Eze 4 | KswSKMB | STEP | ဒီးနဲဒၣ်အံၤပှၤကညီဖိခွါဧၢ,ဟံးန့ၢ်အူးခဲဘ့ၣ်ဘၣ်တဘ့ၣ်,ဒီးပာ်အီၤလၢနမဲာ်ညါ,ဒီးကွဲးဝ့ၢ်ယရူၤၡလ့ၣ်အဂီၤလၢအလိၤ,

‏ Ezekiel 4

1 ဒီးနဲဒၣ်အံၤပှၤကညီဖိခွါဧၢ,ဟံးန့ၢ်အူးခဲဘ့ၣ်ဘၣ်တဘ့ၣ်,ဒီးပာ်အီၤလၢနမဲာ်ညါ,ဒီးကွဲးဝ့ၢ်ယရူၤၡလ့ၣ်အဂီၤလၢအလိၤ, 2 ဒီးကဝီၤဃာ်အီၤ,သူၣ်တိာ်ထီဒါအီၤ,ဒီးမၤထီၣ်ခိၣ်ဒူထီဒါအီၤ,ဒီးသူၣ်ဒဲထီဒါအီၤ,ဒီးပာ်နီၣ်ဘၢၣ်ဖျိတၢ်ဝးတရံးအီၤတက့ၢ်.

3 ဒီးနဲဒၣ်အံၤဟံးန့ၢ်သပၢၤထးဘ့ၣ်ဘၣ်တဘ့ၣ်,ဒီးပာ်အီၤလၢခိၣ်ဒူထးအဂီၢ်လၢနၤဒီးဝ့ၢ်အဘၢၣ်စၢၤ,ဒီးပာ်နမဲာ်ထီဒါအီၤတက့ၢ်.ဒီးကဘၣ်တၢ်ကဝီၤဃာ်အီၤ,ဒီးနကကဝီၤဃာ်အီၤလီၤ.အဝဲန့ၣ်ကကဲထီၣ်အပနီၣ်လၢအံၣ်စရ့လးအပှၤဟံၣ်ဖိအဂီၢ်လီၤ.

4 ဒီးနဲဒၣ်အံၤမံလီၤလၢနကပၤအစ့ၣ်တခီ,ဒီးပာ်အံၣ်စရ့လးအပှၤဟံၣ်ဖိအတၢ်အၢလၢအလိၤတက့ၢ်.နကစိာ်အတၢ်အၢဒ်အမုၢ်နံၤတဖၣ်လၢနမံလီၤလၢအဖီခိၣ်အတၢ်ဂံၢ်အသိးန့ၣ်လီၤ.

5 အဂ့ၢ်ဒ်အံၤ,လၢအတၢ်အၢအနံၣ်တဖၣ်အဂီၢ်ယပာ်လီၤမုၢ်နံၤတဖၣ်လၢနဂီၢ်,အနံၤသၢကယၤခွံဆံလီၤ.ဒီးနကစိာ်အံၣ်စရ့လးအပှၤဟံၣ်ဖိအတၢ်အၢအနံၤပှဲၤန့ၣ်လီၤ.

6 ဒီးတုၤနမၤပှဲၤထီၣ်မုၢ်နံၤတဖၣ်ဝံၤဒီး,မံလီၤကဒီးလၢနကပၤအထွဲတခီတက့ၢ်.ဒီးနကစိာ်ယူဒၤအပှၤဟံၣ်ဖိအတၢ်အၢအနံၤလွံၢ်ဆံလီၤ.လၢတနံၣ်အဂီၢ်ယပာ်လီၤန့ၢ်နၤလၢမုၢ်တနံၤလီၤ.

7 ဒီးကွၢ်လၢနမဲာ်ဆူယရူၤၡလ့ၣ်လၢတၢ်ကဝီၤဃာ်အီၤ,ဒီးမၤဘ့ၣ်ဆ့နစုဒုၣ်,ဒီၤကတိၤတၢ်လၢဝံအကျိာ်ထီဒါအီၤတက့ၢ်.

8 ဒီးကွၢ်ကွၢ်,ယကပာ်တၢ်စၢဃာ်လၢနလိၤ,ဒီးနတဃၣ်ကပၤဘၣ်နသးလၢတခီဆူတခီဘၣ်တုၤနမၤလၢာ်နကဝီၤဃာ်တၢ်အမုၢ်နံၤတဖၣ်လီၤ.

