Eze 9 | KswSKMB | STEP | ဒီးကိးထီၣ်ဝဲလၢယနၢ်ပူၤလၢအကလုၢ်ဖးဒိၣ်,ဒီးစံးဝဲဒၣ်,ဒုးသုးဘူးပှၤလၢအဟဲအိၣ်သကိးဝ့ၢ်တဖၣ်,တဂၤဒီးအစုကဝဲၤလၢအမၤဟးဂီၤတၢ်လၢအစုပူၤစုာ်စုာ်တက့ၢ်.

‏ Ezekiel 9

1 ဒီးကိးထီၣ်ဝဲလၢယနၢ်ပူၤလၢအကလုၢ်ဖးဒိၣ်,ဒီးစံးဝဲဒၣ်,ဒုးသုးဘူးပှၤလၢအဟဲအိၣ်သကိးဝ့ၢ်တဖၣ်,တဂၤဒီးအစုကဝဲၤလၢအမၤဟးဂီၤတၢ်လၢအစုပူၤစုာ်စုာ်တက့ၢ်.

2 ဒီးကွၢ်ကွၢ်,ပှၤဃုဂၤဟဲဝဲလၢပဲတရီလၢထးခီတဖျိအကျဲလၢအဖျိဝဲဆူကလံၤစိး,ဒီးတဂၤဒီးအစုကဝဲၤမၤသံတၢ်လၢအစုပူၤစုာ်စုာ်လီၤ.ဒီးပှၤကူသိးဖှီဝါကဆှၣ်အိၣ်ဝဲဒီးပှၤကွဲးလံာ်အနၢၤတဘိလၢအယီၢ်ဒ့လိၤတဂၤ,အိၣ်ဝဲလၢအကျါလီၤ.ဒီးလဲၤနုာ်ဝဲ,ဒီးဆၢထၢၣ်ဝဲလၢတၢ်လုၢ်လီၢ်တိၢ်အဃၢၤလီၤ.

3 ဒီးအံၣ်စရ့လးအကစၢ်အလၤကပီၤလဲၤထီၣ်ဝဲလၢခ့ရူာ်အလိၤဖဲအအိၣ်ဆူဟံၣ်အကျဲစၢၤလီၤ.ဒီးကိးထီၣ်ဝဲဆူပှၤကူသိးဒီးတၢ်ဖှီဝါကဆှၣ်လၢအအိၣ်ဒီးပှၤကွဲးလံာ်အနၢၤတဘိလၢအယီၢ်ဒ့တဂၤ, 4 ဒီးယွၤစံးဘၣ်အီၤ,လဲၤခီဂာ်ဝ့ၢ်အသးကံၢ်ပူၤ,လၢယရူၤၡလ့ၣ်အသးကံၣ်ပူၤ,ဒီးမၤပနီၣ်ပှၤလၢအကအုကစွါဒီးဟီၣ်ဝဲလၢတၢ်သးဘၣ်အၢလၢအမၤအသးလၢအသးကံၢ်ပူၤအဃိတဖၣ်အမဲာ်တူၢ်ခိၣ်န့ၣ်တက့ၢ်. 5 ဒီးစံးဘၣ်ပှၤဂၤလၢယနၢ်ပူၤ,လဲၤပိာ်အခံလၢဝ့ၢ်ပူၤ,ဒီးကျီတၢ်တက့ၢ်.မ်သုမဲာ်သုတသးလီတဂ့ၤ. 6 ပှၤသးပှၢ်,ပှၤဖိၣ်သၣ်ခွါ,ပှၤမုၣ်ကနီၤ,ပှၤဖိဒံဖိသၣ်,ဒီးပှၤပိာ်မုၣ်ပိာ်မၢၤန့ၣ်မၤသံအီၤသပှၢ်တၢၢ်တက့ၢ်.ဘၣ်ဆၣ်ဒီးသုးဘူးသုသးဆူပှၤလၢတၢ်ပနီၣ်အိၣ်ဝဲလၢအလိၤန့ၣ်နီတဂၤတဂ့ၤ,ဒီးမၤဆိတၢ်ဖဲယလီၢ်စီဆှံန့ၣ်တက့ၢ်.

7 ဒီးမၤဆိဝဲလၢပှၤသူၣ်က့သးပှၢ်လၢအအိၣ်ဝဲလၢဟံၣ်အမဲာ်ညါလီၤ.ဒီးစံးဘၣ်အီၤ,မၤဟံၣ်တကဆှီဘၣ်,ဒီးမၤပှဲၤတၢ်အဂၢၤ,လၢပှၤလၢအဘၣ်တၢ်မၤသံအီၤတက့ၢ်.ဟးထီၣ်တက့ၢ်.ဒီးဟးထီၣ်ဝဲဒီးမၤသံတၢ်လၢဝ့ၢ်ပူၤလီၤ.

8 ဒီးလၢအမၤသံတၢ်အဖၢမုၢ်န့ၣ်ဒီး,ယအိၣ်လီၤတဲာ်,ဒီးတၢ်မၤအသးလၢယထိၣ်လီၤဃံၤအီထီလာ်ယသး,ဒီးယကိးထီၣ်ဒီးယစံး,ကစၢ်ယွၤဧၢ,နလူလီၤနသးကဲၤထီၣ်လၢယရူၤၡလ့ၣ်အဖီခိၣ်အဖၢမုၢ်ဒီး,နကမၤဟးဂီၤပှၤအံၣ်စရ့လးဖိလၢအအိၣ်လီၤတဲာ်ခဲလၢာ်စ့ၢ်ကီးဧါ.

9 ဒီးစံးဘၣ်ယၤ,အံၣ်စရ့လးဒီးယူဒၤအပှၤဟံၣ်ဖိအတၢ်ဒဲးဘးန့ၣ်ဒိၣ်နီၢ်မးလီၤ.ဒီးထံဧိၤကီၢ်ဧိၤပှဲၤဝဲဒီးတၢ်သွံၣ်,ဒီးဝ့ၢ်န့ၣ်ပှဲၤဝဲဒီးတၢ်မၤက့ၣ်မၤကူတၢ်စံၣ်ညီၣ်လီၤ.အဂ့ၢ်ဒ်အံၤ,စံးဝဲဒၣ်,ယွၤလဲၤသဒၣ်လံထံဧိၤကီၢ်ဧိၤလံ,ဒီးယွၤတထံၣ်ဘၣ်ဝဲဘၣ်.

10 မၤသးဒ်န့ၣ်ဒီးယမဲာ်တသးလီဘၣ်,ဒီးယတသးကညီၤဘၣ်.ယကဟ့ၣ်ကၣ်အကျဲလၢအခိၣ်ဒၣ်ဝဲအဖီခိၣ်လီၤ.

11 ဒီးကွၢ်ကွၢ်,ပှၤကူသိးဖှီဝါကဆှၣ်အိၣ်ဒီးကသံၣ်ထံအနၢၤတဘိလၢအယီၢ်ဒ့လိၤတဂၤဟ့ၣ်က့ၤတၢ်ကတိၤ,ဒီးစံးဝဲဒၣ်,ယမၤလံဒ်နမၤလိာ်ယၤအသိးန့ၣ်လံ.