Ezekiel 34
1ဒီးယွၤအကလုၢ်ဘၣ်ယၤဒီးစံးဝဲဒၣ်, 2ပှၤကညီဖိခွါဧၢ,ကတိၤတၢ်လၢဝံကျိာ်ထီဒါအံၣ်စရ့လးအပှၤကွၢ်သိ,ကတိၤတၢ်လၢဝံကျိာ်ဒီးစံးဘၣ်အီၤ,ပှၤကွၢ်သိတဖၣ်ဒၣ်လဲာ်,ကစၢ်ယွၤစံးဒ်အံၤ,အံၣ်စရ့လးအပှၤကွၢ်သိလၢအကွၢ်လီၤအသးတဖၣ်န့ၣ်ဘၣ်အဖှီၣ်လီၤ,ပှၤကွၢ်သိကြၢးဒုးအီၣ်အသိတဖုအဆၣ်,တမ့ၢ်ဘၣ်ဧါ. 3သုအီၣ်တၢ်အဘီၣ်,ဒီးသုကူသိးဒီးသိအဆူၣ်,သုမၤသံတၢ်အဘီၣ်လီၤ.မ့မ့ၢ်သုတဒုးအီၣ်တၤသိတဖုအဆၣ်ဘၣ်. 4တၢ်လၢအဂံၢ်စၢ်အဘါစၢ်န့ၣ်သုတဒုးဆူၣ်ထီၣ်ဘၣ်အီၤဘၣ်,ဒီးတၢ်လၢအဆါဝဲန့ၣ်သုတမၤဘျါဘၣ်အီၤဘၣ်,ဒီးတၢ်လၢအဘၣ်တူာ်န့ၣ်သုတဘိၣ်ထီၣ်ဘၣ်အီၤဘၣ်,ဒီးတၢ်လၢတၢ်ဟီထီၣ်ကွံာ်အီၤန့ၣ်သုတဟဲက့ၤစိာ်ဘၣ်အီၤဘၣ်,ဒီတၢ်လၢအဟးဖျိးကျဲန့ၣ်သုတဃုဘၣ်အီၤဘၣ်.မ့မ့ၢ်သုပၢအီၤလၢတၢ်မၤဆူၣ်,ဒီးတၢ်အစုဆူၣ်အခီၣ်သကးလီၤ. 5မၤသးဒ်န့ၣ်ဒီးမ့ၢ်ပှၤကွၢ်သိဖိတအိၣ်ဘၣ်ဒီး,အိၣ်ပြံပြါဝဲ,ဒီးကဲထီၣ်တၢ်အီၣ်လၢကယဲၢ်ဆၣ်ဖိကီၢ်ဖိလၢပှၢ်လၢ်ကျါအဂီၢ်,ဒီးအိၣ်ပြံပြါဝဲလီၤ. 6ယသိးဟးဖျိးလၢကစၢၢ်ကလိခဲလၢာ်အလိၤ,ဒီးလၢတၢ်စိခိၣ်ထီကိးဖျၢၣ်ဒဲးအလိၤလီၤ.မ့ၢ်မးယသိတဖုလီၤပြံလီၤပြါဝဲလၢကီၢ်ဒီဘ့ၣ်ညါအပူၤ,ဒီးပှၤဃုအီၤတအိၣ်,ပှၤချုအီၤတအိၣ်ဘၣ်လီၤ. 7မၤသးဒ်န့ၣ်ဒီးပှၤကွၢ်သိသ့ၣ်ဧၢ,ကနၣ်ယွၤအကလုၢ်တက့ၢ်. 