Ezekiel 24
1ဒီးလၢခွံနံၣ်တနံၣ်,လါဆံဆဲၣ်လါတလါ,ထီၣ်ဆံဆဲၣ်နံၤတနံၤန့ၣ်ယွၤအကလုၢ်ဘၣ်ယၤ,ဒီးစံးဝဲဒၣ်, 2ပှၤကညီဖိခွါဧၢ,ကွဲးမုၢ်တနံၤအမံၤ,မုၢ်တနံၤအံၤဒၣ်လဲာ်တက့ၢ်.ဘၤဘူၤလိၣ်အစီၤပၤပာ်လီၤအသးထီဒါယရူၤၡလ့ၣ်လၢမုၢ်တနံၤဃီအံၤလီၤ. 3ဒီးကတိၤဒိတၢ်ဒီးပှၤဟံၣ်ဖိလၢအပူၤထီၣ်ဒၣ်တၢ်,ဒီးစံးဘၣ်အီၤ,ကစၢ်ယွၤစံးဒ်အံၤ,ပာ်ထီၣ်သပၢၤ,ပာ်ထီၣ်အီၤ,ဒီးလူလီၤထံလၢအပူၤတက့ၢ်. 4ထၢဖှိၣ်,ဒီးဒၢနုာ်တၢ်အလိၣ်တဖၣ်လၢအပူၤ,ကယဲၢ်တၢ်အလိၣ်လၢအဂ့ၤ,ကံၣ်ဒုၣ်ဒီးဖံဘၣ်ခိၣ်,မၤပှဲၤအီၤဒီးတၢ်အဃံအကွဲလၢအဂ့ၤအဘၣ်တက့ၢ်. 5ဒီးဟံးန့ၢ်တၢ်အဂ့ၤကတၢၢ်လၢသိဒီးမဲာ်တဲးလဲးအကျါ,ဒီးမၤတၢ်တပူလၢအဖီလာ်လၢတၢ်အဃံအကွဲ,ဒုးကလာ်ထီၣ်အီၤဧ့ၢ်ဂ့ၤ,ဒီးချီတၢ်ဃံတဖၣ်လၢအပူၤတက့ၢ်. 6မၤသးဒ်န့ၣ်ဒီးကစၢ်ယွၤစံးဒ်အံၤ,ဝ့ၢ်အိၣ်ဒီးတၢ်သွံၣ်,သပၢၤလၢတိၢ်အအ့ၣ်အိၣ်ဝဲလၢအပူၤ,ဒီးအအ့ၣ်တဟးထီၣ်ကွံာ်လၢအီၤဘၣ်န့ၣ်ဘၣ်အဖှီၣ်လီၤ.ဟဲစိာ်ထီၣ်အီၤတလိၣ်ဘၣ်တလိၣ်တက့ၢ်.မ်ပှၤသုတဖးလၢအဂီၢ်တဂ့ၤ. 7အဂ့ၢ်ဒ်အံၤ,တၢ်အသွံၣ်အိၣ်ဝဲလၢအသးကံၢ်ပူၤ,လူဝဲလၢလၢၢ်ခိၣ်ပျီ,တလူလီၤဘၣ်ဝဲလၢဟီၣ်ခိၣ်အဖီခိၣ်,ဒ်သိးအကမၤဘၢဝဲလၢဟီၣ်ခိၣ်အကမူၣ်ဘၣ်. 8ဒ်သိးတၢ်အသးကကဲၤထီၣ်,ဒ်သိးတၢ်ကမၤဆၢတၢ်အၢဒီး,ယပာ်လီၤအသွံၣ်လၢလၢၢ်ခိၣ်ပျီဒ်သိးအသုတလီၤဘၢတဂ့ၤလီၤ. 9မၤသးဒ်န့ၣ်ဒီးကစၢ်ယွၤစံးဒ်အံၤ,ဝ့ၢ်အိၣ်ဒီးတၢ်သွံၣ်န့ၣ်ဘၣ်အဖှီၣ်လီၤ.ယကမၤတၢ်ပူဒိၣ်လီၤ. 