Eze 13 | KswSKMB | STEP | ဒီးယွၤအကလုၢ်ဘၣ်ယၤဒီးစံးဝဲဒၣ်,

‏ Ezekiel 13

1 ဒီးယွၤအကလုၢ်ဘၣ်ယၤဒီးစံးဝဲဒၣ်, 2 ပှၤကညီဖိခွါဧၢ,ကတိၤတၢ်လၢဝံအကျိာ်ထီဒါအံၣ်စရ့လးအဝံတဖၣ်လၢအကတိၤတၢ်လၢဝံအကျိာ်,ဒီးစံးလၢပှၤလၢအကတိၤလၢဝံကျိာ်လၢအသးဒၣ်ဝဲအပူၤန့ၣ်,ကနၣ်ယွၤအကလုၢ်တက့ၢ်. 3 ကစၢ်ယွၤစံးဒ်အံၤ,ဝံဟးဂီၤဖိလၢအလူၤအသးဒၣ်ဝဲ,ဒီးထံၣ်တၢ်လၢအတမ့ၢ်ဘၣ်တၢ်န့ၣ်ဘၣ်အဖှီၣ်လီၤ.

4 အံၣ်စရ့လးဧၢ,နဝံတဖၣ်မၤသးဒ်ထွံၣ်မံၤလၢပှၢ်မုၢ်ကနၢအသိးန့ၣ်လီၤ. 5 သုတလဲၤထီၣ်ဘၣ်လၢတၢ်ဘၢၣ်ဖျိအလီၢ်,ဒီးတမၤကရၢဝးတရံးအံၣ်စရ့လးအဟံၣ်,ဒ်သိးအကအိၣ်ကျၢၤလၢတၢ်ဒုးသုးအပူၤလၢယွၤအမုၢ်တနံၤအပူၤဘၣ်.

6 အဝဲသ့ၣ်န့ၣ်ထံၣ်တၢ်ကလီကလီလၢညါခီ,ဒီးဖးတၢ်လၢလီတၢ်,ဒီးယွၤတမၢဘၣ်အီၤဘၣ်.ဘၣ်ဆၣ်ဒီးစံးဝဲ,ယွၤစံးဝဲဒၣ်န့ၣ်လီၤ.ဒီးဒုးမုၢ်လၢ်ပှၤကညီလၢအတၢ်ကတိၤကမၤအသးလီၤ.

7 သုထံၣ်တၢ်ကလီကလီလၢညါခီတမ့ၢ်ဘၣ်ဧါ.သုကတိၤတၢ်လၢဖးတၢ်လၢလီတၢ်အဂ့ၢ်တမ့ၢ်ဘၣ်ဧါ.ဒီးသုစံး,ယွၤစံးဝဲဒၣ်,ဒီးယတကတိၤဘၣ်န့ၣ်တမ့ၢ်ဘၣ်ဧါ.

8 မၤသးဒ်န့ၣ်ဒီးကစၢ်ယွၤစံးဝဲဒၣ်,မ့ၢ်သုကတိၤတၢ်ကလီကလီ,ဒီးထံၣ်တၢ်ကဘျံးကဘျၣ်ဒီး,ကွၢ်ကွၢ်,ယထီဒါသု,ကစၢ်ယွၤစံးဝဲဒၣ်, 9 ဒီးယစုကထီဒါဝံလၢအထံၣ်တၢ်ကလီကလီ,ဒီးဖးတၢ်လၢလီတၢ်လီၤ.တအိၣ်လၢၤဘၣ်လၢယပှၤဂီၢ်မုၢ်အတၢ်အိၣ်ဖှိၣ်အကျါဘၣ်.ဒီးတၢ်တဆဲးလီၤအမံၤလၢအံၣ်စရ့လးအဟံၣ်အလံာ်ပူၤဘၣ်,ဒီးတလဲၤနုာ်ဘၣ်လၢကီၢ်အံၣ်စရ့လးဘၣ်,ဒီးသုကသ့ၣ်ညါလၢယမ့ၢ်ကစၢ်ယွၤလီၤ.

