‏ Ezekiel 23

1ယွၤအကလုၢ်ဘၣ်ယၤဒီးစံးဝဲဒၣ်, 2ပှၤကညီဖိခွါဧၢ,ပှၤပိာ်မုၣ်ခံဂၤ,အမိၢ်တဂၤဃီအဖိမုၣ်အိၣ်ဝဲလီၤ. 3ဒီးမၤကမၣ်မုၣ်ကမၣ်ခွါလၢအဲၤကူပတူးအပူၤ,မၤကမၣ်မုၣ်ကမၣ်ခွါလၢအမုၣ်ကနီၤထီၣ်အဖၢမုၣ်လီၤ.ဟ့ၣ်ပှၤဟံးအနုၢ်ဖဲန့ၣ်,ဒီးဖဲန့ၣ်ဟ့ၣ်ပှၤဟံးအမုၣ်လိၣ်ဘိထီၣ်အနုၢ်ခိၣ်မီၣ်လီၤ.

4အမံၤမ့ၢ်နီၢ်အၤဟိးလၤအဝဲၢ်တဂၤ,ဒီးနီၢ်အၤဟိးလံဘၤအပုၢ်တဂၤလီၤ.ဒီးကဲထီၣ်ယတၢ်,ဒီးဆံးစၢ်န့ၢ်ဖိခွါတဖၣ်,ဒီးဖိမုၣ်တဖၣ်လီၤ.တၢ်လၢအမံၤန့ၣ်နီၢ်အၤဟိးလၤမ့ၢ်ၡၤမရံ,ဒီးနီၢ်အၤဟိးလံဘၤမ့ၢ်ယရူၤၡလ့ၣ်လီၤ.

5ဒီးဖဲအမ့ၢ်ယတၢ်န့ၣ်နီၢ်အၤဟိးလၤမၤကမၣ်မုၣ်ကမၣ်ခွါလီၤ.ဒီးအဲၣ်လၢအသးကလုာ်ကလိၤပှၤလၢအအဲၣ်အီၤ,ပှၤလၢအဃၢၤ,ပှၤအၤရှူၢ်ဖိ, 6ကူသိးဒီးတၢ်လါ,ပဒိၣ်ဖးဒိၣ်တဖၣ်,ဒီးပဒိၣ်တဖၣ်,ပှၤဖိၣ်သၣ်ခွါလၢဘၣ်ပှၤအသးခဲလၢာ်,ပှၤဒိးကသ့ၣ်ဖိလၢအဒိးကသ့ၣ်လီၤ.

7ဒီးမၤကမၣ်မုၣ်ကမၣ်ခွါဒီးအီၤ,ဒီးကယဲၢ်အၤရှူၢ်အပှၤဃုထၢဖိခဲလၢာ်,ဒီးကယဲၢ်ပှၤလၢအအဲၣ်အီၤလၢအသးကလုာ်ကလိၤ,မၤဘၣ်အၢအသးလၢအတၢ်ဂီၤတၢ်ဖီၣ်ခဲလၢာ်လီၤ.

8ဒီးတလဲၤသဒၣ်ဘၣ်အတၢ်မၤကမၣ်မုၣ်ကမၣ်ခွါဘၣ်ဃးဒီးအဲၤကူပတူးဘၣ်.အဂ့ၢ်ဒ်အံၤ,အဝဲသ့ၣ်မံဃုာ်ဒီးအီၤလၢအမုၣ်ကနီၤထီၣ်အဖၢမုၣ်,ဒီးဟံးအမုၣ်လိၣ်ဘိအနုၢ်ခိၣ်မီၣ်,ဒီးလူလီၤအတၢ်မၤကမၣ်မုၣ်ကမၣ်ခွါလၢအလိၤလီၤ.

9မၤသးဒ်န့ၣ်ဒီးယဟ့ၣ်လီၤကွံာ်အီၤလၢပှၤလၢအအဲၣ်အီၤအစုပူၤလၢပှၤအၤရှူၢ်ဖိလၢအအဲၣ်အီၤလၢအသးကလုာ်ကလိၤ,အစုပူၤလီၤ.

