ်နုာ်စီၢ်နီၤခိၣ်,ဒီးကတဲာ်ကတီၤတၢ်လၢအအိၣ်ဝဲလၢအလိၤ,ဒီးနဘၣ်ဟဲစိာ်နုာ်မ့ၣ်အူဒၢမိၢ်ပှၢ်,ဒီးဒွဲၣ်ထီၣ်အမ့ၣ်အူဒၢတဖၣ်, 5ဒီးနဘၣ်ပာ်တၢ်လုၢ်လီၢ်ထူလၢတၢ်ဆိၣ်ကဲၤတၢ်နၢမူအဂီၢ်လၢတၢ်အၢၣ်လီၤအီလီၤအတလါမဲာ်ညါ,ဒီးဘျးထီၣ်ယၣ်နီၣ်ကျၢၢ်ဘၢတၢ်လၢတၢ်အိၣ်အလီၢ်အကျဲစၢၤန့ၣ်လီၤ.

6ဒီးနဘၣ်ပာ်တၢ်လုၢ်လီၢ်ဆိၣ်ကဲၤမ့ၣ်အူလၢတၢ်အိၣ်အလီၢ်,တၢ်အိၣ်ဖှိၣ်အဒဲအကျဲစၢၤအမဲာ်ညါလီၤ.

7ဒီးနဘၣ်ပာ်သရာ်လၢတၢ်အိၣ်ဖှိၣ်အဒဲဒီးတၢ်လုၢ်လီၢ်အဘၢၣ်စၢၤ,ဒီးနဘၣ်ပာ်ထံလၢအပူၤလီၤ.

8ဒီးနဘၣ်သူၣ်ထီၣ်ဂၢၤဝးတရံး,ဒီးဘျးထီၣ်ယၣ်နီၣ်ကျၢၢ်ဘၢတၢ်ဖဲဂၢၤအပဲတရီန့ၣ်လီၤ.

9ဒီးနဘၣ်ဟံးန့ၢ်သိဖှူတၢ်,ဒီးဖှူဒဲဒီးကယဲၢ်တၢ်လၢအအိၣ်လၢအပူၤ,ဒီးမၤစီဆှံအီၤ,ဒီးအတၢ်ဖိတၢ်လံၤခဲလၢာ်,ဒီးကကဲထီၣ်တၢ်စီဆှံလီၤ.

10ဒီးနဘၣ်ဖှူတၢ်လုၢ်လီၢ်ဆိၣ်ကဲၤမ့ၣ်အူ,ဒီးအတၢ်ဖိတၢ်လံၤခဲလၢာ်,ဒီးမၤစီဆှံတၢ်လုၢ်လီၢ်,ဒီးကကဲထီၣ်တၢ်လုၢ်လီၢ်စီဆှံကတၢၢ်လီၤ.

11ဒီးနဘၣ်ဖှူသရာ်ဒီးအခီၣ်,ဒီးမၤစီဆှံအီၤလီၤ.

12ဒီးနဘၣ်ဒုးဟဲစီၤအၤဟရိၣ်ဒီးအဖိခွါတဖၣ်ဆူတၢ်အိၣ်အလီၢ်,တၢ်အိၣ်ဖှိၣ်အဒဲအကျဲစၢၤ,ဒီးသ့စီအီၤဒီးထံလီၤ. 13ဒီးနဘၣ်ဒုးသိးထီၣ်စီၤအၤဟရိၣ်လၢတၢ်အကူအသိးစီဆှံ,ဒီးဖှူအီၤ,ဒီးမၤစီဆှံအီၤ,ဒ်သိးအကမၤယတၢ်လၢပှၤလုၢ်တၢ်အဒိၣ်အတၢ်မၤလီၤ.

14ဒီးနဘၣ်ဒုးဟဲထီၣ်အဖိခွါတဖၣ်,ဒီးဒုးသိးအီၤလၢဆ့တဖၣ်လီၤ. 15ဒီးနဘၣ်ဖှူအီၤဒ်နဖှူအပၢ်အသိးဒ်သိးအကမၤယတၢ်လၢပှၤလုၢ်တၢ်အဒိၣ်အတၢ်မၤလီၤ.အဂ့ၢ်ဒ်အံၤ,အတၢ်ဖှူန့ၣ်ကကဲထီၣ်ပှၤလုၢ်တၢ်အဒိၣ်အတၢ်မၤအထူအယိာ်လၢအဝဲသ့ၣ်အဂီၢ်လီၤလၢအစၢၤအသွဲၣ်အစိၤစိၤအဃၣ်ဃၣ်လီၤ.

