Ezekiel 31
1ဒီးတၢ်မၤအသးလၢနံၣ်တဆံတနံၣ်,လါသၢလါတလါထီၣ်တနံၤန့ၣ်ယွၤအကလုၢ်ဘၣ်ယၤဒီးစံးဝဲဒၣ်, 2ပှၤကညီဖိခွါဧၢ,စံးဘၣ်အဲၤကူပတူးအစီၤပၤဖၤရိၤဒီးအပှၤဂီၢ်မုၢ်,လၢနတၢ်ဒိၣ်တၢ်ထီအပူၤန့ၣ်နလီၤဂာ်မတၤတဂၤလဲၣ်. 3ကွၢ်ကွၢ်,ပှၤအၤရှူၢ်ဖိမ့ၢ်တ့ၢ်သ့ၣ်ဆှိအ့ရ့းလၢလဘၤနိၣ်အလိၤအိၣ်ဒီးအဒ့တဖၣ်အဃံအလၤတထံး,မ့ၢ်သ့ၣ်ကဟု,ဒီးအထူၣ်ထီ,ဒီးအခံအိၣ်ဝဲလၢအဒ့အါဒ့အကျါလီၤ. 4ထံဒုးဒိၣ်ထီၣ်အီၤ,ထံယိာ်ဒုးထီထီၣ်အီၤ,အထံကျိတဖၣ်ယွၤလီၤဝးတရံးအတၢ်သူၣ်အသးအလီၢ်,ဒီးဖးဒ့ထီၣ်အထံကျိဖိဆူကယဲၢ်သ့ၣ်အိၣ်လၢဟီၣ်ခိၣ်အကဝီၤအပူၤခဲလၢာ်လီၤ. 5မၤသးဒ်န့ၣ်ဒီးအထူၣ်ထီန့ၣ်ကယဲၢ်သ့ၣ်လၢပှၢ်လၢ်ကျါတက့ၢ်,ဒီးအဒ့အါထီၣ်,ဒီးအဒ့ထီထီၣ်လၢထံအါအဃိဖဲအဒိးထီၣ်လီၤ. 6ထိၣ်ဧိၤလံၣ်ဧိၤလၢမူကပိာ်လိၤခဲလၢာ်မၤအသွံလၢအခံ,ဒီးဆၣ်ဖိကီၢ်ဖိလၢပှၢ်လၢ်ကျါခဲလၢာ်န့ၣ်ဖှံလီၤအဖိလၢအကဟုလာ်,ဒီးပှၤကလုာ်ဖးဒိၣ်ခဲလၢာ်အိၣ်ဝဲဆိးဝဲလၢအကဒုပူၤလီၤ. 7ဒီးအိၣ်ဝဲဒီးအဃံအလၤလၢအတၢ်ဒိၣ်တၢ်ထီအဃိလၢအဒ့ထီအဃိလီၤ.အဂ့ၢ်ဒ်အံၤ,အဂံၢ်အိၣ်ဝဲလၢထံအါအလီၢ်လီၤ. 8သ့ၣ်ဆှိအ့ရ့းလၢကစၢ်အတၤသၣ်အလီၢ်,မၤတဒၢအီၤတသ့ဘၣ်,သ့ၣ်ဆှိတထဲသိးဘၣ်ဒီးအဒ့ဘၣ်,ဒီးသ့ၣ်ဧၢ်မိၢ်တထဲသိးဘၣ်ဒီးအဒ့အဖီဘၣ်,ဒီးသ့ၣ်ထဲသိးဒီးအီၤအိၣ်ဒီးအဃံအလၤတအိၣ်ဘၣ်လၢကစၢ်အတၤသၣ်အလီၢ်ဘၣ်. 9ယပာ်အဃံအလၤလၢအဒ့အါအဃိ,ဒီးကယဲၢ်ဧ့ၤဒ့ၣ်အသ့ၣ်လၢကစၢ်အတၤသၣ်အလီၢ်ခဲလၢာ်န့ၣ်သးကါအီၤလီၤ. 10မၤသးဒ်န့ၣ်ဒီးကစၢ်ယွၤစံးဒ်အံၤမ့ၢ်အပာ်ထီအသး,ဒီးယူာ်ထီၣ်အခံလၢဒ့အါဒ့အကျါ,ဒီးပာ်အသးထီၣ်ထီလၢအထီအဃိဒီး, 11ယဟ့ၣ်လီၤကွံာ်အီၤလၢပှၤအဆူၣ်လၢပှၤကလုာ်တဖၣ်တဂၤအစုပူၤ,ဒီးအဝဲဒၣ်ကမၤအီၤလီၤ.ကဟီထီၣ်ကွံာ်အီၤလၢအတၢ်ဒဲးဘးအဃိလီၤ. 