Exodus 8
1ဒီးယွၤစံးဘၣ်စီၤမိၤရှ့,ဒီးစံးဝဲဒၣ်,လဲၤဆူဖၤရိၤအအိၣ်ဒီးစံးဘၣ်အီၤ,ယွၤစံးဒ်အံၤ,ပျၢ်ယပှၤဂီၢ်မုၢ်ဒ်သိးအကမၤယတၢ်တက့ၢ်. 2ဒီးပျၢ်အီၤန့ၣ်နမ့ၢ်ဂ့ၢ်လိာ်ဒီး,ကွၢ်ကွၢ်,ယကတီၢ်နထံနကီၢ်ခဲလၢာ်လၢဒ့ၣ်ဧိၤကွီၣ်ဧိၤလီၤ. 3ဒီးထံမိၢ်ပှၢ်ကဖှံထီၣ်ဒ့ၣ်ဧိၤကွီၣ်ဧိၤ,လၢအကဟဲထီၣ်,ဒီးကလဲၤနုာ်လၢနဟံၣ်ပူၤ,ဒီးလၢနမံလီၢ်အဒၢးပူၤ,ဒီးလၢနလီၢ်မံအဖီခိၣ်,ဒီးလၢနခ့နပှၤတဖၣ်အဟံၣ်ပူၤ,ဒီးလၢနပှၤဂီၢ်မုၢ်အလိၤ,ဒီးလၢနဖၣ်ကပူၤတဖၣ်အပူၤ,ဒီးလၢနစံၢ်ကိၣ်အကျိးတဖၣ်အပူၤလီၤ. 4ဒီးဒ့ၣ်ဧိၤကွီၣ်ဧိၤန့ၣ်ကဟဲထီၣ်လၢနလိၤ,ဒီးလၢနပှၤဂီၢ်မုၢ်အလိၤ,ဒီးလၢနခ့နပှၤခဲလၢာ်အလိၤလီၤ. 5ဒီးယွၤစံးဘၣ်စီၤမိၤရှ့,စံးဘၣ်စီၤအၤဟရိၣ်,ယူာ်ထီၣ်နစုအိၣ်ဒီးနနီၣ်ထိးဘိလၢထံကျိအဖီခိၣ်,လၢထံမိၢ်ပှၢ်အဖီခိၣ်,ဒီးလၢကမါတဖၣ်အဖီခိၣ်,ဒီးဒုးဟဲထီၣ်ဒ့ၣ်ဧိၤကွီၣ်ဧိၤလၢကီၢ်အဲၤကူပတူးအဖီခိၣ်န့ၣ်တက့ၢ်. 6ဒီးစီၤအၤဟရိၣ်ယူာ်ထီၣ်အစုလၢအဲၤကူပတူးအထံဧိၤနိဧိၤအဖီခိၣ်,ဒီးဒ့ၣ်ဧိၤကွီၣ်ဧိၤဟဲထီၣ်,ဒီးမၤဘံးမၤဘၢကီၢ်အဲၤကူပတူးလီၤ. 7ဒီးပှၤကွဲးလံာ်မၤဝဲဒ်န့ၣ်လၢအတၢ်မၤကဒါပမဲာ်ဒီးဒုးဟဲထီၣ်ဒ့ၣ်ဧိၤကွီၣ်ဧိၤလၢကီၢ်အဲၤကူပတူးအဖီခိၣ်လီၤ. 8ဒီးဖၤရိၤကိးန့ၢ်စီၤမိၤရှ့,ဒီးစီၤအၤဟရိၣ်,ဒီးစံးဝဲဒၣ်,ဃ့ကညးယွၤလၢအကဒုးဟးထီၣ်ကွံာ်ဒ့ၣ်ဧိၤကွီၣ်ဧိၤလၢယအိၣ်,ဒီးလၢယပှၤဂီၢ်မုၢ်အအိၣ်တက့ၢ်.ဒီးယကပျၢ်ပှၤဂီၢ်မုၢ်ဒ်သိးအကလုၢ်တၢ်လၢယွၤလီၤ. 