8ယမူယဲ,ကစၢ်ယွၤစံးဝဲဒၣ်,မ့ၢ်မးမ့ၢ်ယသိတဖုကဲထီၣ်တၢ်ဂုာ်န့ၢ်,ဒီးယသိတဖုကဲထီၣ်တၢ်အီၣ်လၢကယဲၢ်ဆၣ်ဖိကီၢ်ဖိလၢပှၢ်လၢ်ကျါခဲလၢာ်အဂီၢ်,လၢပှၤကွၢ်သိတအိၣ်ဘၣ်အဃိ,ဒီးမ့ၢ်ယပှၤကွၢ်သိတဃုဘၣ်ယသိတဖုဘၣ်,ဒီးကွၢ်လီၤဒၣ်အသး,ဒီးတဒုးအီၣ်ဘၣ်ယသိတဖုအဆၣ်ဘၣ်ဒီး, 9ပှၤကွၢ်သိသ့ၣ်ဧၢ,ကနၣ်ယွၤအကလုၢ်တက့ၢ်. 10ကစၢ်ယွၤစံးဒ်အံၤ,ကွၢ်ကွၢ်,ယထီဒါပှၤကွၢ်သိ,ဒီးယကဃုယသိတဖုလၢအစုပူၤ,ဒီးဒုးဆိတ့ၢ်အကွၢ်သိတဖုန့ၣ်,ဒီးပှၤကွၢ်သိဖိတကွၢ်လီၤလၢၤဘၣ်အသးဒၣ်ဝဲဘၣ်.ဒီးယကမၤပူၤမၤဖျဲးယသိတဖုလၢအထးခိၣ်ဒ်သိး,အသုတကဲထီၣ်တၢ်အီၣ်လၢအဂီၢ်တဂ့ၤလီၤ. 11အဂ့ၢ်ဒ်အံၤ,ကစၢ်ယွၤစံးဒ်အံၤ,ကွၢ်ကွၢ်,ယဲဒၣ်အံၤ,ယၤဒၣ်လဲာ်,ယကဃုယသိတဖု,ဒီးယကချုအီၤ, 12ဒ်ပှၤကွၢ်သိအသိတဖုလၢမုၢ်တနံၤလၢအအိၣ်လၢအသိလၢအအိၣ်ပြံပြါအကျါအသိးန့ၣ်ယကဃုယသိတဖုဒ်န့ၣ်သိး,ဒီးမၤပူၤဖျဲးအီၤလၢကယဲၢ်တၢ်အလီၢ်လၢအလီၤပြံလီၤပြါလၢမုၢ်တနံၤလၢအအိၣ်ဒီးတၢ်အၢၣ်ဒီးတၢ်ခံးန့ၣ်လီၤ. 13ဒီးယကဒုးဟဲထီၣ်အီၤလၢပှၤကလုာ်တဖၣ်အကျါ,ဒီးထၢဖှိၣ်အီၤလၢကီၢ်ခဲလၢာ်အပူၤ,ဒီးယကဒုးဟဲက့ၤအီၤဆူအကီၢ်ဒၣ်ဝဲအပူၤ,ဒီးဒုးအီၣ်အဆၣ်လၢအံၣ်စရ့လးအကစၢၢ်ကလိ,လၢတၢ်တြိတဖၣ်အပူၤ,ဒီးလၢပှၤအိၣ်ဝဲဆိးဝဲလၢအလီၢ်ပူၤခဲလၢာ်လၢထံဧိၤကီၢ်ဧိၤအပူၤလီၤ. 14ယကဒုးအီၣ်အဆၣ်လၢတၢ်အီၣ်ဆၣ်အလီၢ်ဂ့ၤ,ဒီးလၢအံၣ်စရ့လးအကစၢၢ်ကလိထီန့ၣ်အဂၢၤကအိၣ်,ဒီးကကိာ်လီၤဖဲန့ၣ်လၢအဂၢၤဂ့ၤအပူၤ,ဒီးကအီၣ်အဆၣ်ဝံၣ်လၢအံၣ်စရ့လးအကစၢၢ်ကလိလီၤ. 15ယကဒုးအီၣ်ယသိတဖုအဆၣ်,ဒီးယကဒုးကိာ်လီၤအီၤလီၤ,ကစၢ်ယွၤစံးဝဲဒၣ်. 