10အဝဲသ့ၣ်တဖၣ်န့ၣ်လီၣ်ဖျါထီၣ်အတၢ်အိၣ်ဘ့ၣ်ဆ့လီၤ.ဟံးန့ၢ်အဖိခွါဒီးအဖိမုၣ်တဖၣ်,ဒီးမၤသံအီၤလၢနး,ဒီးအမံၤဟူထီၣ်ဝဲလၢပိၣ်မုၣ်အကျါလီၤ.အဂ့ၢ်ဒ်အံၤ,မၤအီၤလၢတၢ်စံၣ်ညီၣ်လီၤ.

11ဒီးအဒီပုၢ်ဝဲၢ်မုၣ်နီၢ်အၤဟိးလံဘၤထံၣ်ဘၣ်တၢ်န့ၣ်ဘၣ်ဆၣ်ဒီး,အဲၣ်တၢ်လၢအသးကလုာ်ကလိၤနးန့ၢ်အဝဲတဂၤတက့ၢ်လီၤ.ဒီးမၤကမၣ်မုၣ်ကမၣ်ခွါနးန့ၢ်အဒီပုၢ်ဝဲၢ်အမၤကမၣ်မုၣ်ကမၣ်ခွါတက့ၢ်လီၤ.

12အဲၣ်ပှၤလၢအဃၢၤလၢအသးကလုာ်ကလိၤ,ပှၤအၤရှူၢ်ဖိ,ပဒိၣ်ဖးဒိၣ်တဖၣ်,ဒီးပဒိၣ်တဖၣ်,ကူသိးတၢ်လၢလၢပှဲၤပှဲၤ,ပှၤဒိးကသ့ၣ်ဖိ,လၢအဒိးကသ့ၣ်,ပှၤဖိၣ်သၣ်ခွါလၢအဘၣ်ပှၤအသးခဲလၢာ်လီၤ.

13တုၤနုၤတစုယထံၣ်လၢအဘၣ်အၢ,လၢပှၤခံဂၤန့ၣ်ပိာ်ကျဲတဘိဃီလီၤ. 14ဘၣ်ဆၣ်ဒီးမၤအါထီၣ်အတၢ်ကမၣ်မုၣ်ကမၣ်ခွါလီၤ.အဂ့ၢ်ဒ်အံၤ,ထံၣ်ပှၤကညီအဂီၤကွဲးအသးလၢတၢ်ဒူၣ်အလိၤ,ပှၤက့ၤစ့းဖိအဂီၤကွဲးအသးလၢကသံၣ်ဂီၤ, 15ကံၢ်တူာ်အယီၢ်ဒ့လၢယီၢ်တကိး,အိၣ်ဝဲဒီးအခိၣ်ဖၢၣ်ဒိၣ်ကံၣ်ဃ့,ဖျါဝဲဒ်ပဒိၣ်ဖးဒိၣ်ခဲလၢာ်အသိး,ဒ်ပှၤဘၤဘူၤလိၣ်ဖိလၢကီၢ်က့ၤစ့းအပူၤ,ဖဲအအိၣ်ဖျဲၣ်အကီၢ်လီၤ. 16ဒီးတုၤအထံၣ်အီၤလၢအမဲာ်ဒီး,အဲၣ်အီၤလၢအသးကလုာ်ကလိၤ,ဒီးမၢအကလူးတဖၣ်လဲၤဆူအအိၣ်လၢကီၢ်က့ၤစ့းအပူၤလီၤ.

17ဒီးဘၤဘူၤလိၣ်အဖိခွါတဖၣ်ဟဲဆူအအိၣ်လၢတၢ်အဲၣ်အလီၢ်မံပူၤ,ဒီၤမၤဘၣ်အၢအီၤလၢအမၤကမၣ်မုၣ်ကမၣ်ခွါ,ဒီးအဝဲဒၣ်ဘၣ်အၢလၢအီၤ,အသးလီၤဖှၣ်ဒီးအီၤလီၤ.

