Ezekiel 46
1ကစၢ်ယွၤစံးဒ်အံၤ,ဂၢၤလၢညါခီအပဲတရီလၢအဖျိဝဲဆူမုၢ်ထီၣ်တခီန့ၣ်ကကးတံာ်ဃာ်အသးလၢပှၤမၤတၢ်ဃုနံၤအတီၢ်ပူၤလီၤ.မ့မ့ၢ်လၢမုၢ်အိၣ်ဘှံးနံၤကအိးထီၣ်အသး,ဒီးလၢလါထီၣ်သီအနံၤကအိးထီၣ်အသးလီၤ. 2ဒီးပဒိၣ်ဖးဒိၣ်န့ၣ်ကလဲၤနုာ်လၢပဲတရီလၢခိတဖျိအတၢ်ခိၣ်ဒုးထီၣ်အသးဒီးကဆၢထၢၣ်လၢပဲတရီအထူၣ်အဃၢၤ,ဒီးပှၤလုၢ်တၢ်အဒိၣ်ကလုၢ်အတၢ်လုၢ်မ့ၣ်အူ,ဒီးအတၢ်လုၢ်မၤဃူမၤဖိးလီၤ.ဒီးကဘါတၢ်လၢပဲတရီအခီၣ်ထံး,ဒီးကဟးထီၣ်ဝဲလီၤ.ဘၣ်ဆၣ်ဒီးပဲတရီတကးတံာ်ဃာ်ဘၣ်အသးတုၤမုၢ်ဟါဘၣ်. 3ဒီးပှၤကီၢ်ဖိကဘါတၢ်လၢပဲတရီအံၤအကျဲစၢၤခီၣ်ထံးလၢယွၤအမဲာ်ညါ,လၢအိၣ်ဘှံးနံၤတဖၣ်,ဒီးလၢလါထီၣ်သီအနံၤတဖၣ်န့ၣ်လီၤ. 4ဒီးတၢ်လုၢ်မ့ၣ်အူလၢပဒိၣ်ဖးဒိၣ်ဘၣ်လုၢ်ယွၤ,လၢမုၢ်အိၣ်ဘှံးနံၤမ့ၢ်သိဖိအလၢအပှဲၤဃုဒု,ဒီးသိဖါအလၢအပှဲၤတဒုလီၤ. 5ဒီးတၢ်မၤဘူၣ်ကိၣ်န့ၣ်ကမ့ၢ်တအ့ဖးလၢသိဖါတဒုအဂီၢ်,ဒီးတၢ်မၤဘူၣ်လၢသိဖိတဖၣ်အဂီၢ်ကမ့ၢ်ဖဲအဟ့ၣ်ဝဲသ့,သိတဟံၣ်ကအိၣ်ဝဲလၢတအ့ဖးအဂီၢ်လီၤ. 6ဒီးလၢလါထီၣ်သီအနံၤကမ့ၢ်ဂီၤဖံးဖါဖိအလၢအပှဲၤတဒု,ဒီးသိဖိဃုဒု,ဒီးသိဖါဖိတဒုလီၤ.ကမ့ၢ်အလၢအပှဲၤလီၤ. 7ဒီးဘၣ်မၤဘူၣ်တအ့ဖးလၢဂီၤဖံးတဒုအဂီၢ်,ဒီးတအ့ဖးလၢသိဖါတဒုအဂီၢ်,ဒီးလၢသိဖိတဖၣ်အဂီၢ်န့ၣ်ဖဲအဟ့ၣ်ဝဲသ့,ဒီးသိတဟံၣ်လၢတအ့ဖးအဂီၢ်လီၤ. 8ဒီးတုၤပဒိၣ်ဖးဒိၣ်လဲၤနုာ်ဝဲဒီး,ဘၣ်လဲၤနုာ်လၢပဲတရီအတၢ်ခိၣ်ဒုးထီၣ်အသး,ဒီးဘၣ်ဟးထီၣ်လၢကျဲဖဲန့ၣ်လီၤ. 9ဘၣ်ဆၣ်ဒီးတုၤပှၤကီၢ်ဖိဟဲဆူယွၤအမဲာ်ညါလၢမၤဘူၣ်အနံၤတဖၣ်ဒီး,ပှၤလၢအလဲၤနုာ်ဘါတၢ်လၢပဲတရီလၢကလံၤစိးန့ၣ်ဘၣ်ဟးထီၣ်လၢပဲတရီလၢကလံၤထံးအကျဲလီၤ.