16ယကဃုတၢ်လၢအဟါမၢ်,ဒီးဟဲက့ၤတၢ်လၢတၢ်ဟီထီၣ်ကွံာ်အီၤ,ဒီးယကဘိၣ်ထီၣ်တၢ်လၢအကၢ်,ဒီးယကဒုးဆူၣ်ထီၣ်တၢ်လၢအဆါလီၤ.မ့မ့ၢ်တၢ်လၢအဘီၣ်ဝဲဒီးဆူၣ်ဝဲန့ၣ်ယကမၤဟးဂီၤအီၤလီၤ.ယကကွၢ်အီၤလၢတၢ်စံၣ်ညီၣ်လီၤ. 17တၢ်လၢသုအံၤ,ယသိဒီးမဲာ်တဲးလဲးတဖုဧၢ.ကစၢ်ယွၤစံးဒ်အံၤ,ကွၢ်ကွၢ်,ယစံၣ်ညီၣ်တၢ်လၢသိဒီးသိအဘၢၣ်စၢၤ,ဒီးလၢသိဖါဒီးမဲာ်တဲးလဲးဖါအဘၢၣ်စၢၤလီၤ. 18သုအီၣ်ကွံာ်တၢ်အီၣ်ဆၣ်အလီၢ်ဂ့ၤမ့ၢ်အဆံးသတးဒီး,သုယီၢ်လီၤတံၢ်လၢသုခီၣ်တၢ်အိၣ်လီၤတဲာ်လၢသုအီၣ်ဆၣ်အလီၢ်စ့ၢ်ကီးဧါ.ဒီးသုအီထံနိၣ်မ့ၢ်အဆံးသတးဒီးသုမၤဒုထီၣ်ထံအိၣ်လီၤတဲာ်လၢသုခီၣ်န့ၣ်စ့ၢ်ကီးဧါ. 19တၢ်လၢယသိဒီးယမဲာ်တဲးလဲးန့ၣ်မ့ၢ်အအီၣ်တၢ်လၢသုယီၢ်လီၤတံၢ်လၢသုခီၣ်,ဒီးအီတၢ်လၢသုမၤဒုထီၣ်လၢသုခီၣ်လီၤ. 20မၤသးဒ်န့ၣ်ဒီးကစၢ်ယွၤစံးလၢအီၤဒ်အံၤ,ကွၢ်ကွၢ်,ယဲဒၣ်အံၤ,ယၤဒၣ်လဲာ်,ယကစံၣ်ညီၣ်တၢ်လၢသိဘီၣ်ဒီးသိဃဲၤအဘၢၣ်စၢၤလီၤ. 21မ့ၢ်သုဆီၣ်တနံးတၢ်လၢသုကပၤဒီးလၢသုဖံဘၣ်ခိၣ်,ဒီးဘျၢၣ်ကယဲၢ်တၢ်လၢအဆါ,လၢသုနၢၤတုၤသုမၤလီၤပြံပြါအီၤဒီး, 22ယကအုၣ်က့ၤခီၣ်က့ၤယသိတဖု,ဒီးတကဲထီၣ်လၢၤဘၣ်တၢ်ဂုာ်န့ၢ်အလီၢ်,ဒီးယကစံၣ်ညီၣ်တၢ်လၢသိဒီးသိအဘၢၣ်စၢၤလီၤ. 23ဒီးယကပာ်ပှၤကွၢ်သိတဂၤလၢအဖီခိၣ်,ဒီးကကွၢ်အီၤ,ယခ့ယပှၤစီၤဒၤဝံးဒၣ်လဲာ်လီၤ.ကကွၢ်အီၤ,ဒီးကကဲထီၣ်အပှၤကွၢ်သိလီၤ. 24ဒီးယၤယွၤအံၤ,ယကကဲထီၣ်အကစၢ်,ဒီးယခ့ယပှၤစီၤဒၤဝံးကကဲထီၣ်ပဒိၣ်ဖးဒိၣ်တဂၤလၢအကျါလီၤ.