10 အဂ့ၢ်ဒ်အံၤ,မ့ၢ်မးအဂ့ၢ်ဒ်အံၤ,သုလွဲကဒံလွဲကဒါယပှၤဂီၢ်မုၢ်ဒီးစံးတၢ်ဃူတၢ်ဖိးအိၣ်လီၤ,ဒီးတၢ်ဃူတၢ်ဖိးတအိၣ်ဘၣ်.ဒီးပှၤတဂၤမၤထီၣ်တၢ်အဒူၣ်,ဒီးကွၢ်ကွၢ်,ပှၤဂၤတဖၣ်ဖှူဝဲဒီးအီကတ့ၣ်လီၤ.

11 စံးဘၣ်ပှၤလၢအဖှူဝဲလၢအီကတ့ၣ်,လၢအတၢ်ကလီၤပှီၢ်န့ၣ်တက့ၢ်.တၢ်ကဟဲစူၤလုၣ်ဘၢတၢ်,သူၣ်ဖးဒိၣ်တဖၣ်ကလီၤတဲာ်,ဒီးကလံၤမုၢ်ကမၤသ့ၣ်ဖးအီၤလီၤ.

12 ကွၢ်ကွၢ်,တုၤသုတၢ်အဒူၣ်လီၤပှီၢ်ဒီး,ပှၤကစံးဘၣ်သု,တၢ်ဖှူတၢ်လၢသုဖှူန့ၣ်မ့ၢ်အအိၣ်ဖဲလဲၣ်န့ၣ်,တမ့ၢ်ဘၣ်ဧါ. 13 မၤသးဒ်န့ၣ်ဒီးကစၢ်ယွၤစံးဒ်အံၤ,ယကမၤသ့ၣ်ဖးအီၤလၢကလံၤမုၢ်လၢယသးကဲၤထီၣ်,ဒီးတၢ်ကဟဲစူၤလုၣ်ဘၢတၢ်လၢယသးထီၣ်,ဒီးသူၣ်ဖးဒိၣ်ကမၤလၢာ်ကွံာ်အီၤလၢယသးကဲၤထီၣ်လီၤ.

14 ဒီးယကမၤလီၤပှီၢ်တၢ်အဒူၣ်လၢသုဖှူလၢအီကတ့ၣ်,ဒီးဒုးလီၤဒါအီၤလၢဟီၣ်ခိၣ်လိၤ,ဒီးအခီၣ်ထံးကအိၣ်ဖျါထီၣ်လီၤ.ကလီၤပှီၢ်ဝဲ,ဒီးသုကဘၣ်တၢ်မၤလၢာ်ကွံာ်လၢအသးကံၢ်ပူၤ,ဒီးသုကသ့ၣ်ညါလၢယမ့ၢ်ယွၤလီၤ.

15 ဒီးယကမၤလၢထီၣ်ပှဲၤထီၣ်ယသးကဲၤထီၣ်လၢတၢ်အဒူၣ်အလိၤ,ဒီးလၢပှၤလၢအဖှူဝဲလၢအီကတ့ၣ်တဖၣ်အလိၤ,ဒီးယကစံးဘၣ်သု,တၢ်အဒူၣ်မ့ၢ်ဂ့ၤ,ပှၤလၢအဖှူအီၤလၢအီကတ့ၣ်မ့ၢ်ဂ့ၤ,တအိၣ်လၢၤဘၣ်. 16 ဒ်ပစံးတၢ်အသိး,အံၣ်စရ့လးအဝံတဖၣ်လၢအကတိၤလၢဝံအကျိာ်လၢယရူၤၡလ့ၣ်အဂ့ၢ်အကျိၤ,လၢအထံၣ်တၢ်ဃူတၢ်ဖိးလၢအဂီၢ်,ဒီးတၢ်ဃူတၢ်ဖိးတအိၣ်ဘၣ်လၢအဂီၢ်ဘၣ်,ကစၢ်ယွၤစံးဝဲဒၣ်.