9 ဒီးနဲဒၣ်အံၤဟံးန့ၢ်ဘုကၠူၣ်,ဒီးဘုမုယီၤ,ဒီးဘီဘၣ်သၣ်,ဒီးပထိးသၣ်,ဒီးသွံသၣ်,ဒီးတုၤကူးစမ့းတဖၣ်လၢနဂီၢ်,ဒီးဒၢနုာ်အီၤလၢသပၢၤတဖျၢၣ်ဃီ,ဒီးမၤနကိၣ်လၢအီၤလၢမုၢ်နံၤတဖၣ်လၢနကမံလီၤလၢနကပၤန့ၣ်တက့ၢ်.သၢကယၤခွံဆံနံၤန့ၣ်နကအီၣ်တၢ်လၢအီၤလီၤ.

10 ဒီးတၢ်အီၣ်လၢနကအီၣ်န့ၣ်နဘၣ်စီၤအီၤတနံၤၡက့လးခံဆံ,တနံၤၡက့လးခံဆံလီၤ.နဘၣ်အီၣ်အီၤလၢတကတီၢ်ဘၣ်တကတီၢ်လီၤ. 11 ဃီၣ်ထံသတးဒီး,နဘၣ်အီထံ,တဟံၣ်ဃုပူတပူလီၤ.နဘၣ်အီအီၤလၢတကတီၢ်ဘၣ်တကတီၢ်လီၤ.

12 ဒီးနဘၣ်အီၣ်ဘုမုယီၤအကိၣ်ဘ့ၣ်ဘၣ်,ဒီးနဘၣ်ကုၢ်အီၤလၢတၢ်အ့ၣ်လၢအဟဲလီၤလၢပှၤကညီအပူၤ,လၢအဝဲသ့ၣ်အမဲာ်ညါလီၤ. 13 ဒီးယွၤစံးဝဲဒၣ်,ဒ်န့ၣ်သိးပှၤအံၣ်စရ့လးဖိကအီၣ်အကိၣ်တကဆှီဘၣ်လၢပှၤကလုာ်တဖၣ်အကျါဖဲယကဟီထီၣ်ကွံာ်အီၤလီၤ.

14 ဒီးယစံး,အၣ်,ကစၢ်ဧၢ,ကွၢ်ကွၢ်,ယဲဒၣ်အံၤယသးတကဆှီတ့ၢ်နီတစုဘၣ်.အဂ့ၢ်ဒ်အံၤ,လၢယဖိၣ်သၣ်ခွါထီၣ်လံၤလံၤတုၤခဲကနံၣ်အံၤတၢ်လၢအသံဒၣ်တၢ်မ့ၢ်ဂ့ၤ,ဒီးတၢ်လၢတၢ်အ့ၣ်ဖှီကွံာ်မ့ၢ်ဂ့ၤ,ယတအီၣ်ဘၣ်.ဒီးတၢ်ညၣ်တကဆှီဘၣ်န့ၣ်တနုာ်ဘၣ်လၢယကိာ်ပူၤဘၣ်.

15 တုၤနုၤတဘျီစံးဘၣ်ယၤ,ကွၢ်ကွၢ်,ယဟ့ၣ်လီၤနၤလၢဂီၤဖံးအအ့ၣ်လၢပှၤကညီအအ့ၣ်အလီၢ်လီၤ.ဒီးနဘၣ်ကုၢ်ကိၣ်လၢအီၤလီၤ.

16 ဒီးစံးဘၣ်ယၤ,ပှၤကညီဖိခွါဧၢ,ကွၢ်ကွၢ်,ယကမၤကၢ်ကွံာ်ကိၣ်အနီၣ်ထိးဘိလၢယရူၤၡလ့ၣ်အပူၤ,ဒီးပှၤကအီၣ်ကိၣ်လၢပှၤစီၤဝဲ,အိၣ်ဒီးအသးကတုၤ, 17 ဒ်သိးအကိၣ်ဒီးအထံကစှၤ,ဒီးအသးကကတုၤတဂၤဒီးတဂၤ,ဒီးကလၢာ်ကွံာ်ဝဲလၢအတၢ်အၢအဃိလီၤ.