10ပာ်ဖှိၣ်သ့ၣ်မုၣ်,ဆိၣ်ကဲၤထီၣ်မ့ၣ်အူ,ချီမံတၢ်ညၣ်,ဒၢနုာ်တၢ်ဟဲတၢ်ဆှီ,ဒီးဆူးထီၣ်ကွံာ်တၢ်ဃံတၢ်ကွဲတက့ၢ်. 11တုၤနုၤတဘျီပာ်သပၢၤန့ၣ်အိၣ်ကလီလၢမ့ၣ်ကဖးအဖီခိၣ်,ဒ်သိးအတိၢ်ကကိၢ်ထီၣ်,ဒီးကဆူးထီၣ်ကွံာ်,ဒီးအတၢ်ဘၣ်အၢကပှံၢ်ဝဲလၢအပူၤ,ဒီးအအ့ၣ်ကလၢာ်ကွံာ်န့ၣ်တက့ၢ်. 12အဝဲန့ၣ်မၤဘှံးယသးလၢတၢ်မၤဘၣ်ဆၣ်ဒီး,အအ့ၣ်တဟးထီၣ်ဘၣ်လၢအပူၤဘၣ်.အအ့ၣ်အိၣ်ဒၣ်အတၢ်လၢမ့ၣ်အူကျါလီၤ. 13တၢ်ကလုာ်ကလိၤအိၣ်ဝဲလၢနတၢ်တကဆှီဘၣ်အပူၤလီၤ.အဂ့ၢ်ဒ်အံၤ,တုၤယမၤကဆှီနၤဒီး,နတကဆှီထီၣ်ဘၣ်.တၢ်တသ့စီလၢၤဘၣ်တၢ်အၢလၢနလိၤတုၤယမၤလၢထီၣ်ပှဲၤထီၣ်ယသးကဲၤထီၣ်လၢနလိၤလီၤ. 14ယၤယွၤအံၤယကတိၤလံတၢ်လံ.ကမၤအသး,ဒီးယကမၤယဲလီၤ.ယတဃၣ်ကွံာ်ဘၣ်ယသးဘၣ်,ဒီးယတသးလီဘၣ်,ဒီးယတပီၢ်ယၢ်လီၤက့ၤဘၣ်ယသးဘၣ်.ဒ်နကျဲအသိးန့ၣ်,ဒီးဒ်နမၤတၢ်အသိးန့ၣ်ပှၤကစံၣ်ညီၣ်နၤလီၤ,ကစၢ်ယွၤစံးဝဲဒၣ်. 15ဒီးယွၤအကလုၢ်ဘၣ်ယၤဒီးစံးဝဲဒၣ်, 16ပှၤကညီဖိခွါဧၢ,ကွၢ်ကွၢ်,ယဟံးထီၣ်ကွံာ်တၢ်လၢအဘၣ်နမဲာ်လၢတၢ်တီၢ်တဘျီလီၤ.ဘၣ်ဆၣ်ဒီးနတဘၣ်ဟီၣ်ဘၣ်ယၢၤဘၣ်,ဒီးနမဲာ်ထံတဘၣ်ယွၤလီၤဘၣ်. 17ကအုကစွါအိၣ်ဃိကလာ်တက့ၢ်,ဟီၣ်လၢပှၤသံအဃိတဂ့ၤ.ဖၢၣ်ထီၣ်နခိၣ်ဖၢၣ်လၢနခိၣ်,ဖျီၣ်ထီၣ်နခီၣ်ဖံးလၢနခီၣ်,ဒီးကျၢၢ်ဘၢနထးခိၣ်တဂ့ၤ,ဒီးအီၣ်ပှၤဖှီၣ်ဖိအကိၣ်တဂ့ၤ. 18ဒီးယကတိၤတၢ်ဒီးပှၤဂီၢ်မုၢ်လၢမုၢ်ဂီၤ,ဒီးလၢမုၢ်ဟါန့ၣ်ယမါသံဝဲလီၤ.ဒီးမုၢ်ဆ့ၣ်ထီၣ်န့ၣ်ယမၤတၢ်ဒ်တၢ်မၤလိာ်ယၤအသိးန့ၣ်လီၤ. 