17 ဒီးနဲဒၣ်ပှၤကညီဖိခွါဧၢ,ပာ်နမဲာ်ထီဒါနပှၤဂီၢ်မုၢ်အဖိမုၣ်လၢအကတိၤတၢ်လၢဝံအကျိာ်လၢအသးဒၣ်ဝဲအပူၤ,ဒီးကတိၤတၢ်လၢဝံအကျိာ်ထီဒါအီၤ, 18 ဒီးစံးဘၣ်အီၤ,ကစၢ်ယွၤစံးဒ်အံၤ,ပိာ်မုၣ်လၢအဆးစုတခူလၢစုနၢၣ်ခံခဲလၢာ်အဂီၢ်,ဒီးမၤခိၣ်တခၢၣ်လၢကယဲၢ်ပှၤအဂီၢ်တဂၤလၢ်လၢ်အခိၣ်အဂီၢ်န့ၣ်ဒ်သိးအကကလံာ်ပှၤကညီဆူတၢ်ဟးဂီၤန့ၣ်ဘၣ်အဖှီၣ်လီၤ.သုကဃုန့ၢ်ယပှၤဂီၢ်မုၢ်အသးသမူ,ဒီးဒုးမူဒံးပှၤအသးသမူလၢသုဂီၢ်ဒၣ်သုဝဲဧါ.

19 သုမၤသံပှၤလၢအတကြၢးသံဘၣ်,ဒီးဒုးမူဒံးပှၤလၢအတကြၢးမူဒံးဘၣ်လၢသုကတိၤတၢ်ကဘျံးကဘျၣ်ဒီးယပှၤဂီၢ်မုၢ်လၢအကနၣ်သုတၢ်ကတိၤကဘျံးကဘျၣ်အဃိ,သုမၤယၤတကဆှီဘၣ်လၢယပှၤဂီၢ်မုၢ်အကျါ,လၢဘုမုယီၤအတၢၤဒုၣ်တဖၣ်အဃိ,ဒီးလၢကိၣ်အလိၣ်တဖၣ်အဃိန့ၣ်လီၤ.

20 မၤသးဒ်န့ၣ်ဒီးကစၢ်ယွၤစံးဒ်အံၤ,ကွၢ်ကွၢ်,ယထီဒါစုတခူန့ၣ်လၢသုကလံာ်ပှၤကညီဆူတၢ်ဟးဂီၤလၢအီၤဒ်သိးအကပူၤဖျဲးဒီးသု,ဒီးယကထုးထီၣ်ကွံာ်စုတခူန့ၣ်လၢသုစု,ဒီးယကမၤပူၤမၤဖျဲးပှၤအသးတဖၣ်လၢသုကလံာ်အီၤ,ဒီးအဝဲသ့ၣ်ကပူၤဖျဲးဒီးသုလီၤ.

21 ယကထုးထီၣ်ကွံာ်စ့ၢ်ကီးသုခိၣ်တခၢၣ်တဖၣ်န့ၣ်,ဒီးမၤပူၤမၤဖျဲးယပှၤဂီၢ်မုၢ်လၢသုစုပူၤ,ဒီးတအိၣ်လၢၤဘၣ်လၢသုစုပူၤဘၣ်,ဒ်သိးသုသုတကလံာ်လၢၤအီၤတဂ့ၤ.ဒီးသုကသ့ၣ်ညါလၢယမ့ၢ်ယွၤလီၤ.

22 မ့ၢ်သုဒုးသူၣ်အုးသးအုးပှၤအတီအလိၤလၢတၢ်ကတိၤကဘျံးကဘျၣ်လၢယတဒုးသူၣ်အုးသးအုးဘၣ်,မ့ၢ်သုစံးလၢပှၤတတီတလိၤလၢအကမူဝဲသတးဒီး,သုမၤဆူၣ်ထီၣ်အစုဒ်သိးအသုတဃၣ်ကွံာ်အသးလၢအကျဲတတီတလိၤဘၣ်ဒီး, 23 သုတထံၣ်လၢၤဘၣ်တၢ်ကလီကလီဘၣ်,ဒီးတဖးလၢၤဘၣ်တၢ်ဘၣ်,ဒီးယကမၤပူၤမၤဖျဲးယပှၤဂီၢ်မုၢ်လၢသုစုပူၤ,ဒီးသုသ့ၣ်ညါလၢယမ့ၢ်ယွၤလီၤ.