16ဒ်န့ၣ်အသိးစီၤမိၤရှ့မၤဝဲလီၤ.ဒ်ကယဲၢ်တၢ်လၢယွၤမၤလိာ်အီၤအသိးန့ၣ်မၤဝဲဒ်န့ၣ်အသိးလီၤ.

17ဒီးတၢ်မၤအသးလၢခံနံၣ်တနံၣ်လၢလါခီၣ်ထံး,လါထီၣ်တနံၤန့ၣ်တၢ်အိၣ်အလီၢ်ဘၣ်တၢ်သူၣ်ထီၣ်အီၤလီၤ.

18ဒီးစီၤမိၤရှ့သူၣ်ထီၣ်တၢ်အိၣ်အလီၢ်,ဒီးမၤကျၢၤအခီၣ်,ဒီးပာ်ဆၢထၢၣ်အသ့ၣ်ဘ့ၣ်ဘၣ်,ဒီးဒၢနုာ်အနီၣ်ဘိ,ဒီးသူၣ်ထီၣ်အထူၣ်လီၤ.

19ဒီးသလၣ်ထီၣ်ဒဲလၢတၢ်အိၣ်အလီၢ်အဖီခိၣ်,ဒီးပာ်တၢ်ကျၢၢ်ဘၢဒဲလၢအဖီခိၣ်,ဒ်ယွၤမၤလိာ်စီၤမိၤရှ့အသိးန့ၣ်လီၤ. 20ဒီးဟံးန့ၢ်တၢ်အၢၣ်လီၤအီလီၤဒီးဒၢနုာ်အီၤလၢတလါပူၤ,ဒီးပာ်နီၣ်ယိးဘိလၢတလါအလိၤဒီးပာ်ထီၣ်တၢ်မၤပူၤဖျဲးအလီၢ်လၢတလါအဖီခိၣ်လီၤ.

21ဒီးဟဲစိာ်တလါဆူတၢ်အိၣ်အလီၢ်အပူၤ,ဒီးဘျးထီၣ်တၢ်ကျၢၢ်ဘၢအယၣ်,ဒီးကျၢၢ်ဘၢတၢ်အၢၣ်လီၤအီလီၤအတလါ,ဒ်ယွၤမၤလိာ်စီၤမိၤရှ့အသိးန့ၣ်လီၤ.

22ဒီးပာ်စီၢ်နီၤခိၣ်လၢတၢ်အိၣ်ဖှိၣ်အဒဲပူၤလၢဒဲအကပၤလၢကလံၤစိးတခီ,လၢယၣ်ဘျးထီၣ်အသးလၢခိလီၤ. 23ဒီးပာ်ကတဲာ်ကတီၤကိၣ်လၢအဖီခိၣ်လၢယွၤအမဲာ်ညါ,ဒ်ယွၤမၤလိာ်စီၤမိၤရှ့အသိးန့ၣ်လီၤ.

24ဒီးပာ်မ့ၣ်အူဒၢမိၢ်ပှၢ်လၢတၢ်အိၣ်ဖှိၣ်အဒဲပူၤ,သဃီၤဒီးစီၢ်နီၤခိၣ်လၢဒဲအကပၤလၢကလံၤထံးတခီလီၤ.

25ဒီးဒွဲၣ်ထီၣ်မ့ၣ်အူဒၢလၢယွၤအမဲာ်ညါ,ဒ်ယွၤမၤလိာ်စီၤမိၤရှ့အသိးန့ၣ်လီၤ.

26ဒီးပာ်တၢ်လုၢ်လီၢ်ထူလၢတၢ်အိၣ်ဖှိၣ်အဒဲပူၤလၢယၣ်ဘျးထီၣ်အသးအမဲာ်ညါလီၤ. 27ဒီးဆိၣ်ကဲၤတၢ်နၢမူလၢအဖီခိၣ်,ဒ်ယွၤမၤလိာ်စီၤမိၤရှ့အသိးန့ၣ်လီၤ.