18ဒီးလီၣ်ဖျါထီၣ်အတၢ်မၤကမၣ်မုၣ်ကမၣ်ခွါ,ဒီးလီၣ်ဖျါထီၣ်အတၢ်အိၣ်ဘ့ၣ်ဆ့လီၤ.တုၤနုၤတဘျီယသးလီၤဖှၣ်ဒီးအီၤ,ဒ်ယသးလီၤဖှၣ်တ့ၢ်ဒီးအဒီပုၢ်ဝဲၢ်တဂၤအသိးန့ၣ်လီၤ. 19အဂ့ၢ်ဒ်အံၤ,မ့ၢ်အသ့ၣ်နီၣ်ထီၣ်က့ၤအမုၣ်ကနီၤထီၣ်အမုၢ်နံၤတဖၣ်ဖဲအမၤကမၣ်မုၣ်ကမၣ်ခွါလၢကီၢ်အဲၤကူပတူးအပူၤသတးဒီး,မၤအါထီၣ်အတၢ်မၤကမၣ်မုၣ်ကမၣ်ခွါလီၤ. 20ဒီးအဲၣ်ဝဲအပှၤသံၣ်ဝၤလၢအဖံးအညၣ်မၤသးဒ်ကသ့ၣ်ယီၤအဖံးအညၣ်အသိး,ဒီးအလူတၢ်န့ၣ်မၤသးဒ်ကသ့ၣ်အလူတၢ်အသိးန့ၣ်လီၤ. 21ဒီးနသ့ၣ်နီၣ်ထီၣ်က့ၤနမုၣ်ကနီၤထီၣ်အသးကလုာ်ကလိၤဖဲပှၤအဲၤကူပတူးဖိဟံးနနုၢ်ခိၣ်မီၣ်လၢနမုၣ်ကနီၤထီၣ်အနုၢ်အဃိလီၤ.

22မၤသးဒ်န့ၣ်ဒီးနီၢ်အၤဟိးလံဘၤဧၢ,ကစၢ်ယွၤစံးဒ်အံၤ,ကွၢ်ကွၢ်,ယကထိၣ်ဂဲၤပှၤလၢနအဲာ်အီၤထီဒါနၤ,ပှၤလၢနသးလီၤဖှၣ်ဒီးအီၤ,ဒီးယကဒုးဟဲအီၤထီဒါနၤဝးတရံးဝဲ, 23ပှၤဘၤဘူၤလိၣ်ဖိ,ဒီးပှၤက့ၤစ့းဖိခဲလၢာ်,ပှၤတၢ်အခိၣ်,ပှၤထူးပှၤတီၤ,ဒီးပှၤအဒိၣ်,ပှၤအၤရှူၢ်ဖိအိၣ်ဒီးအီၤခဲလၢာ်,အဝဲသ့ၣ်ခဲလၢာ်န့ၣ်မ့ၢ်ပှၤဖိၣ်သၣ်ခွါလၢအဘၣ်ပှၤအသး,ပဒိၣ်ဖးဒိၣ်တဖၣ်,ဒီးပဒိၣ်တဖၣ်,ပှၤသုးဖိအခိၣ်တဖၣ်,ပှၤလၢအမံၤဟူထီၣ်တဖၣ်,ဒီးအဝဲသ့ၣ်ခဲလၢာ်ဒိးကသ့ၣ်လီၤ.

24ဒီးကဟဲထီဒါနၤအိၣ်ဒီးကတီၤ,ဒီးလ့ၣ်ကဟၣ်,ဒီးလ့ၣ်ကဟၣ်အပၣ်,ဒီးပှၤဂီၢ်မုၢ်အဖုဖးဒိၣ်တဖၣ်လီၤ.ကပာ်အသးထီဒါနၤအိၣ်ဒီးကတီၤဖိ,ဒီးကတီၤဖးဒိၣ်,ဒီးခိၣ်ကုာ်သုးဝးတရံးဝဲ,ဒီးယကပာ်တၢ်စံၣ်ညီၣ်လၢအမဲာ်ညါ,ဒီးကစံၣ်ညီၣ်နၤဒ်အတၢ်စံၣ်ညီၣ်တဖၣ်အသိးန့ၣ်လီၤ.