9ဒီးစီၤမိၤရှ့စံးဘၣ်ဖၤရိၤ,အိၣ်ဒီးတၢ်အလၤကပီၤလၢယဖီခိၣ်တက့ၢ်.ယဘၣ်ဃ့ကညးတၢ်လၢနဂီၢ်,ဒီးလၢနခ့နပှၤအဂီၢ်,ဒီးလၢနပှၤဂီၢ်မုၢ်အဂီၢ်,ဒ်သိးတၢ်ကမၤဟးဂီၤကွံာ်ဒ့ၣ်ဧိၤကွီၣ်ဧိၤလၢနလိၤ,ဒီးလၢနဟံၣ်တဖၣ်န့ၣ်,ဒီးဒ်သိးအကအိၣ်ထဲလၢထံမိၢ်ပှၢ်အပူၤဧိၤန့ၣ်,အကတီၢ်ဖဲလဲၣ်. 10ဒီးစံးဝဲဒၣ်,ခဲဂီၤကိာ်လီၤ.ဒီးစံးဝဲဒၣ်,မ်တၢ်မၤအသးဒ်နစံးတၢ်အသိး,ဒ်သိးနကသ့ၣ်ညါလၢတၢ်ဒ်ယွၤပကစၢ်အသိးတအိၣ်ဘၣ်လီၤ. 11ဒီးဒ့ၣ်ဧိၤကွီၣ်ဧိၤကဟးထီၣ်ကွံာ်လၢနလိၤ,ဒီးလၢနဟံၣ်တဖၣ်,ဒီးလၢနခ့နပှၤတဖၣ်,ဒီးလၢနပှၤဂီၢ်မုၢ်,ဒီးကအိၣ်လီၤတဲာ်ထဲလၢထံမိၢ်ပှၢ်အပူၤဧိၤလီၤ. 12ဒီးစီၤမိၤရှ့,ဒီးစီၤအၤဟရိၣ်ဟးထီၣ်ကွံာ်လၢဖၤရိၤအအိၣ်,ဒီးစီၤမိၤရှ့ကိးထီၣ်လၢယွၤလၢဒ့ၣ်ဧိၤကွီၣ်ဧိၤအဃိလၢအပာ်ဝဲလၢဖၤရိၤအဂီၢ်လီၤ. 13ဒီးယွၤမၤဝဲဒ်စီၤမိၤရှ့အတၢ်ကတိၤအသိးန့ၣ်ဒီးဒ့ၣ်ဧိၤကွီၣ်ဧိၤသံကွံာ်လၢဟံၣ်ပူၤ,ဒီးလၢအဂၢၤပူၤ,ဒီးလၢခိလီၤ. 14ဒီးပှၤထၢဖှိၣ်အီၤတပူတပူ,ဒီးထံဧိၤကီၢ်ဧိၤနၢအုၣ်ဝဲလီၤ. 15ဒီးဖၤရိၤထံၣ်တၢ်သါထီၣ်ဘၣ်က့ၤတထံၣ်ဃီ,မၤကိၤအသး,ဒီးတကနၣ်ဘၣ်အဝဲသ့ၣ်အကလုၢ်ဘၣ်,ဒ်ယွၤစံးဝဲအသိးန့ၣ်လီၤ. 16ဒီးယွၤစံးဘၣ်စီၤမိၤရှ့,စံးဘၣ်စီၤအၤဟရိၣ်,ယူာ်ထီၣ်နနီၣ်ထိးဘိ,ဒီးတီၢ်ဟီၣ်ခိၣ်အကမူၣ်,ဒ်သိးအကကဲထီၣ်ဃးသူဃးလါလၢကီၢ်အဲၤကူပတူးဒီဘ့ၣ်ညါအပူၤန့ၣ်တက့ၢ်. 17ဒီးမၤဝဲဒ်န့ၣ်,ဒီးစီၤအၤဟရိၣ်ယူာ်ထီၣ်အစုအိၣ်ဒီးအနီၣ်ထိးဘိ,ဒီးတီၢ်ဟီၣ်ခိၣ်အကမူၣ်,ဒီးအတၢ်ကဲထီၣ်ဃးသူဃးလါလၢပှၤကညီအလိၤ,ဒီးလၢဆၣ်ဖိကီၢ်ဖိအလိၤလီၤ.