ဒီးပှၤလၢအဟဲနုာ်လၢပဲတရီကလံၤထံးန့ၣ်ဘၣ်ဟးထီၣ်လၢပဲတရီကလံၤစိးအကျဲန့ၣ်လီၤ.တက့ၤကဒါက့ၤလၢပဲတရီအကျဲဖဲအလဲၤနုာ်ဘၣ်,ဘၣ်ဟးထီၣ်သဃီၤဒီးအီၤလီၤ. 10ဒီးတုၤအဝဲသ့ၣ်လဲၤနုာ်ဒီး,ပဒိၣ်ဖးဒိၣ်ကလဲၤနုာ်လၢအကျါ,ဒီးတုၤအဝဲသ့ၣ်ဟးထီၣ်ဒီး,အဝဲဒၣ်ကဟးထီၣ်လီၤ. 11ဒီးလၢတၢ်မၤဘူၣ်အနံၤတဖၣ်,ဒီးလၢတၢ်အိၣ်ဖှိၣ်ဘါတၢ်န့ၣ်တၢ်မၤဘူၣ်ကိၣ်န့ၣ်ကမ့ၢ်တအ့ဖးလၢဂီၤဖံးဖါတဒုအဂီၢ်,ဒီးတအ့ဖးလၢသိဖါတဒုအဂီၢ်,ဒီးလၢသိဖိတဖၣ်အဂီၢ်န့ၣ်ဖဲအဟ့ၣ်ဝဲသ့,ဒီးသိတဟံၣ်ကအိၣ်လၢတအ့ဖးအဂီၢ်လီၤ. 12ဒီးတုၤပဒိၣ်ဖးဒိၣ်မၤဘူၣ်ယွၤလၢတၢ်မၤဘူၣ်ဒၣ်တၢ်,တၢ်လုၢ်မ့ၣ်အူမ့ၢ်ဂ့ၤ,တၢ်မၤဃူမၤဖိးဒၣ်တၢ်မ့ၢ်ဂ့ၤဒီး,ပှၤဘၣ်အိးထီၣ်န့ၢ်အီၤလၢပဲတရီဖျိထီၣ်ဝဲဆူမုၢ်ထီၣ်လီၤ.ဒီးအတၢ်လုၢ်မ့ၢ်ဂ့ၤ,အတၢ်လုၢ်မၤဃူမၤဖိးမ့ၢ်ဂ့ၤ,ကမၤဘူၣ်ဝဲဒ်အမၤဝဲလၢမုၢ်အိၣ်ဘှံးနံၤအသိးန့ၣ်,ဒီးကဟးထီၣ်ဝဲ,ဒီးလၢအဟးထီၣ်ဝဲအလီၢ်ခံဒီး,ပှၤကကးတံာ်ဃာ်အီၤလီၤ. 13ဒီးနဘၣ်လုၢ်ယွၤလၢသိတနံၣ်ဖိအလၢအပှဲၤတဒု,လၢတၢ်လုၢ်မ့ၣ်အူအဂီၢ်ကိးမုၢ်နံၤဒဲးလီၤ.နဘၣ်လုၢ်အီၤလၢမုၢ်ဂီၤ,ကိးဂီၤဒဲးလီၤ. 14ဒီးနဘၣ်မၤဘူၣ်ဒီးအီၤလၢတၢ်မၤဘူၣ်ကိၣ်,တအ့ဖးဃုပူတပူ,ဒီးသိတဟံၣ်သၢပူတပူအကမၤဘၣ်စီၣ်ကိၣ်အကမူၣ်လၢတၢ်မၤဘူၣ်ကိၣ်လၢယွၤအဂီၢ်ကိးဂီၤဒဲးလီၤ.မ့ၢ်တၢ်မၤလိာ်အထူအယိာ်လီၤ. 15ဒ်န့ၣ်အသိးဘၣ်ကတဲၤကတီၤသိဖိတဒု,ဒီးတၢ်မၤဘူၣ်ကိၣ်,ဒီးသိလၢတၢ်လုၢ်မ့ၣ်အူအဂီၢ်တထံၣ်ဃီလီၤ. 16ကစၢ်ယွၤစံးဒ်အံၤ,ပဒိၣ်ဖးဒိၣ်မ့ၢ်ဟ့ၣ်တၢ်ဟ့ၣ်လၢအဖိခွါတဂၤဂၤဒီး,အဖိခွါန့ၣ်ကန့ၢ်သါအီၤလီၤ.ကကဲထီၣ်လၢအတၢ်န့ၢ်သါလီၤ. 17ဘၣ်ဆၣ်ဒီးမ့ၢ်ဟ့ၣ်တၢ်လၢအတၢ်န့ၢ်သါအပူၤတမံၤလၢအခ့အပှၤတဂၤဒီး,ကကဲထီၣ်အတၢ်တုၤတၢ်ထူၣ်ဖျဲးအနံၣ်တနံၣ်လီၤ.