Eze 22 | KswSKMB | STEP | ဒီးယွၤအကလုၢ်ဘၣ်ယၤဒီးစံးဝဲဒၣ်,

‏ Ezekiel 22

1 ဒီးယွၤအကလုၢ်ဘၣ်ယၤဒီးစံးဝဲဒၣ်, 2 ဒီးနဲဒၣ်အံၤပှၤကညီဖိခွါဧၢ,နကစံၣ်ညီၣ်,နကစံၣ်ညီၣ်ဝ့ၢ်အိၣ်ဒီးတၢ်သွံၣ်န့ၣ်ဧါ.ဒီးဘိးဘၣ်သ့ၣ်ညါအီၤလၢအတၢ်သးဘၣ်အၢခဲလၢာ်န့ၣ်တက့ၢ်. 3 ဒီးစံး,ကစၢ်ယွၤစံးဒ်အံၤ,ဝ့ၢ်လၢအလူလီၤတၢ်သွံၣ်လၢနသးကံၢ်ပူၤဒ်သိးနဆၢနကတီၢ်ကဘၣ်,ဒီးတ့နတၢ်ဂီၤဒ်သိးအကမၤဘၣ်အၢလီၤအသးတဝ့ၢ်ဧၢ.

4 နဘၣ်တၢ်ဒဲးဘးလၢတၢ်သွံၣ်လၢနလူလီၤအီၤအဃိ,ဒီးနမၤဘၣ်အၢလီၤနသးလၢနတၢ်ဂီၤလၢနတ့အီၤအဃိ,ဒီးနဒုးဟဲဘူးနမုၢ်နံၤတဖၣ်,ဒီးနဒုးဘၣ်နနံၣ်နလါလီၤ.မၤသးဒ်န့ၣ်ဒီးယပာ်နၤလၢတၢ်ဒုၣ်ဒွဲၣ်အလီၢ်လၢပှၤကလုာ်တဖၣ်အကျါ,ဒီးတၢ်မၤတရီတပါအလီၢ်လၢကီၢ်ခဲလၢာ်အပူၤလီၤ. 5 ပှၤအိၣ်ဘူး,ဒီးပှၤအိၣ်ယံၤဒီးနၤကမၤတရီတပါနၤ,ဒ်ပှၤလၢအမံၤဘၣ်အၢ,ပှၤဘၣ်တၢ်ကိၢ်တၢ်ဂီၤနးမးအသိးန့ၣ်လီၤ.

6 ကွၢ်ကွၢ်,အံၣ်စရ့လးအပဒိၣ်ဖးဒိၣ်တဖၣ်န့ၢ်အိၣ်ဝဲလၢနပူၤ,အစုအိၣ်လၢအကလူလီၤတၢ်သွံၣ်ကိးဂၤဒဲးလီၤ.

7 ပှၤမၤတရီတပါအမိၢ်ဒီးအပၢ်လၢနပူၤန့ၣ်,ပှၤမၤအၢပှၤတခီဘီမုၢ်ဖိလၢနပူၤန့ၣ်,ပှၤမၤအၢပှၤဖိၣ်ဃဲ,ဒီးပှၤမုၣ်ကမဲလၢနပူၤန့ၣ်လီၤ. 8 နတပးကဲဘၣ်ယတၢ်စီဆှံတဖၣ်,ဒီးနမၤဘၣ်အၢယမုၢ်အိၣ်ဘှံးနံၤတဖၣ်လီၤ. 9 ပှၤလဲၤကတိၤခဲၣ်တၢ်ဒ်သိးအကလူလီၤတၢ်သွံၣ်အိၣ်ဝဲလၢနပူၤလီၤ.ပှၤအီၣ်တၢ်လၢကစၢၢ်ခိၣ်လၢနပူၤလီၤ.ပှၤမၤတၢ်ကလုာ်ကလိၤလၢနပူၤလီၤ.

10 ပှၤလီၣ်ဖျါအပၢ်အတၢ်အိၣ်ဘ့ၣ်ဆ့လၢနပူၤလီၤ.ပှၤဆီၣ်လီၤပိာ်မုၣ်လၢအအိၣ်တကဆှီဘၣ်လၢနပူၤလီၤ.

11 ဒီးပှၤတဂၤမၤတၢ်သးဘၣ်အၢဒီးပှၤလၢအဃၢၤအမါ,ဒီးပှၤတဂၤမၤဘၣ်အၢအဒဲၣ်လၢအသးကလုာ်ကလိၤ,ဒီးပှၤအဂၤတဂၤဆီၣ်လီၤအဒီပုၢ်ဝဲၢ်မုၣ်,အပၢ်အဖိမုၣ်လၢနပူၤလီၤ.

