‏ Ezekiel 33

1ဒီးယွၤအကလုၢ်ဘၣ်ယၤ,ဒီးစံးဝဲဒၣ်, 2ပှၤကညီဖိခွါဧၢ,ကတိၤတၢ်ဒီးနပှၤဂီၢ်မုၢ်ဖိ,ဒီးစံးဘၣ်အီၤ,တုၤယဒုးဘၣ်ကီၢ်လၢနးဧိၤဘီဧိၤဒီး,ပှၤကီၢ်ဖိမ့ၢ်ဟံးန့ၢ်ပှၤတဂၤလၢအကီၢ်ပူၤ,ဒီးပာ်အီၤလၢပှၤပၢၤတၢ်ဖိဒီး, 3တုၤအထံၣ်နးဧိၤဘီဧိၤဟဲဘၣ်ကီၢ်န့ၣ်ဒီး,မ့ၢ်အူထီၣ်ကွဲၤဒီးဒုးပလီၢ်ပှၤဂီၢ်မုၢ်အသးဒီး, 4ဖဲဒၣ်ပှၤလၢအနၢ်ဟူကွဲၤအသီၣ်,ဒီးတပလီၢ်ဘၣ်အသးတဂၤဂၤန့ၣ်နးဧိၤဘီဧိၤမ့ၢ်ဟဲဒီးစိာ်ထီၣ်ကွံာ်အီၤဒီး,အသွံၣ်ကအိၣ်လၢအခိၣ်ဒၣ်ဝဲအဖီခိၣ်လီၤ. 5နၢ်ဟူကွဲၤအသီၣ်,ဒီးတပလီၢ်ဘၣ်အသးဘၣ်.အသွံၣ်ကအိၣ်လၢအလိၤလီၤ.မ့မ့ၢ်ပှၤလၢအပလီၢ်အသးန့ၣ်ကမၤပူၤမၤဖျဲးအသးလီၤ.

6မ့မ့ၢ်ပှၤပၢၤတၢ်ဖိမ့ၢ်ထံၣ်ဘၣ်နးဧိၤဘီဧိၤဟဲဝဲ,ဒီးတအူထီၣ်ဘၣ်ကွဲၤ,ဒီးတဒုးပလီၢ်ဘၣ်ပှၤဂီၢ်မုၢ်အသးဘၣ်ဒီး,နးဧိၤဘီဧိၤန့ၣ်မ့ၢ်ဟဲဒီးစိာ်ထီၣ်ကွံာ်ပှၤတဂၤဂၤလၢအကျါဒီး,တၢ်စိာ်ထီၣ်ကွံာ်အီၤလၢအတၢ်ဒဲးဘးအဃိလီၤ.ဘၣ်ဆၣ်ဒီးယကဃုအသွံၣ်လၢပှၤပၢၤတၢ်ဖိအစုပူၤလီၤ.

7ဒီးနဲဒၣ်ပှၤကညီဖိခွါဧၢ,ယပာ်တ့ၢ်နၤလၢပှၤပၢၤတၢ်ဖိလၢအံၣ်စရ့လးအပှၤဟံၣ်ဖိအဂီၢ်,ဒီးနဘၣ်ကနၣ်တၢ်ကတိၤလၢယထးခိၣ်,ဒီးဒုးပလီၢ်အသးလၢယၤလီၤ.

8တုၤယစံးဘၣ်ပှၤတတီတလိၤဘၣ်,ပှၤတတီတလိၤဘၣ်တဂၤဧၢ,သံဒီးနကသံဒီး,နမ့ၢ်တကတိၤဘၣ်ဒ်သိးနကဒုးပလီၢ်ပှၤတတီတလိၤအသးလၢအကဃၣ်ကွံာ်အသးလၢအကျဲဘၣ်ဒီး,တၢ်လၢပှၤတတီတလိၤဘၣ်တဂၤန့ၣ်ကသံဝဲလၢအတၢ်ဒဲးဘးအဃိလီၤ.ဘၣ်ဆၣ်ဒီးယကဃုအသွံၣ်လၢနစုပူၤလီၤ.

9မ့ၢ်နာ်သက့ဒ်န့ၣ်ဒီးနမ့ၢ်ဒုးပလီၢ်ပှၤတတီတလိၤအသးလၢအကဃၣ်ကွံာ်အသးလၢအကျဲဒီး,မ့ၢ်တဃၣ်ကွံာ်ဘၣ်အသးလၢအကျဲဘၣ်ဒီး,ကသံဝဲလၢအတၢ်ဒဲးဘးအဃိလီၤ.ဘၣ်ဆၣ်ဒီးနမၤပူၤမၤဖျဲးနသးလံလီၤ.