လၢအလီၢ်ခံန့ၣ်ကကဲထီၣ်က့ၤပဒိၣ်ဖးဒိၣ်အတၢ်လီၤ.မ့မ့ၢ်တၢ်န့ၢ်သါလၢအဟ့ၣ်အဖိခွါတဖၣ်န့ၣ်ကကဲထီၣ်အဝဲသ့ၣ်အတၢ်လီၤ. 18ဒီးပဒိၣ်ဖးဒိၣ်တဘၣ်ဟံးန့ၢ်ဘၣ်တၢ်လၢပှၤဂီၢ်မုၢ်အတၢ်န့ၢ်သါ,ဒ်သိးအကဟီထီၣ်ကွံာ်အီၤလၢအတၢ်န့ၢ်သါအပူၤဘၣ်.ဘၣ်ဟ့ၣ်သါအဖိခွါတဖၣ်အတၢ်န့ၢ်သါလၢအတၢ်ဒၣ်ဝဲအပူၤ,ဒ်သိးယပှၤဂီၢ်မုၢ်အသုတဘၣ်တၢ်ဟီထီၣ်ကွံာ်အီၤလၢအတၢ်န့ၢ်သါအပူၤနီတဂၤတဂ့ၤလီၤ. 19ဒီးစိာ်ထီၣ်ယၤလၢတၢ်လဲၤနုာ်အလီၢ်လၢအအိၣ်ဝဲလၢပဲတရီအဃၢၤဆူပှၤလုၢ်တၢ်အဒိၣ်အဒၢးစီဆှံတဖၣ်အပူၤ,လၢအဒိးဝဲဆူကလံၤစိး,ဒီးကွၢ်ကွၢ်,အလီၢ်အိၣ်ဝဲလၢအချၢဃံဆူမုၢ်နုာ်တခီလီၤ. 20ဒီးစံးဘၣ်ယၤ,တၢ်ဖဲအံၤမ့ၢ်အလီၢ်ဖဲပှၤလုၢ်တၢ်အဒိၣ်ဘၣ်ချီတၢ်လုၢ်တၢ်ကမၣ်,ဒီးတၢ်လုၢ်တၢ်ဒဲးဘး,ဒီးဖဲအဘၣ်ကုၢ်တၢ်မၤဘူၣ်ကိၣ်,ဒ်သိးအသုတစိာ်ထီၣ်အီၤဆူဂၢၤလၢခိလၢအကမၤစီဆှံပှၤဂီၢ်မုၢ်တဂ့ၤလီၤ. 21ဒီးစိာ်ထီၣ်ယၤဆူဂၢၤလၢခိတပူၤ,ဒီးဒုးလဲၤတြူာ်ယၤလၢအဂၢၤလွံၢ်သနၢၣ်,ဒီးကွၢ်ကွၢ်,ဂၢၤဖိတပူၤအိၣ်ဝဲလၢဂၢၤအသနၢၣ်ပူၤစုာ်စုာ်လီၤ. 22လၢဂၢၤလွံၢ်သနၢၣ်အပူၤန့ၣ်ဂၢၤအိၣ်ဒီးအခိၣ်ဒူအိၣ်ဝဲလွံၢ်ပူၤလီၤ.အထီမ့ၢ်အပျၢ်လွံၢ်ဆံ,ဒီးအဒီၣ်ဃီမ့ၢ်အပျၢ်သၢဆံလီၤ.တၢ်လွံၢ်သနၢၣ်န့ၣ်တုၤသိးသိးလီၤ. 23ဒီးတၢ်အဒူၣ်တဒူၣ်အိၣ်ဝဲလၢအပူၤဝးတရံးဝဲလၢတၢ်လွံၢ်သနၢၣ်အပူၤဒၣ်လဲာ်,ဒီးချီတၢ်အလီၢ်တဖၣ်အိၣ်ဝဲလၢတၢ်အဒူၣ်န့ၣ်အဖီလာ်ဝးတရံးဝဲတဖၣ်န့ၣ်လီၤ. 24ဒီးစံးဘၣ်ယၤ,အဝဲတဖၣ်အံၤမ့ၢ်ပှၤချီတၢ်အလီၢ်,ဖဲပှၤမၤဟံၣ်အခ့အပှၤအတၢ်န့ၣ်ချီပှၤဂီၢ်မုၢ်အလုၢ်တၢ်လီၤ.
Copyright information for
KswSKMB