25ဒီးယကပာ်ယသးက့ၣ်ထီဒါနၤ,ဒီးအဝဲသ့ၣ်ကမၤနၤလၢအသးကဲၤထီၣ်လီၤ.ကဟံးထီၣ်ကွံာ်နနါဒ့,ဒီးနနၢ်,ဒီးနတၢ်အိၣ်လီၤတဲာ်ကလီၤဃံၤလၢနးလီၤ.ကဟံးန့ၢ်နဖိခွါဒီးနဖိမုၣ်,ဒီးမ့ၣ်အူကအီၣ်ကွံာ်နတၢ်အိၣ်လီၤတဲာ်လီၤ.

26ဒီးကဘ့ၣ်ကွံာ်နကူနသိး,ဒီးကဟံးထီၣ်ကွံာ်နကယၢကယဲအဃံအလၤလီၤ.

27ဒ်န့ၣ်အသိးယကဒုးဆိတ့ၢ်နသးကလုာ်ကလိၤလၢနၤ,ဒီးနတၢ်မၤကမၣ်မုၣ်ကမၣ်ခွါဘၣ်ဃးဒီးအဲၤကူပတူး,ဒီးနတကျ့ထီၣ်လၢၤဘၣ်နမဲာ်ဆူအကီၢ်,ဒီးတသ့ၣ်နီၣ်ထီၣ်က့ၤလၢၤဘၣ်အဲၤကူပတူးဘၣ်.

28အဂ့ၢ်ဒ်အံၤ,ကစၢ်ယွၤစံးဒ်အံၤ,ကွၢ်ကွၢ်,ယကဟ့ၣ်လီၤကွံာ်နၤဆူပှၤလၢနသးဟ့အီၤအစုပူၤ,လၢပှၤလၢနသးလီၤဖှၣ်ဒီးအီၤအစုပူၤလီၤ.

29ဒီးကမၤနၤလၢတၢ်အသးဟ့,ဒီးကဟံးထီၣ်ကွံာ်နတၢ်မၤခဲလၢာ်,ဒီးကလဲၤသဒၣ်နၤလၢနအိၣ်ဘ့ၣ်ဆ့ဒီးနကူနသိးတအိၣ်ဘၣ်.ဒီးနမၤကမၣ်မုၣ်ကမၣ်ခွါအတၢ်အိၣ်ဘ့ၣ်ဆ့,နသးကလုာ်ကလိၤ,ဒီးနတၢ်မၤကမၣ်မုၣ်ကမၣ်ခွါန့ၣ်ကအိၣ်ဖျါထီၣ်လီၤ.

30ယကမၤနၤလၢတၢ်န့ၢ်တဖၣ်လၢနလဲၤမၤကမၣ်မုၣ်ကမၣ်ခွါထွဲပှၤကလုာ်တဖၣ်အခံအဃိ,လၢနဘၣ်အၢလၢအတၢ်ဂီၤတဖၣ်အဃိလီၤ. 31နပိာ်နဒီပုၢ်ဝဲၢ်မုၣ်အကျဲ,ဒီးယကဟ့ၣ်လီၤအလီခီလၢနစုပူၤလီၤ.

32ကစၢ်ယွၤစံးဝဲဒ်အံၤ,နကအီနဒီပုၢ်ဝဲၢ်မုၣ်အလီခီလၢအယိာ်ဒီးအဒိၣ်လီၤ.တြီၢ်တၢ်အါမးလီၤ.နကကဲထီၣ်တၢ်နံၤဘၣ်ဖၣ်လဲအလီၢ်,ဒီးတၢ်ဒုၣ်ဒွဲၣ်အလီၢ်လီၤ.