12 ပှၤဟံးန့ၢ်ခိၣ်ဖးလၢနပူၤ,ဒ်သိးအကလူလီၤတၢ်သွံၣ်လီၤ.ဒီးနဟံးန့ၢ်စ့အအ့ၣ်ဒီးတၢ်အါထီၣ်,ဒီးနအီၣ်ကဘျံးအီၣ်ကဘျၣ်ပှၤလၢနဃၢၤအတၢ်သတးဒီး,နမၤအါထီၣ်နတၢ်,ဒီးနသးပ့ၤနီၣ်ယၤလီၤ.ကစၢ်ယွၤစံးဝဲဒၣ်.

13 မၤသးဒ်န့ၣ်ဒီးကွၢ်ကွၢ်,ယဒဲယစုလၢနအီၣ်ကဘျံးအီၣ်ကဘျၣ်တၢ်လၢနန့ၢ်အီၤ,ဒီးလၢပှၤအသွံၣ်လၢအလူလီၤအသးလၢနသးကံၢ်ပူၤလီၤ.

14 မုၢ်တနံၤလၢယကမၤနၤန့ၣ်နသးတူၢ်ဘၣ်ကကဲဧါ.နစုကဆူၣ်ထီၣ်စ့ၢ်ကီးဧါ.တၢ်လၢယၤယွၤအံၤယကတိၤတၢ်,ဒီးယကမၤတၢ်လီၤ.

15 ဒီးယကမၤလီၤပြံလီၤပြါနၤလၢပှၤကလုာ်တဖၣ်အကျါ,ဒီးမၤလီၤမုၢ်လီၤဖးနၤလၢကီၢ်တဖၣ်အပူၤ,ဒီးယကမၤလၢာ်ကွံာ်နတၢ်အၢလၢနပူၤလီၤ. 16 ဒီးနကမၤဘၣ်အၢလီၤနသးလၢပှၤကလုာ်တဖၣ်အမဲာ်ညါ,ဒီးနကသ့ၣ်ညါလၢယမ့ၢ်ယွၤလီၤ.

17 ဒီးယွၤအကလုၢ်ဘၣ်ယၤဒီးစံးဝဲဒၣ်, 18 ပှၤကညီဖိခွါဧၢ,အံၣ်စရ့လးအပှၤဟံၣ်ဖိကဲထီၣ်လၢတၢ်အအ့ၣ်လၢယဂီၢ်လီၤ.အဝဲသ့ၣ်ခဲလၢာ်မ့ၢ်တိၢ်,ဒီးပှာ်,ဒီးထး,ဒီးပှာ်သူလၢဖၣ်ကပူၤအပူၤန့ၣ်လီၤ.မ့ၢ်စ့အအ့ၣ်လီၤ.

19 မၤသးဒ်န့ၣ်ဒီးကစၢ်ယွၤစံးဒ်အံၤ,မ့ၢ်သုဝဲခဲလၢာ်ကဲထီၣ်တၢ်အအ့ၣ်ဒီး,ကွၢ်ကွၢ်,မၤသးဒ်န့ၣ်ဒီးယကဒုးအိၣ်ဖှိၣ်သုလၢယရုၤၡလ့ၣ်အသးကံၢ်ပူၤလီၤ.

20 ဒ်ပှၤပာ်ဖှိၣ်စ့,ဒီးတိၢ်,ဒီးထး,ဒီးပှာ်သူ,ဒီးပှာ်လၢဖၣ်ကပူၤအသးကံၢ်ပူၤဒ်သိးအကအူဘၣ်မ့ၣ်အူလၢအဖီခိၣ်,ဒီးမၤပှံၢ်အီၤအသိးန့ၣ်,ယကပာ်ဖှိၣ်သုလၢယသးထီၣ်,ဒီးလၢယသးကဲၤထီၣ်,ဒီး,ယကပာ်လီၤသုဖဲန့ၣ်,ဒီးမၤပှံၢ်သုဒ်န့ၣ်သိးလီၤ. 21 မ့ၢ်မးယကပာ်ဖှိၣ်သု,ဒီးယကအူဘၣ်သုလၢယသးကဲၤထီၣ်အမ့ၣ်အူ,ဒီးသုကပှံၢ်လီၤလၢအသးကံၢ်ပူၤလီၤ. 22 ဒ်စ့ပှံၢ်လီၤလၢဖၣ်ကပူၤအသးကံၢ်ပူၤအသိးန့ၣ်သုကပှံၢ်လီၤလၢအသးကံၢ်ပူၤဒ်န့ၣ်သိး,ဒီးသုကသ့ၣ်ညါလၢယၤယွၤအံၤလူလီၤယသးကဲၤထီၣ်လၢသုလိၤလီၤ.