12ဒီးပှၤတခီဘီမုၢ်ဖိ,တၢ်မၤပျံၤတၢ်လၢပှၤကလုာ်တဖၣ်အကျါ,ကူာ်လီၤကွံာ်အီၤ,ဒီးလဲၤသဒၣ်အီၤ,အဒ့လီၤဒါလၢကစၢၢ်လိၤ,ဒီးလၢကစၢၢ်ကဆူးခဲလၢာ်အပူၤ,ဒီးအဒ့ကၢ်ကွံာ်လၢတၢ်တြိခဲလၢာ်အပူၤ,ဒီးပှၤကိးကလုာ်ဒဲးလၢဟီၣ်ခိၣ်ချၢဟးထီၣ်လၢအကဟုလာ်,ဒီးလဲၤသဒၣ်အီၤလီၤ. 13လၢအသဃာ်ပူၤန့ၣ်မူကပိာ်လိၤအထိၣ်ဧိၤလံၣ်ဧိၤန့ၣ်စီၢ်လီၤ,ဒီးဆၣ်ဖိကီၢ်ဖိလၢပှၢ်လၢ်ကျါအိၣ်ဝဲလၢအဒ့တဖၣ်အဖီခိၣ်ခဲလၢာ်, 14ဒ်သိးသ့ၣ်လၢထံနံၤအသုတပာ်ထီၣ်ထီအသးလၢအထီအဃိနီတထံးတဂ့ၤ,ဒီးအသုတယူာ်ထီၣ်အခံလၢကဟုကျါတဂ့ၤ,ဒီးဒ်သိးသ့ၣ်လၢအအီထံအသုတဆၢထၢၣ်လၢအထီဝဲအဃိနီတထံးတဂ့ၤလီၤ.အဂ့ၢ်ဒ်အံၤ,တၢ်ဟ့ၣ်လီၤကွံာ်အီၤဆူတၢ်သံ,ဆူဟီၣ်ခိၣ်လာ်လၢပှၤကညီဖိအကျါ,ဆူပှၤလၢအလဲၤလီၤဆူတၢ်ပူၤလီၤ. 15ကစၢ်ယွၤစံးဒ်အံၤ,မုၢ်တနံၤလၢအလဲၤလီၤဆူပျုၤပူၤန့ၣ်ယဒုးဟီၣ်တၢ်လီၤ.ယကျၢၢ်ဘၢထံယိာ်လၢအဃိ,ဒီးယတြီတၢ်လၢအဃိ,အထံကျိတဖၣ်,ဒီးထံဖးဒိၣ်တဖၣ်အိၣ်ကတီၢ်ဝဲလီၤ.ဒီးယဒုးဟီၣ်လဘၤနိၣ်လၢအဃိ,ဒီးသ့ၣ်လၢပှၢ်လၢ်ကျါခဲလၢာ်အသးလီၤဘှါလၢအဃိလီၤ. 16တုၤယတ့ၢ်လီၤကွံာ်အီၤဆူပျုၤပူၤ,ဒီးဆူပှၤလၢအလဲၤလီၤဆူတၢ်ပူၤအအိၣ်ဒီး,ယဒုးကနိးပှၤကလုာ်တဖၣ်လၢအလီၤဃံၤအသီၣ်လီၤ.ဒီးဧ့ၤဒ့ၣ်အသ့ၣ်ခဲလၢာ်,ဒီးတၢ်ဘၣ်ဃုထၢအီၤ,ဒီးတၢ်အဂ့ၤလၢလဘၤနိၣ်အလိၤ,ကယဲၢ်တၢ်လၢအအီထံခဲလၢာ်န့ၣ်ကမုာ်ထီၣ်က့ၤလၢဟီၣ်ခိၣ်လာ်လီၤ. 17အဝဲသ့ၣ်တဖၣ်န့ၣ်လီၤစ့ၢ်ကီးလၢပျုၤပူၤဒီးအီၤဆူပှၤဘၣ်တၢ်မၤသံအီၤလၢနးဧိၤဘီဧိၤအအိၣ်လီၤ.ဒီးပှၤလၢအမ့ၢ်တ့ၢ်အစုလၢအအိၣ်အဆိးလၢအကဟုလာ်လၢပှၤကလုာ်တဖၣ်အကျါလီၤ. 18နလၤကပီၤဒီးနတၢ်ဒိၣ်တၢ်ထီန့ၣ်နလီၤဂာ်ဒီးမတၤတဂၤလၢဧ့ၤဒ့ၣ်အသ့ၣ်ကျါလဲၣ်.မ့ၢ်မးနကဘၣ်တၢ်ဆီၣ်လီၤနၤဒီးဧ့ၤဒ့ၣ်အသ့ၣ်တဖၣ်ဆူဟီၣ်ခိၣ်လာ်လီၤ.နကမံလီၤဒီးပှၤတဒိးတၢ်ကူးတရံးဖိ,ဒီးပှၤဘၣ်တၢ်မၤသံအီၤလၢနးဧိၤဘီဧိၤအကျါလီၤ.အဝဲန့ၣ်မ့ၢ်ဖၤရိၤဒီးအပှၤဂီၢ်မုၢ်ခဲလၢာ်လီၤ.ကစၢ်ယွၤစံးဝဲဒၣ်.
Copyright information for
KswSKMB