33နကပှဲၤဒီးတၢ်အီမူၤနသး,ဒီးတၢ်သူၣ်အုးသးအုးလီၤ.တၢ်သးကတုၤ,ဒီးတၢ်ကမၢကမၣ်အလီခီန့ၣ်မ့ၢ်နဒီပုၢ်ဝဲၢ်မုၣ်ၡၤမရံအလီခီန့ၣ်လီၤ.

34နကအီအီၤ,ဒီးစူၢ်ထီၣ်ကွံာ်,ဒီးအ့ၣ်လီခီအက့အခီ,ဒီးထုးထီၣ်ကွံာ်နနုၢ်လီၤ.အဂ့ၢ်ဒ်အံၤ,ယကတိၤလံတၢ်လံ,ကစၢ်ယွၤစံးဝဲဒၣ်.

35မၤသးဒ်န့ၣ်ဒီးကစၢ်ယွၤစံးဒ်အံၤ,မ့ၢ်နသးပ့ၤနီၣ်ယၤ,ဒီးကွံာ်တ့ၢ်ကွံာ်ယၤဆူနချၢဃံဒီး,တူၢ်ဒၣ်နသးကလုာ်ကလိၤ,ဒီးနမၤကမၣ်မုၣ်ကမၣ်ခွါန့ၣ်တက့ၢ်.

36ဒီးယွၤစံးဘၣ်ယၤ,ပှၤကညီဖိခွါဧၢ,နကစံၣ်ညီၣ်နီၢ်အၤဟိးလၤ,ဒီးနီၢ်အၤဟိးလံဘၤစ့ၢ်ကီးဧါ.မ့ၢ်မးဒုးနဲၣ်အီၤလၢအတၢ်သးဘၣ်အၢတဖၣ်န့ၣ်, 37လၢအအဲၣ်ဘၢမါအဲၣ်ဘၢဝၤ,ဒီးတၢ်သွံၣ်အိၣ်ဝဲလၢအစုပူၤ,ဒီးအဲၣ်ဘၢမါအဲၣ်ဘၢဝၤဒီးအတၢ်ဂီၤတဖၣ်,ဒီးမၢအဖိခွါလၢအဆံးစၢ်န့ၢ်ယၤတဖၣ်ခီဂာ်မ့ၣ်အူလၢတၢ်ကအီၣ်ကွံာ်အီၤအဂ့ၢ်လီၤ.

38မၤစ့ၢ်ကီးယၤလၢတၢ်အံၤ,မၤဘၣ်အၢယလီၢ်စီဆှံ,ဒီးမၤတကဆှီဘၣ်ယမုၢ်အိၣ်ဘှံးအနံၤတနံၤဃီလီၤ. 39အဂ့ၢ်ဒ်အံၤ,တုၤအမၤသံအဖိအလံၤလၢအတၢ်ဂီၤတဖၣ်အဂီၢ်ဒီး,ဟဲဆူယလီၢ်စီဆှံအပူၤလၢအကမၤဘၣ်အၢအီၤတနံၤဃီလီၤ.ဒီးကွၢ်ကွၢ်,မၤဝဲဒ်န့ၣ်လၢယဟံၣ်အသးကံၢ်ပူၤန့ၣ်လံ.

40လၢန့ၣ်အမဲာ်ညါသုမၢလီၤပှၤကညီဟဲလၢအယံၤ,သုမၢကလူးတဖၣ်လဲၤ,ဆူအအိၣ်,ဒီးကွၢ်ကွၢ်,ဟဲဝဲလီၤ.နသ့စီနသးလၢအဂီၢ်,နဖှူနမဲာ်,ဒီးနကယၢကယဲနသးလီၤ. 41ဒီးနဆ့ၣ်နီၤလၢတၢ်အလီၢ်မံအဃံအလၤ,ဒီးကတဲာ်ကတီၤစီၢ်နီၤခိၣ်လၢအမဲာ်ညါ,ဒီးနပာ်ဖဲန့ၣ်ယတၢ်နၢမူဒီးယသိလီၤ.