23 ဒီးယွၤအကလုၢ်ဘၣ်ယၤဒီးစံးဝဲဒၣ်, 24 ပှၤကညီဖိခွါဧၢ,စံးဘၣ်အီၤ,မ့ၢ်ကီၢ်တဘ့ၣ်လၢတၢ်တမၤကဆှီဘၣ်,ဒီးတၢ်တဟဲစူၤဘၣ်လၢအဖီခိၣ်,လၢယသးကဲၤထီၣ်အမုၢ်တနံၤအပူၤဘၣ်.

25 ဝံတဖၣ်အတၢ်အုၣ်လီၤအၢအိၣ်ဝဲလၢအပူၤလီၤ.ဒ်ခ့ယုၢ်လၢအကညီၤထီၣ်တၢ်ဒီးအ့ၣ်ဖှီတၢ်ဂုာ်န့ၢ်တၢ်အသိးန့ၣ်,အီၣ်ကွံာ်ပှၤအသး,မၤန့ၢ်တၢ်ပာ်ဖှိၣ်အသး,ဒီးတၢ်လုၢ်ဒိၣ်ပှ့ၤဒိၣ်,ဒုးကဲထီၣ်ပှၤမုၣ်ကမဲအါဂၤလၢအသးကံၢ်ပူၤလီၤ. 26 အပှၤလုၢ်တၢ်အဒိၣ်တဖၣ်န့ၣ်လုၣ်သ့ၣ်ခါပတာ်ယတၢ်သိၣ်တၢ်သီ,ဒီးမၤဘၣ်အၢယတၢ်စီဆှံတဖၣ်,ဒီးတနီၤဖးဘၣ်တၢ်စီဆှံဒီးတၢ်ဘၣ်အၢအဆၢဘၣ်,ဒီးတဒုးနဲၣ်ဘၣ်တၢ်ကဆှီဒီးတၢ်တကဆှီဘၣ်အဆၢဘၣ်.ဒီးပာ်တဒၢအမဲာ်လၢယမုၢ်အိၣ်ဘှံးအနံၤတဖၣ်,ဒီးယဘၣ်တၢ်မၤဘၣ်အၢယၤလၢအကျါလီၤ.

27 အပဒိၣ်ဖးဒိၣ်လၢအပူၤမၤသးဒ်ထွံၣ်မံၤအ့ၣ်ဖှီတၢ်ဂုာ်န့ၢ်အသိးန့ၣ်လီၤ.လူလီၤတၢ်သွံၣ်,မၤသံပှၤအသး,ဒ်သိးအကန့ၢ်ဘၣ်အစုလီၢ်အခီၣ်ခိၣ်လီၤ.

28 ဒီးအဝံတဖၣ်ဖှူဝဲဒီးအီကတ့ၣ်,ထံၣ်ဘၣ်တၢ်ကလီကလီ,ဒီးဖးတၢ်လၢအဂီၢ်,ဒီးစံး,ကစၢ်ယွၤစံးဒ်အံၤ,ဒီးယွၤတကတိၤဘၣ်တၢ်ဘၣ်.

29 ထံဧိၤကီၢ်ဧိၤအပှၤဂီၢ်မုၢ်မၤအၢတၢ်,ဒီးဂုာ်ဆူၣ်ပျီဆူၣ်တၢ်,ဒီးသုမၤကိၢ်မၤဂီၤပှၤဖှီၣ်ဖိယာ်ဖိ,ဒီးပှၤဘၣ်နးဘၣ်ဖှီၣ်,ဒီးမၤအၢပှၤတခီဘီမုၢ်ဖိ,ဒီးတၢ်စံၣ်ညီၣ်တအိၣ်ဘၣ်.

30 ဒီးယဃုပှၤလၢအကျါတဂၤလၢအကမၤထီၣ်ကရၢ,ဒီးဆၢထၢၣ်လၢတၢ်ဘျၢၣ်ဖျိအလီၢ်လၢယမဲာ်ညါလၢကီၢ်အဂီၢ်ဒ်သိးယသုတမၤဟးဂီၤအီၤတဂ့ၤ.ဘၣ်ဆၣ်ဒီးယတထံၣ်န့ၢ်ဘၣ်နီတဂၤဘၣ်. 31 မၤသးဒ်န့ၣ်ဒီးယလူလီၤလံယသးဆူၣ်လၢအဖီခိၣ်,ယမၤလၢာ်ကွံာ်အီၤလၢယသးကဲၤထီၣ်အမ့ၣ်အူပူၤလံလီၤ.ယဟ့ၣ်ကၣ်အကျဲလၢအခိၣ်ဒၣ်ဝဲအဖီခိၣ်လံလီၤ.ကစၢ်ယွၤစံးဝဲဒၣ်.