ယၤယွၤအံၤယကတိၤလံတၢ်လံ. 25ယကအၢၣ်လီၤအီလီၤတၢ်ဃူတၢ်ဖိးအတၢ်အၢၣ်လီၤအီလီၤလီၤ.ဒီးယကမၤစှီၢ်ကွံာ်ဆၣ်ဖိကီၢ်ဖိအဒူလၢထံဧိၤကိၢ်ဧိၤအပူၤ,ဒီးကအိၣ်ဝဲဆိးဝဲခၢၣ်သနၢၢ်လၢပှၢ်မုၢ်ကနၢ,ဒီးမံဝဲလၢသ့ၣ်ပှၢ်လၢ်အကျါလီၤ. 26ဒီးယကပာ်အီၤဒီးတၢ်ဝးတရံးယတၢ်စိခိၣ်လၢတၢ်ဆိၣ်ဂ့ၤအလီၢ်,ဒီးယကဒုးဟဲတၢ်စူၤလၢအကတီၢ်ဒၣ်ဝဲအပူၤလီၤ.တၢ်ဆိၣ်ဂ့ၤအတၢ်ဟဲစူၤန့ၣ်ကအိၣ်ဝဲလီၤ. 27ဒီးသ့ၣ်လၢဟီၣ်ခိၣ်အကဝီၤပူၤန့ၣ်ကသၣ်ထီၣ်,ဒီးဟီၣ်ခိၣ်ကဒုးအါထီၣ်တၢ်,ဒီးအဝဲသ့ၣ်ကအိၣ်ခၢၣ်သနၢၣ်လၢအကီၢ်ပူၤ,ဒီးတုၤယမၤတဲာ်ကွံာ်အနီၣ်ယိးဘိအပျံၤ,ဒီးမၤပူၤမၤဖျဲးအီၤဒီးပှၤလၢအမၢကဲကုၢ်အီၤဒီး,ကသ့ၣ်ညါဝဲလၢယမ့ၢ်ယွၤလီၤ. 28ဒီးတကဲထီၣ်လၢၤဘၣ်တၢ်ဂုာ်န့ၢ်အလီၢ်လၢပှၤကလုာ်တဖၣ်အဂီၢ်ဘၣ်,ဒီးထံဧိၤကီၢ်ဧိၤအဆၣ်ဖိကီၢ်ဖိတအီၣ်ကွံာ်ဘၣ်အီၤဘၣ်.ဒီးကအိၣ်ခၢၣ်သနၢၢ်,ဒီးတၢ်တမၤပျံၤဘၣ်အီၤနီတမံၤဘၣ်. 29ယကဒုးမဲထီၣ်တၤသၣ်အလီၢ်လၢတၢ်အမံၤလၤသၣ်ကပီၤအဂီၢ်,ဒီးပှၤတလၢာ်လၢၤဘၣ်လၢကီၢ်ပူၤလၢတၢ်သၣ်ဝံၤအသးအဃိဘၣ်.ဒီးတဘၣ်လၢၤဘၣ်တၢ်မဲာ်ဆှးဘၣ်ဃးဒီးပှၤကလုာ်တဖၣ်ဘၣ်. 30တုၤနုၤတဘျီကသ့ၣ်ညါဝဲလၢယၤယွၤအံၤ,အကစၢ်န့ၣ်အိၣ်ဝဲဒီးအီၤ,ဒီးအဝဲသ့ၣ်အံၣ်စရ့လးအပှၤဟံၣ်ဖိန့ၣ်မ့ၢ်ယပှၤဂီၢ်မုၢ်လီၤ. 31ဒီးသုဝဲသ့ၣ်,ယသိတဖု,ယတၢ်အီၣ်ဆၣ်အလီၢ်အသိတဖု,မ့ၢ်ယပှၤဂီၢ်မုၢ်လီၤ.ဒီးယဲဒၣ်အံၤ,ယမ့ၢ်သုကစၢ်လီၤ,ကစၢ်ယွၤစံးဝဲဒၣ်.
Copyright information for
KswSKMB