42ဒီးပှၤဂီၢ်မုၢ်အိၣ်မုာ်အသီၣ်အိၣ်ဝဲဒီးအီၤတပူၤဃီ,ဒီးပှၤဟဲစိာ်ပှၤအီလုၣ်ကိတၢ်ဒီးပှၤကညီလၢပှၤဂီၢ်မုၢ်အကျါတနီၤလၢပှၢ်မုၢ်ကနၢ,ဒီးအဝဲသ့ၣ်ဒုးသိးအစုလၢထံဖှံၣ်,ဒီးဒုးကုာ်ခိၣ်သလုးအဃံအလၤလၢအခိၣ်န့ၣ်လီၤ.

43တုၤနုၤတစုယစံးလၢပှၤလၢအသးပှၢ်တ့ၢ်လံလၢတၢ်အဲၣ်ဘၢမါအဲၣ်ဘၢဝၤအပူၤတဂၤအဂ့ၢ်,ခဲကနံၣ်အံၤအဝဲသ့ၣ်ကမၤကမၣ်မုၣ်ကမၣ်ခွါဒီးအီၤ,ဒီးအဝဲဒၣ်ဒီးအဝဲသ့ၣ်စ့ၢ်ကီးဧါ.

44ဒီးအဝဲသ့ၣ်လဲၤနုာ်ဆူအအိၣ်,ဒ်ပှၤလဲၤနုာ်ဆူပှၤဃဲသဲမုၣ်အအိၣ်အသိးန့ၣ်လီၤ.ဒီးလဲၤနုာ်ဆူပိာ်မုၣ်လၢအသးကလုာ်ကလိၤနီၢ်အၤဟိးလၤ,ဒီးနီၢ်အၤဟိးလံဘၤအအိၣ်ဒ်န့ၣ်သိးလီၤ.

45ဒီးပှၤကညီအတီအလိၤတဖၣ်ကစံၣ်ညီၣ်အီၤဒ်ပှၤအဲၣ်ဘၢဝၤဘၣ်တၢ်စံၣ်ညီၣ်အသိး,ဒီးဒ်ပိာ်မုၣ်လၢအလူလီၤတၢ်သွံၣ်ဘၣ်တၢ်စံၣ်ညီၣ်အသိးလီၤ.အဂ့ၢ်ဒ်အံၤ,မ့ၢ်ပှၤအဲၣ်ဘၢဝၤ,ဒီးတၢ်သွံၣ်အိၣ်ဝဲလၢအစုပူၤလီၤ.

46အဂ့ၢ်ဒ်အံၤ,ကစၢ်ယွၤစံးဒ်အံၤယကဒုးဟဲထီဒါအီၤလၢပှၤတဖုဖးဒိၣ်,ဒီးယကဟ့ၣ်ပှၤမၤကိၢ်မၤဂီၤအီၤ,ဒီးဂုာ်ဆူၣ်ပျီဆူၣ်အတၢ်လီၤ. 47ဒီးပှၤတဖုန့ၣ်ကကွံာ်အီၤလၢလၢၢ်,ဒီးဒီၣ်တဲာ်ကွံာ်အီၤလၢနး,ဒီးကမၤသံအဖိခွါ,ဒီးအဖိမုၣ်တဖၣ်,ဒီးဆူးကွံာ်အဟံၣ်လၢမ့ၣ်အူလီၤ.

48ဒီးယကဒုးဆိတ့ၢ်တၢ်သးကလုာ်ကလိၤလၢကီၢ်ပူၤ,ဒ်သိးပိာ်မုၣ်ခဲလၢာ်ကပလီၢ်အသး,ဒ်သိးအသုတမၤထွဲအဝဲသ့ၣ်အသးကလုာ်ကလိၤအခံတဂ့ၤ.

49ဒီးကဟ့ၣ်ကၣ်သုသးကလုာ်ကလိၤလၢသုလိၤ,ဒီးသုကတူၢ်သုတၢ်ဂီၤတဖၣ်အတၢ်ဒဲးဘး,ဒီးသုကသ့ၣ်ညါလၢယမ့ၢ်ကစၢ်ယွၤလီၤ.