10ဒီးနဲဒၣ်အံၤပှၤကညီဖိခွါဧၢ,စံးဘၣ်အံၣ်စရ့လးအပှၤဟံၣ်ဖိ,သုကတိၤတၢ်,ဒီးသုစံး,ပတၢ်ကမၣ်ဒီးပတၢ်ဒဲးဘးအိၣ်လၢပလိၤ,ဒီးပဃဲၤလီၤကွံာ်လၢအဃိ,ဒီးပကမူဒံးဒ်လဲၣ်.

11စံးဘၣ်အီၤ,ယမူယဲ,ကစၢ်ယွၤစံးဝဲဒၣ်,ပှၤတတီဘၣ်သံန့ၣ်တမ့ၢ်ဘၣ်အဘၣ်ယသးဘၣ်,မ့ၢ်အဘၣ်ယသးလၢအကဃၣ်ကွံာ်အသးလၢအကျဲဒီးမူဝဲလီၤ.ဃၣ်ကွံာ်သုသး,ဃၣ်ကွံာ်သုသးလၢသုကျဲအၢန့ၣ်တက့ၢ်.အဂ့ၢ်ဒ်အံၤ,အံၣ်စရ့လးအပှၤဟံၣ်ဖိသ့ၣ်ဧၢ,သုကသံမ့ၢ်အဘၣ်မနုၤလဲၣ်.

12ဒီးနဲဒၣ်အံၤပှၤကညီဖိခွါဧၢ,စံးဘၣ်နပှၤဂီၢ်မုၢ်ဖိ,ပှၤအတီတဂၤအတၢ်တီန့ၣ်တမၤပူၤမၤဖျဲးအီၤလၢအမၤကမၣ်တၢ်အမုၢ်နံၤဘၣ်.ဒီးပှၤတတီဘၣ်တဂၤန့ၣ်တလီၤဃံၤဘၣ်လၢအတၢ်တတီဘၣ်အဃိလၢမုၢ်နံၤဖဲအဃၣ်ကွံာ်အသးလၢအတၢ်တတီတလိၤန့ၣ်ဘၣ်.ဒီးပှၤတီန့ၣ်တမူဘၣ်လၢမုၢ်တနံၤဖဲအမၤတၢ်ဒဲးဘးန့ၣ်ဘၣ်.

13တုၤယစံးလၢပှၤအတီအလိၤအဂ့ၢ်န့ၣ်,မူဒီးကမူဝဲလီၤန့ၣ်ဒီး,မ့ၢ်သန့ၤအသးလၢအတၢ်တီ,ဒီးမၤတၢ်ဒဲးဘးဒီး,တၢ်တသ့ၣ်နီၣ်ထီၣ်က့ၤဘၣ်အတၢ်တီနီတမံၤဘၣ်.မ့မ့ၢ်အကသံဝဲလၢအတၢ်ဒဲးဘးလၢအမၤဝဲအဃိလီၤ.

14ဒီးတုၤယစံးလၢပှၤတတီတလိၤဘၣ်အဂ့ၢ်,သံဒီးကသံဝဲဒီး,မ့ၢ်ဃၣ်ကွံာ်အသးလၢအတၢ်ဒဲးဘးန့ၣ်,ဒီးမၤတၢ်စံၣ်ညီၣ်,ဒီးတၢ်တီတၢ်လိၤဒီး, 15ပှၤတတီဘၣ်မ့ၢ်ဟ့ၣ်က့ၤတၢ်ဟ့ၣ်ကီၤ,မ့ၢ်ဟ့ၣ်ကၣ်တၢ်လၢအဂုာ်ဆူၣ်ပျီဆူၣ်,ဒီးတမၤတၢ်ဒဲးဘးဘၣ်,ဒီးမ့ၢ်လဲၤတၢ်လၢတၢ်မူအတၢ်သိၣ်တၢ်သီအပူၤဒီး,မူဒီးကမူဝဲလီၤ.

16တၢ်တသ့ၣ်နီၣ်ထီၣ်ဘၣ်ထီဒါအီၤလၢအတၢ်ဒဲးဘးလၢအမၤဝဲနီတမံၤဘၣ်.မၤတ့ၢ်ဝဲလၢတၢ်စံၣ်ညီၣ်ဒီးတၢ်တီတၢ်လိၤလီၤ.မူဒီးကမူဝဲလီၤ.