ဟီၣ်ခိၣ်အကမူၣ်လၢကီၢ်အဲၤကူပတူးဒီကီၢ်ညါကဲထီၣ်ဃးသူဃးလါလီၤ. 18ဒီးပှၤကွဲးလံာ်မၤဝဲဒ်န့ၣ်လၢအတၢ်မၤကဒါပမဲာ်ဒ်သိးအကဒုးကဲထီၣ်ဃးသူဃးလါ,ဒီးမၤဝဲတသ့ဘၣ်.ဒီးဃးသူဃးလါအိၣ်ဝဲလၢပှၤကညီအလိၤ,ဒီးဆၣ်ဖိကီၢ်ဖိအလိၤလီၤ. 19ဒီးပှၤကွဲးလံာ်စံးဘၣ်ဖၤရိၤ,တၢ်အံၤတမံၤမ့ၢ်ယွၤအစုမုၢ်လီၤ.ဒီးဖၤရိၤအသးဆူၣ်ထီၣ်ဒီးတကနၣ်ဘၣ်အကလုၢ်ဘၣ်,ဒ်ယွၤစံးဝဲအသိးန့ၣ်လီၤ. 20ဒီးယွၤစံးဘၣ်စီၤမိၤရှ့,ဂဲၤဆၢထၢၣ်ခဲဂီၤကိာ်ဂီၤဂီၤ,ဒီးဆၢထၢၣ်လၢဖၤရိၤအမဲာ်ညါ,(ကွၢ်ကွၢ်,ဟဲဝဲဆူထံနံၤ)ဒီးစံးဘၣ်အီၤ,ယွၤစံးဒ်အံၤ,ပျၢ်ယပှၤဂီၢ်မုၢ်ဒ်သိးအကမၤယတၢ်တက့ၢ်. 21နမ့ၢ်တပျၢ်ဘၣ်ယပှၤဂီၢ်မုၢ်ဒီး,ကွၢ်ကွၢ်,ယကမၢတၢ်အဖုတဖၣ်ဟဲလီၤလၢနလိၤ,ဒီးနခ့နပှၤအလိၤ,ဒီးနပှၤဂီၢ်မုၢ်အလိၤဒီးလၢနဟံၣ်တဖၣ်အပူၤလီၤ.ဒီးပှၤအဲၤကူပတူးဖိအဟံၣ်ပူၤကပှဲၤဒီးတၢ်အဖုတဖၣ်,ဒီးဟီၣ်ခိၣ်လၢအအိၣ်လၢအဖီခိၣ်စ့ၢ်ကီးလီၤ. 22ဒီးတၢ်လၢမုၢ်တနံၤန့ၣ်ယကမၤလီၤဆီကီၢ်ကိရှ့ၣ်ဖဲယပှၤဂီၢ်မုၢ်အိၣ်လၢအပူၤ,ဒ်သိးတၢ်အဖုတဖၣ်အသုတအိၣ်ဖဲန့ၣ်တဂ့ၤ,ဒ်သိးနကသ့ၣ်ညါလၢယမ့ၢ်ယွၤလၢဟီၣ်ခိၣ်ချၢအသးကံၢ်ပူၤန့ၣ်လီၤ. 23ဒီးယကပာ်တၢ်ပှ့ၤက့ၤတၢ်လၢယပှၤဂီၢ်မုၢ်ဒီးနပှၤဂီၢ်မုၢ်အဘၢၣ်စၢၤလီၤ.ခဲဂီၤကိာ်တၢ်လီၤလးအပနီၣ်အံၤကကဲထီၣ်လီၤ. 24ဒီးယွၤမၤဝဲဒ်န့ၣ်,ဒီးတၢ်အဖုတဖၣ်ဂီၢ်မုၢ်ဟဲနုာ်လၢဖၤရိၤအဟံၣ်ပူၤ,ဒီးလၢအခ့အပှၤအဟံၣ်တဖၣ်အပူၤ,ဒီးလၢကီၢ်အဲၤကူပတူးဒီဘ့ၣ်ညါအပူၤလီၤ.