19ဒီးပှၤဂီၢ်မုၢ်စံးဘၣ်ယၤ,တၢ်တဖၣ်လၢနမၤန့ၣ်ဘၣ်ဃးဒီးပှၤဒ်လဲၣ်န့ၣ်နတစံးဘၣ်ပှၤဘၣ်ဧါ. 20ဒီးယစံးဘၣ်အီၤ,ယွၤအကလုၢ်ဘၣ်ယၤဒီးစံးဝဲဒၣ်, 21စံးဘၣ်အံၣ်စရ့လးအပှၤဟံၣ်ဖိ,ကစၢ်ယွၤစံးဒ်အံၤ,ကွၢ်ကွၢ်,ယကမၤဘၣ်အၢယလီၢ်စီဆှံ,သုသန့ၤသုသးအလီၢ်လၢသုပာ်ကဖိသုသးလၢအဃိ,တၢ်လၢအဘၣ်သုမဲာ်,ဒီးတၢ်လၢသုသးလီအီၤလီၤ.ဒီးသုဖိခွါ,ဒီးသုဖိမုၣ်လၢအအိၣ်လီၤတဲာ်ဒီးသုန့ၣ်ကလီၤဃံၤလၢနးဧိၤဘီဧိၤလီၤ. 22ဒီးသုကမၤတၢ်ဒ်ယမၤအသိးန့ၣ်လီၤ.သုတကျၢၢ်ဘၢသုးထးခိၣ်ဘၣ်,ဒီးတအီၣ်ဘၣ်ပှၤဖှီၣ်ဖိအကိၣ်ဘၣ်. 23ဒီးသုခိၣ်ဖၢၣ်ကအိၣ်လၢသုခိၣ်,ဒီးသုခီၣ်ဖံးကအိၣ်လၢသုခီၣ်လီၤ.သုတဟီၣ်တယၢၤဘၣ်,ဒီးသုကဃဲၤလီၤကွံာ်လၢသုတၢ်ဒဲးဘးအပူၤ,ဒီးသုကကအုကစွါတဂၤဒီးတဂၤသကိးသကိးလီၤ. 24ဒီးစီၤယဃ့းစက့လးကကဲထီၣ်တၢ်ပနီၣ်တမံၤလၢသုဂီၢ်လီၤ.ဒ်အဝဲဒၣ်မၤတ့ၢ်တၢ်ခဲလၢာ်အသိးန့ၣ်သုကမၤလီၤ.တုၤအဝဲန့ၣ်မၤအသးဒီး,သုကသ့ၣ်ညါလၢယမ့ၢ်ကစၢ်ယွၤလီၤ. 25ဒီးနဲဒၣ်ပှၤကညီဖိခွါဧၢ,မုၢ်တနံၤလၢယဟံးထီၣ်က့ၤအဂံၢ်အဘါ,အလၤကပီၤအသူၣ်ဖှံသးညီ,တၢ်လၢအဘၣ်အမဲာ်,ဒီးတၢ်လၢအသးလီအီၤ,အဖိခွါ,ဒီးအဖိမုၣ်တဖၣ်န့ၣ်ဒီး, 26တၢ်လၢမုၢ်တနံၤန့ၣ်ပှၤလၢအပူၤဖျဲးတၢ်တဂၤကဟဲဆူနအိၣ်ဒ်သိးအကဒုးနၢ်ဟူနၤလၢတၢ်လၢနနၢ်ပူၤလီၤ. 27တၢ်လၢမုၢ်တနံၤန့ၣ်နထးခိၣ်ကအဲးထီၣ်အသးလၢပှၤလၢအပူၤဖျဲးတၢ်အဂီၢ်,ဒီးနကကတိၤတၢ်,ဒီးတအိၣ်တအုၣ်လၢၤဘၣ်,ဒီးနကကဲထီၣ်တၢ်ပနီၣ်တမံၤလၢအဂီၢ်,ဒီးကသ့ၣ်ညါဝဲလၢယမ့ၢ်ယွၤလီၤ.
Copyright information for
KswSKMB