28ဒီးဘျးထီၣ်ယၣ်နီၣ်ကျၢၢ်ဘၢတၢ်လၢတၢ်အိၣ်အလီၢ်အကျဲစၢၤန့ၣ်လီၤ.

29ဒီးပာ်တၢ်လုၢ်လီၢ်မ့ၣ်အူလၢတၢ်အိၣ်အလီၢ်,တၢ်အိၣ်ဖှိၣ်အဒဲအကျဲစၢၤအဃၢၤ,ဒီးလုၢ်တၢ်လုၢ်မ့ၣ်အူဒီးတၢ်မၤဘူၣ်လၢအဖီခိၣ်,ဒ်ယွၤမၤလိာ်စီၤမိၤရှ့အသိးန့ၣ်လီၤ.

30ဒီးပာ်သရာ်လၢတၢ်အိၣ်ဖှိၣ်အဒဲဒီးတၢ်လုၢ်လီၢ်အဘၢၣ်စၢၤ,ဒီးပာ်ထံလၢအပူၤ,ဒ်သိးပှၤကသ့စီတၢ်လီၤ. 31ဒီးစီၤအၤဟရိၣ်,ဒီးအဖိခွါတဖၣ်သ့စီအစုဒီးအခီၣ်ဖဲန့ၣ်လီၤ. 32တုၤအလဲၤနုာ်လၢတၢ်အိၣ်ဖှိၣ်အဒဲပူၤ,ဒီးတုၤအလဲၤဘူးဒီးတၢ်လုၢ်အလီၢ်ဒီး,အဝဲသ့ၣ်တဖၣ်န့ၣ်သ့စီတၢ်ဒ်ယွၤမၤလိာ်စီၤမိၤရှ့အသိးန့ၣ်လီၤ.

33ဒီးသူၣ်ထီၣ်ဂၢၤအိၣ်ဝးတရံးတၢ်အိၣ်အလီၢ်ဒီးတၢ်လုၢ်အလီၢ်,ဒီးဘျးထီၣ်ဂၢၤအပဲတရီအယၣ်ကျၢၢ်ဘၢတၢ်လီၤ.ဒီးစီၤမိၤရှ့မၤဝံၤတၢ်မၤန့ၣ်လီၤ.

34တုၤနုၤတစုတၢ်အၢၣ်ကျၢၢ်ဘၢတၢ်အိၣ်ဖှိၣ်အဒဲ,ဒီးယွၤအလၤကပီၤပှဲၤထီၣ်တၢ်အိၣ်အလီၢ်ပူၤလီၤ.

35ဒီးစီၤမိၤရှ့လဲၤနုာ်လၢတၢ်အိၣ်ဖှိၣ်အဒဲပူၤတသ့ဘၣ်.အဂ့ၢ်ဒ်အံၤ,တၢ်အၢၣ်အိၣ်ဝဲဆိးဝဲလၢအဖီခိၣ်,ဒီးယွၤအလၤကပီၤမၤပှဲၤထီၣ်တၢ်အိၣ်အလီၢ်လီၤ.

36ဒီးတုၤတၢ်အၢၣ်ကစီၤထီၣ်ကွံာ်လၢတၢ်အိၣ်အလီၢ်အဖီခိၣ်ဒီး,ပှၤအံၣ်စရ့လးဖိလဲၤတၢ်လၢအတၢ်လဲၤတဖၣ်ခဲလၢာ်လီၤ.

37ဒီးတၢ်အၢၣ်န့ၣ်မ့ၢ်တကစီၤထီၣ်ကွံာ်ဘၣ်ဒီး,တလဲၤဘၣ်တုၤမုၢ်နံၤလၢအကစီၤထီၣ်ဘၣ်လီၤ.

38အဂ့ၢ်ဒ်အံၤ,ယွၤအတၢ်အၢၣ်အိၣ်ဝဲလၢတၢ်အိၣ်အလီၢ်လၢမုၢ်ဆါ,ဒီးမ့ၣ်အူအိၣ်ဝဲလၢအဖီခိၣ်လၢမုၢ်နၤလၢပှၤအံၣ်စရ့လးဖိအဟံၣ်ဖိခဲလၢာ်အမဲာ်ညါ,ဖဲအလဲၤတၢ်တပူၤလၢ်လၢ်လီၤ.