17ဘၣ်ဆၣ်ဒီးနပှၤဂီၢ်မုၢ်ဖိစံး,ယွၤအကျဲတတီတဘၣ်ဘၣ်လီၤ.မ့မ့ၢ်အဝဲသ့ၣ်အကျဲတတီတဘၣ်ဘၣ်လီၤ.

18ဒီးတုၤပှၤတီပှၤလိၤဃၣ်ကွံာ်အသးလၢအတၢ်တီတၢ်လိၤ,ဒီးမၤတၢ်ဒဲးဘးဒီး,ကသံဝဲလၢအဃိလီၤ.

19ဒီးတုၤပှၤတတီတလိၤဃၣ်ကွံာ်အသးလၢအတၢ်တတီတလိၤဘၣ်,ဒီးမၤတၢ်စံၣ်ညီၣ်,ဒီးတၢ်တီတၢ်လိၤဒီး,ကမူဝဲလၢအဃိလီၤ.

20ဘၣ်ဆၣ်ဒီးသုစံး,ယွၤအကျဲတတီတလိၤဘၣ်လီၤ.ပှၤအံၣ်စရ့လးအပှၤဟံၣ်ဖိသ့ၣ်ဧၢ,ယစံၣ်ညီၣ်သု,တဂၤဒ်အကျဲဒၣ်ဝဲအသိး,တဂၤဒ်အကျဲဒၣ်ဝဲအသိး,စုာ်စုာ်လီၤ.

21ဒီးလၢပကဲကုၢ်အနံၣ်တဆံခံနံၣ်တနံၣ်,လါဆံဆဲၣ်လါတလါထီၣ်ယဲၢ်နံၤတနံၤန့ၣ်တၢ်မၤအသးလၢပှၤလၢအပူၤဖျဲးဒီးယရူၤၡလ့ၣ်တဂၤဟဲဝဲဆူယအိၣ်,ဒီးစံးဝဲဒၣ်,တၢ်မၤလူၤလံဝ့ၢ်န့ၣ်လံ.

22ယွၤအစုအိၣ်တ့ၢ်ဝဲလၢယလိၤလၢမဟါတနံၤလၢမုၢ်ဟါလၢပှၤလၢအပူၤဖျဲးတဂၤတချုးဟဲဒံးဘၣ်န့ၣ်ဒီးဒုးအဲးထီၣ်တ့ၢ်ယထးခိၣ်တုၤအဝဲဒၣ်ဟဲဆူယအိၣ်လၢမုၢ်ဂီၤလီၤ.ဒုးအဲးထီၣ်ယထးခိၣ်,ဒီးယတအိၣ်တအုၣ်လၢၤဘၣ်.

23ဒီးယွၤအကလုၢ်ဘၣ်ယၤဒီးစံးဝဲဒၣ်, 24ပှၤကညီဖိခွါဧၢ,ပှၤလၢအအိၣ်အဆိးလၢအံၣ်စရ့လးအလီၢ်အိၣ်သယုၢ်တဖၣ်အပူၤန့ၣ်ကတိၤတၢ်ဒီးစံးဝဲ,စီၤအၤဘြၤဟၣ်မ့ၢ်ပှၤတဂၤဃီ,ဒီးန့ၢ်ဘၣ်သါထံဧိၤကီၢ်ဧိၤန့ၣ်လီၤ.မ့မ့ၢ်ပဝဲဒၣ်အံၤပမ့ၢ်ပှၤအါဂၤလီၤ.တၢ်ဟ့ၣ်လီၤပှၤလၢထံဧိၤကီၢ်ဧိၤလၢပန့ၢ်သါတၢ်အဂီၢ်လီၤ.

25မၤသးဒ်န့ၣ်ဒီးစံးဘၣ်အီၤ,ကစၢ်ယွၤစံးဒ်အံၤ,သုအီၣ်တၢ်ဒီးတၢ်သွံၣ်,ဒီးသုကျ့ထီၣ်သုမဲာ်ဆူသုတၢ်ဂီၤတၢ်ဖီၣ်,ဒီးသုလူလီၤတၢ်သွံၣ်လီၤ.ဒီးသုကန့ၢ်ဘၣ်ထံဧိၤကီၢ်ဧိၤစ့ၢ်ကီးဧါ.

26သုသန့ၤသုသးလၢသုနးလီၤ.သုမၤတၢ်သးဘၣ်အၢဒီးသုမၤဘၣ်အၢပှၤလၢအဃၢၤအမါ,တဂၤပှၤလၢအဃၢၤအမါစုာ်စုာ်လီၤ.ဒီးသုကန့ၢ်ဘၣ်ထံဧိၤကီၢ်ဧိၤန့ၣ်စ့ၢ်ကီးဧါ.