ဒီးထံဧိၤကီၢ်ဧိၤဒီဘ့ၣ်ညါန့ၣ်ဟးဂီၤဝဲလၢတၢ်တဖုန့ၣ်အမဲာ်ညါလီၤ. 25ဒီးဖၤရိၤကိးက့ၤစီၤမိၤရှ့ဒီးစီၤအၤဟရိၣ်,ဒီးစံးဝဲဒၣ်,လဲၤလုၢ်တၢ်လၢသုကစၢ်လၢကီၢ်အံၤအပူၤတက့ၢ်. 26ဒီးစီၤမိၤရှ့စံးဝဲဒၣ်,တၢ်တစံၣ်ညီၣ်ပာ်ဘၣ်လၢပကမၤဒ်န့ၣ်ဘၣ်,အဂ့ၢ်ဒ်အံၤ,ပကလုၢ်ပှၤအဲၤကူပတူးဖိအတၢ်သးဘၣ်အၢန့ၣ်လၢယွၤပကစၢ်လီၤ.ကွၢ်ကွၢ်,ပကလုၢ်ပှၤအဲၤကူပတူးဖိအတၢ်သးဘၣ်အၢလၢအမဲာ်ညါ,ဒီးအဝဲသ့ၣ်တဖၣ်န့ၣ်ကကွံာ်ပှၤလၢလၢၢ်တမ့ၢ်ဘၣ်ဧါ. 27ပကလဲၤလၢပှၢ်လၢ်ကျါသၢနံၤကျဲ,ဒီးလုၢ်တၢ်လၢယွၤပကစၢ်,ဒ်အကမၤလိာ်ပှၤအသိးန့ၣ်လီၤ. 28ဒီးဖၤရိၤစံးဝဲဒၣ်,ယကပျၢ်သု,ဒ်သိးသုကလုၢ်တၢ်လၢယွၤသုကစၢ်လၢပှၢ်လၢ်ကျါလီၤ.ဘၣ်ဆၣ်ဒီးသုတလဲၤဘၣ်ယံၤယံၤကလဲာ်ဘၣ်,ဃ့ကညးတၢ်လၢယဂီၢ်တက့ၢ်. 29ဒီးစီၤမိၤရှ့စံးဝဲဒၣ်,ကွၢ်ကွၢ်,ယကဟးထီၣ်လၢနအိၣ်,ဒီးယကဃ့ကညးယွၤ,ဒ်သိးတၢ်အဖုတဖၣ်ကဟးထီၣ်ကွံာ်လၢဖၤရိၤအလိၤ,ဒီးလၢအခ့အပှၤအလိၤ,ဒီးလၢပှၤဂီၢ်မုၢ်အလိၤခဲဂီၤကိာ်လီၤ.ဘၣ်ဆၣ်ဒီးမ်ဖၤရိၤအသုတမၤလၢၤဒီးတၢ်လီတၢ်ဝ့ၤလၢအတပျၢ်ဘၣ်ပှၤဂီၢ်မုၢ်ဒ်သိးအကလဲၤလုၢ်တၢ်လၢယွၤန့ၣ်တဂ့ၤ. 30ဒီးစီၤမိၤရှ့ဟးထီၣ်လၢဖၤရိၤအအိၣ်,ဒီးဃ့ကညးတၢ်လၢယွၤလီၤ. 31ဒီးယွၤမၤဝဲဒ်စီၤမိၤရှ့အကလုၢ်အသိးန့ၣ်,ဒီးဒုးဟးထီၣ်ကွံာ်တၢ်အဖုတဖၣ်လၢဖၤရိၤအလိၤ,ဒီးလၢအခ့အပှၤအလိၤ,ဒီးလၢအပှၤဂီၢ်မုၢ်အလိၤ,ဒီးတအိၣ်လီၤတဲာ်ဘၣ်နီတဘ့ၣ်ဘၣ်. 32ဒီးဖၤရိၤမၤကိၤအသးအအံၤတစုစ့ၢ်ကီး,ဒီးတပျၢ်ဘၣ်ပှၤဂီၢ်မုၢ်ဘၣ်.
Copyright information for
KswSKMB