27စံးဘၣ်အီၤဒ်အံၤ,ကစၢ်ယွၤစံးဒ်အံၤ,ယမူယဲ,မ့ၢ်မးပှၤအိၣ်ဝဲလၢတၢ်အိၣ်သယုၢ်အပူၤတဖၣ်န့ၣ်ကလီၤဃံၤလၢနးဧိၤဘီဧိၤ,ဒီးပှၤလၢအအိၣ်ဝဲလၢပှၢ်လၢ်ကျါန့ၣ်ယကဟ့ၣ်လီၤကွံၤအီၤလၢဆၣ်ဖိကီၢ်ဖိဒ်သိးအကအီၣ်ကွံာ်အီၤ,ဒီးပှၤအိၣ်ဝဲလၢတိာ်ဧိၤတာ်ဧိၤအပူၤ,ဒီးလၢတၢ်အိပူၤန့ၣ်ကသံဝဲလၢတၢ်သံသတြိာ်လီၤ.

28ဒီးယကမၤသယုၢ်တုၢ်ထံဧိၤကီၢ်ဧိၤန့ၣ်,ဒီးအဂံၢ်အဘါအသးထီၣ်ထီန့ၣ်ကဆိတ့ၢ်,ဒီးအံၣ်စရ့လးအကစၢၢ်ကလိကအိၣ်သယုၢ်တုၤပှၤတခီဂာ်ဘၣ်အီၤနီတဂၤဘၣ်.

29တုၤယမၤသယုၢ်တုၢ်ထံဧိၤကီၢ်ဧိၤန့ၣ်လၢအတၢ်သးဘၣ်အၢလၢအမၤဝဲအဃိဒီး,ကသ့ၣ်ညါဝဲလၢယမ့ၢ်ယွၤလီၤ.

30ဒီးနဲဒၣ်အံၤ,ပှၤကညီဖိခွါဧၢ,နပှၤဂီၢ်မုၢ်ဖိကတိၤတၢ်လၢနဂ့ၢ်လၢတၢ်အဒူၣ်အဃၢၤ,ဒီးလၢဟံၣ်အကျဲစၢၤဃၢၤ,ဒီးကတိၤတၢ်တဂၤဒီးတဂၤ,ဒီးတဂၤဒီးအဒီပုၢ်ဝဲၢ်,ဒီးစံး,ဟဲလၢ်,ဒီးတၢ်ကတိၤလၢအဟဲလၢယွၤအအိၣ်န့ၣ်မ့ၢ်ဒ်လဲၣ်ဒ်လဲၣ်န့ၣ်ကနၣ်တက့ၢ်.

31ဒီးဟဲဝဲဆူနအိၣ်ဒ်ပှၤဂီၢ်မုၢ်အိၣ်ဖှိၣ်ရိဖှိၣ်အသိး,ဒီးဆ့ၣ်နီၤလၢနမဲာ်ညါဒ်ယပှၤဂီၢ်မုၢ်အသိး,ဒီးနၢ်ဟူတၢ်ကတိၤဘၣ်ဆၣ်ဒီး,တမၤဘၣ်အီၤဘၣ်.အဂ့ၢ်ဒ်အံၤ,အဲၣ်ဒိးတၢ်လၢအထးခိၣ်လီၤ.မ့မ့ၢ်အသးလဲၤထွဲအသးကွံတၢ်အခံလီၤ.

32ဒီးကွၢ်ကွၢ်,နအိၣ်လၢအဂီၢ်မၤသးဒ်ပှၤလၢအကလုၢ်မုာ်,လၢအသံကျံတၢ်သ့မးတဂၤအတၢ်သးဝံၣ်မုာ်မုာ်အသိးန့ၣ်လီၤ.အဂ့ၢ်ဒ်အံၤ,နၢ်ဟူနတၢ်ကတိၤဘၣ်ဆၣ်ဒီး,တမၤဘၣ်အီၤဘၣ်.

33ဒီးတုၤတၢ်န့ၣ်မၤအသးဒီး,(ကွၢ်ကွၢ်,ကမၤအသးလီၤ.),တုၤနုၤတစုကသ့ၣ်ညါဝဲလၢဝံတဂၤအိၣ်တ့ၢ်လံလၢအကျါလံလီၤ.

Copyright information for KswSKMB